(ທ່ານພົນເອກ ຟຸງກວາງແທງ ຕ້ອນຮັບທ່ານ N.P Patrushev)
(vovworld) - “ຫວຽດນາມ ຖືເປັນສຳຄັນການພົວພັນຄູ່ຮ່ວມມືຍຸດທະສາດຮອບດ້ານກັບສະຫະພັນ ລັດເຊຍ” ສິ່ງດັ່ງກ່າວໂດຍທ່ານ ຟ້າມບີງມິງ ຮອງນາຍົກລັດຖະມົນຕີ ລັດຖະມົນຕີວ່າການກະຊວງການຕ່າງປະເທດ ຫວຽດນາມ ເນັ້ນໜັກທີ່ການຕ້ອນຮັບທ່ານ N.P Patrushev ເລຂາທິການສະພາປ້ອງກັນຄວາມສະຫງົບສະຫະພັນ ລັດເຊຍ ທີ່ພວມມີການຢ້ຽມຢາມ ຫວຽດນາມ ໃນຕອນບ່າຍວັນທີ 15/03 ຢູ່ຮ່າໂນ້ຍ. ທ່ານ ຟ້າມບີງມິງ ກໍ່ຕີລາຄາສູງການຮ່ວມມືໃນຂົງເຂດປ້ອງກັນຄວາມສະຫງົບລະຫວ່າງກະຊວງຕຳຫລວດ ຫວຽດນາມ ແລະ ສະພາປ້ອງກັນຄວາມສະຫງົບ ລັດເຊຍ.
2 ຝ່າຍເຫັນດີເປັນເອກະສັນຄວນຕັ້ງໜ້າຜັນຂະຫຍາຍບັນດາມາດຕະການ ເພື່ອແນໃສ່ຊຸກຍູ້ການຮ່ວມມືທຸກດ້ານ, ສົມທົບກັນຢ່າງແໜ້ນແຟ້ນ ເພື່ອປະຕິບັດສັນຍາການຄ້າເສລີ ຫວຽດນາມ - ພັນທະມິດເສດຖະກິດ ອາຊີ - ເອີລົບ ພາຍຫລັງສັນຍາມີຜົນສັກສິດ, ປະກອບສ່ວນຍົກສູງປະສິດທິຜົນການຮ່ວມມືດ້ານເສດຖະກິດ - ການຄ້າລະຫວ່າງ 2 ຝ່າຍຢ່າງມີປະສິດທິຜົນ. ຄຽງຂ້າງນັ້ນ, ສະພາບການສັບສົນຢູ່ທະເລຕາເວັນອອກ, ແຫຼມເກົາຫຼີໃນໄລຍະມໍ່ໆມານີ້ ກໍ່ເຮັດໃຫ້ຫາງສຽງມີຄວາມສົນໃຈ ແລະ ວິຕົກກັງວົນ. ໃນສະພາບການນັ້ນ, 2 ຝ່າຍເນັ້ນໜັກວ່າ: ບັນດາປະເທດໃນພາກພື້ນຄວນປະກອບສ່ວນຢ່າງຕັ້ງໜ້າ ເຂົ້າໃນການຮັກສາສັນຕິພາບ, ສະຖຽນລະພາບຢູ່ພາກພື້ນ, ຍົກສູງບົດບາດຂອງບັນດາກົນໄກຮ່ວມມືຫລາຍຝ່າຍ, ບັນດາຫຼັກການພື້ນຖານຂອງກົດໝາຍສາກົນໃນການແກ້ໄຂບັນດາບັນຫາຂອງພາກພື້ນ
ແລະຕອນບ່າຍຂອງວັນດຽວກັນ, ທີ່ສຳນັກງານກະຊວງປ້ອງກັນປະເທດ, ທ່ານພົນເອກ ຟຸງກວາງແທງ ລັດຖະມົນຕີວ່າການກະຊວງປ້ອງກັນປະເທດ ຫວຽດນາມ ໄດ້ໃຫ້ການຕ້ອນຮັບຄະນະຜູ້ແທນຂັ້ນສູງສະພາປ້ອງກັນຄວາມສະຫງົບສະຫະພັນ ລັດເຊຍ ໂດຍທ່ານ N.P Patrushev ນຳໜ້າຄະນະ. ທີ່ການຕ້ອນຮັບ, ທ່ານພົນເອກ ຟຸງກວາງແທງ ຮັບຮູ້ການຮ່ວມມືນັບມື້ນັບມີປະສິດທິຜົນ, ຕັ້ງໜ້າລະຫວ່າງກະຊວງປ້ອງກັນປະເທດ ຫວຽດນາມ ກັບອົງການປ້ອງກັນຄວາມສະຫງົບສະຫະພັນ ລັດເຊຍ, ພົ້ນເດັ່ນແມ່ນໃນບັນດາຂົງເຂດບຳລຸງສ້າງ, ປ້ອງກັນຊາຍແດນ, ຮັກສາຄວາມລັບ ແລະ ຄວາມປອດໄພໃນການສື່ສານ. ສ່ວນທ່ານ N.P Patrushev ກໍ່ປາດຖະໜາວ່າ: ໃນໄລຍະຈະມາເຖິງ, ການພົວພັນມິດຕະພາບທີ່ເປັນມູນເຊື້ອລະຫວ່າງ 2 ປະເທດສືບຕໍ່ພັດທະນາ ເຂົ້າສູ່ລວງເລິກ, ບັນລຸຜົນງານຫລາຍຢ່າງ, ພິເສດແມ່ນໃນບັນດາຂົງເຂດຮ່ວມມືຕາມຈິດໃຈບົດບັນທຶກຊ່ວຍຈຳລະຫວ່າງກະຊວງປ້ອງກັນປະເທດ ຫວຽດນາມ ແລະ ສະຫະພັນ ລັດເຊຍ ເຊິ່ງລົງນາມເມື່ອປີ 2013.