(VOVWORLD) - ໂດຍໄດ້ຮັບຄຳເຊີນຂອງທ່ານພົນຈັດຕະວາ Awang Halbi bin Mohd Yussof ລັດຖະມົນຕີກະຊວງປ້ອງກັນປະເທດ ທັງເປັນປະທານສະພາຄວາມໝັ້ນຄົງແຫ່ງຊາດ ບຣູໄນ, ຄະນະຜູ້ແທນຂັ້ນສູງກະຊວງຕຳຫຼວດຫວຽດນາມ ໂດຍທ່ານພົນເອກ ໂຕເລິມ ກຳມະການກົມການເມືອງ ລັດຖະມົນຕີກະຊວງຕຳຫຼວດຫວຽດນາມ ເປັນຫົວໜ້າຄະນະ, ພວມມີການຢ້ຽມຢາມ ແລະ ເຮັດວຽກຢູ່ ບຣູໄນ ໃນລະຫວ່າງວັນທີ 13-15 ກຸມພາ
(ພາບ: http://cand.com.vn)
|
ໃນຂອບເຂດການຢ້ຽມຢາມ, ວັນທີ 14 ກຸມພາ, ທ່ານລັດຖະມົນຕີ ໂຕເລິມ ໄດ້ມີການພົບປະເຈລະຈາກັບທ່ານລັດຖະມົນຕີກະຊວງປ້ອງກັນປະເທດ Awang Halbi bin Mohd Yussof ຢູ່ຫ້ອງການຄະນະກຳມະການຄວາມໝັ້ນຄົງແຫ່ງຊາດ ບຣູໄນ. ທີ່ການພົບປະເຈລະຈາ, ລັດຖະມົນຕີທັງສອງທ່ານເນັ້ນໜັກວ່າ: ໃນໄລຍະຜ່ານມາ, ການພົວພັນຮ່ວມມືລະຫວ່າງຫວຽດນາມ-ບຣູໄນ ໄດ້ຮັບການປັບປຸງ ແລະ ພັດທະນາຢ່າງບໍ່ຢຸດຢັ້ງ. ພ້ອມກັນນັ້ນ, ການຮ່ວມມືລະຫວ່າງ ກະຊວງຕຳຫຼວດຫວຽດນາມ ແລະ ອົງການປະຕິບັດກົດໝາຍຂອງ ບຣູໄນ ໄດ້ຮັບການຜັນຂະຫຍາຍຢູ່ທຸກຂັ້ນ, ຢູ່ບັນດາກົນໄກສອງຝ່າຍ ແລະ ຫຼາຍຝ່າຍຢ່າງຄົບຖ້ວນ, ພິເສດແມ່ນຂອບເຂດພາກພື້ນອາຊຽນ ແລະ ເວທີປາໄສພາກພື້ນ, ສາກົນກ່ຽວກັບການປ້ອງກັນຕ້ານອາດຊະຍາກຳ. ການຮ່ວມມືສອງຝ່າຍໃນຂອບເຂດ ASEANAPOL ບັນລຸໄດ້ປະສິດທິຜົນຫຼາຍຢ່າງ.
(ພາບ: http://cand.com.vn)
|
ລັດຖະມົນຕີທັງສອງທ່ານເຫັນດີເປັນເອກະພາບນຳກັນວ່າ, ໃນໄລຍະຈະມາເຖິງ, ສອງຝ່າຍຄວນສືບຕໍ່ເພີ່ມທະວີການຮ່ວມມືຮອບດ້ານ, ປະກອບສ່ວນເຮັດໃຫ້ການພົວພັນຄູ່ຮ່ວມມືຮອບດ້ານລະຫວ່າງຫວຽດນາມ-ບຣູໄນ ໃນຂອບເຂດການຮ່ວມມືສອງຝ່າຍ ແລະ ຫຼາຍຝ່າຍເລິກເຊິ່ງກ່ວາເກົ່າ, ໃນນັ້ນ, ຍູ້ແຮງການເຄື່ອນໄຫວແລກປ່ຽນ, ແບ່ງປັນຂໍ້ມູນຂ່າວສານກ່ຽວກັບສະພາບອາດຊະຍາກຳ, ຄວາມໝັ້ນຄົງທັງແບບເກົ່າ ແລະ ແບບໃໝ່.