(vovworld) – ວັນທີ 23/8, ກອງປະຊຸມລັດຖະມົນຕີ 12 ປະເທດເຂົ້າຮ່ວມການເຈລະຈາຄັ້ງທີ 19 ເພື່ອແນໃສ່ສ້າງສັນຍາຄູ່ຮ່ວມມືຂ້າມ ປາຊີຟິກ (TPP) ໄດ້ສິ້ນສຸດລົງຢູ່ນະຄອນຫຼວງ Bandar Seri Begawan ຂອງ ບຣູໄນ ດ້ວຍການອອກຖະແຫຼງການຮ່ວມ, ໃນນັ້ນໄດ້ເນັ້ນໜັກຄືນໃໝ່ຄຳໝັ້ນໝາຍສ້າງສຳເລັດສັນຍາການຄ້າເສລີພາກພື້ນໃນປີນີ້, ແຕ່ກໍ່ຕ້ອງຮັບຮູ້ວ່າ ຍັງມີສິ່ງກີດຂວາງໃນຫຼາຍຂົງເຂດ. ຖະແຫຼງການຊີ້ແຈ້ງວ່າ: “ບັນດາປະເທດເຂົ້າຮ່ວມການ ເຈລະຈາ TPP ໄດ້ຊອກຫາບັນດາວິທີສົ່ງເສີມບັນດາຂໍ້ຕົກລົງລະຫວ່າງບັນດາຝ່າຍ”. ຕາມນັ້ນແລ້ວ, ບັນດາຂົງເຂດຈຸດສຸມລວມມີການສຳພັດຕະຫຼາດ, ການບໍລິການການເງິນ, ການເກັບຊື້ຂອງລັດຖະບານ ແລະ ຊັບສິນທາງປັນຍາ. ບັນດາລັດຖະມົນຕີໄດ້ເຫັນດີສືບຕໍ່ “ເຂົ້າຮ່ວມຢ່າງຕັ້ງໜ້າ” ໃນໄລຍະແຕ່ນີ້ຮອດກອງປະຊຸມບັນດາການນຳອົງການຮ່ວມມືເສດຖະກິດ ອາຊີ - ປາຊີຟິກ (APEC), ຄາດວ່າຈະດຳເນີນໄປຢູ່ Bali, ປະເທດ ອິນໂດເນເຊຍ ໃນເດືອນ 10 ຈະມາເຖິງ, ພ້ອມທັງໃຫ້ຮູ້ວ່າ: ຄາດວ່າ, ບັນດາການນຳ TPP ຈະມີການພົບປະຢູ່ນອກກອງປະຊຸມ. ຄຽງຄູ່ກັບກອງປະຊຸມຢ່າງເປັນທາງການຂອງທົ່ວກຸ່ມ, ບັນດາລັດຖະມົນຕີ ແລະ ເຈົ້າໜ້າທີ່ຂັ້ນລັດຖະມົນຕີຂອງ ອາເມລິກາ ແລະ ບັນດາປະເທດສະມາຊິກ TPP ອື່ນຈະຈັດຕັ້ງບັນດາກອງປະຊຸມ 2 ຝ່າຍ. ຄາດວ່າ, ບັນດາປະເທດສະມາຊິກຈະຍົກອອກບັນດາຄຳຮຽກຮ້ອງ ແລະ ຂໍ້ສະເໜີຂອງຕົນທີ່ກ່ຽວຂ້ອງເຖິງບັນຫາພາສີອາກອນທີ່ກອງປະຊຸມຄັ້ງຕ່າງໆນີ້.