(vovworld) – ວັນທີ 26/11, ກະຊວງການຕ່າງປະເທດ ແລະ ການຄ້າ ອົດສະຕາລີ ໃຫ້ຮູ້ວ່າ: ໄດ້ຮຽກຕົວເອກອັກຄະລັດຖະທູດ ຈີນ ປະຈຳ Canberra ມາເພື່ອສະແດງບັນດາຄວາມວິຕົກກັງວົນຂອງລັດຖະບານ ອົດສະຕາລີ ແລະ ສະເໜີໃຫ້ບັກກິ່ງ ອະທິບາຍກ່ຽວກັບຂໍ້ຕົກລົງສ້າງຕັ້ງເຂດປ້ອງກັນອາກາດ (ADIZ) ໃນທະເລ ຮວາຕູງ. ທ່ານລັດຖະມົນຕີການຕ່າງປະເທດ ອົດສະຕາລີ Julie Bishop ເນັ້ນໜັກຈຸດເວລາ ແລະ ວິທີທີ່ ຈີນ ປະກາດສ້າງຕັ້ງ ADIZ “ບໍ່ເໝາະສົມໃນສະພາບຄວາມເຄັ່ງຕຶງຢູ່ພາກພື້ນໃນປະຈຸບັນ, ແລະ ຈະບໍ່ຊ່ວຍຮັກສາສະຖຽນລະພາບໃນພາກພື້ນ”. ທ່ານລັດຖະມົນຕີ Bishop ຊີ້ແຈ້ງວ່າ ອົດສະຕາລີ ຄັດຄ້ານ “ທຸກໆການກະທຳພຽງຝ່າຍດຽວ ແລະ ມີລັກສະນະບັງຄັບເພື່ອແນໃສ່ປ່ຽນແປງສະພາບການຢູ່ທະເລຮວາຕູງ”.
ໃນແຈ້ງການເມື່ອວັນທີ 23/11 ກ່ຽວກັບເລື່ອງສ້າງຕັ້ງ ADIZ ໃນທະເລຮວາຕູງ, ຈີນ ໄດ້ຊີ້ແຈ້ງ ແລະ ກຳນົດວ່າ: ເຮືອບິນທຸກໆລຳໄປມາຜ່ານເຂດນີ້ຕ້ອງແຈ້ງການກ່ຽວກັບແຜນການບິນ, ຮັກສາການຕິດຕໍ່ພົວພັນໃນເວລາບິນ ແລະ ປະຕິບັດຕາມການຊີ້ນຳຂອງເຈົ້າໜ້າທີ່ຈີນ. ແຈ້ງການດັ່ງກ່າວຂອງ ຈີນ ໄດ້ຮັບການຄັດຄ້ານຢ່າງແຮງຈາກ ຍີ່ປຸ່ນ ແລະ ສ ເກົາຫຼີ.