(ພາບປະກອບ)
(vovworld) ວັນທີ 4/8, ສະຫະພາບເອີລົບ (ອີຢູ) ປະກາດບັນລຸໄດ້ຂໍ້ຕົກລົງການຄ້າເສລີ (FTA) “ບົນຫລັກການ” ກັບ ຫວຽດນາມ, ລົບລ້າງຮົ້ວກີດຂວາງພາສີເກືອບທັງໝົດສຳລັບ ສິນຄ້າການຄ້າລະຫວ່າງ 2 ຝ່າຍ. ພາຍຫລັງການໂອ້ລົມທາງໂທລະສັບກັບທ່ານລັດຖະມົນຕີວ່າການກະຊວງອຸດສາຫະກຳການຄ້າ ຫວຽດນາມ ຫວູຮຸຍຮ່ວາງ, ກຳມະການຄະນະກຳມະການ ເອີລົບ ຮັບຜິດຊອບດ້ານການຄ້າ ທ່ານນາງ Cecilia Malmstroem ແຈ້ງວ່າ: 2 ຝ່າຍບັນລຸໄດ້ຂໍ້ຕົກລົງ ພາຍຫລັງການເຈລະຈາທີ່ຫຍຸ້ງຍາກເຊິ່ງແກ່ຍາວເປັນເວລາ 2 ປີເຄິ່ງ. ກ່ຽວກັບເນື້ອໃນລະອຽດຂອງຂໍ້ຕົກລົງ, ທ່ານນາງ Cecilia Malmstroem ໃຫ້ຮູ້ວ່າ: ດ້ວຍຂໍ້ຕົກລົງນີ້ ພາສີເກືອບທັງໝົດສຳລັບສິນຄ້າລະຫວ່າງ ອີຢູ ແລະ ຫວຽດນາມ ຈະຖືກຍົກເລີກ. ທ່ານນາງ Cecilia Malmstroem ເນັ້ນໜັກວ່າ: ຂໍ້ຕົກລົງ FTA ຈະຊຸກຍູ້ດ້ານການຄ້າລະຫວ່າງ ອີຢູ ກັບໜຶ່ງໃນບັນດາພື້ນຖານເສດຖະກິດຂະຫຍັນຂັນເຂື່ອນທີ່ສຸດຂອງ ອາຊີ, ສ້າງເປັນຮູບແບບຂໍ້ຕົກລົງການຄ້າເສລີໃໝ່, ດີກວ່າ ແລະ ທັນສະໄໝກ່ວາລະຫວ່າງ ອີຢູ ກັບບັນດາປະເທດພວມພັດທະນາ, ພ້ອມທັງສ້າງຕັ້ງມາດຕະຖານທີ່ດີໃຫ້ແກ່ການພົວພັນດ້ານການຄ້າລະຫວ່າງ ອີຢູ ກັບທົ່ວພາກພື້ນ ອາຊີຕາເວັນອອກສ່ຽງໃຕ້. ທ່ານນາງ Cecilia Malmstroem ຫວັງວ່າ: ຂໍ້ຕົກລົງກ່ຽວກັບ FTA ຈະສ້າງໂອກາດຫຼາຍຢ່າງໃຫ້ບັນດາວິສາຫະກິດ ອີຢູ ແລະ ຫວຽດນາມ, ເມື່ອມັນເປີດກ້ວາງຕະຫລາດ 2 ຝ່າຍໃຫ້ສິນຄ້າ ແລະ ບໍລິການ.