ອີຢູພ້ອມແລ້ວທີ່ຈະສືບຕໍ່ທາບທາມຄວາມເຫັນ3ຝ່າຍກ່ຽວກັບການປະຕິບັດສັນຍາຮ່ວມສຳພັນກັບຢູແກຼນ
ປະທານາທິບໍດີ ຢູແກຼນ Petro Poroshenko (ກາງ), ປະທານ EC Jose Manuel Barroso (ຊ້າຍ) ແລະ ປະທານ EU Herman Van Rompuy
(ພາບ: AFP/TTXVN)
(vovworld) – ໃນຈົດໝາຍຝາກໃຫ້ທ່ານປະທານາທິບໍດີ ລັດເຊຍ Vladimir Putin ໃນວັນທີ 1/10, ທ່ານປະທານຄະນະກຳມະການເອີລົບ (EC) Jose Manuel Barroso ໃຫ້ຮູ້ວ່າ: ສະຫະພາບເອີລົບ (EU) ພ້ອມແລ້ວທີ່ຈະສືບຕໍ່ບັນດາການທາບທາມຄວາມເຫັນ 3 ຝ່າຍ (ເຊິ່ງລວມມີ: ອີຢູ, ລັດເຊຍ ແລະ ຢູແກຼນ) ກ່ຽວກັບເລື່ອງປະຕິບັດສັນຍາຮ່ວມສຳພັນລະຫວ່າງ ຢູແກຼນ ກັບ ອີຢູ, ເພື່ອແນໃສ່ລົບລ້າງຄວາມວິຕົກວັງວົນຂອງ ມົດສະກູ ທີ່ກ່ຽວຂ້ອງເຖິງແຜນການສ້າງຕັ້ງເຂດການຄ້າເສລີ ອີຢູ/ຢູແກຼນ.
ທ່ານ Barroso ເນັ້ນໜັກວ່າ: ສັນຍາຮ່ວມສຳພັນລະຫວ່າງ ຢູແກຼນ ແລະ ອີຢູ ແມ່ນຂໍ້ຕົກລົງ 2 ຝ່າຍ ແລະ ເໝາະສົມກັບກົດຫມາຍສາກົນ. ດັ່ງນັ້ນ, ບໍ່ວ່າການປັບປຸງໃດໆໃນເອກະສານ ກໍ່ລ້ວນແຕ່ຕ້ອງໄດ້ຕວາມເຫັນດີເຫັນພ້ອມຈາກ 2 ຝ່າຍ. ທ່ານຢືນຢັນວ່າ: ພຽງແຕ່ ຢູແກຼນ ແລະ ອີຢູ ຈຶ່ງມີສິດປ່ຽນແປງສັນຍາດັ່ງກ່າວ. ເຖິງຢ່າງໃດກໍ່ຕາມ, ທ່ານປະທານ EC ຊີ້ແຈ້ງ EU ພ້ອມແລ້ວທີ່ສືບຕໍ່ການທາບທາມຄວາມເຫັນກັບ 3 ຝ່າຍ.