(ພາບ:vietnamplus.vn)
(VOV)- ວັນທີ 2/11, ກອງປະຊຸມສຳມະນາຂອງບັນດາເຈົ້າໜ້າທີ່ສະຫະສະມາຄົມປະຊາຊາດອາຊີຕາເວັນອອກສ່ຽງໃຕ້ (ອາຊຽນ) ແລະ ຈີນ ສະເຫຼີມສະຫຼອງ 10 ປີແຫ່ງວັນສ້າງຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (DOC) ໄດ້ອັດລົງຢູ່ນະຄອນຫຼວງພະນົມເປັນ ປະເທດກຳປູເຈຍ. ສອງຝ່າຍໄດ້ເຫັນດີເປັນເອກະສັນຈະປະຕິບັດເອກະສານນີ້ຢ່າງຄົບຖ້ວນ ແລະ ມີປະສິດທິຜົນ ເພື່ອແນ່ໃສ່ຮັກສາສັນຕິພາບ ແລະ ສະຖຽນລະພາບໃນພາກພື້ນ. ທ່ານນາງ Soeung Rathchavy ລັດຖະມົນຕີການຕ່າງປະເທດກຳປູເຈຍ, ປະທານກອງປະຊຸມສຳມະນາໃຫ້ຮູ້ວ່າ: ບັນດາຜູ້ແທນເຂົ້າຮ່ວມກອງປະຊຸມສຳມະນາໄດ້ແລກປ່ຽນທັດສະນະຢ່າງຕັ້ງໜ້າ ແລະ ກົງໄປກົງມາ. ຕາມທ່ານນາງ Rathchavy ແລ້ວ, ອາຊຽນ ແລະ ຈີນ ໄດ້ເຫັນດີເປັນເອກະສັນວ່າຕ້ອງປະຕິບັດ DOC ຢ່າງຄົບຖ້ວນ ແລະ ມີປະສິດທິຜົນ ເພື່ອສ້າງເຂດທະເລຕາເວັນອອກເປັນເຂດທະະເລແຫ່ງສັນຕິພາບ, ສະຖຽນລະພາບ, ມິດຕະພາບ ແລະ ຮ່ວມມືກັນເພື່ອຜົນປະໂຫຍດລວມ. ຕາມແຈ້ງການໜັງສືພິມຫຼັງກອງປະຊຸມສຳມະນາ, ອາຊຽນ ແລະ ຈີນ ໄດ້ເນັ້ນໜັກເຖິງຄວາມສຳຄັນຂອງການດຳເນີນບັນດາການເຄື່ອນໄຫວທີ່ກ່ຽວຂ້ອງເຖິງ DOC ເພື່ອແນ່ໃສ່ຊຸກຍູ້ຄວາມໄວ້ເນື້ອເຊື່ອໃຈ, ຜ່ານນັ້ນສ້າງພື້ນຖານໃຫ້ແກ່ການຮ່ວມມືລະຫວ່າງສອງຝ່າຍ, ພິເສດແມ່ນໃນບັນດາບັນຫາກ່ຽວກຂ້ອງເຖິງທະເລຕາເວັນອອກ.