ບັນດາລັດຖະມົນຕີອາຊຽນຮຽກຮ້ອງບັນດາຝ່າຍປະຕິບັດ DOC ຢ່າງຄົບຖ້ວນ
(ພາບ: ອິນເຕີແນດ)
(vovworld) – ທີ່ການປະຊຸມລັດຖະມົນຕີການຕ່າງປະເທດອາຊຽນຄັ້ງທີ 48 ທີ່ພວມດຳເນີນຢູ່ນະຄອນຫຼວງ ກົວລາລຳເປີ, ມາເລເຊຍ, ບັນດາລັດຖະມົນຕີ ໄດ້ສະແດງຄວາມວິຕົກກັງວົນຢ່າງເລິກເຊິ່ງ ຕໍ່ການຜັນແປຢ່າງສັບສົນຫວ່າງແລ້ວນີ້ຢູ່ທະເລຕາເວັນອອກ, ຖືວ່າບັນດາການກະທຳນີ້ ໄດ້ເຮັດໃຫ້ຄວາມໄວ້ເນື້ອເຊື່ອໃຈຖືກຫຼຸດລົງ, ຄວາມເຄັ່ງຕຶງເພີ່ມຂຶ້ນ ແລະ ນາບຂູ່ເຖິງສັນຕິພາບ, ສະຖຽນລະພາບ, ຄວາມໝັ້ນຄົງຢູ່ທະເລຕາເວັນອອກ. ບັນດາລັດຖະມົນຕີເນັ້ນໜັກເຖິງຄວາມສຳຄັນຂອງການຮັກສາສັນຕິພາບ, ສະຖຽນລະພາບ, ຄວາມໝັ້ນຄົງ, ຄວາມປອດໄພໃນການເດີນທະເລ ແລະ ການບິນ; ແກ້ໄຂຄວາມຂັດແຍ້ງກັນດ້ວຍສັນຕິວິທີ ບົນພື້ນຖານກົດໝາຍສາກົນ, ພິເສດແມ່ນສົນທິສັນຍາສະຫະປະຊາຊາດກ່ຽວກັບກົດໝາຍວ່າດ້ວຍທະເລປີ 1982 (UNCLOS); ລະງັບໃຈບໍ່ນຳໃຊ້ອາວຸດ ຫຼືຂົ່ມຂູ່ນຳໃຊ້ອາວຸດ, ປະຕິບັດຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (DOC) ຢ່າງຄົບຖ້ວນ ແລະ ມີປະສິດທິຜົນ, ບັນລຸປະມວນຂໍ້ກຳນົດກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (COC). ບັນດາລັດຖະມົນຕີເຫັນດີເພີ່ມທະວີຄວາມສາມັກຄີ, ຄວາມຮັບຜິດຊອບ ແລະ ບົດບາດຂອງອາຊຽນໃນການແກ້ໄຂບັນຫາທະເລຕາເວັນອອກ. ກ່າວຄວາມເຫັນກ່ຽວກັບບັນຫານີ້, ທ່ານຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດຫວຽດນາມ ຟ້າມບິ່ງມິງ ສະໜັບສະໜູນທັດສະນະລວມຂອງອາຊຽນ. ພ້ອມທັງເນັ້ນໜັກເຖິງ 5 ຂໍ້ຂອງ DOC ແລະ ຈຳເປັນຕ້ອງມີການປຶກສາຫາລືຢ່າງແທ້ຈິງ ເພື່ອໃຫ້ປະມວນຂໍ້ກຳນົດກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກມີປະສິດທິຜົນໂດຍໄວ.