( vovworld ) - ຕອນບ່າຍວັນທີ 1/3, ຢູ່ນະຄອນໂຮ່ຈິມິນ, ທ່ານອາດີດນາຍົກລັດຖະມົນຕີຫວຽດນາມ ຟານວັນຂາຍ ໄດ້ໃຫ້ການຕ້ອນຮັບທ່ານ Takebe Tsutomu, ປະທານສະຫະພັນຊາດມິດຕະພາບສະມາຊິກສະພາແຫ່ງຍີ່ປຸ່ນ -ຫວຽດນາມ, ອາດີດເລຂາທິການໃຫຍ່ພັກປະຊາທິປະໄຕເສລີພາບຍີ່ປຸ່ນ, ເນື່ອງໃນໂອກາດທ່ານ Tsutomu ມາຢ້ຽມຢາມ ແລະ ເຮັດວຽກຢູ່ແຂວງ ບິ່ງເຢືອງ. ທ່ານອາດີດນາຍົກລັດຖະມົນຕີ ຟານວັນຂາຍ ໄດ້ຊົມເຊີຍ ແລະ ຂອບໃຈລັດຖະບານຍີ່ປຸ່ນ ທີ່ຍາມໃດກໍມີນະໂຍບາຍໃຫ້ບຸລິມະສິດ, ຊ່ວຍເຫຼືອຫວຽດນາມ, ໂດຍສະເພາະແມ່ນແຫຼ່ງທຶນ ODA ເຊິ່ງນັບມື້ນັບເພີ່ມຂື້ນສູງ, ກໍຄືບັນດານັກລົງທຶນຍີ່ປຸ່ນ ສືບຕໍ່ເອົາໃຈໃສ່, ລົງທຶນເຂົ້າຫວຽດນາມ. ທ່ານອາດີດນາຍົກລັດຖະມົນຕີ ຟານວັນຂາຍ ກໍ່ໄດ້ໂອ້ລົມ ແລະ ຖາມຂ່າວກ່ຽວກັບສະພາບການຢູ່ຍີ່ປຸ່ນ ແລະ ວິວັດການສ້າງສາປະເທດຊາດຄືນໃໝ່ພາຍຫຼັງເກີດເຫດແຜ່ນດິນໄຫວ ແລະ ຄື້ນຟອງຍັກກ່ອນນີ້ໜື່ງປີ, ທ່ານກໍເນັ້ນໜັກວ່າ ພາຍຫຼັງເກີດເຫດແຜ່ນດິນໄຫວ ແລະ ຄື້ນຟອງຍັກຢູ່ຍີ່ປຸນ, ຫວຽດນາມ ໄດ້ມີບັນດາການເຄື່ອນໄຫວສະໜັບສະໜູນຍີ່ປຸນ, ສະແດງຈິດໃຈສາມັກຄີລະຫວ່າງປະຊາຊົນສອງປະເທດ.
ທ່ານ Takebe Tsutomu ເຊື້ອໝັ້ນວ່າ, ໃນໄລຍະທີ່ຈະມາເຖິງ ສາຍພົວພັນລະຫວ່າງຫວຽດນາມ - ຍີ່ປຸ່ນ ຈະສືບຕໍ່ໄດ້ຮັບການພັດທະນາຢ່າງດີງາມ, ນັບທັງດ້ານການຄ້າ, ການຮ່ວມມືໃນບັນດາຂົງເຂດເສດຖະກິດ ກໍໄດ້ຮັບການພັດທະນາຢ່າງບໍ່ຢຸດຢັ້ງໃນສະພາບເສດຖະກິດໂລກພວມຊຸດໂຊມ.