(vovworld) - ພາຍຫຼັງມານະພະຍາຍາມມາເປັນເວລາ 1 ອາທິດ, ວັນທີ 12/7, ບັນດານັກເຈລະຈາການຄ້າ ອາເມລິກາ ແລະ ສະຫະພາບ ເອີລົບ (ອີຢູ) ໄດ້ສິ້ນສຸດຮອບເຈລະຈາຄັ້ງທຳອິດກ່ຽວກັບສັນຍາຄູ່ຮ່ວມມືລົງທຶນ ແລະ ການຄ້າຂ້າມ ອັກລັງຕີກ (TTIP), ສ້າງຂອບເຂດໃຫ້ແກ່ບັນດາການປຶກສາຫາລືກ່ຽວກັບບັນຫານີ້ຄັ້ງຕໍ່ໄປໃນອະນາຄົດ. ກ່າວຄຳເຫັນທີ່ການປະຊຸມຂ່າວພາຍຫຼັງສິ້ນສຸດການເຈລະຈາ, ທ່ານ Ignacio Garcia – Bercerco, ຫົວໜ້າຄະນະເຈລະຈາ ອີຢູ ໃຫ້ຮູ້ວ່າ: ຜ່ານຮອບເຈລະຈາຢ່າງຕັ້ງໜ້າ ດ້ວຍບັນດາຫົວຂໍ້ຕ່າງຝ່າຍຕ່າງມີຄວາມສົນໃຈ, ຝ່າຍຕ່າງໆ ໄດ້ມີຄວາມຫວັງຫຼາຍຢ່າງ ກໍ່ຄືວິທີສຳພັດຕ່າງໆ ແນໃສ່ບັນລຸບັນດາໝາກຜົນດີທີ່ສຸດໃນ 20 ຂົງເຂດຂຶ້ນກັບ TTIP. ທ່ານ Bercerco ຢືນຢັນວ່າ: ໂດຍບໍ່ຫົວຊາຕໍ່ການໂຕ້ຖຽງກັນກ່ຽວກັບການສືບລາຊະການລັບຂອງ ອາເມລິກາ ສຳລັບບັນດາປະເທດ ເອີລົບ, 2 ຝ່າຍບັນລຸໄດ້ຈຸດໝາຍຕົ້ນຕໍ່: “ຮອບເຈລະຈາເອກະລາດ ດ້ວຍບັນດາບັນຫາທີ່ຕ່າງຝ່າຍຕ່າງມີຄວາມສົນໃຈ”, ເປີດຊ່ອງທາງໃຫ້ແກ່ການເຈລະຈາຄັ້ງທີ 2 ຊຶ່ງຄາດວ່າຈະຈັດຕັ້ງຢູ່ ບຣຸກແຊນ, ປະເທດ ແບນຊິກໃນວັນທີ 7/10 ຈະມາເຖິງ. ສ່ວນຫົວໜ້າຄະນະເຈລະຈາ ອາເມລິກາ ທ່ານ Dan Mullaney ຕີລາຄາວ່າການເຈລະຈາ ໄດ້ດຳເນີນໄປຢ່າງຕັ້ງໜ້າ, 2 ຝ່າຍເຫັນດີເປັນເອກະພາບກັນກັບແຜນການເຄື່ອນໄຫວ, ເພື່ອແນໃສ່ບັນລຸໄດ້ຂໍ້ຕົກລົງໃນທ້າຍປີ 2014, ກ່ອນຈຸດເວລາທີ່ຄະນະກຳມະການ ເອີລົບ (EC) ເລືອກຕັ້ງປະທານຄົນໃໝ່.