ທ່ານຮອງນາຍົກລັດຖະມົນຕີ ຟ້າມບິ່ງມິງ
ຕ້ອນຮັບທ່ານນາງ Saranya Dissanayake
(ພາບ: dangcongsan.vn)
(vovworld) – ຕອນບ່າຍວັນທີ 17/12, ທ່ານຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ຫວຽດນາມ ຟ້າມບິ່ງມິງ ໄດ້ຕ້ອນຮັບທ່ານນາງ Saranya Dissanayake ເອກອັກຄະລັດຖະທູດວິສາມັນຜູ້ມີອຳນາດເຕັມ ສີລັງກາ ເຂົ້າຢ້ຽມຂ່ຳນັບເນື່ອງໃນໂອກາດໄດ້ຮັບໜ້າທີ່ການທູດຢູ່ ຫວຽດນາມ. ທີ່ການຕ້ອນຮັບ, ທ່ານຮອງນາຍົກລັດຖະມົນຕີ ຟ້າມບິ່ງມິງ ສະແດງຄວາມພາກພູມໃຈຕໍ່ບັນດາການພັດທະນາຢ່າງຕັ້ງໜ້າຂອງການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືລະຫວ່າງ ຫວຽດນາມ ແລະ ສີລັງກາ ໃນຊຸມປີມໍ່ໆມານີ້; ພິເສດແມ່ນໃນບັນດາຂົງເຂດ ການເມືອງ, ເສດຖະກິດ, ການຄ້າ; ການຮ່ວມມືດ້ານກະສິກຳ, ສິນໃນນ້ຳ; ການແລກປ່ຽນວັດທະນະທຳທ່ອງທ່ຽວ ແລະ ການຮ່ວມມືຢູ່ບັນດາເວທີປາໄສພາກພື້ນ ແລະ ສາກົນ. ທ່ານຮອງນາຍົກລັດຖະມົນຕີ ຟ້າມບິ່ງມິງ ຢືນຢັນວ່າ: ນະໂຍບາຍສະເໝີຕົ້ນສະເໝີປາຍຂອງ ຫວຽດນາມ ຍາມໃດກໍຖືເປັນສຳຄັນການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືອັນດີງາມກັບ ສີລັງກາ ແລະ ປາດຖະໜາວ່າ: ການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືຫລາຍດ້ານລະຫວ່າງ 2 ປະເທດ ຈະສືບຕໍ່ພັດທະນາກ່ວາອີກ, ປະກອບສ່ວນເຂົ້າໃນການປົກປັກຮັກສາສັນຕິພາບ, ສະຖຽນລະພາບ ແລະ ການພັດທະນາຈະເລີນຮຸ່ງເຮືອງຢູ່ໃນພາກພື້ນ ແລະ ໂລກ. ສ່ວນທ່ານນາງເອກອັກຄະລັດຖະທູດ Saranya Dissanayake ໃຫ້ຄຳໝັ້ນສັນຍາວ່າ ຈະປະກອບສ່ວນຫລາຍກ່ວາອີກໃຫ້ແກ່ການພັດທະນາສາຍພົວພັນ 2 ປະເທດໃນໄລຍະຈະມາເຖິງ.