(vovworld) – ໂດຍໄດ້ຮັບຄຳເຊີນຂອງລັດຖະບານ ແຟງລັງ, ທ່ານຮອງນາຍົກລັດຖະມົນຕີ ຮ່ວາງຈູງຫາຍ ໄດ້ໄປຢ້ຽມຢາມ ແລະ ເຮັດວຽກຢູ່ ສ. ແຟງລັງ ແຕ່ວັນທີ 25 – 26/9/2014.
ວັນທີ 25/9, ທ່ານຮອງນາຍົກລັດຖະມົນຕີ ໄດ້ເຂົ້າຢ້ຽມຂ່ຳນັບທ່ານນາຍົກລັດຖະມົນຕີ, ພົບປະກັບລັດຖະມົນຕີເສດຖະກິດ ແຟງລັງ, ຢ້ຽມຢາມສະຖາບັນສິ່ງແວດລ້ອມ ແລະ ບາງຮາກຖານວິທະຍາສາດ - ເຕັກໂນໂລຢີ ຄື: Vaisala ແລະ ABB.
ທີ່ການພົບປະຄັ້ງຕ່າງໆ, 2 ຝ່າຍຕີລາຄາສູງການພົວພັນຮ່ວມມືລະຫວ່າງ ຫວຽດນາມ ແລະ ແຟງລັງ ໃນກ່ວາ 40 ປີແຫ່ງການພັດທະນາຢ່າງຕັ້ງໜ້າ, ພິເສດແມ່ນໃນຂົງເຂດການເມືອງ ແລະ ການຮ່ວມມືພັດທະນາ. ທ່ານນາຍົກລັດຖະມົນຕີ Alexander Stubb ແລະ ການນຳບັນດາກະຊວງ, ຂະແໜງການຂອງແຟງລັງ ຢັ້ງຢືນວ່າ: ແຟງລັງ ປາດຖະໜາຢາກເພີ່ມທະວີການພົວພັນຫຼາຍດ້ານກັບ ຫວຽດນາມ, ພິເສດແມ່ນການພົວພັນການຄ້າ ແລະ ການລົງທຶນ, ຢັ້ງຢືນ ແຟງລັງ ສະໜັບສະໜູນເລື່ອງຊຸກຍູ້ສິ້ນສຸດສັນຍາການຄ້າເສລີ ຫວຽດນາມ - ອີຢູ ແລະ ເລື່ອງ ອີຢູ ຮັບຮູ້ ຫວຽດນາມ ມີພື້ນຖານເສດຖະກິດການຕະຫຼາດ.
ທ່ານຮອງນາຍົກລັດຖະມົນຕີ ຮ່ວາງຈູງຫາຍ ຢັ້ງຢືນວ່າ ລັດຖະບານ ຫວຽດນາມ ຈະສ້າງເງື່ອນໄຂສະດວກເພື່ອໃຫ້ບັນດາວິສາຫະກິດ ແຟງລັງ ເຄື່ອນໄຫວລົງທຶນ ແລະ ດຳເນີນທຸລະກິດ ຍາວນານຢູ່ ຫວຽດນາມ. ທ່ານຮອງນາຍົກລັດຖະມົນຕີ ຂອບອົກຂອບໃຈລັດຖະບານ ແຟງລັງ ໄດ້ໜູນຊ່ວຍ ແລະ ສະໜັບສະໜູນປະຊາຄົມຊາວ ຫວຽດນາມ ດຳລົງຊີວິດ, ທຳມາຫາກິນເປັນປົກກະຕິຢູ່ແຟງລັງ.
ເພື່ອແນໃສ່ຊຸກຍູ້ການພົວພັນຮ່ວມມື 2 ຝ່າຍໃຫ້ນັບມື້ນັບມີປະສິດທິຜົນ, 2 ຝ່າຍເຫັນດີເປັນເອກະສັນສືບຕໍ່ປັບປຸງການພົວພັນດ້ານການເມືອງອັນດີງາມ ຜ່ານການຮັກສາການແລກປ່ຽນຄະນະທຸກຂັ້ນ, ສົມທົບກັນຢ່າງແໜ້ນແຟ້ນ ແລະ ສະໜັບສະໜູນເຊິ່ງກັນ ແລະ ກັນຢູ່ບັນດາເວທີປາໄສຫຼາຍຝ່າຍ ແລະ ອົງການຈັດຕັ້ງສາກົນ, ຊຸກຍູ້ການເຊັນຂໍ້ຕົກລົງຮ່ວມມື, ສົ່ງເສີມບັນດາວິສາຫະກິດ 2 ຝ່າຍຊອກຮູ້ຂໍ້ມູນຂ່າວ ແລະ ກາລະໂອກາດຮ່ວມມື.