ຮ່າໂນ້ຍແລະມົດສະກູເພີ່ມທະວີການຮ່ວມມືໃນຫລາຍຂົງເຂດ
ທ່ານ ຫງວຽນເທ໋ຖາວ ປະທານນະຄອນ ຮ່າໂນ້ຍ
ຕ້ອນຮັບທ່ານ Andrei Vorobyov ຜູ້ວ່າການແຂວງ ມົດສະກູ
(ພາບ: AnDang/TTXVN)
(vovworld) – ວັນທີ 22/10, ການນຳຄະນະກຳມະການປະຊາຊົນນະຄອນຮ່າໂນ້ຍ ມີການຕ້ອນຮັບ ແລະ ເຮັດວຽກກັບຄະນະຜູ້ແທນແຂວງ ມົດສະກູ (ສະຫະພັນ ລັດເຊຍ) ໂດຍທ່ານ Andrei Vorobyov ຜູ້ວ່າການແຂວງ ມົດສະກູ ນຳໜ້າ. ທີ່ການຕ້ອນຮັບ, ທ່ານ ຫງວຽນເທ໋ຖາວ ປະທານຄະນະກຳທິການປະຊາຊົນນະຄອນ ຮ່າໂນ້ຍ ປາດຖະໜາວ່າ ໃນໄລຍະຈະມາເຖິງ, ແຂວງ ມົດສະກູ ແລະ ຮ່າໂນ້ຍ ຈະສືບຕໍ່ມີການຮ່ວມມືຕື່ມອີກກ່ຽວກັບດ້ານວິທະຍາສາດ, ການຄ້າ, ເສດຖະກິດ, ການສຶກສາ…ນະຄອນ ຮ່າໂນ້ຍ ໃຫ້ຄຳໝັ້ນສັນຍາຈະສ້າງເງື່ອນໄຂສະດວກເພື່ອໃຫ້ບັນດາວິສາຫະກິດ, ນັກລົງທຶນ ສະຫະພັນ ລັດເຊຍ ເຂົ້າມາລົງທຶນ, ພັດທະນາດຳເນີນທຸລະກິດຢູ່ ຮ່າໂນ້ຍ.
ສ່ວນທ່ານ Andrei Vorobyov ຜູ້ວ່າການແຂວງ ມົດສະກູ ໃຫ້ຮູ້ວ່າ: ການຢ້ຽມຢາມ ແລະ ເຮັດວຽກໃນຄັ້ງນີ້ ແນໃສ່ຈຸດປະສົງຊອກຮູ້, ຊຸກຍູ້ການພົວພັນຮ່ວມມືດ້ານການຄ້າ, ເສດຖະກິດລະຫວ່າງ ມົດສະກູ ກັບ ຮ່າໂນ້ຍ ແລະ ບັນດາແຂວງ, ນະຄອນຂອງ ຫວຽດນາມ. ທ່ານ Andrei Vorobyov ກໍໃຫ້ຮູ້ວ່າ: ຝ່າຍ ລັດເຊຍ ສະໜັບສະໜູນ ແລະ ສ້າງເງື່ອນໄຂເພື່ອໃຫ້ບັນດາໂຄງການຂອງວິສາຫະກິດ ຫວຽດນາມ ລົງທຶນເຂົ້າແຂວງ ມົດສະກູ; ປາດຖະໜາຢາກຊຸກຍູ້ໂຄງການໄຟຟ້ານິວເຄຼຍ ນິງທ້ວນ, ເພີ່ມທະວີການຮ່ວມມືໃນຂົງເຂດກັ່ນຕອງນ້ຳມັນ.