ທ່ານ ສຸຣິນ ພິດສຸວັນ ເລຂາທິການໃຫຍ່ ອາຊຽນ
ພາບ: internet |
(vovworld) - ວັນທີ 25/7, ກ່າວຄຳເຫັນໃນການປະຊຸມຂ່າວຢູ່ສຳນັກງານຄະນະເລຂາ ອາຊຽນ ຢູ່ ອິນໂດເນເຊຍ ກ່ຽວກັບໝາກຜົນກອງປະຊຸມລັດຖະມົນຕີການຕ່າງປະເທດ ອາຊຽນ ຄັ້ງທີ 45 (AMM -45) ແລະ ບັນດາກອງປະຊຸມສຸດຍອດພາຍຫລັງ AMM - 45 ຢູ່ ພະນົມເປັນ ປະເທດກຳປູເຈຍ ທີ່ຜ່ານມາ, ທ່ານ ສຸຣິນ ພິດສຸວັນ ເລຂາທິການໃຫຍ່ ອາຊຽນ ເນັ້ນຫນັກເຖິງຄວາມຈຳເປັນເພີ່ມທະວີຄວາມສະຫນິດຕິດພັນ ແລະ ເປັນເອກະພາບລະຫວ່າງບັນດາປະເທດ ອາຊຽນພາຍໃນກຸ່ມ. ເມື່ອຫວນຄືນວິວັດການກໍຄືບັນດາໝາກຜົນບັນລຸໄດ້ຢູ່ AMM -45 ແລະ ກອງປະຊຸມສຸດຍອດພາຍຫລັງ AMM - 45 ລະຫວ່າງ ອາຊຽນ ກັບບັນດາຄູ່ຮ່ວມມືຕາມກົນໄກ ອາຊຽນ +1, ອາຊຽນ +3 ແລະ ເວທີປາໄສພາກພື້ນ ອາຊຽນ ຄັ້ງທີ 19, ທ່ານເລຂາທິການໃຫຍ່ ອາຊຽນ ສຸຣີນ ພິດສຸວັນ ໃຫ້ຮູ້ວ່າ: ບັນດາປະເທດ ອາຊຽນ ບັນລຸໄດ້ຄວາມເຫັນດີເຫັນພ້ອມຢ່າງສູງກ່ຽວກັບບັນຫາກ່ຽວຂ້ອງເຖິງການເຊື່ອມຕໍ່ແລະ ການເຊື່ອມໂຍງອາຊຽນ, ມຸ່ງໄປເຖິງປະຊາຄົມລວມໃນປີ 2015 ກໍຄືບັນຫາກ່ຽວຂ້ອງເຖິງຖະແຫລງການກ່ຽວກັບສິດທິມະນຸດຂອງ ອາຊຽນ. ອາຊຽນ ແລະ ບັນດາຄູ່ຮ່ວມມືໄດ້ເຫັນດີໃຫ້ຄຳໝັ້ນສັນຍາເພີ່ມທະວີການຮ່ວມມື ເພື່ອຮັບປະກັນຮັກສາສັນຕິພາບ, ຄວາມໝັ້ນຄົງ, ສະຖຽນລະພາບ ແລະ ການພັດທະນາໃນພາກພື້ນ ແລະ ໃນໂລກ. ທ່ານເລຂາທິການໃຫຍ່ ອາຊຽນ ຢືນຢັນວ່າ: ອາຊຽນ ແມ່ນກຸ່ມເປັນເອກະພາບ ແຕ່ຕ້ອງເພີ່ມທະວີຄວາມສະຫນິດຕິດພັນລະຫວ່າງບັນດາສະມາຊິກກວ່າອີກ. ທ່ານ ສຸຣິນ ເນັ້ນຫນັກວ່າ: ການພິພາດຢູ່ທະເລຕາເວັນອອກ ແມ່ນບັນຫາສັບສົມ, ເລື່ອງແກ້ໄຂບັນຫານີ້ແມ່ນຕ້ອງການເວລາກໍຄືເຈດຈຳນົງດີຂອງທຸກຝ່າຍກ່ຽວຂ້ອງ ແລະ ຕ້ອງແກ້ໄຂບັນຫາໂດຍສັນຕິວິທີ ບົນພື້ນຖານເຄົາລົບກົດໝາຍສາກົນ ເປັນຕົ້ນແມ່ນສົນທິສັນຍາສະຫະປະຊາຊາດກ່ຽວກັບກົດໝາຍທະເລປີ 1982/.