ເລຂາທິການໃຫຍ່ຫງວຽນຟູ໋ຈ້ອງຕ້ອນຮັບຄະນະຜູ້ແທນຂັ້ນສູງກະຊວງປ້ອງກັນຄວາມສະຫົງບລາວ
ທ່ານເລຂາທິການໃຫຍ່ຫງວຽນຟູ໋ຈ້ອງຕ້ອນຮັບຄະນະຜູ້ແທນຂັ້ນສູງກະຊວງປ້ອງກັນຄວາມສະຫົງບລາວ
(ພາບຈາກ ອິນເຕີເນັດ)
(vovworld) – ຕອນບ່າຍວັນທີ 27/12, ຢູ່ສຳນັກງານສູນກາງພັກ, ທ່ານເລຂາທິການໃຫຍ່ຄະນະບໍລິຫານງານສູນກາງພັກ ກອມມູນິດ ຫວຽດນາມ ຫງວຽນຟູ໋ຈ້ອງ ໄດ້ໃຫ້ການຕ້ອນຮັບຄະນະຜູ້ແທນຂັ້ນສູງກະຊວງປ້ອງກັນຄວາມສະຫງົບລາວ ໂດຍທ່ານເລຂາສູນກາງພັກ, ລັດຖະມົນຕີກະຊວງປ້ອງກັນຄວາມສະຫງົບລາວ ທອງບັນ ແສງອາພອນ ນຳໜ້າພວມຢູ່ຢ້ຽມຢາມ ຫວຽດນາມ. ນະທີ່ນີ້, ທ່ານເລຂາທິການໃຫຍ່ ຫງວຽນຟູ໋ຈ້ອງ ສະແດງຄວາມພາກພູມໃຈຕໍ່ການພັດທະນາອັນດີງາມຂອງການພົວພັນສາມັກຄີແບບພິເສດ ຫວຽດນາມ - ລາວ, ໃນນັ້ນມີການປະກອບສ່ວນສຳຄັນຂອງກຳລັງປ້ອງກັນຄວາມສະຫງົບ 2 ປະເທດ, ຕີລາຄາສູງໝາກຜົນຂອງການຢ້ຽມຢາມ ແລະ ເຮັດວຽກຂອງຄະນະຢູ່ ຫວຽດນາມ ຄັ້ງນີ້ກໍ່ຄືໝາກຜົນແຫ່ງການຮ່ວມມືລະຫວ່າງກະຊວງຕຳຫຼວດ ຫວຽດນາມ ແລະ ກະຊວງປ້ອງກັນຄວາມສະຫງົບລາວ. ທ່ານເລຂາທິການໃຫຍ່ ຫງວຽນຟູ໋ຈ້ອງ ເນັ້ນໜັກວ່າ: ໃນສະຖານະການສາກົນ ແລະ ພາກພື້ນປະຈຸບັນນີ້, ກຳລັງປ້ອງກັນຄວາມສະຫງົບ 2 ປະເທດຄວນສືບຕໍ່ເສີມຂະຫຍາຍມູນເຊື້ອດີງາມ, ເພີ່ມທະວີການໜູນຊ່ວຍ, ຊ່ວຍເຫຼືອເຊິ່ງກັນ ແລະ ກັນ, ສົມທົບກັນຢ່າງແໜ້ນແຟ້ນເພື່ອຮັບປະກັນຄວາມໝັ້ນຄົງ, ຄວາມເປັນລະບຽບຮຽບຮ້ອຍທາງສັງຄົມຢູ່ແຕ່ລະປະເທດ, ປະຕິບັດບັນດາຂໍ້ຕົກລົງທີ່ໄດ້ຮັບການລົງນາມແລ້ວຢ່າງມີປະສິທິຜົນ, ປະກອບສ່ວນປະຕິບັດມະຕິກອງປະຊຸມໃຫຍ່ຂອງແຕ່ລະພັກຢ່າງມີໄຊ.