ທ່ານ ດົນຕວັນຟອງ ຮອງປະທານກຳມາທິການປ້ອງກັນຊາດ, ປ້ອງກັນຄວາມສະຫງົບ ແລະ ພົວພັນຕ່າງປະເທດ ສະພາແຫ່ງຊາດ ຫວຽດນາມ (ພາບ:  VOV)

ໂດຍໄດ້ຮັບຄຳເຊີນຂອງທ່ານ Tulia Ackson ປະທານສະຫະພັນລັດຖະສະພາສາກົນ (IPU) ແລະ ທ່ານ  Martin Chungong ເລຂາທິການໃຫຍ່ ສະຫະພັນລັດຖະສະພາສາກົນ, ທ່ານ Alen Simonyan ປະທານສະພາແຫ່ງຊາດ ອາກເມນີ, ທ່ານ Tanzila Narbaeva ປະທານສະພາສູງ ອູເບກິດສະຖານ, ທ່ານປະທານສະພາແຫ່ງຊາດ ຫວຽດນາມ ເຈິ່ນແທັງເໝິນ ແລະ ພັນລະຍາ ຈະເຂົ້າຮ່ວມກອງປະຊຸມສະມັດຊາໃຫຍ່ ຄັ້ງທີ 150 ຂອງ ສະຫະພັນລັດຖະສະພາສາກົນ (IPU – 150), ຢ້ຽມຢາມ ສ. ອາກເມນີ ແລະ ອູເບກິດສະຖານ ແຕ່ວັນທີ 2 – 8 ເມສາ ຢ່າງເປັນທາງການ.

ຕາມທ່ານ ດົນຕວັນຟອງ ຮອງປະທານກຳມາທິການປ້ອງກັນຊາດ, ປ້ອງກັນຄວາມສະຫງົບ ແລະ ພົວພັນຕ່າງປະເທດ ສະພາແຫ່ງຊາດ ຫວຽດນາມ ແລ້ວ, ນັບແຕ່ເມື່ອເຂົ້າເປັນສະມາຊິກ IPU ເມື່ອປີ 1979, ສະພາແຫ່ງຊາດ ຫວຽດນາມ ຍາມໃດກໍເປັນສະມາຊິກທີ່ຕັ້ງໜ້າ ແລະ ມີຄວາມຮັບຜິດຊອບ, ສະເໜີແນະຫຼາຍຂໍ້ລິເລີ່ມ ແລະ ມີການປະກອບສ່ວນຢ່າງແທດຈິງເຂົ້າໃນການເຄື່ອນໄຫວຂອງ IPU. ສະພາແຫ່ງຊາດ ຫວຽດນາມ ກໍດຳລົງຫຼາຍຕຳແໜ່ງການນຳສຳຄັນໃນກົນໄກຕ່າງໆຂອງ IPU. ທ່ານ ດົນຕວັນຟອງ ຮອງປະທານກຳມາທິການປ້ອງກັນຊາດ, ປ້ອງກັນຄວາມສະຫງົບ ແລະ ພົວພັນຕ່າງປະເທດຂອງສະພາແຫ່ງຊາດ ຖືວ່າ:

“ສະພາແຫ່ງຊາດ ຫວຽດນາມ ໄດ້ເຂົ້າຮ່ວມຢ່າງຄົບຖ້ວນ ແລະ ຕັ້ງໜ້າ, ມີຄວາມຮັບຜິດຊອບໃນທຸກການເຄື່ອນໄຫວຕົ້ນຕໍຂອງສະຫະພັນສາກົນ, ພິເສດແມ່ນບັນດາກອງປະຊຸມສະມັດຊາໃຫຍ່. ໃນກອງປະຊຸມສະມັດຊາໃຫຍ່ຄັ້ງນີ້, ຫວຽດນາມ ກໍໄດ້ເຂົ້າຮ່ວມການປະກອບຄຳເຫັນ, ຍົກອອກຂໍ້ລິເລີ່ມໃນຄວາມມານະພະຍາຍາມລວມຂອງສະຫະພັນລັດຖະສະພາສາກົນ ກໍຄືລັດຖະສະພາບັນດາປະເທດ, ພິເສດແມ່ນໃນການຊຸກຍູ້ສັນຕິພາບ, ການຮ່ວມມື ແລະ ພັດທະນາ, ໃນນັ້ນ ມີການຊຸກຍູ້ບັນດາເປົ້າໝາຍພັດທະນາແບບຍືນຍົງ”.