ກອງປະຊຸມສຸດຍອດຂະບວນການບໍ່ຮ່ວມກຸ່ມຄັ້ງທີ 16 ຢູ່ອີຣານ
(ພາບ:baobaclieu.vn)
( vovworld ) – ກອງປະຊຸມສຸດຍອດຂະບວນການບໍ່ຮ່ວມກຸ່ມຄັ້ງທີ 16 ( NAM) ໄດ້ໄຂຂຶ້ນຢ່າງເປັນທາງການຢູ່ນະຄອນຫຼວງເຕເຮຣານ ປະເທດອີຣານ ໃນວັນທີ 30/8, ໂດຍມີການເຂົ້າຮ່ວມຂອງຜູ້ແທນ 40 ທ່ານຊື່ງແມ່ນການນຳລັດ, ລັດຖະບານ, ບັນດາລັດຖະມົນຕີການຕ່າງປະເທດຂອງ 120 ປະເທດສະມາຊິກ ພ້ອມກັບຜູ້ຕາງໜ້າກ່ວາ 30 ປະເທດ ແລະ ອົງການຈັດຕັ້ງສາກົນ. ທ່ານເລຂາທິການໃຫ່ຍ ສປຊ Ban Ki Moon ແລະ ປະທານສະມັດຊາໃຫ່ຍ ສປຊ Assir Abdulaziz Al Nasser ເປັນຜູ້ສັງເກດການ ແລະ ແຂກຖືກເຊີນ. ທ່ານ Pham Binh Minh ລັດຖະມົນຕີການຕ່າງປະເທດຫວຽດນາມ ໄດ້ນຳໜ້າຄະນະຜູ້ແທນຫວຽດນາມ ເຂົ້າຮ່ວມກອງປະຊຸມ.
ກ່າວຄຳເຫັນໄຂວາລະປະຊຸມ, ປະທານາທິບໍດີອີຢີບ Mohamed Morsi ອະດີດປະທານຂະບວນການບໍ່ຮ່ວມກຸ່ມ ແລະ ປະທານາທິບໍດີອີຣານ Mahmoud Ahmadinejad ປະທານຄົນໃໝ່ຂອງຂະບວນການບໍ່ຮ່ວມກຸ່ມ ໄດ້ຢັ້ງຢືນຄວາມຕັດສິນໃຈ ຈະພ້ອມກັບບັນດາປະເທດສະມາຊິກ ຊຸກຍູ້ການຮ່ວມມື, ມານະພະຍາຍາມສ້າງໂລກແຫ່ງຄວາມຍຸດຕິທຳ. ບັນດາປະເທດສະມາຊິກໄດ້ດຳເນີນວາລະປຶກສາຫາລືລວມກ່ຽວກັບຫົວຂໍ້ “ສັນຕິພາບທີ່ໝັ້ນຄົງຜ່ານການບໍລິຫານທົ່ວໂລກ“, ພ້ອມກັນແລກປ່ຽນບັນດາມາດຕະການເພື່ອແນໃສ່ເພີ່ມທະວີການສົມທົບຫຼັກໝັ້ນຂອງ NAM ທີ່ບັນດາເວທີປາໄສທົ່ວໂລກຂອງບັນດາປະເທດສະມາຊິກທີ່ມີຄວາມເອົາໃຈໃສ່ເຖິງບັນຫາສັນຕິພາບ, ຄວາມສະຫງົບປອດໄພ, ການພັດທະນາ ແລະ ຄວາມຍຸດຕິທຳໃນສັງຄົມ.
ບັນດາປະເທດສະມາຊິກ NAM ຢືນຢັນວ່າ, ໃນສະພາບການໂລກມີການຜັນແປ ແລະ ການທ້າທາຍອັນສັບສົນຄືປະຈຸບັນ, ຂະບວນການບໍ່ຮ່ວມກຸ່ມສືບຕໍ່ແມ່ນອົງການເຕົ້າໂຮມກຳລັງທີ່ເຂັ້ມແຂງ ແລະ ສຳຄັນທີ່ສຸດຂອງບັນດາປະເທດພວມພັດທະນາ ເພື່ອສ້າງສະພາບແວດລ້ອມທີ່ອຳນວຍຄວາມສະດວກເພື່ອສັນຕິພາບ, ສະຖຽນລະພາບ ແລະ ການພັດທະນາ.
ໃນວັນດຽວກັນ, ຢູ່ນອກກອງປະຊຸມ, ທ່ານລັດຖະມົນຕີການຕ່າງປະເທດຫວຽດນາມ Pham Binh Minh ໄດ້ມີການພົບປະກັບທ່ານນາຍົກລັດຖະມົນຕີກຳປູເຈຍ ແລະ ບູຕານ, ທ່ານລັດຖະມົນຕີການຕ່າງປະເທດອິນໂດເນເຊຍ, ສິງກະໂປ, ໂມງໂກເລຍ, ການາ, ເຊເນການ, ໂບລີເວຍ, ເບລາຣຸດ, ລັດຖະມົນຕີຫ້ອງວ່າການປະທານາທິບໍດີໂມຊຳປິກ, ລັດຖະມົນຕີອາລັບເມມີເຫຼດຢູໃນເຕບ ເພື່ອແລກປ່ຽນກ່ຽວກັບການຮ່ວມມືຢູ່ບັນດາເວທີປາໄສຫຼາຍຝ່າຍ ແລະ ຊຸກຍູ້ການພົວພັນສອງຝ່າຍ.