ກອງປະຊຸມໃຫຍ່ຄັ້ງທີ 22 ສະພາສັນຕິພາບໂລກໄດ້ໄຂຂຶ້ນໃນຕອນບ່າຍວັນທີ 22 ພະຈິກ, ຢູ່ ຮ່າໂນ້ຍ. ໂດຍມີການເຂົ້າຮ່ວມຂອງຜູ້ແທນ 200 ທ່ານ, ໃນນັ້ນມີຜູ້ແທນສາກົນປະມານ 100 ທ່ານ.

        ທີ່ວາລະໄຂ, ກອງປະຊຸມໃຫຍ່ໄດ້ປຶກສາຫາລືຫຼາຍເນື້ອໃນສຳຄັນກ່ຽວກັບສະພາບການສາກົນ, ສະແດງທັດສະນະ, ກໍຄືການປະກອບສ່ວນຂອງ ຫວຽດນາມ ພ້ອມກັບບັນດາປະເທດອື່ນຮັບປະກັນສັນຕິພາບຢູ່ພາກພື້ນ ແລະ ໃນໂລກ. ດ້ວຍສານທີ່ວ່າ “ຄວາມສາມັກຄີສາກົນ, ຮ່ວມແຮງຮ່ວມໃຈກະທຳເພື່ອສັນຕິພາບ, ການຮ່ວມມື ແລະ ພັດທະນາແບບຍືນຍົງ”, ປະເທດເຈົ້າພາບ ຫວຽດນາມ ຢາກສົ່ງສານເຖິງເພື່ອມິດສາກົນກ່ຽວກັບພາບພົດປະເທດຊາດ, ຊາວ ຫວຽດນາມ ທີ່ຮັກແພງແຂກຄົນ, ຮັກຫອມສັນຕິພາບ; ດ້ວຍແນວທາງການຕ່າງປະເທດເອກະລາດ, ເປັນເຈົ້າຕົນເອງ, ສັນຕິພາບ, ມິດຕະພາບ, ຮ່ວມມືພັດທະນາ, ຫັນເປັນຫຼາຍຮູບຫຼາຍແບບ ແລະ ຫຼາຍຝ່າຍ; ປາດຖະໜາຢາກເປັນເພື່ອນຂອງທຸກໆປະເທດ, ເປັນຄູ່ຮ່ວມມື, ບົນພື້ນຖານບໍ່ແຊກແຊງເຂົ້າວຽກງານພາຍໃນຂອງກັນ, ເຄົາລົບເອກະລາດ, ເປັນເຈົ້າຕົນເອງ; ເປັນສະມາຊິກຕັ້ງໜ້າໃນປະຊາຄົມສາກົນ.

(ທ່ານເລຂາທິການໃຫຍ່ສະພາສັນຕິພາບໂລກ Athanasios Pafilis)

        ຢູ່ນອກກອງປະຊຸມໃຫຍ່, ທ່ານເລຂາທິການໃຫຍ່ສະພາສັນຕິພາບໂລກ Athanasios Pafilis, ໃຫ້ຮູ້ວ່າ, ຍາມໃດ ຫວຽດນາມ ກໍ່ກ້າວຂຶ້ນບົນເສັ້ນທາງສັນຕິພາບ, ສະຖຽນລະພາບ, ປະຕິບັດກົດໝາຍສາກົນຢ່າງເຂັ້ມງວດ. ຫວຽດນາມ ໄດ້ປະກອບສ່ວນຕັ້ງໜ້າຫຼາຍຢ່າງໃຫ້ແກ່ສະພາສັນຕິພາບໂລກ. ຍາມໃດສະພາສັນຕິພາບໂລກກໍ່ຕີລາຄາສູງການປະກອບສ່ວນຂອງ ຫວຽດນາມ.

(ທ່ານນາງ Corazon Valdez Fabros)

        ກໍ່ມີທັດສະນະເຊັ່ນດຽວກັນ, ທ່ານນາງ Corazon Valdez Fabros, ຜູ້ຮັບຜິດຊອບຂົງເຂດສັນຕິພາບ ແລະ ຄວາມໝັ້ນຄົງ ສັງກັດເວທີປາໄສປະຊາຊົນ ອາຊີ - ເອີລົບ, ສະມາຊິກສະພາສັນຕິພາບໂລກ ຖືວ່າ, ແນວຄິດສັນຕິພາບຂອງ ຫວຽດນາມ ນອນໃນບັນດາຫຼັກການຂອງລັດທິສັງຄົມນິຍົມ, ຍ້ອນເຫດນັ້ນເລື່ອງ ຫວຽດນາມ ເປັນເຈົ້າພາບຈັດກອງປະຊຸມໃຫຍ່ຄັ້ງນີ້ກໍ່ແມ່ນການຄັດເລືອກທີ່ຖືກຕ້ອງຂອງສະພາສັນຕິພາບໂລກ.