ທ່ານ ເຈົາມິງຫ໋າຍ ຜູ້ອຳນວຍການບໍລິສັດ HK ຈຳກັດ

     ບໍລິສັດ HK ຈຳກັດຂອງທ່ານ ເຈົາມິງຫ໋າຍພວມຮ່ວມມືພ້ອມກັບຊາວກະສິກອນບັນດາເມືອງທາງກຳຕາເວັນອອກແຂວງ ຕຽນຢາງ ເພື່ອຜັນຂະຫຍາຍໂຄງການເຊື່ອມຕໍ່ທົ່ງນາໃຫຍ່ ດ້ວຍຍອດເນື້ອທີ່ 2.300 ເຮັກຕາຕໍ່ລະດູການ. ຮ່ວມໃນທົ່ງນາໃຫຍ່ ຊາວກະສິກອນໄດ້ຮັບການແນະນຳມອບໂອນເຕັກນິກການປູກຝັງ ແລະ ໄດ້ຮັບວັດຖຸເຄື່ອງອຸປະກອນຮັບໃຊ້ກະສິກຳປູກເຂົ້າ, ຖືກຊຳລະພາຍຫຼັງເກັບກ່ຽວ ແລະ ບໍ່ຄິດໄລ່ຄ່າດອກເບ້ຍ. ໃນສາມປີທີ່ຜ່ານມາວິສາຫະກິດໄດ້ສະໜອງຝຸ່ນທຸກຊະນິດປະມານ 5.000 ໂຕນ ທີ່ມີການໜູນຊ່ວຍລາຄາເພື່ອຊ່ວຍພໍ່ແມ່ພີ່ນ້ອງຫຼຸດຜ່ອນຄ່າໃຊ້ຈ່າຍສົ້ນເຂົ້າ ແລະ ປົວແປງສະມັດຕະພາບ ຍົກສູງຄຸນນະພາບ, ເພີ່ມຜົນກຳໄລ. ຮອດລະດູການເກັບກ່ຽວ, ທາງບໍລິສັດຍັງໜູນຊ່ວຍເງິນ 300.000 ດົ່ງຕໍ່ເຮັກຕາ. ທ່ານ ຫ໋າຍ ໃຫ້ຮູວ່າ:

       “ສອງປີກ່ອນນີ້ ຊາວກະສິກອນປູກເຂົ້າກໍ່ມີຜົນກຳໄລໜ້ອຍ, ຈາກນັ້ນເຮົາກໍ່ສັງເກດດ້ານເຕັກນິກຄິດວ່າ ຕົນເອງຕ້ອງເຮັດຫຍັງແດ່ໃຫ້ແກ່ຊາວກະສິກອນ. ເຮົາເອງກໍ່ມີຄວາມຫວັງເມື່ອຊາວກະສິກອນພັດທະນາ ເຮົາແມ່ນວິສາຫະກິດກໍ່ຕ້ອງພັດທະນາໃຫ້ດີຂຶ້ນ ເພື່ອມີຜົນປະໂຫຍດໃຫ້ທັງສອງຝ່າຍ. ຈາກນັ້ນຂ້າພະເຈົ້າໄດ້ຕົກລົງລົງທຶນຜະລິດເຂົ້າ. ຜ່ານໄລຍະ 10 ປີຂ້າຜະເຈົ້າເຫັນວ່າ ຮູບແບບໄດ້ຂະຫຍາຍຕົວ. ສຳຄັນທີ່ສຸດແມ່ນຂັ້ນຕອນຜະລິດ ຖ້າພວກເຮົາມີຂັ້ນຕອນຜະລິດກໍ່ຈະສາມາດຫຼຸດຜ່ອນການລົງທຶນທີ່ບໍ່ຈຳເປັນ”.

       ປູກເຂົ້າໃນທົ່ງນາໃຫຍ່ຕາມລະບົບຮ່ວມສຳພັນບໍລິສັດຂອງທ່ານຫ໋າຍ, ຊາວກະສິກອນໄດ້ຮັບຜົນກຳໄລແຕ່ 50% ຫາ 55% ຍອດລາຍໄດ້ຕໍ່ລະດູການ. ປັດຈຸບັນບໍລິສັດພວມສ້າງເຂດວັດຖຸດິບປຸງແຕ່ງເຂົ້າສານທີ່ມີຄຸນນະພາບເພື່ອໄປຂາຍໃຫ້ຕະຫຼາດ ຈີນ, ຍີ່ປຸ່ນ, ອາເມລິກາ, ເອີລົບ… ນອກຈາກນັ້ນທາງບໍລິສັດກໍ່ພວມຜັນຂະຫຍາຍຮູບແບບຜະລິດເຂົ້າຕາມທິດອົງຄະທາດປອດສານຜິດມາດຖານ ເອີລົບ. ທ່ານ ຫງວຽນວັນຕື ອະດີດພະນັກງານພະແນກກະສິກຳ ແລະ ພັດທະນາຊົນນະບົດ ແຂວງ ຕຽນຢາງ ເປີດເຜີຍວ່າ:

      “ອ້າຍ ຫ໋າຍ ກໍ່ສຸດຈິດສຸດໃຈຕໍ່ວຽກງານ. ຮອດຊ່ວງເວລານີ້ອ້າຍກໍ່ໄດ້ເຂົ້າຮ່ວມຫຼາຍຮູບແບບຂອງລັດ; ເຂົ້າຮ່ວມວຽກງານກັບພະແນນກະສິກຳ ແລະ ພັດທະນາຊົນນະບົດແຂວງ ຕຽນຢາງ. ມີຫຼາຍຮູບແບບກໍ່ປະສົບຜົນສຳເລັດ ແລະ ບັນລຸປະສິດທິຜົນ”.

     ມີເຂດວັດຖຸດິບເຂົ້າຄຸນນະພາບສູງ, ທ່ານ ຫ໋າຍ ໄດ້ສືບຕໍ່ຮ່ວມສຳພັນກັບບັນດາໂຮງສີເຂົ້າ, ປຸງແຕ່ງເຂົ້າສານໃນຂົງເຂດ ແລະ ໄດ້ໃຫ້ກຳເນີດຜະລິດຕະພັນເຂົ້າສານຄຸນນະພາບສູງທີ່ມີເຄື່ອງໝາຍເຂົ້າສານພິເສດ ຕຽນຢາງ. ນີ້ແມ່ນຜະລິດຕະພັນພິເສດຈາກແຫຼ່ງແນວເຂົ້າສົມທົບກັບການມອບໂອນເຕັກນິກໃຫ້ແກ່ຊາວກະສິກອນ ທ່ານ ເຈົາມິງຫ໋າຍ ແບ່ງປັນວ່າ:

      “ຂ້າພະເຈົ້າຈະທະວີຄູນຮູບແບບນີ້ ເພື່ອມີຜະລິດຕະພັນເຂົ້າສານພິເສດສະເພາະ ແລະ ມີຄຸນນະພາບສູງຮັບປະກັນລັກອະນາໄມທາງດ້ານສະບຽງອາຫານ. ຂ້າພະເຈົ້າຍັງຊອກຫາບັນດາວິສາຫະກິດຕ່າງປະເທດທີ່ຕ້ອງການບັນດາເຄື່ອງໝາຍເຂົ້າສານບັນລຸມາດຕະຖານ ເພື່ອເຮົາສົ່ງອອກຂາຍ. ເມື່ອສົ່ງອອກໄດ້, ລາຄາເຂົ້າສານກໍ່ຈະເພີ່ມຂຶ້ນ”.

       ຍ້ອນມີການປະກອບສ່ວນສ້າງພື້ນຖານກະສິກຳຜະລິດເປັນສິນຄ້າຢູ່ແຂວງ ຕຽນຢາງ, ຕິດແທດຕົວຈິງຍົກສູງລະດັບການປູກຝັງ ແລະ ເພີ່ມລາຍຮັບໃຫ້ແກ່ຊາວກະສິກອນ, ປະກອບສ່ວນປ່ຽນແປງໃໝ່ທາງດ້ານກະສິກຳຊົນນະບົດ ແລະ ສ້າງຊົນນະບົດໃໝ່ຢູ່ທ້ອງຖິ່ນຢ່າງສຳເລັດຜົນ, ທ່ານ ເຈົາມິງຫ໋າຍ ມີຄວາມເປັນກຽດໄດ້ຮັບຫຼາຍລາງວັນອັນປະເສີດຄື ໃບຍ້ອງຍໍຂອງປະທານສະມາຄົມຊາວກະສິກອນແຂວງໄລຍະ 2017 – 2022. ໃບຍ້ອງຍໍຂອງປະທານຄະນະກຳມະການປະຊາຊົນແຂວງປີ 2022 ໄລຍະ 2019 – 2022. ປີ 2023 ທ່ານ ຫ໋າຍ ມີຄວາມເປັນກຽດໄດ້ຮັບການເຊີດຊູຈາກສູນກາງສະມາຄົມຊາວກະສິກອນ ຫວຽດນາມ ແມ່ນໜຶ່ງໃນຈຳນວນ 100 ແບບຢ່າງຊາວກະສິກອນ ຫວຽດນາມ ດີເດັ່ນໃນທົ່ວປະເທດ.