ບັນຫາການເຊື່ອມໂຍງເຂົ້າກັບສາກົນຂອງວັດທະນະທຳຫວຽດນາມໄດ້ນຳມາປຶກສາຫາລືຢູ່ການສຳມະນາສາກົນຫວຽດນາມວິທະຍາຄັ້ງທີ່ 4
(ພາບ: baomoi.com)
|
“ ການເຊື່ອມໂຍງເຂົ້າກັບສາກົນ ” . ນີ້ແມ່ນຄຳປະໂຫຍກເຄີຍຖືກເວົ້າເຖິງ. ໂດຍນອນໃນທ່າອຽງ ດັ່ງກ່າວ, ວັດທະນະທຳຫວຽດນາມກໍພວມເຊື່ອມໂຍງເຂົ້າກັບວັດທະນະທຳໂລກເທື່ອລະກ້າວ. ວັດທະນະທຳຫວຽດນາມປ່ຽນແປງຄື ແນວໃດ, ເຊື່ອມໂຍງຄືແນວໃດ ກໍແມ່ນບັນຫາທີ່ບັນດານັກຄົ້ນຄ້ວາຫວຽດນາມວິທະຍາທັງຢູ່ພາຍໃນ ແລະ ຕ່າງປະເທດຄົ້ນຄ້ວາກ່ຽວກັບວັດທະນະທຳໄດ້ນຳມາປຶກສາຫາລືຢູ່ກອງປະຊຸມສຳມະນາສາກົນຫວຽດນາມວິທະຍາຄັ້ງທີ່ 4 ຊຶ່ງຫາກໍຖືກຈັດຂຶ້ນຢູ່ຮ່າໂນ້ຍເມື່ອບໍ່ດົນມານີ້.
ເມື່ອປຶກສາຫາລືກ່ຽວກັບວັດທະນະທຳ, ເປັນຕົ້ນແມ່ນວັດທະນະທຳໃນໄລຍະເຊື່ອມໂຍງເຂົ້າກັບສາກົນ, ທ່ານສາດສະດາຈານ, ດຣ ຝ້າມດຶກເຢືອງ ຫົວໜ້າສະຖາປັນຄົ້ນຄ້ວາວັດທະນະທຳຝ່າຍຕາເວັນອອກ ຖືວ່າ :
“ ເມື່ອກ່ອນນີ້, ຢູ່ຫວຽດນາມ, ໃນຕະຫຼອດໄລຍະທາງແຫ່ງປະຫວັດສາດ, ວັດທະນະທຳຍັງຄົງນຳໜ້າ ເພາະວ່າວັດທະນະທຳຕັດສິນໃຫ້ຊາວຫວຽດນາມປົກປັກຮັກສາປະເທດເພື່ອສ້າງສາປະເທດຊາດ. ໃນວັນນີ້, ພວກເຮົາໄດ້ເຂົ້າສູ່ການພັດທະນາແບບທັນສະໄໝ, ແຕ່ວັດທະນະທຳຍັງຄົງສວມບົກບາດເປັນພື້ນຖານທາງດ້ານຈິດໃຈຂອງການພັດທະນາ. ເມື່ອສ້າງສາປະເທດຊາດດ້ວຍວິທະຍາ ສາດ-ເຕັກໂນໂລຢີ ແລະ ກົນໄກການຕະຫຼາດນັ້ນ, ພວກເຮົາຕ້ອງເອົາໃຈໃສ່ສຸດຂີດເຖິງທີ່ຕັ້ງບົດບາດຂອງວັດທະນະທຳ. ໃນການພັດທະນາແບບຍືນຍົງ ແລະ ເຊື່ອມໂຍງເຂົ້າກັບສາກົນ, ຂ້າພະເຈົ້າຄິດວ່າບົດບາດຂອງວັດທະນະທຳທັງແມ່ນກຳລັງຊຸກຍູ້, ທັງແມ່ນສິ່ງດັດປັບອັນເປັນພື້ນຖານໃຫ້ແກ່ການພັດທະນາຂອງຫວຽດນາມ ”
54 ຊົນເຜົ່າອ້າຍນ້ອງຢູ່ປະເທດຫວຽດນາມໄດ້ນຳມາເຊິ່ງຄວາມອຸດົມສົມບູນ, ຫຼາຍຮູບຫຼາຍສີກ່ຽວກັບວັດທະນະທຳໃຫ້ແກ່ຊາດຕົນ. ແຕ່ລະຊົນເຜົ່າ, ແຕ່ລະເຂດແຄ້ວນ ກໍມີຈຸດວັດທະນະທຳສະເພາະຂອງໃຜຂອງມັນ. ຍ້ອນເຫດນີ້ເອງ ໄດ້ສ້າງເປັນຄວາມດູດດື່ມຂອງວັດທະນະທຳຫວຽດນາມສຳລັບບັນດານັກຄົ້ນຄ້ວາຂອງຫຼາຍປະເທດໃນໂລກ. ທ່ານດຣ Lukas Parker ອາຈານສັງກັດມະຫາວິທະຍາໄລສາກົນ RMIT ນະຄອນໂຮ່ຈິມິນໃຫ້ຮູ້ວ່າ :
“ ຂ້າພະເຈົ້າໄດ້ເລືອກເຟັ້ນເອົາຫົວເລື່ອງຄົ້ນຄ້ວາກ່ຽວກັບບຸນເຕັດຫວຽດນາມ, ເພາະວ່າເມື່ອຫາກໍມາຮອດປະເທດຂອງພວກເພື່ອນ, ຂ້າພະເຈົ້າໄດ້ເຊື່ອໝັ້ນວ່າ ຜ່ານການຄົ້ນຄ້ວາກ່ຽວກັບບຸນເຕັດຫວຽດນາມ, ຂ້າພະເຈົ້າສາມາດຊອກຮູ້ໄດ້ຫຼາຍແງ່ມຸມທີ່ແຕກຕ່າງກັນຂອງວັດທະນະທຳ ແລະ ສັງຄົມຫວຽດນາມ. ສຳລັບ ບຸນເຕັດ, ແມ່ນມີຫຼາຍບັນຫາເມື່ອຄົ້ນຄ້ວາກ່ຽວກັບມັນ, ພວກເພື່ອນອາດຈະເປີດກ້ວາງອອກສູ່ຂົງເຂດອື່ນໆໃນການດຳລົງຊີວິດຂອງຊາວຫວຽດນາມ”
ອາດເວົ້າໄດ້ວ່າ ປະມານ 10 ປີມານີ້, ຈຳນວນມໍລະດົກວັດທະນະທຳຫວຽດນາມ, ນັບທັງມໍລະດົກວັດທະນະທຳມີຮູບຮ່າງ ແລະ ມໍລະດົກວັດທະ ນະທຳບໍ່ມີຮູບຮ່າງທີ່ໄດ້ຮັບການຮັບຮອງຈາກໂລກໄດ້ເພີ່ມຂຶ້ນເຊັ່ນ : ດົນຕີໃນພະລາດຊະວັງເຫ້ວ, ຄ້ອງໄຕງວຽນ, ຂັບກາຈູ..... ແລະ ໃນທ້າຍປີ 2011 ທີ່ຜ່ານມາ, ສິລະປະຂັບຊວານຂອງຫວຽດນາມໄດ້ຮັບການຮັບຮອງຈາກອົງການ UNESCO ວ່າແມ່ນ ມໍລະດົກວັດທະນະທຳບໍ່ມີຮູບຮ່າງຄວນໄດ້ຮັບການຮັກສາດ່ວນ. ທ່ານຮອງສາດສະດາຈານ, ດຣ ເລຮົ່ງຫຼີ ຫົວໜ້າສະຖາປັນຄົ້ນຄ້ວາວັດທະນະທຳຖືວ່າ :
“ ເມື່ອບັນດາຄຸນຄ່າວັດທະນະທຳມີຮູບຮ່າງກໍຄືວັດທະນະທຳບໍ່ມີຮູບຮ່າງໄດ້ຮັບການຮັບຮອງຈາກໂລກນັ້ນ, ແມ່ນຈະເປັນທີ່ຮູ້ຈັກກັນດີກ່ວາເກົ່າຂອງແຂກທ່ອງທ່ຽວທັງຫຼາຍໃນໂລກ, ເຂົາເຈົ້າຊອກຮູ້ຄຸນຄ່າວັດທະນະທຳຫວຽດນາມຫຼາຍກ່ວາ, ບັນດາວົງຄະນະຍາດມີຄວາມເອກອ້າງທະນົງໃຈຫຼາຍກ່ວາເມື່ອຄຸນຄ່າວັດທະ ນະທຳຂອງທ້ອງຖິ່ນຕົນໄດ້ມີຊື່ສຽງ. ນັ້ນແມ່ນຈຸດທີ່ຕັ້ງໜ້າ. ຈາກນັ້ນ, ເຂົາເຈົ້າຈະມີສະຕິປົກປັກຮັກສາຫຼາຍກ່ວາເພື່ອມັນຂະຫຍາຍຕົວໃນໄລຍະທີ່ຈະມາເຖິງ. ນີ້ກໍແມ່ນຈຸດເຊື່ອມໂຍງເຂົ້າກັບສາກົນຂອງວັດທະນະທຳຫວຽດນາມໃນຂະບວນວິວັດຫັນເປັນໂລກາພິວັດ ”
ສ່ວນທ່ານນາງຮອງສາດສະດາຈານ, ດຣ Natalia Kraevskaia ສັງກັດ ສະຖາປັນຄົ້ນຄ້ວາວັດທະນະທຳຝ່າຍຕາເວັນອອກ ມົດສະກູ-ລັດເຊຍ ຊຶ່ງແມ່ນຜູ້ໄດ້ເຫັນປະຈັກຕາການພັດທະນາຂອງສິລະປະຍຸກປະຈຸບັນຫວຽດນາມເວົ້າວສະເພາະ ແລະ ວັດທະນະທຳຫວຽດນາມເວົ້າລວມ ໄດ້ແບ່ງປັນທັດສະນະວ່າ :
“ ຂ້າພະເຈົ້າຢາກເນັ້ນໜັກກ່ຽວກັບສິ່ງໜຶ່ງວ່າການເຊື່ອມໂຍງເຂົ້າກັບສາກົນ ແມ່ນສິ່ງທີ່ຈຳເປັນຕ້ອງເປັນໄປ ແລະ ສຳລັບການເຊື່ອມໂຍງນີ້, ຂ້າພະເຈົ້າບໍ່ເຫັນດີກັບທັດສະນະພວກເຮົາຕ້ອງການເຊື່ອມໂຍງຢ່າງເລິກເຊິ່ງ, ກ້ວາງຂວາງ. ສະເພາະກ່ຽວກັບບັນຫາວັດທະນະທຳ, ພວກເຮົາຕ້ອງຮັກສາຈຸດທີ່ເປັນເອກະລັກສະເພາະໃຫ້ໄດ້. ເວົ້າເຊັ່ນນັ້ນ ບໍ່ໝາຍຄວາມວ່າ ພວກເຮົາປິດປະຕູໄວ້, ຫາກຍັງຄົງຕ້ອງເປີດປະຕູ ແລະ ສຳຜັດກັບບັນດາພື້ນຖານວັດທະນະທຳ, ແຕ່ຕ້ອງຮັກສາສີສັນສະເພາະຂອງຕົນ ”
ໃນຊຸມປີມໍ່ໆມານີ້, ວັດທະນະທຳຫວຽດນາມໄດ້ເຊື່ອມໂຍງເຂົ້າກັບພື້ນຖານວັດທະນະທຳລວມຂອງໂລກຢ່າງແຂງແຮງ. ສິ່ງນີ້ໄດ້ສະແດງອອກຜ່ານບັນດາການເຄື່ອນໄຫວພົວພັນແລກປ່ຽນວັດທະນະທຳ, ບັນດາເຫດການແນະນຳວັດທະນະທຳຫວຽດນາມໃຫ້ແກ່ເພື່ອນມິດສາກົນ. ເຖິງຢ່າງໃດກໍຕາມ, ນອກຈາກເລື່ອງການເຊື່ອມໂຍງເຂົ້າກັບວັດທະນະທຳສາກົນນຳມາເຊິ່ງຜົນປະໂຫຍດໃຫ້ແກ່ປະເທດຊາດນັ້ນ, ແມ່ນບັນດາສິ່ງທ້າທາຍໄປພ້ອມ ແລະ ສິ່ງທ້າທາຍອັນໃຫຍ່ຫຼວງສຳລັບວັດທະນະທຳຫວຽດນາມນັ້ນແມ່ນເມື່ອເຊື່ອມໂຍງເຂົ້າກັບ ວັດທະນະທຳສາກົນ ຈຳເປັນຕ້ອງຮັກສາສີສັນຊາດ.