(vovworld)- ແຜນນະໂຍບາຍສົ່ງເສີມບັນດາກອງສິລະປະກອນສະແດງບັນດາບົດລະຄອນທີ່ມີຄຸນນະພາບສູງຢູ່ໂຮງລະຄອນໃຫຍ່ ຮ່າໂນ້ຍ ໄດ້ຮັບການຕີລາຄາວ່າ ແມ່ນຫນຶ່ງໃນ 10 ເຫດການວັດທະນະທຳ ກິລາ ແລະ ທ່ອງທ່ຽວດີເດັ່ນໃນປີ 2016. ດ້ວຍແຜນນະໂຍບາຍນີ້, ກະຊວງວັດທະນະທຳ ກິລາ ແລະ ທ່ອງທ່ຽວ ໄດ້ເປີດກວ້າງປະຕູເພື່ອໃຫ້ບັນດາບົດລະຄອນສະແດງບົນເວທີທີ່ເປັນມູນເຊື້ອ, ບັນດາຜະລິດຕະພັນສິລະປະໂດດເດັ່ນ ມາໃຫ້ຜູ້ຊົມໃນໂຮງລະຄອນທີ່ຫລູຫລາແຖວຫນ້າຂອງປະເທດຊາດ. ບົດຂຽນຂອງນັກຂ່າວ ງອກງ່າ ທີ່ມີຫົວຂໍ້ວ່າ: ຂີດໝາຍວັດທະນະທຳປີ 2016: “ເປີດປະຕູ”ໂຮງລະຄອນໃຫຍ່ຮ່າໂນ້ຍ
ລາຍການສະແດງສິລະປະຢູ່ໂຮງລະຄອນໃຫຍ່ ຮ່າໂນ້ຍ
ພາບ:internet
|
ເປີດສາກດ້ວຍລາຍການດົນຕີປະສານສຽງພິເສດ ຂອງວົງດົນຕີປະສານສຽງຫວຽດນາມ, ບັນດາບົດລະຄອນເວທີສະແດງທີ່ຍາດໄດ້ຫລຽນຄຳ, ຫລຽນເງິນ ໃນ ບັນດາງານປະກວດ, ງານແຂ່ງຂັນສິລະປະເວທີສະແດງອາຊີບຂອງໂຮງລະຄອນເວທີຫວຽດນາມ, ໂຮງລະຄອນດົນຕີ ແລະ ໂຮງລະຄອນຂັບກ໋າຍເລືອງຫວຽດນາມ ໄດ້ນຳມາສະແດງໃຫ້ຜູ້ຊົມຕາມແຜນນະໂຍບາຍ “ເປີດປະຕູ” ໂຮງລະຄອນໃຫຍ່ ຮ່າໂນ້ຍ. ໃນມື້ສະແດງ ບົດລະຄອນ “ກອງເສືອດາວດຳ” ຂອງໂຮງລະຄອນເວທີຫວຽດນາມ, ທ່ານ ຫງວຽນເທວີງ ຜູ້ອຳນວຍການໂຮງລະຄອນເວທີຫວຽດນາມ ໃຫ້ຮູ້ວ່າ:
“ນີ້ເປັນຄັ້ງທຳອິດ ບົດລະຄອນ “ກອງເສືອດາວດຳ” ໄດ້ຮັບການສະແດງຢູ່ໂຮງລະຄອນໃຫຍ່. ໃນວັນທີ 14/12/2016 ຜ່ານມາ, ພວກຂ້າພະເຈົ້າໄດ້ສະແດງ ບົດລະຄອນ ຮຳແລດ ເປັນຄັ້ງທີ 2 ຢູ່ໂຮງລະຄອນໃຫຍ່. ປີ 2017, ພວກຂ້າພະເຈົ້າຈະສະແດງບັນດາບົດລະຄອນຕາມແຜນການທີ່ວາງອອກໃນປີ. ຫວັງວ່າ ລາຍການສິລະປະໂດຍມີການຮ່ວມເດີນທາງຂອງບັນດາວິສາຫະກິດຄືແນວນີ້ ຈະແກ້ໄຂບັນດາຄວາມຫຍຸ້ງຍາກບໍ່ພຽງແຕ່ໃຫ້ບັນດາໂຮງລະຄອນເທົ່ານັ້ນ ຫາກນັບທັງໂຮງລະຄອນໃຫຍ່ພວມໃນເສັ້ນທາງເປັນເຈົ້າຕົນເອງອີກດ້ວຍ.”
ໂດຍໄດ້ຮັບການສະແດງບົນເວທີຂອງໂຮງລະຄອນໃຫຍ່, ຊື່ງແມ່ນສັນຍາລັກຂອງວັດທະນະທຳ ຫວຽດນາມ, ແລະກໍແມ່ນຄວາມໄຝ່ຝັນຂອງນັກສິລະປິນເວທີສະແດງຫລາຍລຸ້ນຄົນ. ເປີດສາກລາຍການສະແດງເປັນປະຈຳຢູ່ໂຮງລະຄອນໃຫຍ່ ຮ່າໂນ້ຍ, ໂຮງລະຄອນແຈ່ວ ຫວຽດນາມ ໄດ້ຄັດເລືອກບັນດາບົດລະຄອນແຈ່ວດີເດັ່ນຊື່ງຕິດພັນກັບຊື່ສຽງຂອງໂຮງລະຄອນແຈ່ວ. ນັກສິລະປິນປະຊາຊົນ ແທງງວານ, ຜູ້ອຳນວຍການໂຮງລະຄອນແຈ່ວຫວຽດນາມ ແບ່ງປັນວ່າ:
“ພວກຂ້າພະເຈົ້າໄດ້ສ້າງບັນດາບົດລະຄອນໃຫ້ດີສຸດ, ຕົວຢ່າງ ປີນີ້ ພວກຂ້າພະເຈົ້າໄດ້ສ້າງບົດລະຄອນ “ຊູຍເວີນ”, ບົດລະຄອນ “ຜູ້ໃດຊື້ຫົວຜັກບົວຂອງຂ້ອຍ. ຂ້າພະເຈົ້າຄິດວ່າ ມີບົດລະຄອນແຈ່ວຫລາຍບົດໄດ້ກາຍເປັນຫນຶ່ງໃນບັນດາຂີດໝາຍຂອງໂຮງລະຄອນແຈ່ວຫວຽດນາມ. ແຕ່ລະປີ ພວກຂ້າພະເຈົ້າຈະພະຍາຍາມເພື່ອເຮັດແນວໃດສືບຕໍ່ຮັກສາສີສັນທີ່ເປັນມູນເຊື້ອນີ້.”
ບົດລະຄອນ ຮຳແລດ
ພາບ:kinhtedothi
|
ເລື່ອງຈັດຕັ້ງລາຍການສະແດງບັນດາຜະລິດຕະພັນສິລະປະໂດດເດັ່ນຢູ່ ໂຮງລະຄອນໃຫຍ່ ຮ່າໂນ້ຍ ແມ່ນພະລັງຊີວິດໃຫມ່ໃນການເຄື່ອນໄຫວສິລະປະອາຊີບຂອງປີ 2016. ການເຄື່ອນໄຫວສະແດງສິລະປະຢູ່ໂຮງລະຄອນໃຫຍ່ ຮ່າໂນ້ຍໄດ້ຍົກສູງຄຸນນະພາບຂອງບັນດາລາຍການ, ບົດລະຄອນກໍຄືສ້າງບັນຍາກາດອັນຟົດຟື້ນໃນວົງການນັກສິລະປິນ, ດຶງດູດຄວາມສົນໃຈຂອງຫາງສຽງສັງຄົມ. ທ່ານ ເຈືອງຍ້ວນ, ຜູ້ອຳນວຍການໂຮງລະຄອນຕ໋ວຍແຈ໋ (ໄວຫນຸ່ມ) ແບ່ງປັນວ່າ:
“ໂຮງລະຄອນໃຫຍ່ໄດ້ກາຍເປັນສະຖານທີ່ສະແດງບັນດາບົດລະຄອນທີ່ຍາດໄດ້ລາງວັນ ສ້າງການແຜ່ລາມອອກສູ່ວົງກວ້າງ,ດຶງດູດຄວາມສົນໃຈຂອງສາທາລະນະຊົນທີ່ນິຍົມສິລະປະ, ພ້ອມທັງສະແດງໃຫ້ເຫັນວ່າຢາກໃຫ້ດ້ານວັດທະນະທຳສິລະປະການສະແດງພັດທະນາ, ດຶງດູດຄວາມສົນໃຈຂອງສາທາລະນະຊົນ ຄວນມີການຫນູນຊ່ວຍອັນສຳຄັນຈາກບັນດາອົງການຄຸ້ມຄອງລັດ.”
ໃນແງ່ມູມອື່ນ, ບັນດາລາຍການສະແດງສິລະປະຢູ່ໂຮງລະຄອນໃຫຍ່ ຍັງກາຍເປັນຜະລິດຕະພັນທ່ອງທ່ຽວພິເສດ ປະກອບສ່ວນດຶງດູດນັກທ່ອງທ່ຽວເຂົ້າມາຢ້ຽມຢາມຮ່າໂນ້ຍ ເປັນເວລາດົນນານກວ່າ. ທ່ານ ຫງວຽນວັນຕວນ, ຫົວຫນ້າກົມໃຫຍ່ທ່ອງທ່ຽວຫວຽດນາມ ຕີລາຄາວ່າ:
“ເລື່ອງເປີດປະຕູໂຮງລະຄອນໃຫຍ່ ຮ່າໂນ້ຍ ແມ່ນຫນຶ່ງໃນບັນດາການເຄື່ອນໄຫວມີຫົວຄິດປະດິດສ້າງ ແລະ ບຸກທະລຸຂອງກະຊວງວັດທະນະທຳ ກິລາ ແລະ ທ່ອງທ່ຽວ. ໃນໄລຍະຜ່ານມາ, ລາຍການນີ້ພຽງຢູ່ໃນໄລຍະເລີ່ມເຄື່ອນໄຫວເທົ່ານັ້ນ. ເພື່ອໃຫ້ລາຍການນີ້ກາຍເປັນຜະລິດຕະພັນທ່ອງທ່ຽວ, ຄວນເອົາໃຈໃສ່ສ້າງລາຍການໃຫ້ເໝາສົມ, ດູດດື່ມ, ມີຄວາມແຕກຕ່າງ ເພື່ອຮັບໃຊ້ນັກທ່ອງທ່ຽວ ແລະ ພວກເຮົາຕ້ອງຮັກສາການສະແດງສິລະປະເປັນປະຈຳ.”
ເລື່ອງກະຊວງວັດທະນະທຳ ກິລາ ແລະ ທ່ອງທ່ຽວ ສົ່ງເສີມບັນດາກອງສິລະປະກອນຂຸດຄົ້ນໂຮງລະຄອນໃຫຍ່ເພື່ອສະແດງບັນດາບົດລະຄອນມີຄຸນນະພາບສູງ, ເປີດປະຕູໃຫ້ບັນດາບົດລະຄອນເວທີສະແດງທີ່ເປັນມູນເຊື້ອ, ຜະລິດຕະພັນສິລະປະໂດດເດັ່ນນຳມາສະແດງບົນເວທີຂອງໂຮງລະຄອນໃຫຍ່ ຮ່າໂນ້ຍ. ທ້າຍປີ 2016 ມີເກືອບ 20 ລາຍການ, ບົດລະຄອນທີ່ມີຄຸນນະພາບສູງໄດ້ນຳມາສະແດງຢູ່ໂຮງລະຄອນໃຫຍ່ຮ່າໂນ້ຍ. ຄວາມຖືກຕ້ອງຂອງແຜນນະໂຍບາຍເປີດປະຕູໂຮງລະຄອນໃຫຍ່ ຮ່າໂນ້ຍ ໄດ້ຮັບການຢັ້ງຢືນຜ່ານຕົວຈິງ.