ບັນດາລາຍການສະແດງດົນຕີພື້ນເມືອງໂດຍບັນດານັກເສບເຄື່ອງດົນຕີອັນດັບໜຶ່ງຂອງຫວຽດນາມທຳການສະແດງ ໄດ້ສ້າງເປັນກະແສດົນຕີໂດຍປະສານລະຫວ່າງ 3 ທຳນອງດົນຕີຂອງ ພາກເໜືອ, ພາກກາງ ແລະ ພາກໃຕ້. ນີ້ແມ່ນການພົບປະແລກປ່ຽນສະແດງດົນຕີລະຫວ່າງບັນດາຜູ້ສຸມຈິດສຸມໃຈກັບດົນຕີພື້ນເມືອງຫວຽດນາມຢູ່ພາກເໜືອຕະຫຼອດລົງຮອດພາກໃຕ້ຫວຽດນາມ ແລະ ນັບທັງຢູ່ຕ່າງປະເທດອີກດ້ວຍ.
ບັນດານັກສິລະປີນໃນຄ່ຳຄືນສະແດງດົນຕີພື້ນເມືອງ |
ໃນ ຄ່ຳຄືນສະແດງດົນຕີພື້ນເມືອງ, ນັກສິລະປີນ, ນັກເສບເຄືຶ່ອງດົນຕີແຕ່ລະຄົນໄດ້ສະແດງບົດດົນຕີທີ່ເປັນເອກະລັກສະເພາະຂອງຕົນ. ຄື ນັກສິລະປີນປະຊາຊົນ ໂງແທງຮ່ວາຍ ໄດ້ສະແດງຂັບກາບກອນ, ບັນດາທຳນອງຂັບແຈວຂອງປະຊາຊົນເຂດທົ່ງພຽງພາກເໜືອ, ນັກສິລະປີນດີເດັ່ນ ດວານແທງບີງ ສະແດງຂັບກາຈູ , ນັກສິລະປີນປະຊາຊົນ ຊວນແຫກ ສະແດງຂັບສຳ. ນັກສິລະປີນ ດາມມິນກວາງ ຊຶ່ງແມ່ນຜູ້ໜຶ່ງໃນບັນດາຜູ້ໄດ້ນຳສະເໜີບັນດາແນວຄວາມຄິດຈັດລາຍການໃຫ້ຮູ້ວ່າ :
“ ລາຍການໄດ້ຖືກສ້າງຂຶ້ນຈາກການພົບປະກັບບັນດາເພື່ອນຮ່ວມຂັບຮ້ອງທີ່ມາຈາກແດນໄກ ຄືນັກຮ້ອງເຮືອງແທງຢູ່ຝະລັ່ງ. ເມື່ອກັບມາຢາມບ້ານເກີດເມືອງນອນ, ນັກຮ້ອງເຮືອງແທງ ມີຄວາມຫວັງຢາກໄດ້ພົບປະກັບອ້າຍເອື້ອຍນ້ອງໃນວົງການດົນຕີພື້ນເມືອງພາກເໜືອ ເພື່ອໄດ້ແລກປ່ຽນ, ສ້າງຄວາມລື້ງເຄີຍ. ໃນເວລາພົບປະ, ອ້າຍເອື້ອຍນ້ອງມີແນວຄວາມຄິດເຮັດລາຍການຮ່ວມກັນເພື່ອສ້າງລາຍການສະແດງດົນຕີພື້ນເມືອງຫວຽດນາມ ຊຶ່ງລວມທັງທຳນອງດົນຕີ ພາກເໜືອ, ພາກກາງ ແລະ ພາກໃຕ້ ”
ຄ່ຳຄືນສະແດງດົນຕີພື້ນເມືອງ ກໍໄດ້ຕິດພັນກັບແນວຄວາມຄິດ ນຳເອົາບັນດາເຄື່ອງ ດົນຕີພື້ນເມືອງຂອງຫວຽດນາມເຊັ່ນ : ພິນສາຍດຽວ, ພິນ 2 ສາຍ, ຊໍ …ເຂົ້າຮັບໃຊ້ລາຍການດົນຕີ. ນັກສິລະປີນປະຊາຊົນ ຊວນແຫກ ບໍ່ພຽງແຕ່ເຂົ້າຮ່ວມຢ່າງຕັ້ງໜ້າໃນການຟື້ນຟູປະເພດ ດົນຕີພື້ນເມືອງຄື ຂັບສຳ, ຂັບກາຈູເທົ່ານັ້ນ, ຫາກຍັງເປັນຜູ້ຄົ້ນຄ້ວາການນຳໃຊ້ເສັ້ນໃໝເປັນສາຍຂອງເຄື່ອງດົນຕີອີກດ້ວຍ. ທັງນີ້ກໍເປັນການສະແດງໃຫ້ເຫັນຄວາມເປັນເອກະລັກສະເພາະຂອງ ດົນຕີພື້ນເມືອງຝ່າຍຕາເວັນອອກ. ນັກສິລະປີນປະຊາຊົນ ຊວນແຫກ ເວົ້າວ່າ :
“ ເມື່ອສາມາດ ນຳໃຊ້ເສັ້ນໃໝເປັນສາຍຂອງເຄື່ອງດົນຕີ ຈຶ່ງຈະເຫັນສິ່ງທີ່ປະທັບໃຈຂອງສຽງດົນຕີທີ່ດັງຂຶ້ນຈາກເສັ້້ນໃໝ. ຫຼາຍປີແລ້ວ, ທີ່ສິລະປະຂັບກາຈູຖືກຕັດຕອນ. ປະຈຸບັນເຮັດໄດ້ດ້ວຍເສັ້ນໃໝແລ້ວ, ຂ້າພະເຈົ້າດີໃຈທີ່ສຸດ ຍ້ອນວ່າມັນແມ່ນແນວຄວາມຄິດຂອງຂ້າພະເຈົ້າ ”
ຄ່ຳຄືນສະແດງດົນຕີພື້ນເມືອງ ແມ່ນການສະແດງບັນດາລາຍການທີ່ເຕົ້າໂຮມສິ່ງທີ່ຍອດຍິ່ງຂອງສິລະປະຂັບກາຈູ, ຂັບເຈົາວັນ, ຂັບແຈວ, ຂັບສຳ, ຂັບເຫ້ວ. ບັນດາລາຍການສະແດງໄດ້ພາຜູ້ຊົມມີຄວາມດູດດື່ມ ຕອບສະ ຫນອງ ທາງດ້ານອາລົມ ດ້ວຍຄວາມອ້ອນຊ້ອຍ,ອອນຊອນ,ວັ່ງເວ,ເວດທະນາ. ທ່ານຫງວຽຊວນແທ່ງ ຜູ້ມາຊົມລາຍການໃຫ້ຮູ້ວ່າ :
“ ບັນດາລາຍການສະແດງທັງໝົດນີ້ ກໍລ້ວນແຕ່ແມ່ນອາຫານທາງດ້ານຈິດໃຈທີ່ດີທີ່ມ່ວນທີ່ສຸດ. ດົນແລ້ວ, ຂ້າພະເຈົ້າຈຶ່ງໄດ້ຊົມ ແລະ ຟັງລາຍການທີ່ສ້າງຄວາມປະທັບໃຈທີ່ສຸດແກ່ຂ້າພະເຈົ້າ, ອັນໄດ້ເຮັດໃຫ້ຂ້າພະເຈົ້າຫວນຄືນຄາວຍັງນ້ອຍໄປຟັງຂັບສຳ ”. ສ່ວນ ທ້າວຫງວຽນເທ້ແບກ ຜູ້ມາຊົມລາຍການເປີດເຜີຍວ່າ :
“ ຂ້າພະເຈົ້າມີຄວາມຕື້ນຕັນໃຈທີ່ສຸດເມື່ອໄດ້ຮັບຊົມລາຍການສະແດງມື້ນີ້, ຊຶ່ງໄດ້ຊ່ວຍຂ້າພະເຈົາຮູ້ໄດ້ຫຼາຍສິ່ງຫຼາຍຢ່າ່ງກ່ຽວກັບວັດທະນະທຳຂອງຊາວຫວຽດນາມ. ລາຍການສະແດງນີ້ ເຮັດໃຫ້ຂ້າພະເຈົ້າປະທັບໃຈທີ່ສຸດ ”
ເບິ່ງຄືວ່າບໍ່ມີຄວາມມຸ່ງຫວັງໃດໆເໜືອກວ່າເລື່ອງປຸກລຸກໃນຈິດໃຈຂອງຜູ້ນິຍົມດົນຕີພື້ນເມືອງ ກ່ຽວກັບສິ່ງທີ່ລຽບງ່າຍ, ຄວາມຮັກແພງມະນຸດດ້ວຍກັນ. ເພາະສະນັ້ນ, ບັນດານັກສິລະປີນໄດ້ທຳການສະແດງດ້ວຍຄວາມພະຍາຍາມຢ່າງສຸດຂີດເພື່ອນຳສຽງຂັບລຳທຳເພງເຈືອຈານເຂົ້າກັບບັນຍາກາດທີ່ຟົດຟື້ນມ່ວນຊື່ນ.