ລາຍການສະແດງຂັບແທນທີ່ພິທີອັດງານມະໂຫລານສະແດງ
ສິລະປະຂັບແທນ-ພິນຕິ້ງຄັ້ງທີ່ 4 ປີ 2012 ຢູ່ແຂວງຫຼ້າງເຊີນ
(ພາບ: vanhoathethao.vn)
|
ງານມະໂຫລານສະແດງສິລະປະຂັບແທນ-ພິນຕິ້ງຄັ້ງທີ່ 4 ປີ 2012 ຊຶ່ງຫາກໍຖືກ ດຳເນີນຢູ່ແຂວງຫຼ້າງເຊີນ, ໄດ້ເຕົ້າໂຮມສິລະປະຄົບທຸກປະເພດທີ່ເປັນເອກະລັກສະເພາະຂອງເຜົ່າໄຕ, ນຸ່ງ ທີ່ດຳລົງຊີວິດຢູ່ເຂດທາງທິດເໜືອຂອງຫວຽດນາມຄື ຮ່າຢາງ, ກາວບັງ, ຫຼ້າງເຊີນ, ຕວຽນກວາງ..... ງານມະໂຫລານກໍແມ່ນໂອກາດເພື່ອແນະນຳບັນດາຄຸນຄ່າວັດທະນະທຳຂັບແທນ, ພິນຕິ້ງຂອງພໍ່ແມ່ປະຊາຊົນ ເຜົ່າໄຕ, ນຸ່ງ, ໄຕ ດ້ວຍບັນດາຮູບພາບກ່ຽວກັບພິທີບູຊາ, ຊຸດພິນຕິ້ງພື້ນເມືອງ, ບັນດາຮູບແບບເຮືອນຮ້ານຂອງພໍ່ແມ່ປະຊາຊົນເຜົ່າໄຕ, ຊຸດປຶ້ມອ່ານດ້ວຍຕົວໜັງສືຫວຽດເດີມ. ງານມະໂມລານແມ່ນພາບພົດທີ່ຫຍໍ້ເຂົ້າຂອງສາງມໍລະດົກວັດທະນະທຳທີ່ເປັນເອກະລັກສະເພາະເພື່ອແນະນຳໃຫ້ແກ່ມວນຊົນ.
ສິລະປະຂັບແທນ-ພິນຕິ້ງແມ່ນປະເພດວັດທະນະທຳພື້ນເມືອງທີ່ເປັນເອກະລັກສະເພາະຢູ່ເຂດພູສູງທາງທິດເໜືອຂອງຫວຽດນາມ. ຜ່ານການເວລາ, ຂັບແທນໄດ້ກາຍເປັນອາຫານທາງດ້ານຈິດໃຈທີ່ຂາດບໍ່ໄດ້ໃນຊີວິດວັດທະ ນະທຳຂອງພໍ່ແມ່ປະຊາຊົນຢູ່ແຫ່ງນິ້ີ້. ຕາມຄວາມສຳນຶກພື້ນເມືອງແລ້ວ, ແທນ ໝາຍເຖິງ“ສະຫວັນ”, ຊຶ່ງໄດ້ຮັບຖືວ່າແມ່ນທຳນອງເພງຂອງເທວະດາບົນສະຫວັນຖ່າຍທອດໃຫ້. ຍ້ອນເຫດນີ້ເອງ, ໃນຊີວິດຂອງຊາວເຜົ່າໄຕບູຮານ, ຂັບແທນເຄີຍຖືກສະແດງໃນບັນດາເຫດການທີ່ສຳຄັນຍິ່ງ ຫຼືໃນພິທີສູ່ຂວັນ, ພິທີພາວະນາໃຫ້ປະເທດຊາດມີຄວາມສະຫງົບ, ປະຊາຊົນມີຄວາມອີ່ມໜຳສຳລານ, ຜາສຸກ. ພໍ່ແມ່ປະຊາຊົນເຜົ່າໄຕມີຄວາມສຳນຶກວ່າ ບັນດາທຳນອງຂັບແທນໄດ້ຊ່ວຍສົ່ງຄຳໄຫວ້ວອນຂຶ້ນເຖິງເທວະດາ. ໂດຍແມ່ນປະເພດສິລະປະຂັບແທນ-ພິນຕິ້ງອັນດຽວກັນ, ແຕ່ຢູ່ແຕ່ລະທ້ອງຖິ່ນພັດມີຄວາມເປັນເອກະລັກສະເພາະຂອງໃຜຂອງລາວ ແລະ ພຽງແຕ່ຊາວທ້ອງຖິ່ນຢູ່ເຂດນັ້ນ ຈຶ່ງສາມາດສະແດງໄດ້. ທ່ານ Hoang Duc Hau ຫົວໜ້າກົມວັດທະນະທຳຊົນເຜົ່າໃຫ້ຮູ້ວ່າ :
“ ໃນສິລະປະຂັບແທນ ຍັງມີຟ້ອນພ້ອມດ້ວຍ. ສຳລັບດ້ານດົນຕີນັ້ນ, ບໍ່ພຽງແຕ່ມີສຽງພິນຕິ້ງເທົ່ານັ້ນ, ຫາກຍັງມີສຽງຂອງກະດິງ, ຊ້ຳບໍໜຳກໍຍັງມີສຽງວີອີກດ້ວຍ. ສິລະປະຂັບແທນແມ່ນມີມາແຕ່ດົນນານ ແລະ ມັນໄດ້ຕິດພັນກັບຊີວິດຈິດວິນຍານຂອງພໍ່ແມ່ປະຊາຊົນ. ເມື່ອລະດູການຜະລິດໄດ້ຮັບຜົນດີ, ຊາວທ້ອງຖິ່ນກໍໄດ້ຈັດພິທີບູຊາ, ສະແດງສິລະປະຂັບແທນເພື່ອຊົມເຊີຍ. ຍາມຕົ້ນປີໃໝ່, ເຂົາເຈົ້າກໍທຳພິທີບູຊາ, ສະແດງຂັບແທນເພື່ອພາວະນາໃຫ້ມີຄວາມສະຫງົບສຸກ, ມີອາຍຸຍືນຍາວ. ທາງດ້ານເນື້ອໃນແມ່ນອຸດົມສົມບູນ, ມີຫຼາຍປັດໄຈທີ່ຕັ້ງໜ້າ, ສ່ວນທາງດ້ານຮູບການສະແດງກໍມີຫຼາຍຮູບຫຼາຍສີ ”
ງານມະໂຫລານສະແດງສິລະປະຂັບແທນ-ພິນຕິ້ງຄັ້ງທີ່ 4 ໄດ້ດຶງດູດການເຂົ້າຮ່ວມຂອງນັກສິລະປິນຫຼາຍຄົນທີ່ມາຈາກ 10 ແຂວງ ນະຄອນທາງພາກເໜືອຫວຽດນາມ. ນີ້ແມ່ນໂອກາດເພື່ອເຊີດຊູ, ອະນຸລັກຮັກສາ, ພັດທະນາປະເພດສິລະປະພື້ນເມືອງທີ່ເປັນເອກະລັກສະເພາະຊຶ່ງໄດ້ຕິດພັນກັບການດຳລົງຊີວິດ ຂອງປະຊາຊົນເຜົ່ານຸ່ງ, ໄຕ, ໄທ ນັບແຕ່ໃດໆມາ, ປະກອບສ່ວນຮັບໃຊ້ຊີວິດວັດທະນະທຳທາງດ້ານຈິດໃຈຂອງປະຊາຊົນບັນດາເຂດທີ່ມີສິລະປະຂັບແທນ -ພິນຕິ້ງ, ພ້ອມກັນນັ້ນ, ກໍເຮັດໃຫ້ຊີວິດສັງຄົມເພີ່ມຄວາມອຸດົມສົມບູນ, ສ້າງສະພາບແວດລ້ອມດ້ານວັດທະນະທຳທີ່ສົດໃສ, ກ້າວໜ້າ. ຜ່ານງານມະໂຫລານຄັ້ງນີ້, ກໍເພືອ່ແນໃສ່ກະກຽມກ້າວໄປເຖິງການສ້າງສຳເນົາເອກະສານເພື່ອຍືນສະເໜີຕໍ່ອົງການ UNESCO ຮັບຮອງ ສິລະປະຂັບແທນ-ພິນຕິ້ງແມ່ນມໍລະດົກວັດທະນະທຳບໍ່ມີຮູບຮ່າງຂອງມວນມະນຸດ. ທີ່ພິທີໄຂງານມະໂຫລານ, ທ່ານ Vi Van Thanh ປະທານຄະນະກຳມະການປະຊາຊົນແຂວງຫຼ້າງເຊີນໃຫ້ຮູ້ວ່າ:
“ງານມະໂຫລານສະແດງສິລະປະຂັບແທນ-ພິນຕິ້ງໄດ້ດຶງດູດການເຂົ້າຮ່ວມຂອງນັກສິລະປິນ 300 ກ່ວາຄົນທີ່ມາຈາກ 10 ແຂວງ ນະຄອນ. ນີ້ກໍແມ່ນໜຶ່ງໃນບັນດາການເຄື່ອນໄຫວເພືອ່ອະນຸລັກຮັກສາ ແລະ ເສີມຂະຫຍາຍຄຸນຄ່າ ວັດທະນະທຳຂອງບັນດາເຜົ່າ. ນີ້ກໍແມ່ນໂອກາດເພື່ອໃຫ້ບັນດານັກສິລະປິນໄດ້ພົບປະແລກປ່ຽນກ່ຽວກັບບັນດາຈຸດວັດທະນະທຳທີ່ເປັນເອກະລັກສະເພາະຂອງແຕ່ລະທ້ອງຖິ່ນ. ພ້ອມກັນນັ້ນ, ນີ້ຍັງແມ່ນໂອກາດເພື່ອເຊີດຊູ ແລະ ແນະນຳ ສິລະປະຂັບແທນໃຫ້ແກ່ແຂກຄົນທັງຢູ່ພາຍໃນ ແລະ ຕ່າງປະເທດ ”
ທີ່ງານມະໂຫລານ, ບັນດານັກສິລະປິນຂອງຄະນະສິລະປະກອນແຂວງຫຼ້າງເຊີນ ໄດ້ເລົ່າກ່ຽວກັບຕົ້ນກຳເນີດຂອງສິລະປະຂັບແທນຜ່ານສຽງຈັງຫວະທີ່ອ່ອນຊອນຂອງສຽງແທນ ແລະ ພິນຕິ້ງ. ຕໍ່ຈາກນັ້ນ, ປະຊາຊົນແຂວງຫຼ້າງເຊີນ ກໍຄືປະຊາຊົນໃນທົ່ວປະເທດໄດ້ມີໂອກາດຊອກຮູ້ກ່ຽວກັບຄວາມຄ້າຍຄືກັນ ແລະ ແຕກຕ່າງກັນຂອງທຳນອງຂັບແທນລະຫວ່າງບັນດາເຜົ່າໃນລາຍການສະແດງ “ ເຕົ້າໂຮມກັນຈາກສາລະທິດ ”
ປະຈຸບັນ, ສິລະປະຂັບແທນພວມຄົງຕົວດ້ວຍ 2ປະເພດຕົ້ນຕໍຄືຂັບແທນບູຮານ ແລະ ຂັບແທນທັນສະໄໝ. ສິ່ງທີ່ສຳຄັນແມ່ນຕ້ອງອະນຸລັກຮັກສາ ແລະ ເສີມຂະຫຍາຍ ສິລະປະການສະແດງຂັບແທນ. ສຳລັບການປ່ຽນແປງໃໝ່ ແລະ ປັບປຸງເປັນຂັບແທນທັນສະໄໝນັ້ນ, ໝາຍຄວາມວ່າ ບໍ່ແມ່ນການປັດເຂ່ຍປັດໄຈພິທີກຳ ຍ້ອນປັດໄຈນີ້ເອງໄດ້ເຮັດໃຫ້ມະນຸດມີຄວາມຜູກພັນ ແລະ ເມົາມົວກັບ ສິລະປະປະເພດນີ້. ງານມະໂຫລານສະແດງສິລະປະຂັບແທນ-ພິນຕິ້ງຄັ້ງທີ່ 4 ຖືກຈັດຂຶ້ນຢູ່ແຂວງຫຼ້າງເຊີນ ກໍແມ່ນໜຶ່ງໃນບັນດາການເຄື່ອນໄຫວກ້າວໄປເຖິງການສ້າງສຳເນົາເອກະສານໃຫ້ສົມບູນແບບເພື່ອຍືນສະເໜີຕໍ່ອົງການ UNESCO ຮັບຮອງສິລະປະຂັບແທນ-ພິນຕິ້ງແມ່ນມໍລະດົກວັດທະນະທຳບໍ່ມີຮູບຮ່າງຂອງມວນມະນຸດ.