(vovworld)- ຄະນະຄຸ້ມຄອງຄຸ້ມຖະຫນົນເກົ່າ ຮ່າໂນ້ຍ ຫາກໍສົມທົບກັບກຸ່ມຈິດຕະກອນສູນ UNESCO ວິຈິດສິນ ຮ່າໂນ້ຍ ຈັດຕັ້ງງານວາງສະແດງວິຈິດສິນ ດ້ວຍຫົວຂໍ້ “ດອກບົວ” ຢູ່ ສູນພົວພັນແລກປ່ຽນວັດທະນະທຳຄຸ້ມຖະຫນົນເກົ່າຮ່າໂນ້ຍ. ຫົວຂໍ້ “ດອກບົວ” ມີຄວາມໝາຍເຊີດຊູດອກໄມ້ຊະນິດຫນຶ່ງທີ່ຕິດພັນກັບຮູບພາບປະທານໂຮ່ຈິມີນ ແລະ ປະເທດຫວຽດນາມ.
ງານວາງສະແດງພາບແຕ້ມດອກບົວ
ພາບ:vannghequandoi
|
ງານວາງສະແດງພາບແຕ້ມ 42 ແຜ່ນຂອງຈິດຕະກອນ 4 ທ່ານ ສັງກັດສູນ UNESCO ວິຈິດສິນ ຮ່າໂນ້ຍຄື: ຫວູຕວຽນ, ຟານທິແທງມາຍ, ດັ້ງດີງເຫງີ, ບູ່ຍຈ້ອງຢື. ພາບແຕ່ລະແຜ່ນແມ່ນມູມມອງທີ່ເປັນເອກະລັກສະເພາະຂອງດອກບົວດ້ວຍນຳມາ ໃຫ້ຜູ້ຊົມມີຄວາມຮູ້ສຶກຈັບອົກຈັບໃຈທີ່ສຸດ. ກໍເຊັ່ນດຽວກັນກັບບົດກະວີ, ຈິດຕະກຳ, ຫົວເລື່ອງກ່ຽວກັບດອກບົວຍາມໃດກໍສ້າງຄວາມດຶງດູດໃຈໃຫ້ນັກຈິດຕະກອນຫລາຍຄົນໃນການແຕ້ມພາບ. ສະນັ້ນ ຈິດຕະກອນຜູ້ໃດກໍລ້ວນແຕ່ມີພາບດອກບົວຈຳນວນຫນຶ່ງ. ແຕ່ ຈິດຕະກອນ 4 ທ່ານດັ່ງກ່າວແມ່ນຜູ້ແຕ້ມພາບດອກບົວຫລາຍກວ່າໝູ່. ຈິດຕະກອນ ຫວູຕວຽນ ເວົ້າວ່າ: ໃນຈຳນວນພາບແຕ້ມຫລາຍແຜ່ນທີ່ທ່ານແຕ້ມ ດອກບົວແມ່ນຫົວເລື່ອງທີ່ທ່ານມັກແຕ້ມທີ່ສຸດ. ປະຈຸບັນ ທ່ານໄດ້ແຕ້ມພາບກ່ຽວກັບດອກບົວປະມານ 1000 ແຜ່ນ. ທີ່ງານວາງສະແດງຄັ້ງນີ້ ທ່ານເລືອກເຟັ້ນ 16 ແຜ່ນທີ່ພົ້ນເດັ່ນເພື່ອນຳມາແນະນຳໃຫ້ສາທາລະນະຊົນ. ຈິດຕະກອນ ຫວູຕວຽນ ແບ່ງປັນວ່າ:
“ໃນໂອກາດສະເຫລີມສະຫລອງວັນຄ້າຍວັນເກີດປະທານໂຮ່ຈິມີນ, ຫົວເລື່ອງກ່ຽວກັບດອກບົວແມ່ນເໝາະສົມທີ່ສຸດເພື່ອເວົ້າເຖິງເພີ່ນ. ເພາະວ່າ ດອກບົວ ແມ່ນສັນຍາລັກໃຫ້ຈັນຍາບັນ, ຄວາມປອດໄສ, ສຸພາບຮຽບຮ້ອຍ, ຜ່ານນັ້ນ ແມ່ນສ່ອງແສງໃຫ້ເຫັນບຸກຄະລີກະພາບອັນສູງສົ່ງຂອງປະທານໂຮ່ຈິມີນ.”
ຊຸດພາບແຕ້ມດອກບົວດ້ວຍຫົວເລື່ອງ “ລະດູແຫ່ງຄວາມຮັກ” ຂອງຈິດຕະກອນ ຫວູຕວຽນ ທີ່ວາງສະແດງຄັ້ງນີ້ໄດ້ສ້າງຄວາມປະທັບໃຈຕໍ່ຜູ້ຊົມ. ຈິດຕະກອນຫວູຕວຽນ ໄດ້ຈັດງານວາງສະແດງພາບແຕ້ມຂອງຕົນຫລາຍຄັ້ງສຳເລັດຜົນແລ້ວ. ແຕ່ບັນດາພາບແຕ້ມກ່ຽວກັບຫົວເລື່ອງ“ລະດູແຫ່ງຄວາມຮັກ” ແມ່ນພັນລະນາເຖິງຄວາມຂຽວສົດງົດງາມຂອງສະດອກບົວ ນຳມາໃຫ້ຜູ້ຊົມເຫັນໄດ້ຄວາມງາມທີ່ເປັນຫລາຍຮູບຫລາຍແບບຂອງດອກບົວ. ຈິດຕະກອນ ຫວູຕວຽນ ເວົ້າຄວາມໃນໃຈສູ່ຟັງວ່າ:
“ສຳລັບຂ້າພະເຈົ້າແລ້ວ, ພາບແຕ້ມແຕ່ລະແຜ່ນແມ່ນເວົ້າເຖິງຮູບປະພັນໃດຫນຶ່ງ ແລະ ດອກບົວແຕ່ລະດອກນັ້ນ ຄືດັ່ງຮູບຄົນຜູ້ຫນຶ່ງ. ໃນພາບແຕ້ມແຜ່ນຫນຶ່ງມີດອກບົວຫລາຍດອກ ກໍເຊັ່ນດຽວກັນກັບຮູບພາບມີຫລາຍຄົນພວມຢູ່ຮ່ວມກັນ, ເຂົາເຈົ້າສະແດງຄວາມຮັກແພງເຊິ່ງກັນ ແລະກັນ, ອຸ້ມຊູຊ່ວຍເຫລືອກັນ. ນັ້ນແມ່ນສິ່ງທີ່ຂ້າພະເຈົ້າຢາກຝາກຝັງໃນພາບແຕ້ມແຜ່ນຫນຶ່ງ.”
ນາງສາວ ແລະ ດອກບົວ
ພາບ:dantri
|
ສຳລັບ ຈິດຕະກອນ ດັ້ງດີງເຫງີ ແລ້ວ, ການເລືອກເຟັ້ນບ່ອນແຕ້ມພາບດອກບົວຂອງຕົນ ແມ່ນເຮືອນຫລັງຫນຶ່ງຢູ່ແຄມຫນອງ ໂຮ່ໄຕ, ຊື່ງແມ່ນສະຖານທີ່ມີດອກບົວຫລາຍກວ່າໝູ່ ພິເສດໃນລະດູດອກບົວ ໄດ້ສົ່ງກີ່ນຫອມຫວນ ໄປທົ່ວນະຄອນ. ສະນັ້ນ ພາບແຕ້ມດອກບົວຂອງທ່ານ ສ່ວນຫລາຍແມ່ນພັນລະນາດອກບົວສີກຸລາບ.
ສ່ວນຈິດຕະກອນ ບູ່ຍຈ້ອງຢື ພາບທີ່ທ່ານແຕ້ມ ສ່ວນຫລາຍແມ່ນພາບສີຄັດມັນ. ບັນດາພາບແຕ້ມທີ່ທ່ານນຳມາແນະນຳໃນງານວາງສະແດງຄັ້ງນີ້ແມ່ນແຕ້ມຕາມຫົວເລື່ອງຕ່າງໆຄື: ດອກບົວຂຽວ, ດອກບົວຂາວ, ດອກບົວສີອອ່ນ, ດອກບົວ ແລະ ປາ, ດອກບົວໃນລະດູແລ້ງ , ສະດອກບົວ. ນັກຈິດຕະກອນຍິງຜູ້ຫນຶ່ງດຽວທີ່ເຂົ້າຮ່ວມງານວາງສະແດງຄັ້ງນີ້ ແມ່ນຈິດຕະກອນ ຟານທິແທງມາຍ ດ້ວຍບັນດາພາບແຕ້ມສີຄັດມັນທີ່ຈັບອົກຈັບໃຈ. ຫົວເລື່ອງທີ່ຈິດຕະກອນຍິງເລືອກເຟັ້ນແມ່ນ “ດອກບົວໃນສວນ”, “ສະດອກບົວ”, “ດອກບົວເດືອນ 5”, “ດອກບົວລະດູແລ້ງ”, “ດອກບົວແລະນາງສາວ”. ພາບແຕ້ມ ທັງໝົດນີ້ແມ່ນເວົ້າເຖິງອາລົມຈິດ ແລະ ຄວາມງາມແບບເລີບແລບ. ຮອງສາດສະດາຈານ, ດຣ ຫງວຽນວັນຮູຍ, ຮອງຜູ້ອຳນວຍການສູນຄົ້ນຄ້ວາ ແລະ ເສີມຂະຫຍາຍຄຸນຄ່າມໍລະດົກວັດທະນະທຳ ແບ່ງປັນວ່າ:
“ຂ້າພະເຈົ້າໄດ້ຊົມພາບແຕ້ມກ່ຽວກັບດອກບົວທັງໝົດໃນງານວາງສະແດງຄັ້ງນີ້, ຂ້າພະເຈົ້າເຫັນວ່າ ມັນມີຫລາຍຮູບຫລາຍແບບທີ່ສຸດ. ບັນດາພາບແຕ້ມລ້ວນແຕ່ສະແດງໃຫ້ເຫັນຄວາມຮູ້ສຶກ, ອາລົມຈິດຂອງຈິດຕະກອນທີ່ມີຕໍ່ດອກບົວ ແລະ ວິທີແຕ້ມຂອງຈິດຕະກອນແຕ່ລະຄົນສະແດງອອກຜ່ານພາບແຕ້ມຢ່າງເລິກເຊິ່ງທີ່ສຸດ. ຜ່ານບັນດາພາບແຕ້ມດອກບົວນີ້ ໄດ້ເຮັດໃຫ້ຜູ້ຊົມມີຄວາມຮູ້ສຶກຫລາຍຢ່າງ ພິເສດ ແມ່ນຊາວຫວຽດນາມ ຍາມໃດກໍເອົາຮູບພາບດອກບົວຕິດພັນກັບປະທານໂຮ່ຈິມີນ. ແນ່ນອນວ່າ ທຸກຄົນເມື່ອມາຊົມງານວາງສະແດງຄັ້ງນີ້ ລ້ວນແຕ່ມີຄວາມຮູ້ສຶກໃຫມ່ກ່ຽວກັບຮ່າໂນ້ຍ, ກ່ຽວກັບດອກບົວ ແລະ ເຂົ້າໃຈໄດ້ວ່າ ຊາວຫວຽດນາມ ນິຍົມດອກບົວຄືແນວໃດ.”
ຈິດຕະກອນ 4 ຄົນທີ່ເຂົ້າຮ່ວມງານວາງສະແດງດອກບົວຄັ້ງນີ້ ລ້ວນແຕ່ນຳມາໃຫ້ຜູ້ຊົມບັນດາຊຸດພາບແຕ້ມດອກບົວທີ່ງາມຕາ, ເປັນຫລາຍຮູບຫລາຍສີ ແລະ ສະແດງໃຫ້ເຫັນຄວາມເມົາມົວ, ຄວາມປາດຖະຫນາຂອງຕົນຢາກຝາກຝັງຜ່ານຮູບດອກບົວ.