ບົດລະຄອນ “ ວິນຍານ ເຈືອງບາ ຮ່າງກາຍ ຮ່າງ4ຖີດ” ຂອງລິວກວາງວູ້ ແມ່ນຈຸດສູງຂອງເວທີ່ສະແດງຫວຽດນາມ
(ພາບ:dantri.com)
|
ໃນຊຸມວັນຕົ້ນເດືອນ 9 ຢູ່ຮ່າໂນ້ຍ, ມີເຫດການສະແດງບົນເວທີ່ພິເສດໄດ້ຖືກ ຈັດຂຶ້ນ, ນັ້ນແມ່ນງານສະແດງບັນດາບົດລະຄອນຂອງນັກແຕ່ງ ລິວກວາງວູ້. ພ້ອມກັບບັນດາການເຄື່ອນໄຫວ ສະເຫຼີມສະຫຼອງ 25 ປີແຫ່ງວັນເຖິງແກ່ ມໍລະນະກຳຂອງທ່ານ, ມີ 13 ບົດລະຄອນຂອງທ່ານໄດ້ຖືກບັນດາຄະນະສິລະປະກອນສະແດງຕໍ່ໜ້າມວນຊົນຮ່າໂນ້ຍ. 1/4 ຂອງສະຕະວັດໄດ້ຜ່ານພົ້ນໄປ, ແຕ່ບັນດາບົດລະຄອນເຊຶ່ງ ລິວກວາງວູ້ ປະໄວ້ໃຫ້ນັ້ນ ຍັງຄົງມີລັກສະນະສົດໆ ຮ້ອນໆ ແລະ ມີຄວາມດຶງດູດໃຈມວນຊົນ. ງານສະແດງບັນດາ ບົດລະຄອນຂອງ ລິວກວາງວູ້ ໂດຍສະມາຄົມ ນັກສິລະປີນສະແດງບົນເວທີ່ ຈັດຂຶ້ນ ເພື່ອແນໃສ່ອາໄລຫາ 25 ປີແຫ່ງວັນເຖິງແກ່ມໍ ລະນະກຳຂອງນັກແຕ່ງບົດລະຄອນທີ່ດີເດັ່ນນີ້. ງານສະແດງຈະດຳເນີນແຕ່ວັນທີ 9 ຫາ 16/9 ຢູ່ຮ່າໂນ້ຍ, ຊຶ່ງໄດ້ດຶງດູດການເຂົ້າຮ່ວມຂອງ 9 ຄະນະສິລະປະກອນຄື: ໂຮງລະຄອນຫວຽດນາມ, ໂຮງລະຄອນຮ່າໂນ້ຍ, ໂຮງລະຄອນໄວໜຸ່ມ, ຂັບແຈວຮ່າໂນ້ຍ, ຂັບກາຍເລືອງ ຫາຍຟ່ອງ, ລະຄອນ ນາມດິ້ງ, ລະຄອນ ເຫ້ວ...ໃນງານແດງລະຄອນຄັ້ງນີ້ ມີເຖິງ 12 ບົດລະຄອນໂດຍອີງໃສ່ 9 ບົດລະຄອນຂອງນັກແຕ່ງ ລິວກວາງວູ້ ຊຶ່ງແມ່ນປະເພດລະຄອນ, ລະຄອນແຈວ, ລະຄອນກາຍເລືອງ...ໃນນັ້ນມີບົດລະຄອນທີ່ມີຊື່ສຽງທັງຢູ່ພາຍໃນ ແລະ ຕ່າງປະເທດຄື : “ ວິນຍານ ເຈືອງບາ ຮ່າງກາຍ ຮ່າງຖີດ” ; “ ຫົວໃຈສັດຊື່ບໍລິສຸດ” ; “ ເຈົ້າບໍ່ແມ່ນພໍ່ຂ້ອຍ”; “ ລະດູຮ້ອນສຸດທ້າຍ”; “ ຄຳປະຕິຍານເທື່ອທີ 9”... ມີຫຼາຍ ບົດລະຄອນ ຂອງ ລິວກວາງວູ້ ໄດ້ຖືກແຕ່ງຄືນ, ແຕ່ມີການປະສານສົມທົບກັບປັດໄຈຮູບເງົາ, ທາງດ້ານພາສາກໍໃໝ່ອຽມ ອັນໄດ້ເຮັດໃຫ້ເພີ່ມປະສິດທິຜົນ, ສົ່ງຜົນກະທົບຕໍ່ຜູ້ຊົມ. ໂດຍແມ່ນບັນດາເລື່ອງລາວທີ່ເລີ່ມມາຈາກຊີວິດຕົວຈິງ,ບັນດາບົດຮຽນກ່ຽວກັບຄວາມສັດຊື່, ກ້າຫານ, ການຕໍ່ສູ້ຫຼືການຫຼົບຫຼີກຕໍ່ສິ່ງທີ່ຊົ່ວຮ້າຍ, ຜິດພາດ...
ເຖິງວ່າຖືກແຕ່ງໃນຊຸມປີ 70, 80 ຂອງສະຕະວັດກ່ອນ, ແຕ່ບົດລະຄອນ ຂອງ ລິວກວາງວູ້ ຍັງຊ້ອນແຝງບັນດາການທຳນາຍ, ບັນດາບັນຫາສົດໆຮ້ອນໆມາຮອດທຸກວັນນີ້. ສິ່ງນີ້ກໍເປັນຢັ້ງຢືນຄວາມເກັ່ງກ້າສາມາດຂອງ ລິວກວາງວູ້. ນັກສິລະປີນປະຊາຊົນ ຢ້ວານເຈົາ, ອະດີດຜູ້ອຳນວນການ ໂຮງລະຄອນຫວຽດນາມ ຊຶ່ງແມ່ນເພື່ອນຮ່ວມງານຂອງ ລິວກວາງວູ້ ໃນການແຕ່ງຫຼາຍບົດລະຄອນ ໃຫ້ຂໍ້ສັງເກດວ່າ :
“ ນັກແຕ່ງບົດລະຄອນ ລິວກວາງວູ້ ແມ່ນໜຶ່ງໃນບັນດາແບບຢ່າງດີເດັ່ນໃນເວທີ່ການສະແດງຍຸກປະຈຸບັນຂອງຫວຽດນາມ. ຂ້າພະເຈົ້າຄິດວ່າ ມາຮອດຈຸດເວລານີ້, ເບິ່ງຄືວ່າ ຍັງບໍ່ທັນມີ ນັກແຕ່ງບົດລະຄອນໃດ ທີ່ສາມາດທົດແທນບົດບາດຂອງ ລິວກວາງວູ້ ທີ່ໄດ້ປະກອບສ່ວນເຂົ້າໃນພື້ນຖານສິລະປະການສະແດງບົນເວທີ່ຍຸກປະຈຸບັນຂອງຫວຽດນາມ”
ໃນງານສະແດງລະຄອນທີ່ແກ່ຍາວເປັນເວລາອາທິດໜຶ່ງ, ບັນດາ ບົດລະຄອນຂອງ ລິວກວາງວູ້ ຍາມໃດກໍດຶງດູດຜູ້ມາຊົມຢ່າງຫຼວງຫຼາຍ. ບັນດາບົດລະຄອນໄດ້ນຳມາເຊິ່ງຄວາມຮູ້ສຶກທີ່ແຕກຕ່າງກັນໃຫ້ແກ່ຜູ້ຊົມໃນທຸກເພດທຸກໄວ. ຖ້າຫາກວ່າ ບົດລະຄອນ : “ ວິນຍານ ເຈືອງບາ ຮ່າງກາຍ ຮ່າງຖີດ” ແມ່ນສະແດງໃຫ້ເຫັນການຕໍ່ສູ້ລະຫວ່າງວິນຍານກັບຮ່າງກາຍ, ລະຫວ່າງຄວາມໂລພາ ແລະ ອຸດົມຄະຕິເພື່ອໃຫ້ມະນຸດໄດ້ກັບຄືນສູ່ທາດແທ້ຂອງຕົນນັ້ນ, ບົດລະຄອນ“ ເຈົ້າບໍ່ແມ່ນພໍ່ຂ້ອຍ” ພັດສ່ອງແສງບັນດາບັນຫາໃນສາຍພົວພັນຄອບຄົວ, ບັນດາການປ່ຽນແປງທາງດ້ານສິນລະທຳສັງຄົມ, ການເສືອ່ມທາດຂາດຄຸນເມື່ອນັບຖືເງິນຕາ. ທ່ານ ເຈືອງຍ້ວນ ຜູ້ອຳນວນການໂຮງລະຄອນໄວໜຸ່ມ ໃຫ້ຂໍ້ສັງເກດວ່າ :
“ ມາຮອດປະຈຸບັນ, ມີຫຼາຍໂຮງລະຄອນ, ຫຼາຍຫົວໜ່ວຍອາຊີບຍັງຄົງສະແດງບົດລະຄອນຂອງ ລິວກວາງວູ້. ມັນໄດ້ພິສູດໃຫ້ເຫັນວ່າ ລົມຫາຍໃຈແຫ່ງຊີວິດ ແລະ ບັນດາບັນຫາຊອ່ງບັນດາ ບົດລະຄອນໄດ້ສ່ອງແສງ ແມ່ນຍັງຄົງໄກ້ຊິດແຕດແທດກັບມວນຊົນ. ທາງດ້ານປັດຊະຍາ, ແນວຄິດຂອງ ບົດລະຄອນຂອງ ລິວກວາງວູ້ ລ້ວນແຕ່ມີລັກສະນະວັດທະນະທຳມະນຸດ ແລະ ຍັງມີປັດໄຈຕໍ່ສູ້ຢ່າງຂ້ຽວຂາດຕໍ່ໜ້າສິ່ງທີ່ຊົ່ວຮ້າຍ, ຜິດພາດ ເພື່ອນຳມາເຊິ່ງຄວາມຍຸດຕິທຳໃນສັງຄົມ”
ໂດຍໄດ້ເຖິງແກ່ມໍລະນະກຳເມື່ອມີອາຍຸພຽງ 41 ປີເທົານັ້ນ, ຍ້ອນອຸບັດຕິເຫດທາງຄົມມະນາຄົມ, ລິວກວາງວູ້ ໄດ້ປະໄວ້ໃຫ້ເວທີ່ສະແດງຫວຽດນາມ ກ່ວາ 50 ບົດລະຄອນດ້ວຍທຸກປະເພດ, ໃນນັ້ນມີບັນດາບົດລະຄອນໄດ້ຮັບຖືວ່າແມ່ນຈຸດສູງຂອງເວທີ່ສະແດງຫວຽດນາມຄື ບົດລະຄອນ “ ວິນຍານ ເຈືອງບາ ຮ່າງກາຍ ຮ່າງຖີດ”. ນັກສິລະປີນປະຊາຊົນ ຢ້ວານເຈົາ ໃຫ້ຮູ້ອີກວ່າ :
“ ບົດລະຄອນນີ້, ເມືອ່ພວກຂ້າພະເຈົ້ານຳໄປສະແດງຢູ່ງານສະແດງບົນເວທີ່ຢູ່ມົດສະກູເມືອ່ປີ 1986, ເມືອ່ສະແດງແລ້ວໆ, ມີນັກວິຈານຄົນໜຶ່ງຂອງເຢຍລະມັນໄດ້ໃຫ້ຂໍ້ສັງເກດວ່າ : ນີ້ແມ່ນລູກລະເບີດຂອງງານສະແດງ, ແລະ ບົດລະຄອນໄດ້ສ້າງຊື່ສຽງຮຽງນາມໃຫ້ແກ່ສິລະປະສະແດງລະຄອນຂອງຫວຽດນາມ. ໄລຍະຕໍ່ມາ, ພວກຂ້າພະເຈົ້າກໍນຳ ບົດລະຄອນນີ້ໄປສະແດງຢູ່ອາເມລິກາ, ຢູ່ແຫ່ງໃດໃນປະເທດນີ້ ກໍລ້ວນແຕ່ຕອບສະໜອງຢ່າງສຸດໃຈ ”
ງານສະແດງບັນດາບົດລະຄອນຂອງ ລິວກວາງວູ້ ຄັ້ງນີ້ ໄດ້ຢັ້ງຢືນອີກເທື່ອໜຶ່ງກ່ຽວກັບລະດັບ, ຄວາມເກັ່ງກ້າສາມາດຂອງນັກແຕ່ງບົດລະຄອນ ລິວກວາງວູ້. ໃນໄລຍະເຄື່ອນໄຫວປະດິດຄິດແຕ່ງ ບົດລະຄອນຂອງຕົນ, ລິວກວາງວູ້ ໄດ້ປະກອບສ່ວນນຳພື້ນຖານການສະແດງບົນເວທີ່ຂອງຫວຽດນາມກ້າວຂຶ້ນເຖິງຍອດສູງ, ຊຶ່ງວົງການນັກສິລະປີນຫຼາຍຄົນຍັງໄຟຝັນຢາກໄດ້ຢູ່.