(vovworld)- ສິລະປະພື້ນເມືອງແມ່ນສ່ວນຫນຶ່ງທີ່ສຳຄັນປະກອບສ່ວນສ້າງເປັນພື້ນຖານວັດທະນະທຳຂອງ ປະເທດຫນຶ່ງ. ໃນຍຸກສະໄຫມທີ່ຂະແຫນງອຸດສາຫະກຳບັນເທິງພັດທະນາຢ່າງແຮງຄືຢູ່ ຫວຽດນາມ, ບັນດາເວທີສະແດງສິລະປະພື້ນເມືອງ ຍັງຄົງມີທີ່ຕັ້ງສຳຄັນສຳລັບຜູ້ຊົມແຕ່ລະຄົນ, ບໍ່ພຽງແຕ່ຢູ່ພາຍໃນປະເທດເທົ່ານັ້ນ ຫາກນັບທັງເພື່ອນມິດສາກົນ ອີກດ້ວຍ. ຢູ່ ຮ່າໂນ້ຍ, ເມື່ອຮອດຕອນຄ່ຳຂອງມື້ທ້າຍສັບປະດາ, ບັນດາເວທີສາແດງສິລະປະພື້ນເມືອງນັ້ນຍັງຄົງສືບຕໍ່ເຄື່ອນໄຫວຢູ່, ບໍ່ພຽງແຕ່ສົ່ງສານວັດທະນະທຳເຖິງຜູ້ຊົມເທົ່ານັ້ນ ຫາກຍັງແມ່ນບ່ອນຮັກສາຄວາມເມົາມົວ, ຄວາມຮັກສິລະປະຂອງບັນດານັກສິລະປິນນະຄອນຫລວງ ອີກດ້ວຍ.
ໃນ 4 ປີຜ່ານມາ, ເມື່ອຮອດຕອນຄ່ຳວັນສຸກປະຈຳອາທິດ, ໂຮງລະຄອນແຈວ ກີມໝາ ຢູ່ ຖະຫນົນ ກີມໝາ ຮ່າໂນ້ຍ ໄດ້ເປີດປະຕູຕ້ອນຮັບແຂກມາຊົມການສະແດງສິລະປະ. ແຕ່ລະອາທິດ, ຜູ້ຊົມໄດ້ຮັບຊົມບັນດາລາຍການສິລະປະພື້ນເມືອງທີ່ແຕກຕ່າງກັນ ເຕັມໄປດ້ວຍສີສັນວັດທະນະທຳຫວຽດນາມ. ຈາກບັນດາຕົວລະຄອນແຈວບູຮານ ຕະຫລອດຮອດບັນດາລາຍການເພງພື້ນເມືອງຄື: ຂັບເສີມ, ຂັບເຈົາວັນ, …ໂດຍນັກສິລະປິນໂຮງລະຄອນແຈ່ວ ຫວຽດນາມ ຜັດປ່ຽນກັນສະແດງ ເພື່ອແນະນຳໃຫ້ຜູ້ຊົມທີ່ນິຍົມສິລະປະຂັບແຈວຢູ່ ນະຄອນຮ່າໂນ້ຍ ແລະ ຜູ້ຊົມຕ່າງປະເທດອີກດ້ວຍ. ນັກສິລະປິນດີເດັ່ນ ແທງງວານ, ຜູ້ອຳນວຍການໂຮງລະຄອນແຈວ ຫວຽດນາມ ໃຫ້ຮູ້ວ່າ:
ລາຍການສະແດງລະຄອນແຈວ ຢູ່ ໂຮງລະຄອນແຈວ ກີມໝ໋າ
ພາບ:nhahatcheovn
|
“ຕອນຄ່ຳວັນສຸກປະຈຳອາທິດ, ເວທີສະແດງແຈວ ກີມໝ໋າ ມີ 5 ລາຍການຜັດປ່ຽນກັນ. ໃນເດືອນຫນຶ່ງ, ພວກຂ້າພະເຈົ້າ ມີ 2 ກອງສິລະປະກອນ ຜັດປ່ຽນກັນສະແດງ ໂດຍມີການເຂົ້າຮ່ວມຂອງນັກສິລະປິນລຸ້ນຕ່າງໆ. ພວກຂ້າພະເຈົ້າມີລາຍການສະແດງໃນເວລາ 1 ຊົ່ວໂມງ ຮອດ 1 ຊົ່ວໂມງ 15 ນາທີ ເພື່ອສະຫງວນໃຫ້ແກ່ຜູ້ຊົມແມ່ນຊາວຫວຽດນາມ, ສຳລັບແຂກຕ່າງປະເທດ ພວກຂ້າພະເຈົ້າມີລາຍການສະແດງໃນເວລາ 30 ນາທີ ຫລື 45 ນາທີ ເພື່ອໃຫ້ເຂົາເຈົ້າຄົ້ນຄ້ວາເລິກເຊິ່ງກ່ຽວກັບສິລະປະຂັບແຈວຫວຽດນາມ.”
ໃນ 5 ລາຍການສະແດງ, ແຕ່ລະລາຍການ, ບັນດານັກສິລະປິນ ແນະນຳຕອນຫນຶ່ງໃນລະຄອນແຈວໂດດເດັ່ນ, ເວທີສະແດງກໍໄດ້ປະດັບປະດາຕາມຮູບການລະຄອນແຈວພື້ນເມືອງ. ເວທີສະແດງລະຄອນແຈວໃນທ້າຍສັບປະດາຢູ່ ນະຄອນຫລວງ ຮ່າໂນ້ຍ ໂດຍໂຮງລະຄອນແຈວ ຫວຽດນາມ ຜັນຂະຫຍາຍ ບໍ່ພຽງແຕ່ເພື່ອຈຸດປະສົງ ແນະນຳໃຫ້ ຊາວຫວຽດນາມ ໃນທຸກໄວ ລ້ວນແຕ່ນິຍົມຊົມຊອບສິລະປະຂັບແຈວ ເທົ່ານັ້ນ ຫາກຍັງແນະນຳ, ໂຄສະນາສິລະປະຂັບແຈວເຖິງນັກທ່ອງທ່ຽວຕ່າງປະເທດ ເມື່ອມາຢ້ຽມຢາມນະຄອນຫລວງ ຮ່າໂນ້ຍອີກດ້ວຍ. ໃນຊຸມປີມໍ່ໆມານີ້, ໂຮງລະຄອນແຈວ ຍັງມີການປ່ຽນແປງຫລາຍຢ່າງ ເພື່ອໃຫ້ຜູ້ຊົມຕ່າງປະເທດ ມີໂອກາດໄດ້ສຳພັດ ແລະ ຮູ້ສຶກມີຄວາມປະທັບໃຈເມື່ອໄດ້ຮັບຊົມຮູບການສະແດງສິລະປະພື້ນເມືອງທີ່ເຂັ້ມຂົ້ນໄປດ້ວຍສີສັນວັດທະນະທຳຫວຽດນາມ. ໃນແຕ່ລະລາຍການສິລະປະລ້ວນແຕ່ໄດ້ຮັບການແປເປັນພາສາຕ່າງປະເທດຄື: ອັງກິດ, ຝລັ່ງ, ຍີ່ປຸ່ນ… ເພື່ອຮັບໃຊ້ໃຫ້ແຂກຕ່າງປະເທດ. ນັກສິລະປິນ ແທງງວານ ໃຫ້ຮູ້ວ່າ:
“ພວກຂ້າພະເຈົ້າແປລະຄອນແຈວ ດ້ວຍການແນະນຳເນື້ອໃນໂດຍຫຍໍ້ ເພື່ອໃຫ້ຜູ້ຊົມເຂົ້າໃຈໄດ້ຕົ້ນກຳເນີດຂອງສິລະປະແຈວ. ສິ່ງທີ່ເປັນເອກະລັກພິເສດສະເພາະຂອງເວທີສະແດງສິລະປະແຈວ ແມ່ນການຂັບຮ້ອງ, ການຟ້ອນ ແລະ ການສະແດງ. ພວກຂ້າພະເຈົ້າກໍສະຫງວນເວລາ 15 ນາທີ ເພື່ອໂອ້ລົມສົນທະນາກັບຜູ້ຊົມກ່ອນ ຫລື ພາຍຫລັງ ສະແດງລະຄອນ.”
ສ່ວນຢູ່ຄຸ້ມຖະຫນົນເກົ່າ, ຢູ່ທາງສີ່ແຍກຂອງຖະຫນົນ ດີງລຽດ- ຮ່າງບາກ- ຕ້າຫ້ຽນ, ເວທີສະແດງຈວງຫວ່າງ ແມ່ນຈຸດນັດພົບອັນດູດດື່ມຂອງຜູ້ນິຍົມຊອກຮູ້ບັນດາຮູບການວັດທະນະທຳສິລະປະທີ່ເປັນເອກະລັກສະເພາະຂອງເຂດແຄ້ວນຢູ່ຫວຽດນາມໃນຕອນຄ່ຳວັນເສົາປະຈຳອາທິດ. ເວທີສະແດງນີ້ແມ່ນ “ແນະນຳວັດທະນະທຳຂອງບັນດາເຂດແຄ້ວນຢູ່ຫວຽດນາມ” ນັບແຕ່ ຜັນຂະຫຍາຍມາຮອດປະຈຸບັນ ຍາມໃດກໍດຶງດູດຜູ້ມາຊົມເປັນຈຳນວນຫລວງຫລາຍ. ໃນແຕ່ລະລາຍການລ້ວນແຕ່ໄດ້ມີການກະກຽມຢ່າງລອບຄອບຖີ່ຖ້ວນ. ສິ່ງທີ່ດຶງດູດຜູ້ຊົມ ນັ້ນແມ່ນ ເມື່ອມານີ້ ເຂົາເຈົ້າບໍ່ພຽງແຕ່ໄດ້ຮັບຊົມລາຍການສະແດງສິລະປະແຈວເທົ່ານັ້ນ ຫາກຍັງໄດ້ຮັບຊົມລາຍການຂັບກາຍເລືອງ, ຊື່ງເປັນຮູບການເວທີສະແດງທີ່ເປັນເອກະລັກສະເພາະຢູ່ພາກໃຕ້ຫວຽດນາມ ແຕ່ໄດ້ນຳມາສະແດງຢູ່ນະຄອນຫລວງ ຮ່າໂນ້ຍ. ນັກສິລະປິນດີເດັ່ນ ເຈີນກວາງຮຸ່ງ, ຜູ້ກຳກັບການສະແດງ, ທັງເປັນຜູ້ອຳນວຍການໂຮງລະຄອນ ກາຍເລືອງ ຮ່າໂນ້ຍ ໃຫ້ຮູ້ວ່າ:
“ພວກຂ້າພະເຈົ້າ ນຳເອົາບັນດາບົດເພງຂອງປະຊາຊົນຢູ່ເຂດທົ່ງພຽງພາກເຫນືອ, ຂອງຊາວເຜົ່າໄຕງວຽນ, ເຜົ່າຈຳ ມາສະແດງ ເພື່ອໃຫ້ຜູ້ຊົມສາມາດເຂົ້າໃຈໄດ້ຈຸດວັດທະນະທຳຂອງບັນດາເຂດແຄ້ວນຢູ່ຫວຽດນາມ. ໃນບັນດາວາດຟ້ອນ, ລາຍການເຕັ້ນລຳ ສ່ວນຫລາຍພວກຂ້າພະເຈົ້າຢາກຮັກສາຮູບການສະແດງເດີມໄວ້. ໃນລາຍການສະແດງ ເວລາ 60 ນາທີ, ພວກຂ້າພະເຈົ້າແນະນຳໂດຍ ບັນດາຈຸດວັດທະນະທຳທີ່ສ້າງຄວາມຈັບອົກຈັບໃຈ ແລະເຮັດໃຫ້ຜູ້ຊົມຮູ້ສຶກມີຈິດໃຈສະຫວາດສະເຫວີຍ, ມີຄວາມໝາຍຢ່າງແທ້ຈິງ.”
ລາຍການສະແດງສິລະປະຢູ່ຖະໜົນ ໝ໋າໄມ ຮ່າໂນ້ຍ
ພາບ:thanglong.cp
|
ກໍເຊັ່ນດຽວກັນກັບໂຮງລະຄອນແຈວ ຫວຽດນາມ, ໂຮງລະຄອນ ກາຍເລືອງ ຮ່າໂນ້ຍ ກໍແປເນື້ອໃນລະຄອນ, ທຳນອງເພງ, ວາດຟ້ອນ ເປັນພາສາຕ່າງປະເທດເພື່ອ ຊ່ວຍໃຫ້ບັນດາຜູ້ຊົມຕ່າງປະເທດເຂົ້າໃຈຕື່ມອີກກ່ຽວກັບບັນດາລາຍການສິລະປະຂອງຫວຽດນາມ. ພິເສດມວ້ນທ້າຍລາຍການ, ຜູ້ຊົມມີໂອກາດໄດ້ພ້ອມກັບບັນດານັກສິລະປິນສະແດງລາຍການສິລະປະຢ່າງເບີກບານມ່ວນຊື່ນ. ທ່ານເຈີນກວາງຮຸ່ງ ແບ່ງປັນວ່າ:
“ລາຍການສຸດທ້າຍແມ່ນລາຍການເຕັ້ນແຊ, ພວກຂ້າພະເຈົ້າເຊີນຜູ້ຊົມຂຶ້ນເວທີສະແດງເພື່ອເຕັ້ນກັບບັນດານັກສິລະປິນ. ເມື່ອຜູ້ຊົມຊື້ປີ້ເຂົ້າຊົມລາຍການສະແດງສິລະປະ ພວກຂ້າພະເຈົ້າໄດ້ຈົດທີ່ຢູ່ ແລະ ອີແມວຂອງເຂົາເຈົ້າໄວ້. ເພື່ອສົ່ງ ຮູບເປັນລະນຶກໂດຍ ພວກຂ້າພະເຈົ້າຖ່າຍເອງໃຫ້ແກ່ຜູ້ຊົມຜ່ານອີແມວນັ້ນ ເມື່ອໄດ້ຮັບບັນດາຮູບຖ່າຍເຫລົ່ານັ້ນ ຜູ້ຊົມມີຄວາມຮູ້ສຶກດີໃຈ ແລະ ມັກຫລາຍ.”
ໃນແຕ່ລະຕອນຄ່ຳທ້າຍສັບປະດາ, ບັນດາຜູ້ນິຍົມ ແລະ ມັກຊອກຮູ້ສິລະປະພື້ນເມືອງຫວຽດນາມ ຈະໄດ້ຮັບຊົມບັນດາລາຍການສະແດງສິລະປະທີ່ເຂັ້ມຂົ້ນໄປດ້ວຍສີສັນວັດທະນະທຳຂອງບັນດາເຂດແຄ້ວນຢູ່ຫວຽດນາມ. ຜ່ານແຕ່ລະລາຍການ, ຜູ້ຊົມບໍ່ພຽງແຕ່ໄດ້ຮັບຊົມລາຍການສິລະປະທີ່ຈັບອົກຈັບໃຈເທົ່ານັ້ນຫາກຍັງມີໂອກາດໄດ້ສຳພັດກັບບັນດາຮູບການເວທີສະແດງສິລະປະພື້ນເມືອງອີກດ້ວຍ. ຍ້ອນ ການຊົມເຊີຍຢ່າງສຸດອົກສຸດໃຈຈາກຜູ້ຊົມນັ້ນເອງໄດ້ກາຍເປັນກຳລັງຫນູນເພື່ອໃຫ້ບັນດານັກສິລະປິນສືບຕໍ່ຮັກສາ ແລະ ພັດທະນາຄວາມເມົາມົວກັບອາຊີບຂອງຕົນ ຈາກນັ້ນ ຈະມີບັນດາລາຍການສະແດງສິລະປະທີ່ສ້າງຄວາມປະທັບໃຈທີ່ສຸດໃຫ້ແກ່ຜູ້ຊົມ.