ຕະຫຼາດນັດ ບັກຮ່າ ໃນຍາມມໍ່ກັບບຸນເຕັດ (ພາບ: vietbao.vn)
ຕະຫຼາດນັດ ບັກຮ່າ ແມ່ນຕະຫຼາດນັດໃຫຍ່ກ່ວາໝູ່ຢູ່ເຂດພູສູງຊາຍແດນ, ແມ່ນແຫ່ງແລກປ່ຽນຄ້າຂາຍ ສິນຄ້າຂອງປະຊາຊົນ 14 ເຜົ່າອ້າຍນ້ອງ ທີ່ດຳລົງຊີິວິດຢູ່ຮ່ວມກັນໃນເທດສະບານເມືອງ ບັກຮ່າ ແລະ ບັນດາເມືອງ, ແຂວງຢູ່ອ້ອມຂ້າງ. ທຸກໆວັນອາທິດ, ຕະຫຼາດນັດກໍຖືກຈັດຂຶ້ນ. ຕະຫຼາດນັດ ໃນວັນອາທິດຕ່າງໆໃນປີ ກໍຄັບຄາໜາແໜ້ນດ້ວຍຜູ້ຊື້ຜູ້ຂາຍ, ແຕ່ ຮອດຕະຫຼາດນັດຍາມໄກ້ຈະຮອດບຸນເຕັດ, ກໍຍິ່ງຄຶກຄື້ນກ່ວາ. ບັນດາຜູ້ຄົນໄດ້ພາກັນໄປຕະຫຼາດເພື່ອຊື້ເຄື່ອງຂອງກະກຽມຕ້ອນຮັບບຸນເຕັດ ພວມວຽນ ມາ.
ອາກາດຢູ່ເຂດ ໄຕບັກ ໝາຍເຖິງເຂດທາງທິດຕາເວັນຕົກສ່ຽງເໜືອຂອງຫວຽດນາມ, ປະຈຸບັນພວມໜາວຈັດ, ມີນ້ຳໝອກກົ້ວປົກຄຸມໄປທົ່ວເຂດ.ຈາກໝູ່ບ້ານຕ່າງໆໃນເຂດ, ພໍ່ແມ່ພີນ້ອງບັນດາເຜົ່າໃນເຂດໄດ້ພາກັນຫຼັ່ງໄຫຼມາຕະຫຼາດນັບແຕ່ເວລາທ້ອງຟ້າຍັງມືດຢູ່. ຜູ້ບ່າວຜູ້ສາວ, ຜູ້ເຖົ້າຜູ້ແກ່ ຕະຫຼອດເດັກນ້ອຍໄດ້ນັດກັນໄປຕະຫຼາດແຕ່ຍາມເຊົ້າຕູ່ ມີບາງຄົນກໍເລີ່ມອອກໄປແຕ່ຕອນແລງມື້ກ່ອນ. ນີ້ແມ່ນຕະຫຼາດນັດຄັ້ງສຸດທ້າຍ, ດັ່ງນັ້ນໃຜໆກໍຢາກຂາຍເຄື່ອງໃຫ້ໝົດເພື່ອໄດ້ເງິນຕື່ມ, ຊື້ເຄື່ອງຂອງຕ້ອນຮັບບຸນເຕັດ. ທີ່ຕະຫຼາດນັດມື້ນີ້, ທ້າວ ທ່າວເທວເຢ້ ຢູ່ຕາແສງ ຖາຍຢາງໂຝ ໄດ້ເອົາທູບມາຂາຍ. ລາວບອກວ່າ ຕ້ອງຂາຍທູບໃຫ້ໝົດ, ຈຶ່ງຊື້ເຄື່ອງຂອງກະກຽມຕ້ອນຮັບບຸນເຕັດ. ທ້າວ ທ່າວເທວເຢ້ ໃຫ້ຮູ້ວ່າ: “ ຍາມໄກ້ຈະຮອດບຸນເຕັດ, ຂ້ອຍຈຶ່ງນຳເອົາທູບໄປຂາຍ. ຂາຍທູບ 2 ກະຕ່າ ກໍໄດ້ເງິນປະມານ 2 ແສນດົງ. ແລະ ຈະໃຊ້ເງິນຈຳນວນນີ້ເພື່ອຊື້ເຄື່ອງຂອງຕ້ອນຮັບບຸນເຕັດ . ມື້ນີ້ ຂ້ອຍຈະຊື້ຊິ້ນໝູ, ຜັກ, ຂອງກິນແຫ້ງ ເພື່ອກະກຽມຕ້ອນຮັບບຸນເຕັດ ”
ສຽງເວົ້ານົວຫົວມ່ວນ, ສຽງຕໍ່ລອງລາຄາ ຊື້ຂາຍສິນຄ້າ ກໍຟົດຟື້ນເນື່ອງນັນໄປທົ່ວເຂດ. ຕະຫຼາດນັດຍາມມໍ່ກັບບຸນເຕັດ ມີສິນຄ້າຫຼາຍປະເພດ ແລະ ອຸດົມສົມບູນ. ພໍ່ແມ່ພີນ້ອງໃນເຂດໄດ້ນຳເອົາເຄື່ອງຂອງ, ສິນພິເສດຂອງເຂດພູສູງມາຂາຍຢູ່ຕະຫຼາດເຊັ່ນ: ຊາ, ໝາກໄມ້, ນ້ຳເຜິ້ງ, ເຫຼົ້າ, ເຄື່ອງນຸ່ງຫົ່ມ, ເຄື່ອງເອ້ຢ້ອງ, ດອກກ້ວຍໄມ້. ເຂົາເຈົ້າຍັງຈູງມ້າ, ງົວ, ໝູໄປນຳ. ຜູ້ຮັ່ງມີບາງຄົນມາຕະຫຼາດພຽງແຕ່ຊື້ເຄື່ອງເທົ່ານັ້ນ, ແຕ່ສ່ວນຫຼາຍຕ້ອງນຳເອົາສັດລ້ຽງ, ຜະລິດຕະພັນກະເສດຂອງຄອບຄົວຕົນມາຂາຍເອົາເງິນ, ແລ້ວຈຶ່ງສາມາດຊື້ເຄື່ອງຂອງ ຕ້ອນຮັບບຸນເຕັດໄດ້. ລຸງ ໂຕກຸຍ ຊາວເຜົ່າ ຟູ່ລ້າ ຢູ່ຕາແສງ ລຸ່ງຟິ່ນປາດທະໜາວ່າ: ມາຕະຫຼາດນັດຄັ້ງນີ້, ຈະຂາຍອານມ້າໄດ້ 4 ອັນ. ລຸງ ໂຕກຸຍ ໃຫ້ຮູ້ວ່າ: “ ຂາຍອານມ້າ ເພື່ອໃຫ້ມ້າຕາງເຄື່ອງ. ອາທິດໜຶ່ງເຮັດໄດ້ 4 ອັນ. ເຊື່ອແນວ່າຈະໄດ້ຂາຍໝົດ. ຂາຍໄດ້ເງິນ, ກໍຊື້ເຫຼົ້າເມືອກິນຍາມບຸນເຕັດ. ຊື້ຊິ້ນໝູຕື່ມ 4 ໂລ. ສ່ວນໄກ່ຢູ່ເຮືອນມີແລ້ວ, ຈະຂ້າສອງສາມໂຕ ”
ຊິ້ນໝູແມ່ນອາຫານທີ່ຂາດບໍ່ໄດ້ໃນບຸນເຕັດຂອງບັນດາຊົນເຜົ່າເຂດພູສູງ, ສະນັ້ນ ຢູ່ຮ້ານຂາຍຊິ້ນໝູ ຍາມໃດກໍ່ມີຄົນມາຊື້ຢ່າງໜາແໜ້ນ. ໃນຕະຫຼາດນັດ ມື້ທຳມະດາ, ອ້າຍ ຢາງແຊວຊາງ ຂ້າໝູພຽງໂຕໜຶ່ງເທົ່ານັ້ນ, ແຕ່ຮອດຕະຫຼາດ ນັດຍາມມໍ່ກັບບຸນເຕັດ, ແມ່ນຕ້ອງຂ້າໝູສອງໂຕ. ອ້າຍ ຢາງແຊວຊາງ ໃຫ້ຮູ້ວ່າ: “ ຂ້ອຍຂາຍຊິ້ນໝູແຕ່ 6 ໂມງເຊົ້າ, ຮອດເວລານີ້ ກໍຂາຍເກືອບໝົດແລ້ວ. ໝູແຕ່ລະໂຕມີນ້ຳໜັກ 140 kg, ພໍ່ແມ່ພີນ້ອງໃນເຂດມາຊື້ເພື່ອປຸ່ງແຕ່ງອາຫານ ກິນເຕັດ”ສ່ວນທ່ານ ຝ້າມວັນຖຸຍ ພະນັກງານຕະຫຼາດ ບັກຮ່າ ໃຫ້ຮູ້ວ່າ :
“ ມື້ນີ້ມີຮ້ານຊິ້ນໝູຫຼາຍເຖິງ 80 ຮ້ານ, ໃນຕະຫຼາດນັດມື້ທຳມະດາ ມີພຽງ 20-30 ຮ້ານ. ສຳລັບຊິ້ນໄກ່, ມື້ນີ້ ລາຄາກໍຂຶ້ນເຖິງ 110000 ດົງຕໍ່ໂລ, ໃນມື້ທຳມະດາ, ລາຄາພຽງແຕ່ 80000 ດົງເທົ່ານັ້ນ ”
ເຂດຂາຍສັດ ຄື: ງົວ, ຄວາຍ, ມ້າ ກໍຄຶກຄື້ນພໍສົມຄວນ. ເຂົາເຈົ້າຈູງງົວ,ຄວາຍ ແລະ ມ້າໄປໆມາໆ ເພື່ອໃຫ້ຜູ້ຊື້ເບິ່ງຮູບຮ່າງ, ເບິ່ງຕີນ, ຕົບກົ້ນ, ແລ້ວກໍຕໍ່ລອງລາຄາ. ຄວາຍຂອງອ້າຍ ຖາວອາຢິ້ງ ກໍມີຫຼາຍຄົນມາເບິ່ງ ແລະ ຖາມຊື້, ແຕ່ລາວຍັງບໍ່ທັນເຫັນດີຂາຍ ຍ້ອນບໍ່ໄດ້ລາຄາ. ອ້າຍ ຖາວອາຢິ້ງ ໃຫ້ຮູ້ວ່າ:
“ ຢູ່ເຮືອນມີຄວາຍ 2 ໂຕ, ຂາຍໂຕໜຶ່ງເພື່ອເອົາເງິນຊື້ເຄື່ອງບຸນເຕັດ, ຍັງເຫຼືອໂຕໜຶ່ງເມື່ອໄຖນາ. ຂ້ອຍຂາຍໂຕນີ້ໄດ້ 15 ລ້ານດົງ, ສາມາດຊື້ໄດ້ຫຼາຍສິ່ງຫຼາຍຢ່າງ ”
ມີສີສັນຫຼາກຫຼາຍ ແລະ ງາມຕາທີ່ສຸດ ແມ່ນບັນດາຮ້ານຂາຍສິ້ນ, ຜ້າແພ ທີ່ສະຫງວນໃຫ້ແກ່ເອື້ອຍນ້ອງແມ່ຍິງ. ອ້າຍ ຖາວວັນຊິງ ປະກອບອາຊີບຂາຍເຄື່ອງນຸ່ງຢູ່ຕະຫຼາດ ບັກຮ່າ ມາເປັນເວລາ 4 ປີແລ້ວ ໃຫ້ຮູ້ວ່າ : “ ທັງຜູ້ເຖົ້າຜູ້ແກ່, ໄວໜຸ່ມລ້ວນແຕ່ຊື້ໝົດ, ບໍ່ຈຳແນກ, ໃຜນຸ່ງກໍໄດ້. ນັບແຕ່ເຊົ້າຮອດດຽວນີ້ ຂາຍໄດ້ເງິນເກືອບ 2 ລ້ານດົງແລ້ວ ”
ພາຍຫຼັງຊື້ໄດ້ເຄື່ອງຂອງຈຳເປັນຢ່າງພຽງພໍແລ້ວ, ທຸກໆຄົນທັງຜູ້ເຖົ້າຜູ້ແກ່ຕະຫຼອດຮອດໄວໜຸ່ມຕ່າງກໍມາເຕົ້າໂຮມກັນຢູ່ຮ້ານອາຫານ ທັ້ງໂກ້. ເວລານີ້ ເຂົາເຈົ້າຈຶ່ງມີໂອກາດໄດ້ແລກປ່ຽນໂອ້ລົມຖາມຂ່າວກ່ຽວກັບຂຸຂະພາບ, ວຽກງານຕ່າງໆ, ເປັນຕົ້ນແມ່ນກະກຽມຕ້ອນຮັບບຸນເຕັດ. ສ່ວນບັນດາອ້າຍບາວ, ນາງສາວນັ້ນ, ຮອດຍາມຕະຫຼາດນັດບຸນເຕັດ ກໍແມ່ນໂອກາດເພື່ອໃຫ້ພວກເຂົາໄດ້ນັດກັນລະຫຼິ້ນນຳກັນຢ່າງມ່ວນຊື່ນໃນຍາມລະດູບານໃໝ່.
ລານແອງ