(VOVWORLD) -ໃນຄວາມມານະພະຍາຍາມຮ່ວມຂອງທົ່ວປະເທດ ທີ່ນຳແສງສະຫວ່າງທາງດ້ານພູມປັນຍາ ມາສູ່ພໍ່ແມ່ພີ່ນ້ອງຢູ່ເຂດພູສູງ, ເຂດຫ່າງໄກສອກຫຼີກຂອງປະເທດຊາດ, ໃນໄລຍະທີ່ຜ່ານມາ, ກົມຫໍສະໝຸດ ກະຊວງ ວັດທະນະທຳ ກິລາ ແລະ ທ່ອງທ່ຽວ ຫວຽດນາມ ໄດ້ມີບັນດາຂໍ້ລິເລີ່ມ ແລະ ຈັດຕັ້ງການເຄື່ອນໄຫວຜັນຂະຫຍາຍແຜນນະໂຍບາຍນີ້. ໃນນັ້ນໂຄງການມອບປຶ້ມອ່ານໃຫ້ແກ່ບັນດາຕາແສງທີ່ປະສົບກັບຄວາມຫຍຸ້ງຍາກ ແລະ ບັນດາໂຮງຮຽນມັດທະຍົມ, ໂຮງຮຽນປະຖົມ ຢູ່ເຂດພູສູງແຂວງ ຮວ່າບິ່ງ ໄດ້ຮັບການຕີລາຄາວ່າ ແມ່ນການເຄື່ອນໄຫວທີ່ມີຄວາມໝາຍອັນໃຫຍ່ຫຼວງ ນຳກາລະໂອກາດສຳຜັດກັບພູມປັນບາມາສູ່ເດັກນ້ອຍ ແລະ ປະຊາຊົນຢູ່ເຂດພູສູງແຂວງ ຮວ່າບິ່ງ
 ພວກນ້ອງນັກຮຽນມັກອ່ານປຶ້ມຢູ່ຫໍສະຫມຸດທີ່ໂຮງຮຽນ |
ຍ້ອນເງື່ອນໄຂທາງດ້ານການເງິນຖືກຈຳກັດ, ດັ່ງນັ້ນເຖິງວ່າຫໍສະໝຸດຂອງແຂວງ ແລະ ຖືກຕັ້ງຢູ່ໃຈກາງນະຄອນຮວ່າບິ່ງ ກໍ່ຕາມ ແຕ່ຫໍສະໝຸດແຂວງ ຮວ່າບິ່ງ ຍັງຄົງຂາດແຄນປຶ້ມອ່ານ ຢ່າງຫຼວງຫຼາຍ. ສິ່ງນິີ້ໄດ້ອະທິບາຍວ່າ ເປັນຫຍັງການນຳຮາກຖານເຫຼົ່ານີ້ ພັດມີຄວາມພາກພູມໃຈ ເຖິງຂັ້ນນັ້ນ ຂະນະທີ່ຫໍສະໝຸດໄດ້ຮັບປຶ້ມຈາກພາກສ່ວນຕ່າງໆ. ທ່ານ ບຸ່ຍວັນຢິບ ຜູ້ອຳນວຍການຫໍສະໝຸດແຂວງ ຮວ່າບິ່ງ ແບ່ງປັນວ່າ :
“ການເຄື່ອນໄຫວຂອງຫໍສະໝຸດສາທາລະນະ ຢູ່ທ້ອງຖິ່ນ ແມ່ນປະສົບກັບຄວາມຫຍຸ້ງຍາກຫຼາຍຢ່າງ ນັບທັງທາງດ້ານພາຫະນະອຸປະກອນ,ພື້ນຖານວັດຖຸ,ການລົງທຶນທາງດ້ານຄ່າໃຊ້ຈ່າຍ.ຄວາມໝາຍຂອງໂຄງການນີ້ ແມ່ນນຳພູມປັນຍາມາໃຫ້ພໍ່ແມ່ພີ່ນ້ອງຢູ່ທ້ອງຖິ່ນ, ພິເສດແມ່ນຢູ່ບັນດາຫໍສະໝຸດໃນໂຮງຮຽນຕ່າງໆ”
ຢູ່ໂຮງຮຽນເຍິນເຫ້ງຍ ເມືອງ ຫຼາກເຊີນ ແຂວງ ຮວ່າບິ່ງ ກໍ່ຍ້ອນຂາດແຄນປຶ້ມ ດັ່ງນັ້ນຫໍສະໝຸດໃນໂຮງຮຽນ ກໍ່ຍັງບໍ່ດຶງດູດນັກຮຽນມາອ່ານໄດ້. ທຸກໆເລື່ອງກໍ່ໄດ້ມີການປ່ຽນແປງ ຂະນະທີ່ຫໍສະໝຸດ ໄດ້ຮັບປຶ້ມອ່ານຫຼາຍຫົວທີ່ດູດດື່ມ. ນ້ອງ ບຸ່ຍແຄັ໊ງຮ່ຽນ ນັກຮຽນຫ້ອງ ມ.4 ສັງກັດໂຮງຮຽນເຍິນເຫ້ງຍ ໃຫ້ຮູ້ວ່າ:
“ພື້ນຖານວັດຖຸຢູ່ທີ່ນີ້ ເມື່ອກ່ອນນີ້ກໍ່ບໍ່ພຽງພໍ ແລະ ຫໍສະໝຸດກໍ່ບໍ່ມີປຶ້ມທີ່ນັກຮຽນຕ້ອງການ, ດັ່ງນັ້ນພວກນ້ອງກໍ່ບໍ່ເຄີຍມາອ່ານຢູ່ທີ່ນີ້. ເພາະສະນັ້ນ ບັນດາໂຄງການຄືແນວນີ້ ໄດ້ນຳບັນດາປຶ້ມອ່ານທີ່ດີທີ່ມ່ວນ ມາໃຫ້ພວກນ້ອງ , ອັນໄດ້ເປັນແຫຼ່ງບັນດານໃຈ ໃຫ້ແກ່ພວກນ້ອງອ່ານປຶ້ມ. ນ້ອງຮູ້ສຶກມີຄວາມໂຊກດີ ເມື່ອຫໍສະໝຸດໄດ້ຮັບຄວາມເອົາໃຈໃສ່ຄືແນວນີ້”.
ໂຮງຮຽນມັດທະຍົມຕອນຕົ້ນ ເທື້ອງກົກ ຕາແສງ ເທື້ອງກົກ ເມືອງ ຫຼາກເຊີນ ກໍ່ແມ່ນໂຮງຮຽນແຫ່ງໜຶ່ງທີ່ມີຫໍສະໝຸດ ເຊິ່ງໄດ້ຮັບການມອບປຶ້ມເປັນຂອງຂວັນ. ນາງ ຮ່າທິງາ ຫົວໜ້າຄະນະອຳນວຍການໂຮງຮຽນ ໄດ້ຢືນຢັນວ່າ ຍ້ອນມີບັນດາປຶ້ມອ່ານທີ່ດີນັ້ນ ຄວາມນຶກຄິດ ແລະ ການກະທຳຂອງນັກຮຽນໃນໂຮງຮຽນ ກໍ່ໄດ້ມີການປ່ຽນແປງຢ່າງເຫັນໄດ້ຊັດ. ທ່ານນາງ ຮ່າທິງາ ເວົ້າວ່າ:
“ພວກນ້ອງນັກຮຽນກໍ່ໄດ້ຮຽນຮູ້ຫຼາຍສິ່ງທີ່ດີຈາກປຶ້ມອ່ານເຫຼົ່ານີ້. ພວກນ້ອງນັກຮຽນຮູ້ຈັກວິທີສຳພັນມະນຸດຫຼາຍກວ່າ ແລະ ມີທັດສະນະສຳພັນມະນຸດຫຼາຍກວ່າ”.
ສ່ວນທ່ານນາງ ຫວູເຢືອງຖຸຍງ່າ ຫົວໜ້າກົມຫໍສະໝຸດ ກະຊວງ ວັດທະນະທຳ ກິລາ ແລະ ທ່ອງທ່ຽວ ຫວຽດນາມ ເຊື່ອໝັ້ນວ່າ ການອ່ານປຶ້ມກໍ່ແມ່ນໜຶ່ງໃນບັນດາວິທີດີທີີ່ສຸດ ເພື່ອຊ່ວຍໃຫ້ປະຊາຊົນຫຼຸດພົ້ນອອກຈາກຄວາມທຸກຍາກ ເພື່ອໃຫ້ເດັກນ້ອຍເຊິ່ງແມ່ນລຸ້ນຄົນອະນາຄົດຂອງປະເທດຊາດ ມີລະດັບຄວາມຮູ້ຢ່າງຄົບຖ້ວນ ເພື່ອພັດທະນາ ແລະ ຮັບໃຊ້ປະເທດຊາດໃນພາຍພາກໜ້າ. ຄວາມນຶກຄິດດັ່ງກ່າວ ກໍ່ແມ່ນພື້ນຖານ ແລະ ເປັນກຳລັງໜູນເພື່ອໃຫ້ກົມຫໍສະໝຸດຜັນຂະຫຍາຍ ໂຄງການມອບປຶ້ມເປັນຂອງຂວັນ ແລະ ແຜ່ຂະຫຍາຍວັດທະນະທຳການອ່ານ ໄປສູ່ພໍ່ແມ່ພີ່ນ້ອງ ແລະ ເດັກນ້ອຍເຂດພູສູງ. ນາງ ງ່າ ກ່າວວ່າ:
“ທີ່ຈິງແລ້ວການອ່ານປຶ້ມກໍ່ແມ່ນສິ່ງທີ່ສຳຄັນ ເພື່ອໃຫ້ຄົນເຮົາມີສະຕິປັນຍາ. ແລະ ເມື່ອມີລະດັບຄວາມຮູ້ ແລະ ມີທັກສະນັ້ນ, ຜູ້ຄົນທັງຫຼາຍຈຶ່ງສາມາດ ຫຼຸດພົ້ນອອກຈາກຄວາມທຸກຍາກໄດ້ ແລະ ສາມາດເຮັດໄດ້ທຸກສິ່ງທີ່ຈົບງາມ, ມຸ່ງໄປສູ່ການຮັບໃຊ້ວົງຄະນາຍາດທີ່ດີກວ່າ. ພວກຂ້າພະເຈົ້າມີຄວາມຫວັງວ່າ ພວກເຮົາຈະພ້ອມກັນສູ້ຊົນ ເຮັດແນວໃດ ເພື່ອໃຫ້ການອ່ານຂອງວົງຄະນາຍາດ, ເດັກນ້ອຍຈະໄດ້ຮັບຄວາມເອົາໃຈໃສ່ຫຼາຍກວ່າ”.
ດ້ວຍຈຸດປະສົງທີ່ດີງາມ ແມ່ນແຜ່ຂະຫຍາຍວັດທະນະທຳການອ່ານ, ນຳພູມປັນຍາໃຫ້ແກ່ຊາວທ້ອງຖິ່ນທີ່ປະສົບຄວາມຫຍຸ້ງຍາກຫຼາຍຢ່າງ ໃນທົ່ວປະເທດ, ຫວັງວ່າຂະບວນການມອບປຶ້ມເປັນຂອງຂວັນຢູ່ບັນດາເຂດພູສູງ, ເຂດຫ່າງໄກສອກຫຼີກຈະສືບຕໍ່ໄດ້ຮັບການຮັກສາ ແລະ ທະວີຄູນໃນອະນາຄົດ.