ການອວຍພອນອາຍຸຍືນໃຫ້ຜູ້ອາຍຸສູງຊຶ່ງແມ່ນ
ຈຸດວັດທະນະທຳຂອງຊາດຫວຽດນາມ
(ພາບ: baonguoicaotuoi)
|
ຕາມປະເພນີທີ່ມີແຕ່ດົນນານຢູ່ຫວຽດນາມ, ແຕ່ລະປີຮອດຍາມຕົ້ນລະດູບານ ໃໝ່, ບັນດາຄອບຄົວຊາວຫວຽດນາມເຄີຍຈັດພິທີອວຍພອນອາຍຸຍືນໃຫ້ແກ່ປູຍາຕາຍາຍ, ພໍ່ແມ່. ນີ້ແມນຈຸດວັດທະນະທຳທີ່ໄດ້ຮັບການຮັກສາໄວ້ນັບຮ້ອຍປີມານີ້, ສະແດງໃຫ້ເຫັນຫຼັກສິນທຳ “ ກິນເຂົ້າຄິດຮອດຄຸນນາ, ກິນປາຄິດຮອດຄຸນນ້ຳ ” ຂອງຊາດຫວຽດນາມ. ໃນຊຸມມື້ຕົ້ນລະດູບານໃໝ່ປີນີ້, ພິທີອວຍພອນອາຍຸຍືນ ໄດ້ຈັດຂຶ້ນຢູ່ທຸກແຫ່ງ. ນີ້ແມ່ນໂອກາດເພື່ອໃຫ້ລູກຫຼານສະແດງຄວາມເຄົາລົບນັບຖື, ຄວາມກະຕັນຍູ, ຄວາມຮູ້ບູນຄຸນທີ່ມີຕໍ່ ປູຍາຕາຍາຍ, ພໍ່ແມ່ຂອງຕົນ.
ກໍເຊັ່ນດຽວກັນກັບຫຼາຍຄອບຄົວຢູ່ບ້ານ ກົ້ງຮ່ວາ, ຕາແສງດົງກວານ, ເມືອງ ດົງຮຶງ, ແຂວງທ້າຍບິງ, ໃນມື້ຍາມຕົ້ນປີໃໝ່ນີ້, ລູກຫຼານທັງໝົດຂອງແມ່ຕູ້ ຝ້າມ ທິມາຍໄດ້ມາເຕົ້າໂຮມກັນຢ່າງຄົບຖ້ວນເພື່ອຈັດ ພິທີອວຍພອນອາຍຸຍືນແມ່ຍ່າຂອງຕົນ. ແມ່ຕູ້ ຝ້າມທິມາຍ ມີລູກທັງໝົດ 6 ຄົນ, ແຕ່ມີເຖິງ 5 ຄົນ ໄດ້ທຳມາຄ້າຂາຍຢູ່ແດນໄກ. ແມ່ຕູ້ ມາຍ ຢູ່ບ້ານກັບລູກຊາຍກົກຂອງຕົນ. ປີນີ້, ແມ່ຕູ້ ມາຍ ມີອາຍຸ 95 ປີແລ້ວ, ແມ່ມີຫຼານ 14 ຄົນ ແລະ ຫຼອນ 12 ຄົນ. ພວກລູກຫຼານຂອງແມ່ຕູ້ ມາຍ ຕ່າງກໍໄດ້ເຕີບໃຫຍ່ ພ້ອມທັງໄດ້ມີວຽກເຮັດ ງານທຳໝົດແລ້ວ. ເພື່ອຈັດ ພິທີອວຍພອນອາຍຸຍືນໃຫ້ແກ່ແມ່ຍ່າຂອງຕົນ, ພວກລູກຫຼານທຸກຄົນ ຈາກຮ່າໂນ້ຍ, ຫາຍຟ່ອງ, ນະຄອນໂຮ່ຈິມິນ ລ້ວນແຕ່ໄດ້ມາແຕ່ເຊົ້າ. ຜູ້ລະວຽກ, ຈາກການປັດກວາດເຮືອນຊານ, ກະກຽມໂຕະຕັ່ງ, ແຕ່ງພາເຂົ້າ ຄອບຄົວເພື່ອອວຍພອນອາຍຸຍືນໃຫ້ແກ່ແມ່ຍ່າ. ໃນພິທີອວຍພອນອາຍຸຍືນດ້ວຍຄວາມປະຢັດ, ບໍ່ຟຸມເຟື່ອຍນັ້ນ, ສຽງເວົ້ານົວຫົວມ່ວນຢ່າງເບີກບານມ່ວນຊື່ນ ແລະ ຄຳອວຍພອນທີ່ດີງາມຂອງພວກລູກຫຼານທັງຢູ່ໃກ້ ແລະ ໄກ ໄດ້ເຮັດໃຫ້ບັນຍາກາດຍາມຕົ້ນລະດູບານໃໝ່ເພີ່ມຄວາມອົບອຸ່ນ. ສຳລັບປ້າ ວູ້ມິງຮ່ຽນ ຊຶ່ງແມ່ນລູກຜູ້ທີ່ 3 ແລ້ວ, ນີ້ແມ່ນໂອກາດເພື່ອໃຫ້ລູກຫຼານສະແດງຄວາມກະຕັນຍູ, ຄວາມຮູ້ບູນຄຸນຕໍ່ພໍ່ປູແມ່ຍ່າ, ພໍ່ແມ່, ພ້ອມທັງເປັນການຕັກເຕືອນໃຫ້ລຸ່ນລູກລຸ່ນຫຼານຕ້ອງມີຄວາມຮັບຜິດຊອບຕໍ່ພວກເພິ່ນ. ປ້າ ວູ້ມິງຮ່ຽນ ເປີດເຜີຍວ່າ :
“ ການຈັດພິທີອວຍພອນອາຍຸຍືນໃຫ້ແກ່ແມ່ຂອງຕົນທີ່ອາຍຸ 95 ປີ ແມ່ນດີທີ່ສຸດ. ນີ້ແມ່ນຄວາມເປັນກຽດແລະ ຜາສຸກຢ່າງຍິ່ງຂອງລູກຫຼານໃນຄອບຄົວ. ມານີ້ກັບແມ່ ກໍເປັນການລະດົມກຳລັງໃຈແກ່ແມ່ຂອງຕົນ, ເມື່ອເພິ່ນເຫັນລູກເຫັນຫຼານຂອງຕົນກໍດີໃຈແລ້ວ.”
ເຖິງວ່າມີອາຍຸເກືອບ 100 ປີແລ້ວ, ແຕ່ແມ່ຕູ້ ຝ້າມທິມາຍ ຍັງຄົງມີຄວາມຈຳດີ, ເພິ່ນຍັງສາມາດຫຸ້ງເຂົ້າ, ແຕ່ງກິນ, ປັດກວາດເຮືອນດ້ວຍຕົນເອງ ແລະ ຍັງບໍ່ທັນຕ້ອງເພິ່ງພາອາໄສລູກຫຼານເທື່ອ. ມາຮອດປະຈຸບັນ, ແມ່ຕູ້ຍັງຄົງແມ່ນບ່ອນອີງທາງດ້ານຈິດໃຈເມື່ອເປັນຜູ້ຖ່າຍທອດບົດຮຽນໃນການດຳລົງຊີວິດໃຫ້ແກ່ລູກຫຼານ. ສຳລັບແມ່ຕູ້ ມາຍ ແລ້ວ, ຈິດໃຈຂອງລູກຫຼານແມ່ນຂອງຂວັນທາງດ້ານຈິດໃຈອັນລ້ຳຄ່າ. ແມ່ຕູ້ຝ້າມທິມາຍ ເວົ້າວ່າ :
“ ມື້ນີ້ພວກລູກຫຼານເຕົ້າໂຮມກັນມານີ້, ຂ້າພະເຈົ້າດີໃຈທີ່ສຸດ. ພວກລູກຫຼານໄດ້ຈັດ ພິທີອວຍພອນອາຍຸຍືນໃຫ້ແກ່ຂ້າພະເຈົ້າເທື່ອໜຶ່ງແລ້ວ, ຂ້າພະເຈົ້າພະຍາຍາມຮັກສາສຸຂະພາບເພື່ອໃຫ້ອາຍຸຍືນຍາວຮອດຮ້ອຍປີ. ”
ໃນຈຸດເວລາລະດູບານໃໝ່, ບຸນເຕັດວຽນມາ, ອຳນາດການປົກຄອງພ້ອມກັບບັນດາອົງການຈັດຕັ້ງສັງຄົມ ຄື ສະມາຄົມຜູ້ອາຍຸສູງ, ສະມາຄົມນັກຮົບເກົ່າ, ສະມາຄົມແມ່ຍິງ.... ຢູ່ຫຼາຍທ້ອງຖິ່ນໃນທົ່ວປະເທດ ຍັງເອົາໃຈໃສ່ຈັດ ພິທີອວຍພອນອາຍຸຍືນໃຫ້ແກ່ຜູ້ອາຍຸສູງໃນທ້ອງຖິ່ນຕົນ. ຢູ່ແຂວງ ທ້າຍບິງ, ການຈັດ ພິທີອວຍພອນອາຍຸຍືນໄດ້ຖືກດຳເນີນຢ່າງອົບອຸ່ນຈາກຂັ້ນເມືອງ ລົງຮ້ອນຂັ້ນບ້ານ, ຕາແສງ. ພິທີອວຍພອນອາຍຸຍືນໃຫ້ແກ່ຜູ້ອາຍຸສູງຖືກຈັດຂຶ້ນດ້ວຍຄວາມປະຢັດ, ບໍ່ຟຸມເຟື່ອຍ ແຕ່ສຸພາບຮຽບຮ້ອຍ, ສະແດງໃຫ້ເຫັນຄວາມເຄົາລົບນັບຖືຂອງສັງຄົມທີ່ມີຕໍ່ຜູ້ອາຍຸສູງ. ທ່ານ ບຸຍກວາງເວື້ອງ, ປະທານສະມາຄົມຜູ້ອາຍຸສູງຕາແສງ ດົງກວາງ, ເມືອງດົງຮຶງ ໃຫ້ຮູ້ວ່າ :
“ ແຕ່ລະປີ, ທາງຕາແສງຍັງຄົງຈັດ ພິທີອວຍພອນອາຍຸຍືນໃຫ້ແກ່ຜູ້ອາຍຸສູງເຕັມ 70, 75, 80, 85, 90, 95, 100 ປີ ແລະ ສູງກ່ວາອີກ. ປີມະເສງ 2013 ປີນີ້ ຕາແສງມີຜູ້ອາຍຸຍືນ 92 ປີ ໄດ້ຖືກຈັດພິທີອວຍພອນ. ຜູ້ມີອາຍຸສູງກວ່າໝູ່ ແມ່ນ 102, 104 ປີ. ການນຳຕາແສງ ແລະ ຄອບຄົວ ໄດ້ສະແດງຄວາມເຄົາລົບນັບຖື, ຄວາມກະຕັນຍູຕໍ່ພໍ່ປູແມ່ຍ່າ, ພໍ່ແມ່ ”
ໃນວັນນີ້, ພິທີອວຍພອນອາຍຸຍືນໃຫ້ແກ່ ຜູ້ອາຍຸສູງ ໄດ້ກາຍເປັນມູນເຊື້ອທີ່ດີງາມຂອງຫຼາຍຄອບຄົວ ແລະ ທ້ອງຖິ່ນໃນທົ່ວປະເທດຫວຽດນາມ. ໃນການດຳລົງຊີວິດຍຸກປະຈຸບັນ, ຮູບການຈັດ ພິທີອວຍພອນອາຍຸຍືນໄດ້ຖືກປ່ຽນແປງບໍ່ຫຼາຍກໍໜ້ອຍ, ແຕ່ຄວາມໝາຍຂອງ ພິທີອວຍພອນອາຍຸຍືນຍັງຄົງໄດ້ຮັບການຮັກສາໄວ້ເໝືອນເດີມ, ສະແດງໃຫ້ເຫັນຄວາມກະຕັນຍູຕໍ່ພໍ່ປູແມ່ຍ່າ, ພໍ່ແມ່, ຄວາມຮັກແພງກັນໃນຄອບຄົວ, ການສຶກສາອົບຮົມລູກຫຼານ. ທັງນີ້ກໍເພື່ອທະວີຄູນຈຸດຄວາມງາມດ້ານວັດທະນະທຳ “ ເຄົາລົບນັບຖື ຜູ້ອາຍຸສູງ” ໃນສັງຄົມຫວຽດນາມ.