(vovworld)- ໂດຍໄດ້ເຄື່ອນໄຫວວຽກງານກຸສົນສັງຄົມມາເປັນເວລາກ່ວາ 10 ປີ, ດ້ວຍບັນດາກິດຈະກຳຮັບໃຊ້ໃຫ້ແກ່ຊີວິດຂອງປະຊາຊົນຢ່າງແທດຈິງນັ້ນ, ພະອາຈານທິກເລະເຕິນ, ເຈົ້າອາວາດວັດຢາກຮວາ, ຕາແສງເຮົ້າແທງດົງ, ເມືອງເຕິນແທ້ງ, ແຂວງລອງອານ ໄດ້ຮັບການຮູ້ຈັກຈາກຫຼາຍຄົນເໝືອນດັ່ງ “ນັກວິສາວະກອນຜ້າສະບົງ“ ໃນເວລາ 2, 3 ປີມານີ້, ພະອາຈານໄດ້ຂົນຂວາຍບັນດາຜູ້ມີໃຈບຸນໃຈກຸສົນ, ບໍລິຈາກເງິນໄດ້ນັບສີບຕື້ດົ່ງ ເພື່ອກໍ່ສ້າງບັນດາກິດຈະກຳຄົມມະນາຄົມຊົນນະບົດ, ແບ່ງປັນຄວາມຫຍຸ້ງຍາກກັບຄົນທຸກຍາກ.. ພິເສດ, ສູນສ້າງສະຖິຕິຫວຽດນາມ ໄດ້ຮັບຮອງພະອາຈານທິກເລະເຕິນ ແມ່ນຜູ້ຂົນຂວາຍກໍ່ສ້າງຂົວ ແລະ ບັນດາກິດຈະກຳກຸສົນຫຼາຍກ່ວາໝູ່ຢູ່ແຂວງລອງອານ.
(ພາບ: phapluattp.vn)
ໃນ 5 ປີຜ່ານມາ ຄືແຕ່ປີ 2009-2013, ພະອາຈານທິກເລະເຕິນ ສາມາດຂົນຂວາຍຈຳນວນເງິນໄດ້ກ່ວາ 13 ຕື້ 700 ລ້ານດົ່ງ ເພື່ອປະຕິບັດວຽກງານສັງຄົມ, ໃນນັ້ນໄດ້ສະຫງວນ 5 ຕື້ 500 ລ້ານດົ່ງເພື່ອກໍ່ສ້າງຂົວເບຕົງເສີມເຫຼັກ 48 ແຫ່ງ. ພິເສດ, ທ້າຍປີ 2013, ກິດຈະກຳຂົວແຂວນຂະໜາດໃຫ່ຍກາຍຂ້າມຄອງເໝືອງເຢືອງວັນເຢືອງທີ່ມີລວງຍາວ 80 ມ, ກ້ວາງ 3 ມໄດ້ລົງມືກໍ່ສ້າງ ດ້ວຍຍອດມູນຄ່າ 1 ຕື້ 600 ລ້ານດົ່ງ; ໃນນັ້ນຫັກຈາກງົບປະມານທ້ອງຖິ່ນປະມານ 700 ລ້ານດົ່ງ, ສ່ວນຍັງເຫຼືອໂດຍບັນດາພຸດທະສາສະນິກກະຊົນ, ຜູ້ມີໃຈບຸນໃຈກຸສົນ, ວິສາຫະກິດ ແລະ ປະຊາຊົນບໍລິຈາກ. ສະເພາະໃນ 6 ເດືອນຕົ້ນປີ 2014, ພະອາຈານທິກເລະເຕິນ ໄດ້ຂົນຂວາຍບໍລິຈາກເງິນກໍ່ສ້າງຂົວ 11 ແຫ່ງໃຫ້ບັນດາຕາແສງພາຍໃນ ແລະ ນອກເມືອງດ້ວຍຍອດຈຳນວນເງິນກ່ວາ 3 ຕື້ 600 ລ້ານດົ່ງ, ໃນນັ້ນຫຼາຍກ່ວາໝູ່ແມ່ນຕາແສງເຮົ້າແທງດົງ ມີຂົວ 6ແຫ່ງ ແລະ ຕາແສງເຍີນນິງມີຂົວ 2 ແຫ່ງ. ທ່ານເຈືອງວັນວິງ, ບ້ານ 2, ຕາແສງເຮົ້າແທງດົງ, ເມືອງເຕິນແທ້ງ, ແຂວງລອງອານ ເວົ້າວ່າ:
“ເມື່ອໄດ້ຮັບຂ່າວວ່າ ພະອາຈານທິກເລະເຕິນ ຂົນຂວາຍກໍ່ສ້າງຂົວ, ປະຊາຊົນມີຄວາມປິຕິຊົມຊື່ນທີ່ສຸດ. ມີຂົວແລ້ວຈະຊ່ວຍໃຫ້ຊາວກະສິກອນໄປມາຢ່າງສະດວກສະບາຍ. ສະນັ້ນ, ປະຊາຊົນກໍ່ປະກອບກຳລັງເຮື່ອແຮງເພື່ອກໍ່ສ້າງຂົວ. ພິເສດ, ຂົວແຫ່ງນີ້ໄດ້ຮັບການກໍ່ສ້າງສຳເລັດໄວທີ່ສຸດ, ໃນເວລາພຽງ 50 ວັນເທົ່ານັ້ນ“.
ກ່ອນນີ້ນັບສິບປີ, ພະອາຈານທິກເລະເຕິນ ໄດ້ຕິດພັນກັບວຽກງານກໍ່ສ້າງຂົວ. ບໍ່ພຽງແຕ່ໄປສຳຫຼວດຕົວຈິງ, ຂົນຂວາຍບັນດາຜູ້ມີໃຈບຸນໃຈກຸສົນບໍລິຈາກເງິນເທົ່ານັ້ນ, ພະອາຈານທິກເລະເຕິນ ຍັງພ້ອມກັບໜ່ວຍນາຍຊ່າງຊອກຮູ້, ອອກແບບຂົວແຫ່ງຕ່າງໆທັງຮັບປະກັນຄຸນນະພາບ, ທັງງາມ, ແລະມີລາຄາຖືກອີກ. ນັບແຕ່ນັ້ນ, ຂົວເບຕົງແຫ່ງຕ່າງໆທີ່ຕິດພັນກັບຊື່ສຽງ “ນັກວິສາວະກອນຜ້າສະບົງ“ ໄດ້ປະກົດຕົວຢູ່ເຂດບ້ານນາທຸກຍາກຫຼາຍແຫ່ງ, ຈາກເຕິນແທ້ງ, ແທ້ງຮວາ, ເຕິນຈຸ, ເຈົາແທ່ງ ຕະຫຼອດຮອດບາງທ້ອງຖິ່ນອ້ອມແອ້ມຄືຕ່ຽນຢາງ, ດົ່ງທາບ… ທ່ານເລຮ່ວາງແມ້ງ, ຢູ່ບ້ານຫງວຽນໂລກ, ຕາແສງເຮົາແທງດົງ, ເມືອງເຕິນແທ້ງ, ແຂວງລອງອານ ໃຫ້ຮູ້ວ່າ: ທ່ານໄດ້ພ້ອມກັບປະຊາຊົນສະໜັບສະຫນູນການກໍ່ສ້າງຂົວຊົນນະບົດແຫ່ງຕ່າງໆໂດຍພະອາຈານທິກເລະເຕິນ ເປັນຜູ້ຂົນຂວາຍ:
“ປະຊາຊົນຢາກມີຂົວແຫ່ງນີ້ນັບແຕ່ດົນແລ້ວ. ປະຊາຊົນໄດ້ປະກອບເຫື່ອແຮງເພື່ອກໍ່ສ້າງຂົວໃຫ້ສຳເລັດໂດຍໄວ “.
ບໍ່ພຽງແຕ່ໄດ້ກໍ່ສ້າງຂົວເທົ່ານັ້ນ, ພະອາຈານທິກເລະເຕິນ ຍັງເອົາໃຈໃສ່ເຖິງບັນດາຜູ້ປະສົບກັບຄວາມຫຍຸ້ງຍາກ, ອາພັບຢູ່ທ້ອງຖິ່ນຕ່າງໆໃນແຂວງອີກດ້ວຍ. ໄລ່ສະເພາະໃນ 6 ເດືອນຕົ້ນປີ 2014, ນອກຈາກການກໍ່ສ້າງຂົວ, ພະອາຈານທິກເລະເຕິນ ຍັງພ້ອມກັບບັນດາພະສົງສາມະເນັນ, ພຸດທະສາສະນິດກະຊົນວັດຢາກຮວາ ມອບຂອງຂວັນກ່ວາ 400 ພູດໃຫ້ແກ່ນັກຮຽນທຸກຍາກ, ໄປຢ້ຽມຢາມຖາມຂ່າວ ແລະ ມອບຂອງຂວັນໃຫ້ແມ່ຫວຽດນາມວິລະຊົນ, ນັກປະຕິວັດຜູ້ອາວຸໂສ, ຜູ້ເຖົ້າແກ່ຢູ່ໂດດດຽວ, ທຳການຜ່າຕັດຕາໃຫ້ຄົນທຸກຍາກກ່ວາ 470 ຄົນໂດຍເກັບຄ່າ. ຈຳນວນເງິນທັງໝົດເພື່ອຮັບໃຊ້ໃຫ້ແກ່ການເຄື່ອນໄຫວເຫຼົ່ານີ້ຄາດວ່າແມ່ນກ່ວາ 4 ຕື້ 800 ລ້ານດົ່ງ. ພະອາຈານທິກເລະເຕິນ ປາດຖະໜາວ່າຈະກໍ່ສ້າງຂົວໄດ້ຕື່ມອີກຫຼາຍແຫ່ງ, ຊ່ວຍເຫຼືອໃຫ້ແກ່ຄອບຄົວທຸກຍາກຫຼາຍຄອບຄົວ, ປະກອບສ່ວນປັບປຸງຊີວິດການເປັນຢູ່ໃຫ້ແກ່ປະຊາຊົນເຂດຊົນນະບົດ:
“ຍາມໃດພວກອາດຕະມາກໍ່ສົມທົບກັບອຳນາດການປົກຄອງທ້ອງຖິ່ນ, ປະຊາຊົນເພື່ອພ້ອມກັນຂົນຂວາຍ, ເສີມຂະຫຍາຍ, ເຮັດແນວໃດເພື່ອໃຫ້ຕາແສງໃດກໍ່ກາຍເປັນຕາແສງຊົນນະບົດໃໝ່. ຈາກນັ້ນປະກອບສ່ວນຍົກສູງຊີວິດການເປັນຢູ່ຂອງປະຊາຊົນໃນທ້ອງຖິ່ນ“.
ຍ້ອນບັນດາກິດຈະກຳຮັບໃຊ້ປະຊາຊົນ, ບັນດາການເຄື່ອນໄຫວກຸສົນນັ້ນ ໄດ້ປະກອບສ່ວນຢ່າງຕັ້ງໜ້າຊ່ວຍໃຫ້ທ້ອງຖິ່ນປະຕິບັດສຳເລັດໂຄງການກໍ່ສ້ງຊົນ ນະບົດໃໝ່ໂດຍໄວ. ຫວັງວ່າ, ໃນໄລຍະຈະມາເຖິງ, ຈະມີກິດຈະກຳທີ່ຕິດພັນກັບຊື່ສຽງຂອງ “
ນັກວິສາວະກອນຜ້າສະບົງ“ ຫຼາຍແຫ່ງສືບຕໍ່ໄດ້ຮັບການກໍ່ສ້າງຕາມເນື້ອໃນຈິດໃຈທີ່ວ່າລັດ ແລະ ປະຊາຊົນພ້ອມກັນເຮັດ, ຈາກນັ້ນ, ຈະຍົກສູງຊີວິດຂອງປະຊາຊົນເທື່ອລະກ້າວ, ຊຸກຍູ້ການພັດມະນາເສດຖະກິດ-ສັງຄົມຂອງແຂວງລອງອານ./.