(vovworld) - ສີສັນວັດທະນະທຳ ຫວຽດນາມ ທີ່ສະແດງອອກໃນບັນດາມໍລະດົກວັດທະນະທຳ ໄດ້ຮັບການຮັບຮອງຈາກອົງການວັດທະນະທຳ - ວິທະຍາສາດ - ການສຶກສາ ຂອງ ສະຫະປະຊາຊາດ (UNESCO) ວ່າ ແມ່ນມໍລະດົກໂລກ. ພ້ອມກັນຂະບວນວິວັດແຫ່ງການເຊື່ອມໂຍງເຂົ້າກັບເສດຖະກິດ, ບັນດາຄຸນຄ່າວັດທະນະທຳຂອງ ຫວຽດນາມ ກໍ່ແຜ່ຂະຫຍາຍອອກສູ່ໂລກ.
ພິທີເຂົ້າຊົມພະແມ່ (ພາບ: ອິນເຕີແນັດ)
ວັນທີ 1/12/2016, ຢູ່ວາລະປະຊຸມຂອງຄະນະກຳມະການລະຫວ່າງລັດຖະບານ ກ່ຽວກັບການຮັກສາມໍລະດົກວັດທະນະທຳບໍ່ມີຮູບຮ່າງຄັ້ງທີ 11 ຂອງ UNESCO ເຊິ່ງດຳເນີນຢູ່ນະຄອນ Addis Ababa, ປະເທດ ສາທາລະນະລັດ ປະຊາທິປະໄຕ ສະຫະພັນ Ethiopia, ມໍລະດົກເຊື່ອຖືບູຊາພະແມ່ຕາມຝູ ຂອງ ຫວຽດນາມ ໄດ້ຮັບການຮັບຮອງວ່າເປັນມໍລະດົກວັດທະນະທຳບໍ່ມີຮູບຮ່າງທີ່ເປັນຕົວແທນຂອງມວນມະນຸດ…ໂດຍໄດ້ຮັບຖືວ່າແມ່ນ “ຫໍພິພິທະພັນ” ກ່ຽວກັບປະຫວັດສາດ, ມໍລະດົກ, ແລະ ສີສັນວັດທະນະທຳຂອງຊາວ ຫວຽດນາມ, ການເຊື່ອຖືບູຊາພະແມ່ຕາມຝູ ຊ້ອນແຝງບັນດາຄຸນຄ່າຄຸນສົມບັດ ແລະ ວັດທະນະທຳມະນຸດຢ່າງເລິກເຊິ່ງ. ນັ້ນແມ່ນສິນທຳທີ່ວ່າ “ກິນເຂົ້າຄິດຮອດຄຸນນາ, ກິນປາຄິດຮອດຄຸນນ້ຳ” ໃນນັ້ນແມ່ - ພະແມ່ແມ່ນໃຈກາງ. ຜູ້ກຳກັບການສະແດງ ຫງວຽນມິງຕ໋ວນ, ຜູ້ແຕ່ງຮູບເງົາບັນທຶກໂທລະພາບ “ຫວຽດນາມ ແລະ ວັດທະນະທຳບູຊາພະແມ່” ນັບຮ້ອຍພາກໄດ້ໄຈ້ແຍກວ່າ:
“ຄວາມໝາຍພົ້ນເດັ່ນຂອງການເຊື່ອຖືບູຊາພະແມ່ ແມ່ນຍົກສູງນ້ຳໃຈສາມັກຄີຊົນຊາດ, ເຊິ່ງສະແດງອອກຢ່າງຈະແຈ້ງໃນການເຂົ້າຊົງ, ນອກນັ້ນກໍ່ເຊີດຊູວັດທະນະທຳຂອງບັນດາເຜົ່າຄື: ຊາວເຜົ່າຢ້າວ, ມົ້ງ, ນຸ່ງ…. ການເຊື່ອຖືບູຊາພະແມ່ຍັງສະແດງໃຫ້ເຫັນລັດທິວິລະຊົນແຫ່ງຊາດ, ເພາະວ່າມີຫຼາຍຕົວລະຄອນໃນການເຂົ້າຊົງແມ່ນບັນດາວິລະຊົນຂອງຊາດ”.
ພິທີເຂົ້າຊົມພະແມ່ (ພາບ: ອິນເຕີແນັດ)
ນັບແຕ່ເມື່ອມໍລະດົກກຸ້ງເກົ່າເຫວ໋ ໄດ້ຮັບການຮັບຮອງວ່າເປັນມໍລະດົກໂລກເມື່ອປີ 1993 ມາຮອດປະຈຸບັນ, ໄດ້ມີ 22 ມໍລະດົກຂອງ ຫວຽດນາມ ໄດ້ຮັບການຮັບຮອງຈາກ UNESCO ວ່າເປັນມໍລະດົກໂລກເຊັ່ນ: ທັດສະນີຍະພາບອ່າວ ຫ້າລອງ, ປູຊະນີຍະສະຖານ ມີ້ເຊີນ, ເມືອງເກົ່າ ໂຫ້ຍອານ, ຟອງຍາແກບ່າງ, ພະລາຊະວັງ ທັງລອງ, ກຳແພງສະໄໝລາຊະວົງ ໂຮ່, ທັດສະນີຍະພາບ ຈ່າງອານ, ວັດທະນະທຳຄ້ອງ ໄຕງວຽນ, ການເຊື່ອຖືບູຊາເຈົ້າຊີວິດ ຮຸ່ງ, ງານບຸນ ຢ໋ອງຢູ່ວິຫານ ຊອກ ແລະ ຝູ່ດົງ, ການເຊື່ອຖືບູຊາພະແມ່… ບັນດາມໍລະດົກຂອງ ຫວຽດນາມ ໄດ້ຮັບການຮັບຮອງລວມມີ 3 ປະເພດ: ມໍລະດົກທຳມະຊາດໂລກ, ມໍລະດົກວັດທະນະທຳໂລກ, ມໍລະດົກສັງລວມວັດທະນະທຳ ແລະ ທຳມະຊາດໂລກ. ບັນດາມໍລະດົກໄດ້ຮັບການສ້າງຂຶ້ນຈາກທຳມະຊາດ, ປະເທດຊາດ, ຊາວ ຫວຽດນາມ, ເມື່ອໄດ້ຮັບການຮັບຮອງຈາກ UNESCO, ມັນໄດ້ກາຍເປັນເຄື່ອງໝາຍວັດທະນະທຳຂອງ ຫວຽດນາມໃນຂອບເຂດທົ່ວໂລກ. ທ່ານ ຟ້າມແຊງເຈົາ, ທູດພິເສດຂອງທ່ານນາຍົກລັດຖະມົນຕີ ຫວຽດນາມ ກ່ຽວກັບບັນຫາ UNESCO, ເລຂາທິການໃຫຍ່ຄະນະກຳມະການແຫ່ງຊາດ UNESCO ຂອງ ຫວຽດນາມ, ໃຫ້ຮູ້ວ່າ:
“ບາງເທື່ອເຮົາບໍ່ເຂົ້າໃຈບັນດາມໍລະດົກວັດທະນະທຳຂອງຕົນໄດ້ໝົດ, ຈົນຮອດເວລາໄດ້ຮັບນາມມະຍົດຈາກ UNESCO, ພວກເຮົາຈຶ່ງເຂົ້າໃຈໄດ້ວ່າປະເທດຕົນມີຫຼາຍສິ່ງຫຼາຍຢ່າງທີ່ລ້ຳຄ່າ. ຍິ່ງເຊື່ອມໂຍງເທົ່າໃດພວກເຮົາຍິ່ງມີເງື່ອນໄຂເພື່ອເຂົ້າໃຈວ່າ, ພວກເຮົາມີສີສັນວັດທະນະທຳອຸດົມສົມບຸນທີ່ສຸດ. ປະເທດເຮົາທີ່ມີພື້ນຖານເສດຖະກິດພັດທະນາ, ມີຄວາມນິຍົມວັດທະນະທຳ, ການສຶກສາ ແລະ ມີສີສັນວັດທະນະທຳທີ່ອຸດົມສົມບຸນ. ສິ່ງດັ່ງກ່າວເຮັດໃຫ້ພວກເຮົາມີຄວາມເອກອ້າງທະນົງໃຈ ແລະ ຟົດຟື້ນກວ່າ”.
ພິທີເຂົ້າຊົມພະແມ່ (ພາບ: ອິນເຕີແນັດ)
ນັບແຕ່ມໍລະດົກທຳອິດຂອງຫວຽດນາມໄດ້ຮັບການຮັບຮອງເປັນມໍລະດົກໂລກ, ຫວຽດນາມກໍ່ເຂົ້າຮ່ວມຢ່າງຕັ້ງໜ້າເຂົ້າໃນ 3 ສົນທິສັນຍາສາກົນກ່ຽວກັບວັດທະນະທຳຂອງ UNESCO, ສະແດງໃຫ້ເຫັນຄວາມຮັບຜິດຊອບຂອງ ຫວຽດນາມ ທີ່ມີຕໍ່ຄຸນຄ່າວັດທະນະທຳຂອງມວນມະນຸດ. ຫວຽດນາມໄດ້ສົມທົບກັບ UNESCO ໂຄສະນາເຮັດໃຫ້ບັນດາຄຸນຄ່າວັດທະນະທຳຂອງ ຫວຽດນາມ ແຜ່ຂະຫຍາຍອອກສູ່ປະຊາຄົມໂລກ. ທ່ານນາງ Susan Vize, ຜູ້ຮັກສາການຫົວໜ້າຜູ້ຕາງໜ້າຫ້ອງການ UNESCO ປະຈຳ ຫວຽດນາມ, ໃຫ້ຮູ້ວ່າ:
“ການຮ່ວມມືຢ່າງແຮງລະຫວ່າງ UNESCO ແລະ ຫວຽດນາມ ແມ່ນໜຶ່ງໃນບັນດາຕົວຢ່າງທີ່ດີເດັ່ນຢູ່ໃນໂລກ, ສະແດງໃຫ້ເຫັນຄວາມສຳຄັນຂອງການຮ່ວມມື ແລະ ເລື່ອງຖືວັດທະນະທຳເປັນໃຈກາງຂອງການພັດທະນາເພື່ອສ້າງການປ່ຽນແປງໃຫ້ແກ່ປະເທດ. ຫຽດນາມ ໄດ້ມີຄວາມມານະພະຍາຍາມພໍສົມຄວນ ເມື່ອທຽບໃສ່ຫຼາຍປະເທດໃນໂລກ”.
ເລື່ອງການເຊື່ອຖືບູຊາພະແມ່ຕາມຝູຂອງຊາວ ຫວຽດນາມ ແລະ ບັນດາມໍລະດົກອື່ນໆຂອງ ຫວຽດນາມ ໄດ້ຮັບການຮັບຮອງຈາກ UNESCO ວ່າເປັນມໍລະດົກວັດທະນະທຳຂອງມວນມະນຸດນັ້ນ, ດ້ານໜຶ່ງຈະປະກອບສ່ວນເພີ່ມທະວີທີ່ຕັ້ງ, ບົດບາດຂອງມໍລະດົກທີ່ມີຕໍ່ສັງຄົມ, ເຮັດໃຫ້ວັດທະນະທຳຂອງ ຫວຽດນາມ ແລະ ມວນມະນຸດອຸດົມສົມບຸນຍິ່ງຂຶ້ນ. ດ້ານໜຶ່ງອີກມັນຈະເຮັດໃຫ້ປະຊາຄົມມີຄວາມເຂົ້າໃຈຢ່າງເລິກເຊິ່ງກວ່າ ກ່ຽວກັບມໍລະດົກຂອງຕົນ ເພື່ອມີຄວາມເອກອ້າງທະນົງໃຈ ແລະ ຕັ້ງໜ້າກວ່າໃນການປົກປັກຮັກສາ ແລະ ເສີມຂະຫຍາຍຄຸນຄ່າຂອງມໍລະດົກ. ເປັນອັນວ່າ, ເລື່ອງຮັບຮອງບັນດາມໍລະດົກ ຫວຽດນາມ ເປັນມໍລະດົກໂລກນັ້ນ, ທັງຊ່ວຍໃຫ້ປະຊາຄົມໂລກມີຄວາມເຂົ້າໃຈຢ່າງເລິກເຊິ່ງກ່ຽວກັບບັນດາຄຸນຄ່າວັດທະນະທຳ ຫວຽດນາມ, ທັງຊ່ວຍປະຊາຊົນ ຫວຽດນາມ ຮັບຮູ້ໄດ້ຄວາມຮັບຜິດຊອບຂອງຕົນຕໍ່ບັນດາຄຸນຄ່າວັດທະນະທຳມະນຸດ. ຜ່ານນັ້ນ, ຊາວ ຫວຽດນາມ ຈະຮັບເອົາບັນດາປັດໃຈວັດທະນະທຳທີ່ກ້າວໜ້າ, ລົບລ້າງບັນດາປັດໃຈວັດທະນະທຳທີ່ຫຼ້າຫຼັງ, ກົດໜ່ວງການພັດທະນາ ເພື່ອສ້າງຮູບພາບວັດທະນະທຳໃໝ່ທີ່ເປັນເອກະລັກສະເພາະຂອງ ຫວຽດນາມ.