ທ່ານ ຮອງລັດຖະມົນຕີ ໂຮ່ແອງຕ໋ວນ ກ່າວຄຳເຫັນທີ່ກອງປະຊຸມ ສຳມະນາ “ລະບົບຄຸນຄ່າວັດທະນະທຳຫວຽດນາມ ໃນທ່າອຽງ ເຊື່ອມໂຍງ ເຂົ້າກັບສາກົນ ແລະ ປ່ຽນແປງໃໝ່ ”
|
ໃນທ່າອຽງເຊື່ອມໂຍງເຂົ້າກັບສາກົນ, ວັດທະນະທຳຫວຽດນາມຢູ່ໃນຂະບວນວິວັດເຊື່ອມໂຍງເຂົ້າກັບວັດທະນະທຳໂລກ. ໃນສະພາວະນີ້, ລະບົບ ວັດທະນະທຳຫວຽດນາມໄດ້ຮັບຜົນກະທົບທັງຢູ່ພາຍໃນ ແລະ ພາຍນອກ. ການຫັນປ່ຽນຄຸນຄ່າທາງດ້ານວັດທະນະທຳ, ຫຼືວິທີອະນຸລັກ ແລະ ເສີມຂະຫຍາຍ ລະບົບຄຸນຄ່າວັດທະນະທຳຫວຽດນາມໃນການພັດທະນາສັງຄົມ...ແມ່ນບັນດາບັນຫາໄດ້ຮັບຄວາມສົນໃຈຈາກບັນດານັກວັດທະນະທຳ.
ມີຫຼາຍວິທີໃຫ້ຄຳນິຍາມກ່ຽວກັບລະບົບຄຸນຄ່າວັດທະນະທຳຫວຽດນາມຕາມເງື່ອນໄຂຊີວິດສັງຄົມ. ທ່ານ ຮອງລັດຖະມົນຕີກະຊວງວັດທະນະທຳ-ກິລາ ແລະ ທ່ອງທ່ຽວຫວຽດນາມ ໂຮ່ແອງຕ໋ວນ ຖືວ່າ: ລະບົບຄຸນຄ່າຂອງພື້ນຖານ ວັດທະນະທຳ ແມ່ນລວມທັງບັນດາເຈົ້າຂອງທັງໝົດຊຶ່ງ ພື້ນຖານວັດທະນະທຳສາມາດສະສົມໄດ້. ລະບົບຄຸນຄ່າວັດທະນະທຳຫວຽດນາມ ກໍແມ່ນບັນດາ ຄຸນຄ່າວັດທະນະທຳໃນທຸກໆຂົງເຂດວັດທະນະທຳ, ການເມືອງ, ເສດຖະກິດ, ສັງຄົມ... ຊຶ່ງໂດຍແມ່ນຊາວຫວຽດນາມຖອດຖອນມາໄດ້ໃນອະດີດຕະການ, ມີຫຼາຍຄຸນຄ່າໄດ້ຮ່ວມສຳພັນກັນສ້າງເປັນລະບົບ. ລະບົບຄຸນຄ່າວັດທະນະທຳນີ້ ພັດດັດສົມ, ຄອບງຳວິຖີຊີວິດຂອງມະນຸດຍຸກປະຈຸບັນ. ມີຫຼາຍຄັ້ງ, ລະບົບ ຄຸນຄ່າວັດທະນະທຳຫວຽດນາມ ກໍຍັງມີການປ່ຽນແປງໃດໜຶ່ງເພື່ອສອດຄ່ອງກັບສະພາບການໃໝ່. ຈາກພື້ນຖານທີ່ເປັນມູນເຊື້ອ, ບັນດາ ຄຸນຄ່າວັດທະນະທຳພື້ນ ເມືອງໄດ້ຮັບການອະນຸລັກຮັກສາ ແລະ ເສີມຂະຫຍາຍມາຮອດວັນນີ້ ພວມສ້າງເປັນລະບົບຄຸນຄ່າວັດທະນະທຳໃໝ່ຂອງຍຸກທັນສະໄໝ, ໄປພ້ອມກັນນັ້ນ ແມ່ນບັນດາປັດໄຈຮັບເອົາຍອດຍິ່ງດ້ານວັດທະນະທຳຂອງມວນມະນຸດ. ການພົວພັນແລກປ່ຽນວັດທະນະທຳລະຫວ່າງບັນດາເຜົ່າ ໄດ້ເຮັດໃຫ້ຫຼາຍຄຸນຄ່າ, ສີສັນວັດທະນະທຳຂອງຊາດຫວຽດນາມໄດ້ຮັບການຢັ້ງຢືນ, ພ້ອມກັນນັ້ນ ລະບົບ ຄຸນຄ່າວັດທະນະທຳຫວຽດນາມຖືກເພີ່ມເຕີມຫຼາຍຄຸນຄ່າໃໝ່ຕື່ມອີກ, ອັນໄດ້ເຮັດໃຫ້ສີສັນວັດທະນະທຳຂອງຊາດມີຄວາມອຸດົມສົມບູນ ຫຼາຍຮູບຫຼາຍສີກ່ວາເກົ່າ. ສາດສະດາຈານ ໂງດຶກທິ້ງ ນັກຄົ້ນຄ້ວາວັດທະນະທຳຫວຽດນາມຖືວ່າ :
“ ຫຼັກຕົ້ນທີ່ບໍ່ອາດຈະປ່ຽນແປງໄດ້, ນັ້ນແມ່ນໃນປະຈຸບັນ, ພວກເຮົາຕ້ອງ ພະຍາຍາມປະຕິບັດ 2 ວຽກງານ, ທັງປົກປັກຮັກສາ, ສືບທອດ, ສ້າງຄວາມອຸດົມ ຮັ່ງມີ, ແຕ່ພ້ອມກັນນັ້ນ ກໍຕ້ອງເປັນເຈົ້າການເຊື່ອມໂຍງເຂົ້າກັບສາກົນ. ນັ້ນແມ່ນ ວຽກງານ 2 ຢ່າງທີ່ບໍ່ອາດຈະປະລະຢ່າງໜຶ່ງໄດ້. ຖ້າຫາກປະຕິບັດ 2 ວຽກງານນີ້ເປັນຢ່າງດີນັ້ນ, ປະເທດພວກເຮົາຍັງສາມາດຮັກສາສີສັນຂອງຕົນໄດ້, ແຕ່ທັນສະໄໝທີ່ສຸດ. ໂລກປະຈຸບັນ ມີຄວາມອຸດົມສົມບູນ ຫຼາຍຮູບຫຼາຍສີທີ່ສຸດ. ເປັນເຈົ້າການເຊື່ອມໂຍງເຂົ້າກັບສາກົນໝາຍຄວາມວ່າ ເປັນເຈົ້າການເລືອກເຟັ້ນ. ບໍ່ເປັນເຈົ້າການ ແມ່ນບໍ່ສາມາດບັນລຸໄດ້ຈຸດໝາຍ ”
ໃນປະຫວັດສາດແຫ່ງການອະນຸລັກຮັກສາ ແລະ ພັດທະນາວັດທະນະທຳທີ່ເປັນມູນເຊື້ອຂອງຊາດ, ຫວຽດນາມຍາມໃດກໍສະແດງໃຫ້ເຫັນຄຸນນະທາດທີ່ໝັ້ນຄົງໜັກແໜ້ນຕໍ່ໜ້າເລື່ອງແຊກຊຶມຈາກກະແສວັດທະນະທຳຕ່າງປະເທດເຂົ້າມາ. ໃນປະຈຸບັນ, ທ່າອຽງເປີດປະຕູ, ພົວພັນແລກປ່ຽນ, ການເຊື່ອມໂຍງທາງດ້ານວັດທະນະທຳ ແມ່ນນັບມື້ນັບເລິກເຊິ່ງກ້ວາງຂວາງ, ຊີວິດວັດທະນະທຳຫວຽດນາມພວມຕ້ອງປະເຊີນໜ້າກັບບັນດາສິ່ງທ້າທາຍຢ່າງໃຫຍ່ຫຼວງໂດຍກົງ. ນັກທິດສະດີ ຕຳໜິວິຈານ ໂງຖາວ ຊີ້ແຈ້ງວ່າ :
“ ວຽກງານທີ່ສຳຄັນກ່ວາໝູ່ ຍັງຄົງ ແມ່ນສ້າງກຳລັງແຮງພາຍໃນຂອງຕົນ. ກຳລັງແຮງພາຍໃນນັ້ນ ກໍແມ່ນການສ້າງຖັນແຖວຜູ້ປະດິດຄິດແຕ່ງວັນນະຄະດີສິລະປະຫວຽດນາມທີ່ີມີລະດັບຄວາມຮູ້ກ່ຽວກັບມູນເຊື້ອທີ່ເລິກເຊິ່ງ. ນຳວັດທະ ນະທຳທີ່ເປັນມູນເຊື້ອຂອງຫວຽດນາມເຊື່ອມໂຍງເຂົ້າກັບວັດທະນະທຳໂລກ ເພື່ອສ້າງໃຫ້ມີບັນດາຜະລິດຕະພັນທີ່ໃໝ່ອຽມຢ່າງສິ້້ນເຊິ່ງ, ແຕ່ໃນນັ້ນຍັງຄົງຮັກສາຮູບຮ່າງ, ຈິດວິນຍານ, ສະຕິປັນຍາຂອງຊາດຫວຽດນາມໄວ້ໄດ້”
ໂລກໄດ້ພັດທະນາຢ່າງບໍ່ຢຸດຢັ້ງ, ວັດທະນະທຳກໍບໍ່ນອນນອກເໜືອຈາກກະແສພັດທະນານັ້ນ. ບັນດາກະແສວັດທະນະທຳໃນໂລກໄດ້ແຊກຊຶມເຂົ້າມາກັບໄວໜຸ່ມໃນແຕ່ລະວັນ ແລະ ມີການປ່ຽນແປງໃໝ່ຢ່າງບໍ່ຢຸດຢັ້ງ. ໃນທຸກວັນນີ້, ບັນຫາທີ່ຍາມໃດກໍໄດ້ຮັບຄວາມສົນໃຈຈາກບັນດານັກຄົ້ນຄ້ວາ, ຜູ້ວາງແຜນວັດທະ ນະທຳຂອງຫວຽດນາມ, ນັ້ນແມ່ນແນວຄິດໃໝ່ຂອງໄວໜຸ່ມກ່ຽວກັບວັດທະ ນະທຳ. ສາດສະດາຈານ ໂງດຶກທິ້ງ ນັກຄົ້ນຄ້ວາວັດທະນະທຳຫວຽດນາມເວົ້າວ່າ:
“ ອະນາຄົດຂອງວັດທະນະທຳກໍແມ່ນຢູ່ໃນໄວໜຸ່ມ. ໃນບັນດາຂໍ້ສະເໜີແນະກ່ຽວກັບວັດທະນະທຳ, ແມ່ນຄວນມຸ່ງໄປສູ່ໄວໜຸ່ມ, ລຸ່ນຄົນໃນອະນາຄົດຂອງ ປະເທດຊາດ. ບັນຫາເຊື່ອມໂຍງດ້ານວັດທະນະທຳ, ອະນຸລັກຮັກສາວັດທະນະ ທຳກໍແມ່ນຕ້ອງສົ່ງຜົນກະທົບຕໍ່ໄວໜຸ່ມ, ກຳລັງໜຸ່ມນັ້ນ ເພື່ອໃຫ້ເຂົາເຈົ້າມີສະຕິຄວາມຮັບຮູ້ໄດ້ວ່າ ເປັນຫຍັງພວກເຮົາຕ້ອງປົກປັກຮັກສາມໍລະດົກ, ມູນເຊື້ອ, ເປັນຫຍັງພວກເຮົາຕ້ອງເຊື່ອມໂຍງເຂົ້າກັບສາກົນ. ເມື່ອເຂົາເຈົ້າມີສະຕິຄວາມຮັບຮູ້ໄດ້ ແລະ ພວກເຮົາສາມາດສ້າງເງື່ອນໄຂເພື່ອໃຫ້ເຂົາເຈົ້າອາດຈະປະຕິບັດໄດ້ວຽກງານເຫຼົ່ານັ້ນ, ເຂົາເຈົ້າກາຍເປັນບັນດາຜູ້ເປັນເຈົ້າຂອງຂະບວນວິວັດແຫ່ງການອະນຸລັກຮັກສາ ແລະ ເຊື່ອມໂຍງເຂົ້າກັບສາກົນ. ຄວາມນຶກຄິດຂອງຂ້າພະ ເຈົ້າແມ່ນພຽງແຕ່ລວບລວມໃນປະໂຫຍກທີ່ວ່າ “ ພະຍາຍາມອະນຸລັກຮັກສາ ແລະ ເສີມຂະຫຍາຍມູນເຊື້ອ, ເປັນເຈົ້າການເຊື່ອມໂຍງເຂົ້າກັບວັດທະນະທຳຂອງມວນມະນຸດ ”
ເມື່ອເນັ້ນໜັກເຖິງຄວາມສຳຄັນຂອງ ການອະນຸລັກຮັກສາ ແລະ ເສີມຂະຫຍາຍສີສັນວັດທະນະທຳຂອງຊາດໃນຄວາມມານະພະຍາຍາມສ້າງລະບົບ ຄຸນຄ່າວັດທະນະທຳຫວຽດນາມໃນໄລຍະປະເທດຊາດເຊື່ອມໂຍງເຂົ້າກັບສາກົນ. ທ່ານ ຮອງລັດຖະມົນຕີກະຊວງວັດທະນະທຳ-ກິລາ ແລະ ທ່ອງທ່ຽວຫວຽດນາມ ໂຮ່ແອງຕ໋ວນ ຊີ້ແຈງວ່າ :
“ ການອະນຸລັກຮັກສາ ແລະ ເສີມຂະຫຍາຍສີສັນວັດທະນະທຳຂອງຊາດໂດຍຜ່ານການກໍ່ຕັ້ງ, ເພີ່ມພູນຄູນສ້າງ ແລະ ຮັກສາ ລະບົບຄຸນຄ່າວັດທະນະທຳ ຫວຽດນາມ ແມ່ນມີບົດບາດສຳຄັນສຳລັບບໍ່ວ່າປະເທດຊາດໃດໆ. ນັ້ນກໍແມ່ນຄວາມແຕກຕ່າງກັນ, ແມ່ນຄຸນນະທາດຂອງສັງຄົມຊຶ່ງລະບົບຄຸນຄ່ານັ້ນຄົງຕົວ. ຈາກພື້ນຖານທີ່ເປັນມູນເຊື້ອ, ບັນດາຄຸນຄ່າວັດທະນະທຳພື້ນເມືອງໄດ້ຮັບການອະນຸລັກຮັກສາ ແລະ ເສີມຂະຫຍາຍມາຮອດວັນນີ້, ພວມສ້າງໃຫ້ມີລະບົບ ຄຸນຄ່າວັດທະນະທຳໃໝ່ຂອງຍຸກທັນສະໄໝ”
ໃນທ່າມກາງບັນດາການຫັນປ່ຽນຂອງຊີວິດສັງຄົມ, ວັດທະນະທຳຫວຽດນາມ ຄືດັ່ງມີສາຍລົມໃໝ່ຕື່ມອີກຈາກບັນດາປັດໄຈ ເຊື່ອມໂຍງເຂົ້າກັບສາກົນ, ບັນດາສິ່ງຍອດຍິ່ງຂອງໂລກ. ພ້ອມກັນນັ້ນ, ບັນດາຈຸດວັດທະນະທຳທີ່ເປັນມູນເຊື້ອທີ່ມີຢູ່ແລ້ວນັ້ນ ພວມໄດ້ຮັບການອະນຸລັກຮັກສາ ແລະ ເສີມຂະຫຍາຍ ເພື່ອໃຫ້ວັດທະນະທຳຫວຽດນາມຍາມໃດກໍແມ່ນຄວາມເອກອ້າງທະນົງໃຈຂອງຊາວຫວຽດນາມແຕ່ລະຄົນ.