(vovworld)- ໃນໂອກາດທ້າຍອາທິດ,ຢູ່ຖະຫນົນເກົ່າຫລາຍສາຍ ຢູ່ ຮ່າໂນ້ຍ, ບັນດາປະເພດດົນຕີພື້ນເມືອງຄື: ຂັບແຈ່ວ, ຂັບຕ່ວງ, ຂັບລຳພື້ນເມືອງ ແລະ ດົນຕີໃນພິທີເຂົ້າຊົງໄດ້ຮັບການສະແດງຢ່າງມີຊີວິດຊິວາ ອັນໄດ້ດຶງດູດນັກທ່ອງທ່ຽວຢູ່ພາຍໃນ ແລະ ຕ່າງປະເທດມາຊົມເປັນຈຳນວນຫລວງຫລາຍ. ບັນດາລາຍການສະແດງດົນຕີພື້ນເມືອງຢູ່ຖະຫນົນເກົ່າຮ່າໂນ້ຍ ບໍ່ພຽງແຕ່ເຮັດໃຫ້ທັດສະນິຍະພາບຢູ່ຮ່າໂນ້ຍຍິ່ງອຸດົມສົມບູນດູດດື່ມກວ່າເທົ່ານັ້ນ ຫາກຍັງເປັນການອະນຸລັກຮັກສາ, ເສີມຂະຫຍາຍ ແລະ ໂຄສະນາບັນດາປະເພດດົນຕີທີ່ເປັນມໍລະດົກວັດທະນະທຳຂອງຊາດຫວຽດນາມຢ່າງມີປະສິດທິຜົນອີກດ້ວຍ.
ບັນດານັກສິລະປິນສະແດງລາຍການສິລະປະພື້ນເມືອງ
|
ບັນດາທຳນອງເພງຂອງປະເພດດົນຕີຂັບເຈົາວັນໃນພິທີເຂົ້າຊົງນີ້ ບໍ່ພຽງແຕ່ໄດ້ຮັບການປະຕິບັດຢູ່ບັນດາຫໍບູຊາເທົ່ານັ້ນ ຫາກຍັງກາຍເປັນຄວາມຊີນເຄີຍກັບນັກທ່ອງທ່ຽວ ແລະ ປະຊາຊົນທີ່ດຳລົງຊີວິດຢູ່ຄຸ້ມຖະຫນົນເກົ່າຮ່າໂນ້ຍອີກດ້ວຍ. ໃນໂອກາດທ້າຍອາທິດ, ໃນຖະຫນົນຫລາຍສາຍຢູ່ຮ່າໂນ້ຍ, ບັນຍາກາດອຶກກະທຶກຄຶກໂຄມ, ນັກທ່ອງທ່ຽວມາຢ້ຽມຊົມ ແລະ ຮັບຟັງບັນດາທຳນອງເພງພື້ນເມືອງ, ສຽງດົນຕີພື້ນເມືອງໂດຍບັນດານັກສິລະປີນອາຊີບສະແດງຢ່າງຫລວງຫລາຍ. ສຽງເພງ, ສຽງດົນຕີນັ້ນໄດ້ສ້າງຄວາມປະທັບໃຈດ້ານວັດທະນະທຳທີ່ດີງາມກ່ຽວກັບວັດທະນະທຳສິລະປະພື້ນເມືອງຂອງຫວຽດນາມ.
ດ້ວຍປະເພດດົນຕີໃນການຂັບເຈົາວັນ, ກ່ອນນີ້ ບໍ່ມີຫລາຍຄົນນິຍົມປະເພດສິລະປະນີ້, ຜູ້ມາຊົມສ່ວນຫລາຍແມ່ນຜູ້ເຖົ້າຜູ້ແກ່ ແລະ ຜູ້ນິຍົມສິລະປະພື້ນເມືອງ. ແຕ່ບັດນີ້ ລາຍການຂັບເຈົາວັນທີ່ສະແດງຢູ່ຖະຫນົນເກົ່າພັດມີຄວາມດູດດື່ມທີ່ສຸດ. ຜູ້ມາຊົມລາຍການສະແດງດົນຕີພື້ນເມືອງ ມີທັງຜູ້ເຖົ້າຜູ້ແກ່ຕະຫລອດຮອດເດັກນ້ອຍ. ພາຍຫລັງລາຍການສະແດງຂັບເຈົາວັນຢູ່ຖະຫນົນເກົ່າ, ນັກສິລະປິນ ພື້ນເມືອງ ຫງວຽນທິຢ້ຽວຮົ່ງ ໃຫ້ຮູ້ວ່າ ດ້ວຍການສະແດງໃນຕົວຈິງ ໄດ້ດຶງດູດ ໄວຫນຸ່ມມາຊົມລາຍການສະແດງສິລະປະນີ້ເປັນຈຳນວນຫລວງຫລາຍ.
“ຂ້າພະເຈົ້າຄິດວ່າ ບັນດາວາດຟ້ອນຂອງນາງທຽມ, ທ້າວທຽມໃນພິທີເຂົ້າຊົມ ເປັນການດຶງດູດແຂກມາຊົມເປັນຈຳນວນຫລວງຫລາຍ. ປະຈຸບັນ ບໍ່ສະເພາະຜູ້ເຖົ້າຜູ້ແກ່ເທົ່ານັ້ນ ຫາກລຸ້ນຫນຸ່ມກໍນິຍົມປະເພດສິລະປະພື້ນເມືອງນີ້ອີກດ້ວຍ.”
ນັກສິລະປິນສະແດງການຂັບແຈ່ວ
|
ດ້ວຍເວທີສະແດງຂະຫນາດນ້ອຍຕັ້ງຢູ່ກ່າງແຈ້ງ, ບັນດານັກສິລະປິນຂັບສຳ ບາງເທື່ອນັ່ງລົງ, ບາງເທື່ອລຸກຂຶ້ນ ທັງເສບດົນຕີ ທັງຮ້ອງລຳທຳເພງດ້ວຍຄວາມເມົາມົວ. ດ້ວຍເຄື່ອງດົນຕີ ແລະ ຊໍ, ຜ່ານບັນດາທຳນອງເພງໃນບັນດາບົດຂັບສຳ, ນັກສິລະປິນພື້ນເມືອງ ໄດ້ເຮັດໃຫ້ຜູ້ຊົມວາດພາບເຖິງຊີວິດຂອງຊາວຮ່າໂນ້ຍໃນຊຸມປີຕົ້ນສັດຕະວັດທີ 20. ສຽງຂັບສຳໃນຖະຫນົນເກົ່າຢູ່ ຮ່າໂນ້ຍ ທີ່ຄັບຄາຫນາແຫນ້ນ ແລະ ທັນສະໄຫມ ໄດ້ເຮັດໃຫ້ຜູ້ຊົມຄິດເຖິງຮູບພາບຜູ້ຂັບສຳສະແດງຢູ່ຕໍ່ຫນ້າປະຕູເຂົ້າຕະຫລາດບ້ານນາໃນເມື່ອກ່ອນ. ເອື້ອຍ ກາວທູຮ່າ, ນັກທ່ອງທ່ຽວມາຢ້ຽມຢາມຖະຫນົນເກົ່າ ຮ່າໂນ້ຍ ໃຫ້ຮູ້ວ່າ:
“ບັນດາສຽງດົນຕີທີ່ມີຊີວິດຊີວາອ່ອນຊອນ ຜ່ານການສະແດງຂອງບັນດານັກສິລະປິນ ແລະ ການເສບເຄື່ອງດົນຕີພື້ນເມືອງປະເພດຕ່າງໆ ໄດ້ສ້າງຄວາມປະທັບໃຈໃຫ້ແກ່ຜູ້ຊົມທີ່ສຸດ. ເມື່ອໄດ້ຮັບຟັງດົນຕີໃນລາຍການສະແດງດົນຕີພື້ນເມືອງຢູ່ຖະຫນົນເກົ່າ ຮ່າໂນ້ຍ ຂ້າພະເຈົ້າຮູ້ສຶກມັນແຕກຕ່າງກັບສຽງດົນຕີພື້ນເມືອງຜ່ານປະເພດອື່ນ.”
ການເຄື່ອນໄຫວສະແດງດົນຕີພື້ນເມືອງຢູ່ຄຸ້ມຖະຫນົນເກົ່າຮ່າໂນ້ຍ ເບື້ອງຕົ້ນໂດຍບັນດາກຸ່ມນິຍົມດົນຕີພື້ນເມືອງ ແລະ ມີຄວາມຮັກຕໍ່ຮ່າໂນ້ຍ ສະແດງ ດ້ວຍຈຸດປະສົງແມ່ນຢາກໂຄສະນາສິ່ງທີ່ຍອດຢ້ຽມໃນດົນຕີພື້ນເມືອງຂອງຊາດໂດຍບໍ່ເກັບຄ່າ. ຫລັງຈາກນັ້ນ ການເຄື່ອນໄຫວດັ່ງກ່າວໄດ້ຮັບການຕອບສະຫນອງ ແລະ ລະດົມກຳລັງໃຈບໍ່ພຽງແຕ່ຈາກຜູ້ຊົມເປັນຈຳນວນຫລວງຫລາຍເທົ່ານັ້ນ ຫາກນັບທັງບັນດາອົງການອື່ນອີກດ້ວຍ. ປີ 2015 ກອງດົນຕີ ພື້ນເມືອງ ດົງກີງ ໄດ້ຮ່ວມມືກັບຄະນະຄຸ້ມຄອງຄຸ້ມຖະຫນົນເກົ່າຮ່າໂນ້ຍ ຈັດຕັ້ງລາຍການ “ດົນຕີໃນຖະຫນົນເກົ່າ” ເພື່ອແນະນຳໂດຍສັງເຂບໃຫ້ສາທາລະນະຊົນກ່ຽວກັບດົນຕີໃນເມື່ອກ່ອນ ແລະ ປະຈຸບັນ ຂອງເຂດດິນແຫ່ງອະລິຍະທຳນັບພັນປີ.” ລາຍການຍັງໄດ້ເຊື້ອເຊີນບັນດານັກສິລະປິນດົນຕີພື້ນເມືອງແຖວຫນ້າຄື: ນັກສິລະປີນປະຊາຊົນ ຊວນແຫກ, ນັກສິລະປີນດີເດັ່ນ ດັ້ງກວາງຮືງ, ນັກສິລະປິນ ແທງຮ່ວາຍ. ລາຍການສະແດງແມ່ນດຳເນີນຕາມຮູບການທີ່ເປັນມູນເຊື້ອ, ບັນດານັກສິລະປິນ, ນັກເສບດົນຕີ ນັ່ງເທິງສາດ ທັງເສບດົນຕີ, ທັງຮ້ອງລຳທຳເພງ, ບໍ່ມີ micro ແລະ ໂທລະໂຄ່ງ. ອ້າຍດັ້ງຊວນເຄ, ຜູ້ນິຍົມດົນຕີພື້ນເມືອງ ແລະ ເມົາມົວຕໍ່ຄວາມງາມຂອງຮ່າໂນ້ຍ ໄດ້ແບ່ງປັນວ່າ:
“ເມື່ອໄດ້ຮັບຟັງສຽງດົນຕີໂດຍນັກສິລະປິນສະແດງ ຂ້າພະເຈົ້າຮູ້ສຶກຈັບອົກຈັບໃຈທີ່ສຸດ. ທຳນອງເພງແມ່ນອ່ອນຊອນ, ດູດດື່ມທີ່ສຸດ.”
ຖ້າວ່າ ດົນຕີເວົ້າລວມ ແມ່ນສິລະປະນຳໃຊ້ທຳນອງເພງແມ່ນນ້ຳສຽງ ເພື່ອສະແດງອາລົມຈິດ, ຄວາມຮູ້ສຶກຂອງມະນຸດ, ດົນຕີພື້ນເມືອງແມ່ນນ້ຳສຽງສະແດງໃຫ້ເຫັນດ້ານຈິດວິນຍານ, ວັດທະນະທຳ, ພູມປັນຍາຂອງຊາດ. ດົນຕີພື້ນເມືອງນັບມື້ນັບດຶງດູດຜູ້ຊົມຜ່ານການສະແດງຂອງບັນດານັກສິລະປິນພື້ນເມືອງ, ນັກສິລະປິນປະຊາຊົນ ພິເສດໄດ້ສະແດງຢູ່ຄຸ້ມຖະຫນົນເກົ່າຮ່າໂນ້ຍ. ເມື່ອໄປຢ້ຽມຢາມ ຖະຫນົນ 36 ສາຍຢູ່ ຮ່າໂນ້ຍ, ທ່ານຢ່າລືມແວ່ຢ້ຽມຊົມລາຍການສະແດງດົນຕີພື້ນເມືອງຂອງຫວຽດນາມ.