ລາຍການສິລະປະໃນວັນບຸນໂດຍຊາວຊົນເຜົ່າສະແດງ
|
(vovworld)- ວັນວັດທະນະທຳບັນດາເຜົ່າຢູ່ຫວຽດນາມ ດ້ວຍຫົວຂໍ້ “ເຕົ້າໂຮມສິ່ງຍອດຍິ່ງ” ຫາກໍດຳເນີນໄປໃນກາງເດືອນ 4 ຢູ່ ບ້ານວັດທະນະທຳ ທ່ອງທ່ຽວ ບັນດາເຜົ່າ ຫວຽດນາມ, ຊື່ງແມ່ນຊາຍຄາລວມຂອງ 54 ຊົນເຜົ່າອ້າຍນ້ອງໃນທົ່ວປະເທດຫວຽດນາມ. ຜ່ານການຈັດຕັ້ງ 8 ຄັ້ງ, ມາຮອດປະຈຸບັນ, ວັນວັດທະນະທຳບັນດາເຜົ່າຢູ່ຫວຽດນາມ ໄດ້ກາຍເປັນວັນບຸນເພື່ອໃຫ້ປະຊາຊົນບັນດາເຜົ່າພົບປະແລກປ່ຽນ, ພ້ອມກັນເຊື່ອມຕົວໃນບັນດາງານບຸນທີ່ເປັນມູນເຊື້ອ ຜ່ານນັ້ນ ປະກອບສ່ວນຮັກສາບັນດາຄຸນຄ່າວັດທະນະທຳອັນດີງາມ, ເຮັດໃຫ້ຊີວິດທາງດ້ານຈິດໃຈຂອງປະຊາຊົນຍິ່ງອຸດົມສົມບູນກວ່າ.
ຢູ່ເຂດແນະນຳວັດທະນະທຳຂອງຊາວເຜົ່າ ຊານໄຈ, ໝໍຜີ ແລະ ພໍ່ແມ່ປະຊາຊົນເຜົ່າ ຊານໄຈ ພ້ອມກັນເຂົ້າຮ່ວມລາຍການສິລະປະເພື່ອວາດພາບບັນດາວາດຟ້ອນ ຕັກສິ່ງ(Tac Xinh)ໃນງານບຸນພາວະນາຂໍໃຫ້ລະດູການເກັບກ່ຽວໄດ້ຮັບຜົນດີ ຊື່ງແມ່ນມໍລະດົກວັດທະນະທຳບໍ່ມີຮູບຮ່າງລະດັບຊາດຂອງພໍ່ແມ່ນປະຊາຊົນເຜົ່າ ຊານໄຈ. ການເຄື່ອນໄຫວນີ້ແມ່ນຈຸດພົ້ນເດັ່ນໃນເຫດການວັນວັດທະນະທຳບັນດາເຜົ່າ ຫວຽດນາມ ປີນີ້.
ໃນບັນຍາກາດຟົດຟື້ນມ່ວນຊື່ນຂອງວັນບຸນ, ເຈົ້າກົກເຈົ້າເຫລົ່່າ, ນາຍບ້ານ, ນັກສິລະປະການນັບຮ້ອຍໆຄົນທີ່ຕາງຫນ້າໃຫ້ປະຊາຊົນບັນດາຊົນເຜົ່າ ຄື: ເຜົ່າ ຂະມູ ຢູ່ ແຂວງ ດ້ຽນບຽນ, ເຜົ່າຂະແມຢູ່ ແຂວງ ຊອກຈັງ ແລະ ເຜົ່າອື່ນໆ ພ້ອມກັນພົບປະແລກປ່ຽນ, ແນະນຳບັນດາ ຈຸດວັດທະນະທຳທີ່ເປັນເອກະລັກສະເພາຂອງເຜົ່າຕົນ, ຈາກນັ້ນ ຮັດແຫນ້ນຄວາມສາມັກຄີສະຫນິດຕິດພັນລະຫວ່າງ 54 ຊົນເຜົ່າອ້າຍນ້ອງ. ຈາກບຸນຢັ້ງຢືນການເຕີບໃຫຍ່ຂອງຊົນເຜົ່າ ເອເດ ຕະຫລອດຮອດບຸນ ເຕັ້ນໃສ່ຖ່ານໄຟ ຫລື ງານບຸນອວຍພອນອາຍຸຍືນຂອງຊາວເຜົ່າຢ້າວ… ແຕ່ລະງານບຸນລ້ວນແຕ່ມີສີສັນວັດທະນະທຳສະເພາະ ໂດຍພໍ່ແມ່ປະຊາຊົນຊົນບັນດາເຜົ່າແນະນຳ. ມາເຂົ້າຮ່ວມວັນບຸນນີ້, ຜູ້ຊົມໄດ້ເຫັນປະຈັກຕາການເຄື່ອນໄຫວດ້ານຈິດວີນຍານທີ່ເປັນເອກະລັກສະເພາະຫລື ໄດ້ເຊື່ອມຕົວໃນກັບບັນດາວາດຟ້ອນ, ສຽງເພງພື້ນເມືອງທີ່ດຶງດູດໃຈ. ນັກທ່ອງທ່ຽວ ຫງວຽນແທງເຕີມ, ມາຈາກແຂວງ ເງ້ອານ ແບ່ງປັນວ່າ:
“ຜ່ານການເຄື່ອນໄຫວຕ່າງໆທີ່ວັນບຸນ, ພວກຂ້າພະເຈົ້າຈຶ່ງຮູ້ຈັກເຖິງບັນດາຄຸນຄ່າທີ່ເປັນເອກະລັກສະເພາະທີ່ສຸດ ເຊິ່ງບັນດາເຜົ່າໄດ້ ແນະນຳໃນງານບຸນ. ຜ່ານນັ້ນ ກໍປາດຖະຫນາວ່າ ປະຊາຊົນບັນດາເຜົ່າຈະອະນຸລັກຮັກສາ ແລະ ເສີມຂະຫຍາຍບັນດາຄຸນຄ່ານດ້ານວັດທະນະທຳທີ່ເປັນເອກະລັກສະເພາະຂອງເຜົ່າຕົນກວ່າອີກ ເພື່ອແນະນຳເຖິງເພື່ອນມິດພາຍໃນ ແລະ ຕ່າງປະເທດ, ຈາກນັ້ນ ສ້າງຄວາມເປັນເອກະພາບໃນວັດທະນະທຳຫລາຍຮູບຫລາຍແບບຂອງຫວຽດນາມ”
ທີ່ວັນບຸນ ຍັງດຳເນີນການເຄື່ອນໄຫວວັດທະນະທຳ, ກິລາຫລາຍຢ່າງ ຄືສະແດງລາຍການສິລະປະຊົນເຜົ່າ, ການລະຫລິ້ນພື້ນເມືອງ, ແນະນຳບັນດາຜະລິດຕະພັນພິເສດ, ອາຫານການກິນຊົນເຜົ່າ.. ບັນດາການເຄື່ອນໄຫວເຮັດໃຫ້ວັນບຸນເຂັ້ມຂົ້ນໄປດ້ວຍສີສັນວັດທະນະທຳຫລາຍຮູບຫລາຍແບບ. ເຂົ້າຮ່ວມວັນບຸນ, ທ່ານນາງ ບູ່ຍທິລານເຟືອງ, ຊາວເຜົ່າເມື່ອງ ຢູ່ ແຂວງ ຮວາບີງ ໃຫ້ຮູ້ວ່າ:
“ພວກຂ້າພະເຈົ້ານຳເອົາບັນດາຈຸດວັດທະນະທຳທີ່ເປັນເອກະລັກສະເພາະຂອງເຜົ່າຕົນເຖິງ ວັນບຸນ, ນັ້ນແມ່ນບັນດາຜະລິດຕະພັນພິເສດຂອງເຜົ່າເມື່ອງຄື: ກອງຄ້ອງ, ຜະລິດຕະພັນແຜ່ນແພພື້ນເມືອງ, ການລະຫລິ້ນພື້ນເມືອງ. ແລະ ພິເສດ ອາຫານການກິນຂອງຊາວເຜົ່າເມື່ອງພວກຂ້າພະເຈົ້າໄດ້ຮັບຄວາມນິຍົມຈາກນັກທ່ອງທ່ຽວທີ່ສຸດ. ຜ່ານເຫດການນີ້ ຄະນະຈັດຕັ້ງໄດ້ຊ່ວຍໃຫ້ປະຊາຊົນບັນດາເຜົ່າມີຄວາມໃກ້ຊິດສະຫນິດສະຫນົມກວ່າ, ເຂົ້າໃຈໄດ້ສີສັນວັດທະນະທຳເຊິ່ງກັນ ແລະກັນ ແລະເພີ່ມຄວາມສາມັກຄີສະຫນິດຕິດພັນລະຫວ່າງບັນດາເຜົ່າ ເພືື່ອສ້າງສາປະເທດຫວຽດນາມໃຫ້ນັບມື້ນັບກ້າວຫນ້າເຂັ້ມຂົ້ນໄປດ້ວຍສີສັນຊາດ.”
ນັບແຕ່ປີ 2009 ມາຮອດປະຈຸບັນ, ຜ່ານບັນດາການເຄື່ອນໄຫວໃນວັນວັດທະນະທຳບັນດາເຜົ່າຢູ່ຫວຽດນາມ, ປະຊາຊົນໃນທົ່ວປະເທດ ກໍຄືປະຊາຄົມຊາວຫວຽດນາມ ອາໄສຢູ່ ຕ່າງປະເທດ ແລະ ນັກທ່ອງທ່ຽວສາກົນ ຮູ້ຈັກເຖິງພາບພົດປະເທດຫວຽດນາມ ດ້ວຍ 54 ຊົນເຜົ່າໃນຊາຍຄາລວມ ຍາມໃດກໍສາມັກຄີກັນ, ພ້ອມກັນຮ່ວມແຮງຮ່ວມໃຈສ້າງສາປະເທດຊາດ. ທ່ານ ເລີມວັນຄາງ, ຮອງຫົວຫນ້າຄະນະຄຸ້ມຄອງບ້ານວັດທະນະທຳ ທ່ອງທ່ຽວ ບັນດາເຜົ່າຫວຽດນາມ ໃຫ້ຮູ້ວ່າ:
“ພວກຂ້າພະເຈົ້າຍາມໃດກໍສ້າງເງື່ອນໄຂເພື່ອໃຫ້ປະຊາຊົນບັນດາເຜົ່າສາມາດເຂົ້າຮ່ວມການເຄື່ອນໄຫວຫລາຍຢ່າງ. ປະຊາຊົນມານີ້ບໍ່ພຽງແຕ່ໄດ້ເຂົ້າຮ່ວມ ການເຄື່ອນໄຫວຕ່າງໆຂອງເຜົ່າຕົນເທົ່ານັ້ນ ຫາກຍັງພົບປະແລກປ່ຽນນຳກັນ ແລະ ເຂົ້າຮ່ວມລາຍການສິລະປະອີກດ້ວຍ. ນີ້ແມ່ນຄວາມປາດຖະຫນາຂອງປະຊາຊົນ ແລະ ພວກຂ້າພະເຈົ້າກໍຫວັງວ່າເຂົາເຈົ້າໄດ້ເຂົ້າຮ່ວມທຸກເຫດການ.”
ວັນວັດທະນະທຳຊົນເຜົ່າຫວຽດນາມ ແມ່ນໂອກາດເພື່ອໃຫ້ປະຊາຊົນບັນດາເຜົ່າໄດ້ສຳຜັດ ແລະ ຕ້ອນຮັບບັນດາຄຸນຄ່າດ້ານວັດທະນະທຳ, ປະຕິບັດແຜນນະໂຍບາຍ “ທົ່ວປວງຊົນສາມັກຄີສ້າງຊີວິດທາງດ້ານວັດທະນະທຳ, ຄອບຄົວວັດທະນະທຳ”. ນີ້ແມ່ນໂອກາດເພື່ອໃຫ້ປະຊາຊົນພ້ອມກັນພົບປະແລກປ່ຽນ, ຖອດຖອນບົດຮຽນ, ຈາກນັ້ນ ມີສະຕິກວ່າກ່ຽວກັບການສືບຕໍ່ຮັກສາບັນດາຈຸດວັດທະນະທຳທີ່ເປັນມູນເຊື້ອ, ປະດິດສ້າງບັນດາຄຸນຄ່າວັດທະນະທຳໃຫມ່, ເຮັດໃຫ້ຊີວິດການເປັນຢູ່ທາງດ້ານຈິດໃຈຂອງປະຊາຄົມບັນດາເຜົ່າຫວຽດນາມອຸດົມສົມບູນກວ່າ.