ພິທີໄຂວັນມໍລະດົກວັດທະນະທຳຫວຽດນາມຄັ້ງທີ່ 8 ປີ 2012 (ພາບ:baomoi.com)
|
ວັນມໍລະດົກວັດທະນະທຳຫວຽດນາມຄັ້ງທີ່ 8 ປີ 2012 ດ້ວຍຫົວເລື່ອງວ່າ “ ຄົ້ນຫາອະລິຍະທຳແມ່ນ້ຳແດງ ” ຫາກໍຖືກຈັດຂຶ້ນຢູ່ຮ່າໂນ້ຍແຕ່ວັນທີ 21 ຫາ 24/11/2012. ນີ້ແມ່ນການເຄື່ອນໄຫວເປີດສາກໃຫ້ແກ່ ປີທ່ອງທ່ຽວແຫ່ງຊາດ, ທັງເພື່ອແນໃສ່ຍູ້ແຮງການໂຄສະນາ, ແນະນຳໃຫ້ປະຊາຊົນໃນທົ່ວປະເທດ, ເພື່ອນມິດສາກົນຮັບຊາບກ່ຽວກັບຄຸນຄ່າວັດທະນະທຳມີຮູບຮ່າງ ແລະ ບໍ່ມີ ຮູບຮ່າງທີ່ເປັນເອກະລັກ ສະເພາະຂອງເຂດທົ່ງພຽງແມ່ນ້ຳແດງ
ການເຄື່ອນໄຫວຂອງວັນມໍລະດົກປີນີ້ລວມມີບັນດາງານວາງສະແດງ, ກອງປະຊຸມສຳມະນາກ່ຽວກັບ ການອະນຸລັກຮັກສາເສີມຂະຫຍາຍມໍລະດົກວັດທະນະທຳຊຶ່ງໄດ້ດຶງດູດການເຂົ້າຮ່ວມຂອງບັນດາແຂວງເຂດທົ່ງພຽງແມ່ນ້ຳແດງເຊັ່ນ: ນະຄອນຮ່າໂນ້ຍ, ຫາຍຟ່ອງ, ແຂວງຟູ້ເຖາະ, ນິງບີງ, ບັກນິງ. ບັນດາການ ເຄື່ອນໄຫວຂອງວັນມໍລະດົກຍັງແນະນຳບາງປະເພດສິລະປະທີ່ພົ້ນເດັ່ນ ໃນເຂດ ທົ່ງພຽງແມ່ນ້ຳແດງ ຊຶ່ງໄດ້ຮັບການຮັບຮອງຈາກອົງການ UNESCO ວ່າແມ່ນ ມໍລະດົກ ວັດທະນະທຳຄື : ຂັບກວານເຫາະ(ແຂວງບັກນິງ) ຊຶ່ງແມ່ນ ມໍລະດົກ ວັດທະນະທຳບໍ່ມີຮູບຮ່າງເປັນຕົວແທນຂອງມວນມະນຸດ ( 2009) , ຂັບກາຈູ (ເຂດທົ່ງພຽງພາກເໜືອ) ແມ່ນມໍລະດົກວັດທະນະທຳບໍ່ມີຮູບຮ່າງຄວນໄດ້ຮັບການຮັກສາດ່ວນ (2009), ຫຼືຂັບຊວານ (ແຂວງຟູ້ເຖາະ) ແມ່ນມໍລະດົກ ວັດທະນະທຳບໍ່ມີຮູບຮ່າງຄວນໄດ້ຮັບການຮັກສາດ່ວນ (2011).
ການສະແດງຂັບຊວານ
|
ສານສະບັບໜຶ່ງທີ່ກວມລວມບັນດາ ການເຄື່ອນໄຫວຂອງ ວັນມໍລະດົກວັດທະນະທຳປີນີ້, ນັ້ນແມ່ນ
ການແນະນຳບັນດາຄວາມສາມາດບົ່ມຊ້ອນກ່ຽວກັບ ມໍລະດົກ, ວຽກງານເສີມຂະຫຍາຍສະຕິຄວາມຮັບຜິດຊອບຂອງວົງຄະນະຍາດໃນການອະນຸລັກຮັກສາ ບັນດາຄຸນຄ່າ ມໍລະດົກວັດທະນະທຳທີ່ມີມາແຕ່ດົນນານ. ໂດຍຕອບສະໜອງສານດັ່ງກ່າວ, ຢູ່ຮ່າໂນ້ຍ, ສະມາຄົມ ມໍລະດົກວັດທະນະທຳ ທັງລອງ - ຮ່າໂນ້ຍ ໄດ້ຈັກງານປະກວດຂັບເຈົາວັນ - ຮ່າໂນ້ຍປີ 2012. ງານປະກວດໄດ້ເຕົ້າໂຮມບັນດານັກຄົ້ນຄ້ວາວັດທະນະທຳທັງຢູ່ພາຍໃນ ແລະ ຕ່າງປະເທດ ພ້ອມກັບວົງການນັກສິລະປີນ ເພື່ອແນໃສ່ແລກປ່ຽນກ່ຽວກັບວັດທະນະທຳການເຫຼື້ອມໄສບູຊາເຈົ້າແມ່ ຕິດພັນກັບພິທີເຂົ້າຊົງ. ໃນນັ້ນພິທີເຂົ້າຊົງ-ຂັບເຈົາວັນ ພວມກະກຽມສະເໜີຕໍ່ອົງການ UNESCO ຮັບຮອງແມ່ນມໍລະດົກວັດທະນະທຳບໍ່ມີຮູບຮ່າງຂອງມວນມະນຸດ. ທ່ານດຣ ລິວມິງຈິ ປະທານສະມາຄົມ ມໍລະດົກວັດທະນະທຳ ທັງລອງ - ຮ່າໂນ້ຍ ໃຫ້ຮູ້ວ່າ :
“ ຄວນເຮັດໃຫ້ສັງຄົມເຂົ້າໃຈແຈ້ງກ່ວາກ່ຽວກັບ ມໍລະດົກວັດທະນະທຳ, ກ່ຽວກັບຂັບເຈົາວັນຕິດພັນກັບພິທີເຂົ້າຊົງ ແລະ ວິຫານບູຊາເຈົ້າແມ່. ທີ່ 2 ແມ່ນແລກປ່ຽນບົດຮຽນລະຫວ່າງນັກສິລະປິນໃນພິທີເຂົ້າຊົງຢູ່ບັນດາວິຫານບູຊາເຈົ້າແມ່. ຜ່ານນີ້ບັນດານັກວິທະຍາສາດໄດ້ເຮັດໃຫ້ຈະແຈ້ງກ່ວາກ່ຽວກັບປະເພນີບູຊາເຈົ້າແມ່ຫວຽດນາມ, ສາມາດເຂົ້າໃຈແຈ້ງກ່ຽວກັບພິທີເຂົ້າຊົງຢູ່ບັນດາວິຫານບູຊາເຈົ້າແມ່, ນັບທັງດ້ານດີ, ດ້ານອ່ອນ ຄວນໄດ້ຮັບການແກ້ໄຂ ”
ໜຶ່ງໃນບັນດາຈຸດໝາຍທີ່ສຳຄັນໃນບັນດາການເຄື່ອນໄຫວເນື່ອງໃນໂອກາດວັນມໍລະດົກແຕ່ລະປີ, ນັ້ນແມ່ນການສົ່ງເສີມບັນດາອົງການຈັດຕັ້ງສັງຄົມ, ວົງຄະນະຍາດ ຊອກຫາບັນດາວິທີການແກ້ໄຂທີ່ແທດຈິງແນໃສ່ອະນຸລັກຮັກສາ, ເສີມຂະຫຍາຍບັນດາມໍລະດົກວັດທະນະທຳ. ປີນີ້, ບັນດາແຂວງ, ນະຄອນ, ທ້ອງຖິ່ນຕ່າງໆໄດ້ນຳສະເໜີຫຼາຍວິທີການແກ້ໄຂ, ຂໍ້ລິເລີ່ມທີ່ດີທີ່ມ່ວນ. ຍົກຕົວຢ່າງຄື ແຂວງຟູ້ເຖາະ ໄດ້ຈັດກອງປະຊຸມສຳມະນາທີ່ມີຫົວຂໍ້ “ ສຶກສາກ່ຽວກັບມໍລະດົກວັດທະນະທຳຢູ່ໂຮງຮຽນສາມັນ ” . ກອງປະຊຸມສຳມະນາໄດ້ຊີ້ໃຫ້ເຫັນວິທີສຳຜັດກັບມໍລະດົກວັດທະນະທຳຢູ່ບັນດາໂຮງຮຽນ, ການປະພຶດຕໍ່ກັບມໍລະດົກ ວັດທະນະທຳ ແລະ ເຮັດແນວໃດເພື່ອໃຫ້ການອະນຸລັກຮັກສາ ເສີມຂະຫຍາຍມໍລະດົກ ວັດທະນະທຳ ບໍ່ແມ່ນຂະບວນການ, ຫາກຕ້ອງມີພະລັງຊີວິດ, ກຳລັງດຶງດູດໃນການດຳລົງຊີວິດ. ທ່ານດຣ ເລຊວນເຈືອງ ຫົວໜ້າພະແນກສຶກສາ ແລະ ບຳລຸງສ້າງແຂວງຟູ້ເຖາະ ມີຄຳເຫັນວ່າ :
“ ຕ້ອງຫັນຮູບການສຶກສາເປັນຫຼາຍຮູບຫຼາຍແບບ, ບໍ່ພຽງແຕ່ຊ່ວຍພວກນ້ອງນັກຮຽນໄດ້ສຳຜັດມໍລະດົກວັດທະນະທຳເທົ່ານັ້ນ, ຫາກຕ້ອງມີຮູບແບບ, ຮູບຈຳລອງເພື່ອນຳເອົາບັນດາມໍລະດົກວັດທະນະທຳເຂົ້າໃນໂຮງຮຽນ. ເພື່ອສ້າງກຳລັງດຶງດູດສຳລັບນັກຮຽນນັ້ນ, ນອກຈາກການຖ່າຍທອດໃນໂຮງຮຽນແລ້ວ, ກໍຄວນຈັດຕັ້ງບັນດານການເຄື່ອນໄຫວລະອຽດຄື ໃຫ້ພວກນ້ອງນັກຮຽນໄປທັດສະນະສຶກສາ, ຈັດຕັ້ງບັນດາການເຄື່ອນໄຫວວັດທະນະທຳ, ສິລະປະ ຄື ສະແດງລະຄອນ. ເຮັດໄດ້ເຊັ່ນນັ້ນ, ພວກນ້ອງຈະພາກພູມໃຈ ແລະ ຮັບເອົາຄວາມຮູ້ໄດ້ຢ່າງສະດວກສະບາຍ ”
ດ້ວຍຫົວເລື່ອງວ່າ “ ຄົ້ນຫາອະລິຍະທຳແມ່ນ້ຳແດງ ” ,ວັນມໍລະດົກປີນີ້ຍັງມີ ບັນດາການເຄື່ອນໄຫວມຸ່ງໄປສູ່ປີທ່ອງທ່ຽວແຫ່ງຊາດເຂດທົ່ງພຽງແມ່ນ້ຳແດງ - ຫາຍຟ່ອງ 2013 . ນີ້ແມ່ນໂອກາດເພື່ອໃຫ້ບັນດາທ້ອງຖິ່ນໄດ້ພົບປະແລກປ່ຽນ, ແນະນຳກ່ຽວກັບບັນດາປູຊະນີຍະສະຖານ, ທິວທັດທຳມະຊາດພ້ອມກັບບັນດາຄຸນຄ່າມໍລະດົກວັດທະນະທຳທີ່ມີຮູບຮ່າງ ແລະ ບໍ່ມີຮູບຮ່າງທີ່ເປັນເອກະລັກສະເພາະຢູ່ເຂດທົ່ງພຽງແມ່ນ້ຳແດງຊຶ່ງໄດ້ຮັບການຮັບຮອງຈາກອົງການ UNESCO . ຈາກນັ້ນ ສ້າງການຮ່ວມສຳພັນ, ສ້າງເປັນສະຖານທີ່ທ່ອງທ່ຽວທີ່ດູດດື່ມສຳລັບນັກທ່ອງທ່ຽວສາກົນ, ພ້ອມທັງຊຸກຍູ້ການທ່ອງທ່ຽວຢູ່ພາຍໃນປະເທດ. ບັນດາການເຄື່ອນໄຫວຂອງວັນມໍລະດົກຍັງຢືນຢັນວ່າ : ທ່າແຮງທາງດ້ານມໍລະດົກ ວັດທະນະທຳແມ່ນຊັບພະຍາກອນການທ່ອງທ່ຽວທີ່ມີຄຸນຄ່າເພື່ອສ້າງ ແລະ ຂະຫຍາຍເປັນບັນດາຜະລິດຕະພັນທ່ອງທ່ຽວພິເສດສະເພາະ, ປະກອບສ່ວນຊຸກຍູ້ການເຕີບໂຕດ້ານຈຳນວນແຂກທ່ອງທ່ຽວ ແລະ ໂຄສະນາພາບພົດປະເທດຊາດ ແລະຊາວຫວຽດນາມ.