ການຫຼິ້ນ ບາຍຈອຍ
(ພາບ: vanhoadoisong)
|
ແຕ່ດົນນານມາແລ້ວ, ແຂກທ່ອງທ່ຽວມາຢ້ຽມຢາມ ໂຫ້ຍອານ ແຂວງ ກວາງ ນາມ ບໍ່ພຽງແຕ່ເພື່ອຄົ້ນຫາຄຸ້ມເມືອງເກົ່າເທົ່ານັ້ນ ຫາກຍັງໄດ້ເຊື່ອມຕົວເຂົ້າກັບບັນຍາກາດຟົດຟື້ນມ່ວນຊື່ນດ້ວຍການຂັບລຳທຳເພງທີ່ເປັນເອກະລັກສະເພາະຂອງແຂວງ ກວາງນາມອີກດ້ວຍ. ທ່ານ John Haward ຫົວໜ້າບໍລິສັດທ່ອງທ່ຽວທາງໄກຢູ່ ໂຮນລັງໃນການມາຢ້ຽມຢາມໂຫ້ຍອານເທື່ອໜຶ່ງໄດ້ຖືວ່າ:“ ຢູ່ໂຫ້ຍອານ ບັນດາລາຍການສະແດງສິລະປະເຖິງວ່າດຳເນີນດ້ວຍຮູບການຂາຍປີ້ບໍລິການ ຫຼືບໍ່ເກັບຄ່າກໍຕາມ ກໍລ້ວນແຕ່ສ້າງຄວາມປະທັບໃຈແກ່ຜູ້ຊົມ . ສິ່ງທີ່ປະທັບໃຈ ແລະ ເປັນເອກະລັກສະເພາະຂອງລາຍການສະແດງສິລະປະຢູ່ໂຫ້ຍອານ ກໍແມ່ນຄວາມລຽບງ່າຍ. ຢູ່ໂຫ້ຍອານ ແຕ່ລະແຈຖະໜົນ ລ້ວນແຕ່ແມ່ນເວທີສະແດງ ”.
ບັນດາລາຍການສະແດງສິລະປະປະຈຳວັນຂອງກອງສິລະປະພື້ນເມືອງ ໂຫ້ຍ ອານ ສັງກັດສູນວັດທະນະທຳ-ກິລາ ໂຫ້ຍອານເຊັ່ນນີ້ ແຕ່ດົນນານມາແລ້ວ ໄດ້ກາຍເປັນອາຫານທາງດ້ານຈິດໃຈທີ່ຂາດບໍ່ໄດ້ຂອງນັກທ່ອງທ່ຽວເມື່ອມີໂອກາດມາຢ້ຽມຢາມໂຫ້ຍອານ, ອັນໄດ້ປະກອບສ່ວນສ້າງຜະລິດຕະພັນດ້ານວັດທະນະ ທຳ-ທ່ອງທ່ຽວທີ່ເປັນເອກະລັກສະເພາະ, ໂຄສະນາດ້ານວັດທະນະທຳຂອງໂຫ້ຍ ອານ ເວົ້າສະເພາະ ແລະ ແຂວງກວາງນາມເວົ້າລວມ. ທ່ານ ດິງຫາຍ ຫົວໜ້າພະແນກວັດທະນະທຳ-ກິລາ ແລະ ທ່ອງທ່ຽວແຂວງກວາງນາມຫວນຄືນວ່າ: ນັບແຕ່ປີ 1990 , ຂະແໜງວັດທະນະທຳ ແລະ ທ່ອງທ່ຽວຢູ່ ໂຫ້ຍອານ ມີຄວາມຮັບຮູ້ຢ່າງຈະແຈ້ງທີ່ສຸດກ່ຽວກັບການກໍ່ສ້າງຖັນແຖວນັກຮ້ອງ ນັກສິລະປີນ ເພື່ອສະແດງ ຂັບລຳທຳເພງສິລະປະພື້ນເມືອງຢູ່ໂຫ້ຍອານ ແລະ ສ້າງບັນດາລາຍການສະແດງສິລະປະຊົນເຜົ່າ ເປັນຜະລິດຕະພັນທ່ອງທ່ຽວດຶງດູດໃຈນັກທ່ອງທ່ຽວເມື່ອມາຢ້ຽມຢາມ ໂຫ້ຍອານ. ທ່ານ ດິງຫາຍ ຫົວໜ້າພະແນກວັດທະນະທຳ-ກິລາ ແລະ ທ່ອງທ່ຽວແຂວງກວາງນາມ ໃຫ້ຮູ້ວ່າ
“ ໃນຊຸມປີທີ່ຜ່ານມາ, ແຕ່ລະປີ ມີຈຳນວນແຂກທ່ອງທ່ຽວມາທ່ອງທ່ຽວຄຸ້ມເມືອງເກົ່າ ໂຫ້ຍອານ ຢ່າງຫຼວງຫຼາຍ. ດ້ວຍຖານະແມ່ນມໍລະດົກສະຖາປັດ ຕະຍະກຳ, ແຂກທ່ອງທ່ຽວມາທັດສະນະສຶກສາຢ້ຽມຊົມເຮືອນເກົ່າ, ວັດວາອາຮາມ ຫ້າງຮ້ານ. ຖ້າຫາກວ່າ ພຽງມາຢ້ຽມຊົມເທົ່ານັ້ນ, ແມ່ນຈະບໍ່ຮູ້ສຶກໝົດເຖິງດ້ານວິນຍາຍຂອງຄຸ້ມຖະໜົນເກົ່າ, ສະນັ້ນ ການເຄື່ອນໄຫວວັດທະນະທຳຮັບໃຊ້ການອະນຸລັກຮັກສາວັດທະນະທຳບໍ່ມີຮູບຮ່າງ ກໍຄືການສ້າງຄວາມອຸດົມສົມບູນທີ່ມີລັກສະນະວັດທະນະທຳ ແມ່ນສຳຄັນທີ່ສຸດ ”
ປະຈຸບັນບັນດາທຳນອງເພງພື້ນເມືອງ ກວາງນາມ, ສິລະປະຂັບໂບ້ຍ, ຂັບກ້ຽວ, ການລະຫຼິ້ນຂັບ ບາຍຈອຍ ໄດ້ຮັບຄວາມຊົມຊອບຈາກປະຊາຊົນ ແລະ ແຂກທ່ອງທ່ຽວເປັນຈຳນວນຫຼວງຫຼາຍ. ບໍ່ນັບທັງບັນດາລາຍການ “ ຄ່ຳຄືນຄຸ້ມຖະໜົນເກົ່າ ”, “ ຖະໜົນບໍ່ມີສຽງລົບກວນ ” ພ້ອມກັບງານບຸນຕ່າງໆຖືກຈັດຂຶ້ນຢູ່ ໂຫ້ຍອານນັ້ນ, ໃນແຕ່ລະວັນ, ບັນດານັກສິລະປີນໄດ້ສະແດງແຕ່ 2 ຫາ 3 ຄັ້ງເພື່ອຮັບໃຊ້ຂາກທ່ອງທ່ຽວຢູ່ສະຖານທີຕ່າງໆ ແລະ ຫໍສະແດງສິລະປະພື້ນເມືອງ. ໂຫ້ຍອານໄດ້ເຕົ້າໂຮມນັກເສບເຄື່ອງດົນຕີພື້ນເມືອງນັບ 10 ຄົນທີ່ມາຈາກແຂວງ ແທງຮ້ວາ, ເຫ້ວ, ດານັ້ງ, ຢີຊວຽນ........ພ້ອມກັບນັກຮ້ອງ, ສິລະປີນຫຼາຍໆຄົນ. ທ່ານ ວໍ້ຮຸ່ງ ຫົວໜ້າສູນວັດທະນະທຳ-ກິລາ ໂຫ້ຍອານໃຫ້ຮູ້ວ່າ :
“ ບັນດາການເຄື່ອນໄຫວສະແດງສິລະປະວັດທະນະທຳ, ພິເສດແມ່ນສິລະປະວັດທະນະທຳພື້ນເມືອງນັ້ນ, ໂຫ້ຍອານ ໄດ້ມີການກຳນົດທິດຢ່າງຈະແຈ້ງ. ສະເພາະການຟື້ນຟູບັນດາປະເພດສິລະປະວັດທະນະທຳພື້ນເມືອງ ແມ່ນທັງເຮັດໜ້າທີ່ຟື້ນຟູວັດທະນະທຳພື້ນເມືອງ, ທັງຮັບໃຊ້ຄວາມຕ້ອງການຂອງປະຊາຊົນ, ດັ່ງນັ້ນບໍ່ອາດຂາດບົດບາດສ້າງໃຫ້ມີບັນດາຜະລິດຕະພັນທ່ອງທ່ຽວວັດທະນະທຳທ້ອງຖິ່ນຂອງເຂດແຄ້ວນ. ນັບແຕ່ທ້າຍຊຸມປີ 1980 ຂອງສະຕະວັດກ່ອນ, ໂຫ້ຍ ອານໄດ້ມີການກຳນົດທິດເຊັ່ນນັ້ນ ແລະ ມາຮອດປະຈຸບັນໄດ້ສ້າງເປັນຮູບປະທຳ ເພື່ອຮັບໃຊ້ການພັດທະນາດ້ານວັດທະນະທຳທ່ອງທ່ຽວຂອງນະຄອນ ”
ພິເສດການຫຼິ້ນ ບາຍຈອຍ, ຄິດວ່າໄດ້ຖືກສູນຫາຍໄປແລ້ວ, ແຕ່ຜ່ານງານບຸນຕ່າງໆໄດ້ຮັບການຟື້ນຟູ ແລະ ເຂົ້າສູ່ຈິດໃຈຂອງມະຫາຊົນຢ່າງແທ້ຈິງ. ໂດຍບໍ່ແມ່ນແຫ່ງໃຫ້ກຳເນີດສິລະປະຂັບບາຍຈອຍ, ແຕ່ດ້ວຍສະຕິປົກປັກຮັກສາ ແລະເສີມຂະຫຍາຍບັນດາຄຸນຄ່າວັດທະນະທຳຂອງປູຍ່າຕາຍາຍນັ້ນ, ຊາວ ໂຫ້ຍອານໄດ້ສ້າງທີ່ີຕັ້ງພິເສດໃຫ້ແກ່ປະເພດວັດທະນະທຳບໍ່ມີຮູບຮ່າງນີ້. ແລະ ປະຈຸບັນ, ການຫຼິ້ນບາຍຈອຍໄດ້ກາຍເປັນອາຫານທາງດ້ານຈິດໃຈທີ່ຂາດບໍ່ໄດ້ສຳລັບຊາວທ້ອງຖິ່ນ ແລະ ແຂກທ່ອງທ່ຽວທີ່ມາຈາກສາລະທິດເມືອ່ມີໂອກາດມາຢ້ຽມຢາມຄຸ້ມຖະໜົນເກົ່າ ຊຶ່ງແມ່ນມໍລະດົກວັດທະນະທຳຂອງໂລກ. ທ່ານດິງຫາຍ ໃຫ້ຮູ້ວ່າ “ ນອກຈາກໄປທັດສະນະສຶກສາຢູ່ຄຸ້ມຖະໜົນເກົ່າໃນແງ່ສະຖາປັດຕະຍະກຳແລ້ວ, ແຂກທ່ອງທ່ຽວຈະໄດ້ຮັບຊົມລາຍການສະແດງຂັບລຳທຳເພງພື້ນເມືອງ ກວາງນາມ, ຂັບບາຍຈອຍ ແລະ ອື່ນໆ ຊຶ່ງຈັດຂຶ້ນຢູ່ຄຸ້ມຖະໜົນເກົ່າ. ປະຈຸບັນ, ມີ ສະຖານທີ 2 ແຫ່ງ ທຳການສະແດງເປັນປະຈຳໃນມື້ວັນເພັງ ໂດຍມີລາຍການຄືນວັນເພັງຢູ່ຄຸ້ມເມືອງເກົ່າ. ລາຍການນີ້ວາດພາບເຖິງບັນຍາກາດຄຸ້ມຖະໜົນເກົ່າໃນຕົ້ນສະຕະວັດ ”
ການຂັບລຳທຳເພງພື້ນເມືອງ, ຂັບກ້ຽວ, ຂັບບາຍຈອຍ ຢູ່ໂຫ້ຍອານ ໄດ້ເຮັດໃຫ້ນັກທ່ອງທ່ຽງທັງຫຼາຍມີຄວາມປະທັບໃຈ, ເຖິງວ່າ ບາງຄັ້ງບາງຄາວເຂົາເຈົ້າມີຄວາມເຂົ້າໃຈແບບຜິວເຜີນກ່ຽວກັບບັນດາລາຍການສະແດງສິລະປະພື້ນເມືອງ ຖືກຈັດຂື້ນໃນແຕ່ລະຄ່ຳຄືນຢູ່ແຫ່ງນີ້ກໍຕາມ. ແຕ່ຍ້ອນເຫດນີ້ເອງໄດ້ເຮັດໃຫ້ບັນດາລາຍການສະແດງສິລະປະຢູ່ໂຫ້ຍອານການເປັນຜະລິດຕະພັນທ່ອງທ່ຽວທີ່ເປັນເອກະລັກສະເພາະດຶງດູດແຂກທ່ອງທ່ຽວ.