(vovworld) - ແຂວນຮູບພາບດົງໂຮ່ ໃນບຸນປີໃໝ່ປະຈຳຊາດ (ບຸນເຕັດ) ໄດ້ກາຍເປັນຄວາມນິຍົມ, ເປັນຮີດຄອງອັນດີງາມຂອງຊາວຫວຽດນາມ. ຮູບພາບໂດຍບັນດານັກສິລະປະການພື້ນເມືອງບ້ານດົງໂຮ່, ເມືອງທ້ວນແທ່ງ, ແຂວງບັກນິງຄວັດເທິງແຜ່ນພິມດ້ວຍໄມ້, ແຕ່ລະແຜ່ນພິມສະແດງໃຫ້ເຫັນເລື່ອງນິຍາຍໃດໜຶ່ງທີ່ມີລັກສະນະທິດສະດີປັດສະຍາ, ແມ່ນສານກ່ຽວກັບຄຸນສົມບັດໃນຊີວິດປະຈຳວັນ.
(ພາບ: ອິນເຕີແນດ)
ໃນໂອກາດບຸນເຕັດ, ຄຽງຂ້າງພາໝາກໄມ້ 5 ປະເພດເພື່ອບູຊາບັນພະບຸລຸດ, ເຂົ້າຕົ້ມ, ຊີ້ນໝູ, ສົ້ມຫົວຜັກບົວ, ຄຳຜະຫຍາແລ້ວ, ບັນດາຮູບພາບພື້ນເມືອງດົງໂຮ່ ທີ່ມີສີຫຼາກຫຼາຍ ໄດ້ເຮັດໃຫ້ບັນຍາກາດມີຄວາມຟົດຟື້ນຍິ່ງຂຶ້ນ. ຮູບພາບດົງໂຮ່ ວາດພາບເຖິງຊີວິດການເປັນຢູ່ ດ້ວຍສີສັນທຳມະຊາດ, ດັ່ງນັ້ນມັນຈຶ່ງເໝາະສົມກັບບັນຍາກາດບຸນປີໃໝ່ປະຈຳຊາດຂອງຫວຽດນາມ. ຮູບພາບບຸນເຕັດດົງໂຮ່ ບໍ່ແມ່ນວາດພາບເຖິງບຸນເຕັດເທົ່ານັ້ນ, ຫາກແມ່ນການຝາກຝັງ, ແມ່ນຄຳອວຍພອນໃຫ້ມີຄວາມສຸກ, ຄວາມສົມຫວັງໃນປີໃໝ່ ດ້ວຍບັນດາຮູບພາບ, ສັນຍາລັກທຳມະດາສາມັນ, ໃກ້ຊິດ, ແຕ່ເຕັມໄປດ້ວຍລັກສະນະວັດທະນະທຳມະນຸດ. ດ້ວຍຄວາມອຸດົມສົມບຸນ, ຫຼາຍຮູບຫຼາຍແບບ, ນັບທັງຮູບແບບ, ຫົວຂໍ້ນັ້ນ, ຮູບພາບດົງໂຮ່ ໄດ້ສ່ອງແສງໃຫ້ເຫັນທຸກສິ່ງທຸກຢ່າງໃນຊີວິດຂອງຊາວຜູ້ອອກແຮງງານຄື: ການລ້ຽງຄວາຍ, ເປົ່າຂຸ່ຍ, ຮັບໝາກພ້າວ, ມວຍປຳ້, ຕະຫຼອດຮອດຄວາມໄຝ່ຝັນ, ຄວາມປາຖະໜາຢາກມີຊີວິດສົມບຸນພູນສຸກຄື: ມີຄວາມຮັ່ງມີ, ມີຝຸງໝູ, ຝູງໄກ່. ຍິ່ງຊົມຮູບພາບດົງໂຮ່, ຍິ່ງຮັບຮູ້ໄດ້ຄວາມໝາຍດ້ານວັດທະນະທຳຢ່າງເລິກເຊິ່ງ, ຄຳຕັກເຕືອນ, ຄວາມຮັກທີ່ມີຕໍ່ຊີວິດ. ທ່ານຫງວຽນດັງເຈ໋, ນັກສິລະປະການລຸ່ນທີ 20 ໃນຄອບຄົວທີ່ເຮັດຮູບພາບດົງໂຮ່, ໃຫ້ຮູ້ວ່າ:
“ເຂົາເຈົ້າຫຼິ້ນຮູບພາບດົງໂຮ່ ໃນໂອກາດບຸນເຕັດ, ດັ່ງນັ້ນຈຶ່ງເອີ້ນວ່າຮູບ ພາບເຕັດ. ບັນດາຄອບຄົວຊາວກະສີກອນຊີ້ຮູບພາບໂຕໝູ, ໂຕໄກ່ ເພື່ອພາວະນາຂໍໃຫ້ວຽກງານລ້ຽງສັດໃນປີໃໝ່ສະດວກສະບາຍ, ຂະຫຍາຍຜາຍແຜ່. ໃນໂອກາດບຸນເຕັດເຂົາເຈົ້າຍັງແຂວນຮູບພາບຈາກປະຕູໂຂງເຂົ້າເຮືອນ. ນອກຈາກບັນດາຮູບພາບປະດັບໃນເຮືອນຄືຊຸດຮູບພາບ 4 ລະດູ, ຖ້າຜູ້ໃດນິຍົມຮູບພາບກ່ຽວກັບສິລະປະວັນນະຄະດີ, ສາມາດຊື້ຮູບພາບນາງ ກ່ຽວ (ສາວທີ່ສວຍງາມໃນສະໄໝກ່ອນ) ໄດ້“.
ຝູງໝູໃນຮູບພາບພື້ນເມືອງດົງໂຮ່
(ພາບອິນເຕີແນດ)
ຈຸດພິເສດສະເພາະຂອງຮູບພາບພື້ນເມືອງດົງໂຮ່ ທີ່ສ້າງຄວາມດູດດື່ມໃຫ້ແກ່ຜູ້ຊົມ ນັ້ນແມ່ນ ສີສັນ ແລະ ເຈ້ຍພິມ. ເຈ້ຍໃຊ້ເພື່ອພິມຮູບພາບ ທັງເປາະ, ອ່ອນ, ບາງ ແລະ ຫຍາບ ເພື່ອຈູບສີງ່າຍ. ຄຽງຂ້າງນັ້ນ, ສີກໍ່ແມ່ນຈຸດພິເສດສະເພາະໃນການປະດິດ, ຄົ້ນຫາ ແລະ ນຳໃຊ້ບັນດາວັດຖຸທີ່ໃກ້ຊິດກັບທຳມະຊາດເຂົ້າໃນສິລະປະປະດິດຮູບ, ການປະສົມສີກໍ່ອີງໃສ່ເງື່ອນໄຂດິນຟ້າອາກາດ, ທາດເຈ້ຍ... ນີ້ແມ່ນປະສົບການ, ຫົວຄິດປະດິດສ້າງ, ແມ່ນເຂັດລັບຂອງນັກສິລະປະການແຕ່ລະຄົນ. ທ່ານ ຫງວຽນດັງເຈ໋ ໃຫ້ຮູ້ຕື່ມອີກວ່າ:
“ຈຸດພິເສດສະເພາະຂອງພາບພື້ນເມືອງດົງໂຮ່ ນັ້ນແມ່ນວັດຖຸເພື່ອສ້າງເປັນຮູບພາບລ້ວນແຕ່ນຳມາຈາກທຳມະຊາດ, ເຈ້ຍແມ່ນຜະລິດຈາກຕົ້ນໄມ້ໃນປ່າ. ກ່ຽວກັບສີໃນພາບແຕ້ມດົງໂຮ່ກໍ່ເອົາມາຈາກທຳມະຊາດຄືຫອຍທະເລ, ຫີນພູ, ຕົ້ນຄາມ, ຕົ້ນໄມ້ໄຜ່. ຮູບພາບດົ່ງໂຮ່ ທັງໝົດລ້ວນແຕ່ພິມດ້ວຍແຜ່ນໄມ້“.
ຊຸດຮູບພາບ 4 ລະດູທີ່ຊາວຫວຽດນາມເຄີຍປະດັບໃນເຮືອນ
(ພາບອິນເຕີແນດ)
ຕາມທັດສະນະຂອງບັນດານັກສິລະປະການດົງໂຮ່ ແລ້ວ, ສີຂຽວເປັນສັນລັກໃຫ້ແກ່ຊີວິດ ແລະ ການແຜ່ຜາຍ, ທັງແມ່ນສີຂອງລະດູບານໃໝ່; ສີແດງເປັນສັນຍາລັກໃຫ້ໄຟ, ຄວາມຮ້ອນ, ສີຂອງລະດູຮ້ອນ; ສີເຫຼືອງແມ່ນສີຂອງດິນ, ເປັນສັນຍາລັກໃຫ້ແມ່ຂອງທຳມະຊາດ... ດັ່ງນັ້ນໃນພາບດົງໂຮ່ ເຂົາເຈົ້າເຄີຍໃຊ້ສີເຫຼືອງເປັນພື້ນໃຫ້ຮູບພາບ. ເຖິງຢ່າງໃດກໍ່ຕາມ, ພາບດົງໂຮ່ແຕ່ລະແຜ່ນ ແມ່ນຄຳອວຍພອນເຊິ່ງນັກສິລະປະການພື້ນເມືອງຢາກຝາກຝັງເຖິງທຸກຄອບຄົວຄືດັ່ງສານແຫ່ງລະດູບານໃໝ່. ອ້າຍຫງວຽນດັງເຕິມ, ລູກຫຼ້າຂອງທ່ານ ຫງວຽນດັງເຈ໋, ແມ່ນຜູ້ສືບທອດອາຊີບທີ່ເປັນມູນເຊື້ອນີ້ຂອງຄອບຄົວ, ໃຫ້ຮູ້ວ່າ:
“ໃນຊຸມວັນໃກ້ຈະຮອດບຸນປີໃໝ່, ທຸກຄົນເລີ່ມມາຊື້ຮູບພາບດົງໂຮ່ ເພື່ອປະດັບໃນຄອບຄົວ. ສີຂອງຮູບພາບດົ່ງໂຮ່ ຍັງຄົງຮັກສາຕາມຮູບເດີມ, ນັ້ນແມ່ນມີສີສົດໄສ ເພື່ອປະດັບເຮືອນໃນໂອກາດບຸນເຕັດ“.
ຮູບພາບໂຕໄກ່ສະແດງຄວາມຫວັງການລ້ຽງສັດໄດ້ຮັບຜົນດີ
(ພາບອິນເຕີແນດ)
ຮູບພາບພື້ນເມືອງແຕ່ລະແຜ່ນລ້ວນແຕ່ມີຄວາມໝາຍຊີວິດຂອງມະນຸດ, ເຊິ່ງສະແດງອອກໃນຫຼາຍແງ່ມູມ, ມັນແມ່ນພາກສ່ວນໜຶ່ງທີ່ຂາດບໍ່ໄດ້ໃນຊີວິດການເປັນຢູ່, ພິເສດແມ່ນໃນໂອກາດລະດູບານໃໝ່ວຽນມາ. ປ້າ ຫງວຽນທິມາຍ ຢູ່ຮ່າໂນ້ຍ, ແບ່ງປັນວ່າ:
“ຂ້າພະເຈົ້ານິຍົມຮູບພາບດົງໂຮ່ຫຼາຍ, ເພາະວ່ານີ້ແມ່ນຮູບພາບທີ່ໄດ້ຮັບການສືບທອດມາແຕ່ດົນນານ. ຜ່ານຮູບພາບຂ້າພະເຈົ້າຢາກແນະນນຳໃຫ້ລູກຫຼານຮູ້ເຖິງບັນດາຮີດຄອງປະເພນີໃນເມື່ອກ່ອນຂອງຊາວຫວຽດນາມ. ດັ່ງນັ້ນແຕ່ລະເທື່ອເມື່ອບຸນປີໃໝ່ວຽນມາ, ປີໃດຄອບຄົວຂ້າພະເຈົ້າກໍ່ຊື້ຮູບພາບດົງໂຮ່ມາແຂວນໃນເຮືອນ, ທັງປະດັບປະດາ, ທັງສ້າງຄວາມອົບອູ່ນ ເພື່ອຕ້ອນຮັບປີໃໝ່ດ້ວຍຄວາມຫວັງໄດ້ຮັບຄວາມຈະເລີນ, ຢູ່ເຢັນເປັນສຸກຕະຫຼອດປີ“.
ຮູບພາບໄກ່ຕີໃນພາບດົງໂຮ່
(ພາບອິນເຕີແນດ)
ຮູບພາບດົງໂຮ່ໄດ້ຍືນຍົງຄົງຕົວ ແລະ ມີຄວາມດູດດື່ມພິເສດສຳລັບຊາວຫວຽດນາມ ຫຼາຍລຸ່ນຄົນ ເພາະວ່າບັນດາຫົວຂໍ້ໃນຮູບພາບສ່ອງແສງໃຫ້ເຫັນຊີວິດແບບລຽບງາຍ, ໃກ້ຊິດຕິດພັນກັບວັດທະນະທຳຫວຽດນາມ. ບັນດາຫົວຂໍ້ໃນຮູບພາບພື້ນເມືອງດົງໂຮ່ຕິດພັນກັບຊີວິດຂອງຊາວກະສີກອນ ເປັນສັນຍາລັກໃຫ້ຄວາມຜາສຸກ, ຄວາມໂຊກດີ, ຄວາມວັດທະນາຖາວອນໃນປີໃໝ່.