(vovworld)-ບໍ່ປະຕິບັດຕາມຮູບການພິມຈຳຫນ່າຍເກົ່າ, ປະຈຸບັນມີນັກປະພັນຫນຸ່ມຫວຽດນາມຫລາຍຄົນໄດ້ເລືອກເຟັ້ນໃຫ້ຕົນທິດກ້າວເດີນໃຫມ່ເພື່ອສຳຜັດໂດຍກົງກັບຜູ້ອ່ານ, ນັ້ນແມ່ນ ສ້າງກອງທຶນວົງຄະນາຍາດ(crowdfunding) ເພື່ອພິມຈຳຫນ່າຍປື້ມ. ໂດຍເລີ່ມມາຈາກຄວາມມຸ່ງຫວັງ ແລະ ຄວາມຮັກຕໍ່ວັດທະນະທຳຂອງຊາດ, ບັນດາໂຄງການສ້າງກອງທຶນວົງຄະນາຍາດໄດ້ຫັນຄວາມເມົາມົວກັບສິລະປະໃຫ້ປະກົດຜົນເປັນຈິງໃນເບື້ອງຕົ້ນ ດ້ວຍການປະກົດອອກບັນດາຜະລິດຕະພັນທີ່ເຕັມໄປດ້ວຍສີສັນຫວຽດນາມ. ນັບມື້ນັບມີຫລາຍໂຄງການສິລະປະຖືກສ້າງຂຶ້ນ ຕື່ມອີກ ຈາກຮູບການ crowdfunding ແລະ ເປີດກາລະໂອກາດຫລາຍຢ່າງເພື່ອໃຫ້ບັນດານັກປະພັນຊອກທາງອອກໃຫ້ຜະລິດຕະພັນຂອງຕົນ.
ສ້າງກອງທຶນວົງຄະນາຍາດ ພວມແມ່ນຮູບການທີ່ໃຫມ່ອ່ຽມສົມຄວນຢູ່ຫວຽດນາມ. ໃນຊຸມປີມໍ່ໆມານີ້ ການ ສ້າງກອງທຶນວົງຄະນາຍາດໄດ້ປະກົດອອກຢູ່ຫລາຍຂົງເຂດ, ເຖິງຢ່າງໃດກໍຕາມ ໃນຂົງເຂດພິມຈຳຫນ່າຍ ຮອດປີ 2014 ຮູບການນີ້ຈຶ່ງໄດ້ປະຕິບັດ ດ້ວຍການພິມຈຳຫນ່າຍຊຸດປື້ມພາບເລື່ອງປະຫວັດສາດ “ລອງເທີນເຕືອງ”. ນີ້ແມ່ນຊຸດປື້ມພາບເລື່ອງປະຫວັດສາດຫວຽດນາມລວມມີ 5 ເຫລັ້ມ ຂອງບັນດາເພື່ອນຫນຸ່ມ ກຸ່ມ ຟອງເຢືອງ comic ໄດ້ພິມຈຳຫນ່າຍເປັນຄັ້ງທຳອິດເມື່ອເດືອນ 11/2014. ດ້ວຍການສ້າງກອງທຶນວົງຄະນາຍາດ, ກຸ່ມ ຟອງເຢືອງ comic ໄດ້ຮຽກຮ້ອງຜູ້ອ່ານສະຫນັບສະຫນູນລາຍຈ່າຍເພື່ອພິມຈຳຫນ່າຍປື້ມພາບເລື່ອງຂອງຕົນ.ໃນຄັ້ງທຳອິດທີ່ພິມຈຳຫນ່າຍປື້ມພາບເລື່ອງ, ກຸ່ມ ຟອງເຢືອງ comic ຂົນຂວາຍຈຳນວນເງິນຈາກຜູ້ອ່ານ ໄດ້ກວ່າ 300 ລ້ານດົງ. ເມື່ອພິມຈຳຫນ່າຍເຫລັ້ມ 2, ຈຳນວນເງິນທີ່ຂົນຂວາຍມາໄດ້ແມ່ນ 200 ລ້ານດົງ. ກອ່ນທີ່ເຫລັ້ມ 3 ໄດ້ຮັບການພິມຈຳຫນ່າຍໃນເດືອນ 4 ຈະມາເຖິງ, ກຸ່ມ ຟອງເຢືອງ comic ໄດ້ຮັບຂ່າວດີວ່າ ຊຸດປື້ມພາບເລື່ອງ “ລອງເທີນເຕືອງ” ເຫລັ້ມ 1 ໄດ້ຮັບລາງວັນຫລຽນ ເງິນໃນການມອບລາງວັນໃຫ້ປື້ມພາບເລື່ອງ Manga ສາກົນຄັ້ງທີ 9 (International Manga Award 9), ຊື່ງແມ່ນຫນຶ່ງໃນບັນດາລາຍການມອບລາງວັນໃຫ້ພາບເລື່ອງທີ່ມີຊື່ສຽງໃນໂລກ ຊື່ງຈັດຂຶ້ນໃນຕົ້ນເດືອນ 3. ອ້າຍ ຫງວຽນແທງຟອງ, ຈິດຕະກອນແຕ້ມພາບຂອງຊຸດປື້ມພາບເລື່ອງ “ລອງເທີນເຕືອງ” ແບ່ງປັນວ່າ: “ລອງເທີນເຕືອງ” ແມ່ນຮູບການໃຫມ່ເມື່ອ ກຸ່ມ ຟອງເຢືອງ comic ເລືອກເຟັ້ນເພື່ອສ້າງກອງທຶນວົງຄະນາຍາດ.
ປື້ມພາບເລື່ອງປະຫວັດສາດ “ລອງເທີນເຕືອງ
|
“ພວກຂ້າພະເຈົ້າເລືອກເຟັ້ນຮູບການສ້າງກອງທຶນວົງຄະນາຍາດເພື່ອພິມຈຳຫນ່າຍປື້ມພາບເລື່ອງນີ້ ຍ້ອນວ່າບໍ່ຢາກປະຕິບັດຕາມຮູບການພິມຈຳຫນ່າຍເກົ່າ. ຮູບການນີ້ມີຈຸດພິເສດນັ້ນແມ່ນເຮັດໃຫ້ຜູ້ອ່ານ ແລະ ນັກປະພັນໃກ້ຊິດຕິດແທດກັນກວ່າ. ຜູ້ອ່ານອາດຈະສະຫນັບສະຫນູນນັກປະພັນເພື່ອສ້າງບັນດາບົດປະພັນທີ່ມີຄວາມສາມາດບົ່ມຊ້ອນຫລືບົດປະພັນທີ່ຕົນເອງນິຍົມ.”
ຜົນສຳເລັດຂອງປື້ມພາບເລື່ອງ“ລອງເທີນເຕືອງ ໄດ້ຮັບຖືວ່າ ແມ່ນເຫດການຂອງຂົງເຂດພິມຈຳຫນ່າຍຊື່ງເຄີຍປະຕິບັດຕາມຮູບການພິມຈຳຫນ່າຍປື້ມເພື່ອຂາຍ ແລະ ເກັບເງິນ. ຈາກປະສິດທິຜົນຂອງໂຄງການດັ່ງກ່າວ, ນັບມື້ນັບມີປື້ມຫລາຍຫົວໄດ້ຮັບການພິມຈຳຫນ່າຍຕາມຮູບການ crowdfunding ຄື: ປື້ມພາບເລື່ອງ Humans of Hanoi ກ້າວເຂົ້າສູ່ໂລກຂອງກັນ, ບົດນະວະນິຍາຍ ແທງກີອີ, ປື້ມຄູ່ມືການສຶກສາອົບຮົມໃນຄອບຄົວ…. ຄວາມຈິງໄດ້ສະແດງງໃຫ້ເຫັນວ່າ ຮູບແບບ ສ້າງກອງທຶນວົງຄະນາຍາດເຮັດໃຫ້ຜູ້ອ່ານ ແລະ ຜູ້ປະດິດຄິດສ້າງຫຍັບມໍ່ໃກ້ກັນກວ່າ. ຜູ້ອ່ານສາມາດຮ່ວມກັບນັກປະພັນສ້າງໂຄງການນັບແຕ່ຫົວທີ່ ດ້ວຍການປະກອບຄຳເຫັນໃສ່ເນື້ອໃນຕະຫລອດຮອດຮູບການ. ສະນັ້ນ ປະຈຸບັນ ມີນັກປະພັນຫລາຍຄົນໄດ້ເລືອກເຟັ້ນຮູບການສ້າງກອງທຶນວົງຄະນາຍາດເພື່ອຫັນຄວາມຫວັງຂອງຕົນໃຫ້ປະກົດຜົນເປັນຈິງ ແລະ ແບ່ງປັນຄວາມເມົາມົວຂອງຕົນກັບວົງຄະນາຍາດ, ສັງຄົມ.
ຫນ້າຫນຶ່ງໃນປື້ມພາບເລື່ອງແມ່ນເວົ້າເຖິງການດຳເນີນຊີວິດຂອງຊາວ
ຫວຽດນາມໃນສະໄຫມລາດຊະວົງເຈີນ |
ຫວ່າງແລ້ວນີ້, ຕົ້ນປີ 2016, ບັນດາເພື່ອນຫນຸ່ມໃນກຸ່ມ ດ້າຍຫວຽດໂກ໋ຟອງ ເລີ່ມປະຕິບັດໂຄງການ “ວັນຮວາດ້າຍຫວຽດ” ດ້ວຍຮູບການ ສ້າງກອງທຶນວົງຄະນາຍາດ ດ້ວຍຄວາມປາດຖະຫນາຢາກນຳເອົາບັນດາລວດລາຍບູຮານຂອງຫວຽດນາມເຂົ້າໃນລະບົບດີຈີຕອນ ເພື່ອໝູນໃຊ້ໃນບັນດາຂົງເຂດແຕ້ມພາບ, ສະຖາປັດຕະຍະກຳ, ອອກແບບເຄື່ອງໃຊ້ຕ່າງໆ. ດ້ວຍຄວາມເມົາມົວ ແລະ ຄວາມສຸດຈິດສຸດໃຈ, ບໍ່ລໍຖ້າເມື່ອ ສ້າງກອງທຶນບັນລຸຄາດໝາຍໄດ້ 100 ລ້ານດົງ, ພາຍຫລັງບັນລຸລະດັບ 3,5 ລ້ານດົງ, ຫນ່ວຍ ດ້າຍຫວຽດ ໄດ້ດຳເນີນການສະສົມເທື່ອລະກ້າວ, ນຳເອົາບັນດາລວດລາຍ ຈາກວັດຖຸພັນໃນສະໄຫມລາດຊະວົງຫງວຽນ ເຂົ້າລະບົບດີຈີຕອນ. ເມື່ອກອງທຶນບັນລຸໄດ້ 50 ລ້ານດົງ, ຫນ່ວຍດັ່ງກ່າວສືບຕໍ່ປະຕິບັດການສະສົມ, ນຳເອົາບັນດາລວດລາຍສະຖາປັດຕະຍະກຳ, ເຄື່ອງໃຊ້ສອຍໃນສະໄຫມລາດຊະວົງເລເຂົ້າໃນລະບົບດີຈີຕອນ. ອ້າຍ ກູມີງຄອຍ, ນັກຈິດຕະກອນໃຫ້ຄຳປືກສາ, ປະເມີນຜົນໂຄງການ “ຮວາວັນດ້າຍຫວຽດ” (ລວດລາຍດ້າຍຫວຽດ”ຖືວ່າ:
“ພວກເຮົາຕ້ອງເຂົ້າໃຈໄດ້ວ່າ ພວກເຮົາເຮັດໄດ້ສິ່ງໃດແດ່, ສະຫນອງໃຫ້ຜູ້ສະຫນັບສະຫນູນໄດ້ຫຍັງແດ່ເພື່ອໃຫ້ເຂົາເຈົ້າສະຫນັບສະຫນູນຕົນ. ເພາະສະນັ້ນ ພວກເຮົາຕ້ອງເຮັດແນວໃດເພື່ອໃຫ້ໂຄງການມີປະໂຫຍດຕໍ່ພາກສ່ວນໃດຫນຶ່ງໃນສັງຄົມເພື່ອໃຫ້ເຂົາເຈົ້າເຫັນໄດ້ຜົນປະໂຫຍດຈາກໂຄງການ. ທີສອງ ພວກເຮົາປະຕິບັດໂຄງການດ້ວຍຄວາມກະຕືລືລົ້ນ, ສຸດຈິດສຸດໃຈຕໍ່ວຽກງານ ເວລານັ້ນພວກເຮົາຈຶ່ງໄດ້ຮັບການສະຫນັບສະຫນູນ.”
ກຸ່ມ ຟອງເຢືອງ comic
ພາບ:thethaovanhoa
|
ບັນດາໂຄງການຄື: “ລອງເທີນເຕືອງ” ແລະ “ຮວາວັນດ້າຍຫວຽດ” ໄດ້ຮັບຖືວ່າແມ່ນຜະລິດຕະພັນ “made in Vietnam” ໄດ້ຮັບຜົນສຳເລັດຈາກກອງທຶນວົງຄະນາຍາດຂອງບັນດາເພື່ອນຫນຸ່ມທີ່ເມົາມົວກັບວັດທະນະທຳຂອງຊາດ. ການພິມຈຳຫນ່າຍປື້ມຈາກກອງທຶນຂອງບັນດາຜູ້ອ່ານ ໄດ້ຊ່ວຍໃຫ້ນັກປະພັນຫນຸ່ມຖອດຖອນບົດຮຽນຕື່ມອີກກ່ຽວກັບການຄຸ້ມຄອງວັນເວລາ, ແຜນການຜະລິດສິ່ງພິມ,ຫລືຂອດ ດູແລລູກຄ້າ ຊື່ງແມ່ນບັນດາຜູ້ປະກອບສ່ວນເຂົ້າໃນການພິມຈຳຫນ່າຍປື້ມ. ກອງທຶນວົງຄະນາຍາດກໍເຮັດໃຫ້ບັນດາໂຄງການປື້ມເລື່ອງໄດ້ຮັບການລົງທຶນຢ່າງລະອຽດລະອໍກວ່າ, ລອບຄອບຖິ່ຖ້ວນກວ່າ, ເພາະສະນັ້ນ ບັນດານັກປະພັນຕ້ອງເອົາໃຈໃສ່ປື້ມເລື່ອງກວ່າ. ອ້າຍ ຫງວຽນແຄງເຢືອງ, ຜູ້ຮ່ວມສ້າງຕັ້ງບໍລິສັດຫຸ້ນສ່ວນພາບເລື່ອງ Comicola, ຊືງແມ່ນຫົວຫນ່ວຍຈັດຕັ້ງການສ້າງກອງທຶນວົງຄະນາຍາດໃຫ້ແກ່ສອງໂຄງການດັ່ງກ່າວໃຫ້ຮູ້ວ່າ ເມື່ອໂຄງການໄດ້ຮັບຜົນສຳເລັດ ຈະນຳເອົາຊຸດສະສົມລວດລາຍບູຮານເຂົ້າເຄືອຂ່າຍອິນເຕີແນັດ ແລະ ໃຫ້ທຸກຄົນໃຊ້ໂດຍບໍ່ເກັບຄ່າ.
“ທຸກຄົນຍາມໃດກໍສະຫນັບສະຫນູນໂຄງການຂອງຊາວຫວຽດນາມ. ກໍເຊັ່ນດຽວກັບກັບ “ລອງເທີນເຕືອງ”, ພວກຂ້າພະເຈົ້າໄດ້ຮັບການສະຫນັບສະຫນູນຫລາຍຢ່າງຈາກຕ່າງປະເທດ. ເຂົາເຈົ້າສົ່ງເງິນໃຫ້ພວກຂ້າພະເຈົ້າ ແລະ ຈົດໝາຍທາງອີແມວອີກ ໃນນັ້ນໄດ້ຂຽນວ່າ: ບໍ່ຕ້ອງຝາກຫຍັງໃຫ້ຂ້າພະເຈົ້າ, ພວກເພື່ອນພະຍາຍາມເດີ. ນີ້ແມ່ນກຳລັງຫນູນອັນໃຫຍ່ຫລວງເພື່ອໃຫ້ພວກຂ້າພະເຈົ້າພັດທະນາບັນດາໂຄງການຄືດັ່ງກ່າວ.”
ນອກຈາກ ສອງໂຄງການ “ລອງເທີນເຕືອງ” ແລະ “ຮວາວັນດ້າຍຫວຽດ”, ບໍລິສັດຫຸ້ນສ່ວນພາບເລື່ອງ Comicola ຍັງສ້າງກອງທຶນ ແລະ ຫນູນຊ່ວຍການພິມຈຳຫນ່າຍ ປື້ມພາບເລື່ອງ 10 ຫົວ. ຄຽງຄູ່ກັນນັ້ນ ບັນດາໂຄງການໄດ້ອັດແຜ່ນເພງ CD, ໂຄສະນາຄວາມຮັບຮູ້ຂອງວົງຄະນາຍາດກ່ຽວກັບບັນດາບັນຫາສັງຄົມ ກໍໄດ້ຮັບຄວາມຊົມເຊີຍຈາກທຸກຄົນ.
ອາດຈະເວົ້າໄດ້ວ່າ ການສ້າງກອງທຶນວົງຄະນາຍາດແມ່ນການສະແດງໃຫ້ເຫັນຄວາມຮັບຜິດຊອບສັງຄົມຜ່ານການເລືອກເຟັ້ນ ແລະ ຊຸກຍູ້ວິວັດການພິມຈຳຫນ່າຍ ປື້ມຕ່າງໆເພື່ອ “ຜູ້ອ່ານຕ້ອງການປື້ມມ່ວນ, ປື້ມດີ ແລະ ເຂົາເຈົ້າຍາມໃດກໍພ້ອມແລ້ວລົງທຶນເພື່ອຮັບເອົາບັນດາຜະລິດຕະພັນຄືດັ່ງຄວາມມຸ້ງຫວັງ. ເມື່ອກອງທຶນວົງຄະນາຍາດໄດ້ນຳໃຊ້ຢ່າງມີປະສິດທິຜົນຈາກບັນດານັກປະພັນ, ຜູ້ອ່ານຈະນັບມື້ນັບມີຫລາຍສິ່ງພິມມ່ວນກວ່າ, ຄຸນນະພາບສູງກວ່າ, ຈາກນັ້ນ ປະກອບສ່ວນຍົກສູງວັດທະນະທຳອ່ານປື້ມຂອງວົງຄະນາຍາດ.