ຮູບພາບສັດ 4 ປະເພດທີ່ສັກສິດຍັງຄົງຖືກນຳໄປປະດັບປະດາຢູ່ຕາມກິດຈະກຳສະຖາປັດຕະຍະກຳ, ພາບແຕ້ມ, ຮູບແກະຄວັດສະຫຼັກ
(ພາບ: vietnamnet)
|
ນັບແຕ່ປາງກ່ອນເປັນຕົ້ນມາ, ໃນການເຫຼື້ອມໄສພື້ນເມືອງຫວຽດນາມ, ສັດ 4 ປະເພດທີ່ສັກສິດ ລວມມີ: ມັງກອນ, ສິງໂຕ, ເຕົາ, ຫົງ ໄດ້ເປັນສັນຍາລັກໃຫ້ແກ່ສິດອຳນາດ, ສະຕິປັນຍາ, ກຳລັງແຮງຢ່າງມະຫາສານ ແລະ ຄວາມງາມອັນສູງສົ່ງ. ຍ້ອນຄວາມໝາຍທີ່ດີງາມນີ້ເອງ, ຮູບພາບສັດທີ່ສັກສິດເຫຼົ່່ານັ້ນຍາມໃດກໍປະກົດຕົວໃນບັນດາກິດຈະກຳສິລະປະສະຖາປັດຕະຍະກຳ ແລະ ໃນການດຳລົງຊີວິດ, ປະຊາຊົນໄດ້ຖືເປັນສັນຍາລັກໃຫ້ແກ່ຄວາມໂຊກດີ ແລະ ຄວາມຈະເລີນຮຸ່ງເຮືອງ.
ຕາມປັດຊະຍາຝ່າຍຕາເວັນອອກແລ້ວ, ສັດ 4 ປະເພດທີ່ສັກສິດ ລວມມີ: ມັງກອນ, ສິງໂຕ, ເຕົາ, ຫົງ, ໃນນັ້ນມັງກອນແມ່ນສັດປະເພດນຳໜ້າໃນກຸ່ມສັດທີ່ສັກສິດດັ່ງກ່າວ ຖືກຊາວຫວຽດນາມຫັນເປັນເທບນິຍາຍ, ກາຍເປັນສັນຍາລັກຂອງກຳລັງແຮງ, ສິດອຳນາດ, ຄວາມຈະເລີນຮຸ່ງເຮືອງ ແລະ ພະລັງຊີວິດຍືນຍົງ. ຮູບພາບ ມັງກອນໄດ້ປະກົດຕົວຫຼາຍໃນສິລະປະສະຖາປັດຕະຍະກຳ, ການປະດັບປະດາໃນພະລາດຊະວັງ, ຫໍໂຮງບູຊາ, ສຸສານ, ວັດວາອາຮາມ. ເມື່ອສົມທຽບກັບບັນດາປະເທດອາຊີຕາເວັນອອກ. ມັງກອນຂອງຫວຽດນາມແມ່ນນິ້ມນວນອ່ອນຍົນດ້ວຍຮ່າງຄົດງໍຄືຕົວໜັງສື S. ມັງກອນຖືກປະດັບປະດາໃນວັດວາອາຮາມ, ພະລາດຊະວັງສ່ວນຫຼາຍມີຫົວແຫງນຂຶ້ນສູງ, ອ້າປາກກ້ວາງ. ຜ່ານແຕ່ລະໄລຍະແຫ່ງປະຫວັດສາດ, ຕາມຄວາມວາດນຶກຂອງມະນຸດນັ້ນ, ມັງ ກອນໄດ້ຮັບການປະດັບປະດາລາຍລະອຽດຫຼາຍຢ່່າງໃຫ້ແທດເໝາະຕື່ື່ມອີກ. ເພາະສະນັ້ນ, ເມື່ອເຫັນຮູບພາບ ມັງກອນຢູ່ຕາມເຂດປູຊະນີຍະສະຖານປະຫວັດສາດ, ເຄື່ອງປະດັບຕ່າງໆນັ້ນ, ຜູ້ຄົນທັງຫຼາຍສາມາດເດົາເອົາອາຍຸຂອງກິດຈະກຳຫຼືເຄື່ອງຂອງວັດຖຸບູຮານນັ້ນແມ່ນມາແຕ່ສະໄໝລາດຊະວົງຫຼີ້, ລາດຊະວົງເລ ຫຼື ລາດຊະວົງຫງວຽນ. ທ່ານດັ້ງວັນບານ, ນັກຄົ້ນຄ້ວາວັດທະນະທຳໃຫ້ຮູ້ວ່າ :
“ມັງກອນແມ່ນສັນຍາລັກສະແດງໃຫ້ເຫັນຄວາມມຸ່ງຫວັງຂອງມະນຸດຢາກຫຼຸດພົ້ນອອກຈາກຄວາມຜູກຮັດ. ມັງກອນສາມາດບິນຂຶ້ນສູ່ສະຫວັນ, ຊ້ອນໂຕໃນກຸ່ມເມັກ, ສາມາດລອຍນ້ຳ ແລະ ຍ່າງຫຼືເລື່ອນເທິງບົກ. ມັງກອນແມ່ນສັນຍາລັກແຫ່ງຄວາມຫວັງອັນສູງສົ່ງຂອງມະນຸດ. ສະແດງໃຫ້ເຫັນກຳລັງແຮງທັງໝົດ, ທັງຊ່ວຍມະນຸດເປີດກ້ວາງສະພາບແວດລ້ອມແຫ່ງຊີວິດ, ສ້າງການດຳລົງຊີວິດທີ່ນັບມື້ນັບອຸດົມຮັ່ງມີ, ຈົບງາມກ່ວາເກົ່າ”
ໃນຂະນະທີ່ ມັງກອນແມ່ນສັນຍາລັກໃຫ້ແກ່ສິດອຳນາດສູງສຸດນັ້ນ, ສິງໂຕແມ່ນສັດປະເພດທີ 2 ໃນກຸ່ມສັດ 4 ປະເພດທີ່ສັກສິດ ສະແດງໃຫ້ເຫັນຄວາມສັນຕິສຸກ ແລະ ໂຊກດີ. ໃນຄວາມນຶກຄິດຂອງຊາວຫວຽດນາມ, ສິງໂຕແມ່ນສັດປະເພດທີ່ແຂງແຮງ, ມີຄວາມຈົງຮັກພັກດີ ດັ່ງນັ້ນເຄີຍຖືກເລືອກເອົາເພື່ອຮັບໃຊ້ວຽກງານເຝົ້າເວນຍາມຢູ່ຫໍໂຮງບູຊາ, ວັດວາອາຮາມ.
ສັດປະເພດທີ 3 ໃນກຸ່ມສັດ 4 ປະເພດທີ່ສັກສິດ, ນັ້ນແມ່ນເຕົາ, ເປັນສັນຍາລັກໃຫ້ແກ່ກຳລັງແຮງ, ຄວາມຍືນຍົງຄົງຕົວ. ໃນປະຫວັດສາດ, ຊາວຫວຽດນາມໄດ້ສ້າງເລື່ອງລາວກ່ຽວກັບເຕົາເປັນເທບນິຍາຍ, ຊຶ່ງໄດ້ຊ່ວຍເຈົ້າຊີວິດອານເຢືອງເວືອງກໍ່ສ້າງກຳແພງ ໂກລວາຢູ່ເມືອງດົງແອງ, ຮ່າໂນ້ຍ. ສ່ວນຢູ່ໃຈກາງນະຄອນ ຫຼວງຮ່າໂນ້ຍ ມີໜອງຮ່ວານກ໋ຽມ ດ້ວຍທາດເກົ່າຊຶ່ງຖືກເອີ້ນວ່າ ທາດເຕົາ ຕັ້ງຢູ່ກາງໜອງ. ພິເສດຢູ່ໜອງຮ່ວານກ໋ຽມໃນປະຈຸບັນ, ຍັງຄົງມີເຕົາໂຕໜຶ່ງຢູ່ນີ້ມາເປັນເວລານັບຮ້ອຍປີ, ບາງຄັ້ງຄາວເຕົາໄດ້ຟູຂຶ້ນໜ້ານ້ຳ ອັນໄດ້ເຮັດໃຫ້ຜູ້ຄົນທັງຫຼາຍຄຳນຶງເຖິງເລື່ອງລາວເລົ່າຂານປາກຕໍ່ປາກກ່ຽວກັບເຈົ້າຊີວິດເລເຫຼີ້ຍຂີ່ເຮືອໄປສົ່ງ ດາບວິເສດໃຫ້ແກ່ເຕົາຄຳພາຍຫຼັງໄດ້ຕີທັບມ້າງພວກສັດຕູເຂົ້າມາຮຸກຮານ. ຮູບພາບທາດເຕົາ, ແລະ ເຕົາສັກສິດຍິ່ງເຮັດໃຫ້ທັດສະນີຍະພາບໜອງຮ່ວານກ໋ຽມ ເພີ່ມຄວາມລຶກລັບມະຫັດສະຈັນ. ຮູບພາບເຕົາ ກໍຍັງປະກົດຕົວຢູ່ຕາມຫໍໂຮງບູຊາ, ວັດວາອາຮາມ. ຢູ່ວັນມ້ຽວກວັກຕືຢ້າມ ຊຶ່ງຮັບຖືວ່າແມ່ນມະຫາວິທະຍາໄລແຫ່ງທຳອິດຂອງຫວຽດນາມ ໄດ້ຖືກກໍ່ສ້າງແຕ່ປີ 1070 ມີແຜ່ນສີລາ 82 ແຜ່ນຄວັດຊື່ບັນດາຜູ້ເສັງໄດ້ລະດັບປະລິນຍາເອກ. ສິ່ງທີ່ພິເສດ ແມ່ນແຜ່ນສີລາເຫຼົ່ານັ້ນ ລ້ວນແຕ່ຖືກຕັ້ງບົນຫຼັງເຕົາຖືກແກະຄວັດສະຫຼັກດ້ວຍຫີນ ມັນປຽບເໝືອນຄວາມເຄົາລົບຕໍ່ການຮ່ຳຮຽນ, ຖືຜູ້ມີຄວາມເກັ່ງກ້າສາມາດເປັນສຳຄັນ. ທ່ານດຣ ດັ້ງກິມຫງອກ ນັກຄົ້ນຄ້ວາວັດທະນະທຳ ໃຫ້ຮູ້ວ່າ :
“ ໃນຄວາມສຳນຶກຂອງຊາວຫວຽດນາມ, ເຕົາແມ່ນສັນຍາລັກໃຫ້ແກ່ຄວາມໝັ້ນຄົງໜັກແໜ້ນ, ຍືນຍົງຄົງຕົວ. ຍ້ອນເຫດນີ້ເອງ, ໃນສະໄໝລາດຊະວົງເລຄືໃນຕົ້ນສະຕະວັດທີ 15 ຂະນະທີ່ການຮ່ຳຮຽນໄດ້ຂະຫຍາຍຕົວຢ່າງກ້ວາງຂວາງ, ໄດ້ໃຫ້ສ້າງບັນດາແຜ່ນສີລາຄວັດຊື່ບັນດາຜູ້ເສັງໄດ້ລະດັບປະລິນຍາເອກເຫຼົ່ານັ້ນ ເພື່ອເຊີດຊູບັນດາຜູ້ເສັງໄດ້ຄະແນນດີ, ຜ່ານນັ້ນຢາກສຶກສາອົບຮົມມູນເຊື້ອທີ່ດີງາມນີ້ໃຫ້ແກ່ຄົນລຸ່ນຫຼັງ ”
ສ່ວນຫົງແມ່ນສັດປະເພດສຸດທ້າຍໃນ ກຸ່ມສັດ 4 ປະເພດທີ່ສັກສິດ, ແມ່ນນົກທີ່ສວຍງາມ. ຕາມຄວາມສຳນຶກຂອງຊາວຫວຽດນາມແລ້ວ, ບອ່ນທີ່ນົກຫົງບິນມາ ແມ່ນບອ່ນທີ່ຄາດຄະເນວ່າ ຈະໄດ້ຮັບຄວາມໂຊກດີ ແລະ ຈະເລີນຮຸ່ງເຮືອງ. ຫົງແມ່ນສັນຍາລັກຂອງຄວາມງາມສຸພາບຮຽບຮ້ອຍ ແລະ ແມ່ນຜົນສຳເລັດ. ການປະສົມປະສານລະຫວ່າງມັງກອນ ແລະ ນົກຫົງ ກໍແມ່ນຮູບພາບທີ່ດີງາມແຫ່ງ ຄວາມຜາສຸກຂອງຄູ່ສົມລົດໃໝ່ ກໍຄືຄວາມໂຊກດີ, ຄວາມສຳເລັດຜົນໃນໜ້າທີ່ການງານ. ໃນທຸກວັນນີ້, ຮູບພາບສັດ 4 ປະເພດທີ່ສັກສິດຍັງຄົງຖືກນຳໄປປະດັບປະດາຢູ່ຕາມກິດຈະກຳສະຖາປັດຕະຍະກຳ, ພາບແຕ້ມ, ຮູບແກະຄວັດສະຫຼັກ... ໃນທຸກໄລຍະເວລາ, ຮູບພາບສັດບັນດາປະເພດທີ່ສັກສິດ ຍັງຄົງແມ່ນສ່ວນໜຶ່ງໃນຊີວິດວັດທະນະທຳຂອງຊາວຫວຽດນາມ,ສະແດງໃຫ້ເຫັນຄວາມຫວັງກ່ຽວກັບປະເທດຊາດທີ່ສັນຕິພາບ, ວັດທະທາຖາວອນ, ຊີວິດຂອງປະຊາຊົນທີ່ ອີ່ມໜຳສຳລານ ແລະ ສົມບູນພຸນສຸກ.