ໂດຍໄດ້ກາຍເປັນມູນເຊື້ອແລ້ວ, ຮອດວັນທີ 5 ເດືອນຈຽງໄລ່ຕາມຈັນທະປະຕິທິນ, ໝາຍເຖິງວັນທີ 5 ຂອງປີໃໝ່ປະຈຳຊາດຫວຽດນາມຂອງທຸກໆປີ, ງານບຸນ ກໍ່ດົ໋ງດາ ກໍ່ຖືກຈັດຂຶ້ນ ຢູ່ກໍ່ດົ໋ງດາ, ຕາແສງ ກວາງຈູງ, ເມືອງ ດົ໋ງດາ, ຮ່າໂນ້ຍ ເພື່ອທົບທວນຄືນໄຊຊະນະທີ່ມີຊື່ສຽງດົ່ງດັງຂອງເຈົ້າຊີວິດ ກວາງຈູງ, ເຊິ່ງໄດ້ຕີເອົາໄຊຊະນະ ເສິກ ຊິງ 29.000 ຄົນ ກ່ອນນີ້ກວ່າ 200 ປີ, ນີ້ແມ່ນໄຊຊະນະທີ່ຍິ່ງໃຫຍ່ໃນປະຫວັດແຫ່ງການຕໍ່ສູ້ຕ້ານເສິກຕ່າງດ້າວຂອງຊາດຫວຽດນາມ. ນີ້ກໍ່ແມ່ນງານບຸນທີ່ເປັນເອກະລັກສະເພາະທີ່ສຸດ ເຊິ່ງຖືກຈັດຂຶ້ນຢູ່ຮ່າໂນ້ຍໃນໂອກາດຕົ້ນປີ.
(ພາບ://vnexpress.net)
ກໍ່ດົ໋ງດາ, ກໍ່ແມ່ນໂພນແຫ່ງໜຶ່ງທີ່ຖືກປົກຄຸມໄປດ້ວຍຕົ້ນໄມ້ຂຽວອຸ່ມທູ່ມ, ຕັ້ງລຽບບົນຖະໜົນ ໄຕເຊີນ, ເຊິ່ງແມ່ນຖະໜົນທີ່ຄັບຄາໜາແໜ້ນ ແລະທັນສະໄໝຂອງນະຄອນຫຼວງ. ບັນດານັກທ່ອງທ່ຽວມາແຫ່ງນີ້ຄັ້ງທຳອິດ, ແມ່ນບໍ່ອາດຄາດຄິດໄດ້ເລີຍວ່າ, ນີ້ແມ່ນຮ່ອງຮອຍບັ້ນຮົບທີ່ຍິ່ງໃຫຍ່ໃນປະຫວັດສາດ ແຫ່ງການຕໍ່ສູ້ຕ້ານເສິກຕ່າງດ້າວຂອງຫວຽດນາມກ່ອນນີ້ ກວ່າ 2 ສະຕະວັດ. ໃນລະດູບານໃໝ່ປີລະກາ 1789 ທະຫານ ໄຕເຊີນ ໂດຍເຈົ້າຊີວິດ ກວາງຈູງ ບັນຊາ ໄດ້ສ້າງເປັນໄຊຊະນະທີ່ມີຊື່ສຽງໂດ່ງດັງໃນປະຫວັດສາດ. ກາງຄືນວັນທີ 4 ຮຸ່ງເຊົ້າວັນທີ 5 ເດືອນຈຽງປີ ລະກາ (1789), ທະຫານໄຕເຊີນ ໂດຍ ດັ້ງຕ໋ຽນດົງ ບັນຊາໄດ້ທຳລາຍປ້ອມ ເຄືອງເທື້ອງ ຂອງເສິກ ຊິງ. ນາຍພົນຂອງເສິກ ຊິງ ແມ່ນ ເສີນອີຕົງ ຕ້ອງຜູກຄໍຕາຍຢູ່ພູ ອົກ (ລວາເຊີນ) ມໍ່ກັບເຂດ ກໍ່ດົ໋ງດາ ໃນປະຈຸບັນ. ບັ້ນຮົບໄດ້ເປີດຊ່ອງທາງໃຫ້ທະຫານ ໄຕເຊີນ ບຸກເຂົ້າປົດປ່ອຍເມືອງຫຼວງ ທັງລອງ, ກວາດລ້າງ ເສິກ ຊິງ ຮຸກຮານ 29.000 ຄົນອອກຈາກປະເທດ. ນັບແຕ່ນັ້ນມາ, ເຂດ ກໍ່ດົ໋ງດາ ໄດ້ກາຍເປັນແຫ່ງຈັດຕັ້ງງານບຸນປະເພນີ ສະເຫຼີມ ສະຫຼອງໄຊຊະນະດັ່ງກ່າວ. ນັບແຕ່ນະຄອນຫຼວງ ຮ່າໂນ້ຍ ໄດ້ຮັບການປົດປ່ອຍຄືວັນທີ (10-10-1954) ງານບຸນ ກໍ່ດົ໋ງດາ ຖືກຖືວ່າແມ່ນງານບຸນທີ່ເປັນມູນເຊື້ອ ເພື່ອຈາລຶກບຸນຄຸນຕໍ່ສູ້ຕ້ານສັດຕູຂອງບຸລຸດ. ປະຈຸບັນ, ງານບຸນ ກໍ່ດົ໋ງດາ ແມ່ນງານບຸນທີ່ມີຂອບຂະໜາດໃຫຍ່, ເຊິ່ງໄດ້ດຶງດູດຊາວນະຄອນຫຼວງ ແລະ ບັນດາເຂດອ້ອມຂ້າງເຂົ້າຮ່ວມນັບໝື່ນຄົນ. ງານບຸນຖືກຈັດຂຶ້ນດ້ວຍຫຼາຍພິທີຢ່າງສົມກຽດ, ພ້ອມກັບການເຄື່ອນໄຫວສິລະປະ ວັດທະນະທຳທີ່ເປັນເອກະລັກສະເພາະຫຼາຍຢ່າງເຊັ່ນ: ພິທີຖະຫວາຍທູບທຽນ, ແຫ່ຫວໍ, ຟ້ອນມັງກອນ… ແຕ່ພິເສດທີ່ສຸດແມ່ນລາຍການສະແດງສິລະປະທີ່ວາດພາບກ່ຽວກັບໄຊຊະນະພິລະອາດຫານຂອງນັກວິລະຊົນຊາວນາ ກວາງຈູງ ຜູ້ທີ່ໄດ້ຕີເອົາຊະນະເສິກຊິງ, ປົກປັກຮັກສາປະເທດຊາດ, ນຳມາເຊິ່ງຊີວິດສະຫງົບສຸກໃຫ້ແກ່ປະຊາຊົນ. ລຸງ ຕ້າຮູຍຮຸ່ງ, ນັກຮົບເກົ່າຢູ່ຕາແສງ ນາມດົ່ງ, ເມືອງ ດົ໋ງດາ, ໃຫ້ຮູ້ວ່າ:
”ດົ໋ງດາ - ງອກໂຮ່ຍ ແມ່ນໄຊຊະນະອັນພິລະອາດຫານຂອງຊາດຫວຽດນາມ, ປະຈຸບັນ, ລູກຫຼານຄວນຮູ້ມູນເຊື້ອຂອງບັນພະບຸລຸດໃນການປົກ ປັກຮັກສາ ແລະ ສ້າງສາປະເທດຊາດ ເພື່ອຮູ້ບຸນຄູນ ແລະ ສືບທອດມູນເຊື້ອອັນລ້ຳຄ່າດັ່ງກ່າວ”.
(ພາບ://vnexpress.net)
ພາຍຫຼັງໄດ້ຮັບຊົມຟ້ອນມັງກອນທີ່ເປັນມູນເຊື້ອ, ເຊິ່ງສະແດງໃຫ້ເຫັນບັ້ນຮົບບຸກໂຈມຕີສັດຕູດ້ວຍໄຟຂອງທະຫານ ໄຕເຊີນ ໃນເມື່ອກ່ອນແລ້ວ, ນັກທ່ອງທ່ຽວກໍ່ໄດ້ເຂົ້າຮ່ວມພິທີຖະຫວາຍທູບທຽນ ເຊິ່ງຈັດຂຶ້ນຢູ່ສາລາ ເຄືອງເທື້ອງ, ພິທີພາວະນາໄຫວ້ວອນຢູ່ວັດ ດົ່ງກວາງ. ປ້າ ຫງວຽນທິເວີ້ຍ, ຢູ່ເມືອງ ຮ່ວາງມາຍ, ໃຫ້ຮູ້ວ່າ: ”ຂ້າພະເຈົ້ານັບຖືການຈັດຕັ້ງພິທີງານບຸນຂອງ ຮ່າໂນ້ຍ ທີ່ສຸດ, ເຊິ່ງໄດ້ທົບທວນຄືນມູນເຊື້ອຂອງຊາດຫວຽດນາມນັບແຕ່ສະໄໝ ກວາງຈູງ ມາຮອດປະຈຸບັນ. ແຕ່ລະເທື່ອ, ເມື່ອໄດ້ເຂົ້າຮ່ວມງານບຸນຂູາພະເຈົ້າຮູ້ສຶກພາກພູມໃຈຫຼາຍ”
ນອກຈາກບັນດາພິທີຕ່າງໆຖືກຈັດຂຶ້ນຢ່າງເຄັ່ງຂຶມແລ້ວ, ຍັງມີການສະແດງສິລະປະ, ກິລາ, ການລະຫຼິ້ນພື້ນເມືອງທີ່ເປັນເອກະລັກສະເພາະຄື: ສະແດງມວຍປ້ຳສິລະປະ, ຟ້ອນ ວີ, ແຂ່ງຂັນໝາກຮຸກ, ດຶງເຊືອກ.. ອ້າຍ ຟານຮື້ວແທງ, ເຮັດວຽກຢູ່ຂະແໜງທະນາຄານເມືອງ ຮ່ວານກ໋ຽມ, ໃຫ້ຮູ້ວ່າ:
”ປີໃດຂ້າພະເຈົ້າກໍ່ເຂົ້າຮ່ວມງານບຸນເພື່ອຊົມ. ບັນດາລາຍການສະແດງໃນງານບຸນທັງມ່ວນ, ທັງອຸດົມສົມບຸນ, ຜ່ານນັ້ນສະແດງໃຫ້ເຫັນວ່າປະເທດຊາດມີການປ່ຽນແປງຫຼາຍຢ່າງ”
ຕົ້ນປີໄປທ່ຽວງານບຸນ ກໍ່ດົ໋ງດາ, ຊາວນະຄອນຫຼວງ, ນັກທ່ອງທ່ຽວທີ່ມາຈາກທຸກສາລະທິດ ຈະມີໂອກາດເຂົ້າໃຈຕື່ມກ່ຽວກັບງານບຸນທີ່ເປັນເອກະ ລັກສະເພາະ ເຊິ່ງຈັດຂຶ້ນຢູ່ ທັງລອງ - ຮ່າໂນ້ຍໃນຊຸມມື້ບຸນປີໃໝ່ປະຈຳຊາດ. ເຂົ້າຮ່ວມງານບຸນໃນບັນຍາກາດຕົ້ນລະດູບານໃໝ່, ຜູ້ໃດກໍຮູ້ສຶກຕື້ນຕັນໃຈ ແລະ ມີຄວາມເຂົ້າໃຈຕື່ມອີກກ່ຽວກັບບຸນຄຸນຂອງບັນພະບຸລຸດ, ຜູ້ທີ່ໄດ້ເສຍສະຫຼະເລືອດເນື້ອ ເພື່ອປົກປັກຮັກສາ ແລະ ສ້າງສາປະເທດຊາດໃຫ້ພັດທະນາຄືທຸກວັນນີ້.
ໂຕຕ໋ວນ