ພະລາດຊະວັງ ທັງລອງ - ຮ່າໂນ້ຍ ( ພາບ : hanoimoi.com.vn )
|
ຫວ່າງແລ້ວນີ້, ນະຄອນຫຼວງຮ່າໂນ້ຍໄດ້ປະກາດແຜນຜັງໜ້າພຽງເຂດປູຊະນີ ຍະສະຖານສູນກາງ ພະລາດຊະວັງ ທັງລອງ ຢູ່ເຂດດິນເລກທີ່ 18 ຖະໜົນຮ່ວາງຢ້ຽວ-ຮ່າໂນ້ຍ. ຈຸດໝາຍຂອງ ແຜນຜັງ ແມ່ນເພື່ອກໍ່ສ້າງເປັນສວນສາທາລະນະວັດທະນະທຳປະຫວັດສາດ ແນໃສ່ເສີມຂະຫຍາຍບັນດາຄຸນຄ່າທີ່ພົ້ນເດັ່ນມີລັກສະນະທົ່ວໂລກຂອງເຂດປູຊະນີຍະສະຖານພະລາດຊະວັງ ທັງລອງ ຊຶ່ງໄດ້ຮັບການຮັບຮູ້ຈາກອົງການ UNESCO ວ່າແມ່ນມໍລະດົກວັດທະນະທຳຂອງໂລກ. ດ້ວຍແຜນຜັງດັ່ງກ່າວ, ສວນສາທາລະນະແຫ່ງນີ້ ຈະດຶງດູດ, ເຊື້ອເຊີນແຂກ ທ່ອງທ່ຽວທັງຢູ່ພາຍໃນ ແລະ ຕ່າງປະເທດ ມາຮັບຊົມ, ຊອກຮູ້ບັນດາຄຸນຄ່າ ມໍລະດົກວັດທະນະທຳທີ່ປະເສີດ ເລີດລ້ຳຂອງຊາດຫວຽດນາມ.
ກ່ອນນີ້ 2 ປີ, ພະລາດຊະວັງ ທັງລອງ - ຮ່າໂນ້ຍໄດ້ຮັບການຮັບຮູ້ຢ່າງເປັນທາງການຈາກອົງການ UNESCO ວ່າແມ່ນມໍລະດົກວັດທະນະທຳຂອງໂລກ. ເຂດສູນກາງພະລາດຊະວັງ ທັງລອງ ມີບັນດາຄຸນຄ່າທີ່ພົ້ນເດັ່ນໃນທົ່ວໂລກ, ເພາະວ່າໃນຫຼາຍສະຕະວັດຢ່າງລຽນຕິດ, ຢູ່ແຫ່ງນີ້ແມ່ນແຫ່ງເຕົ້າໂຮມບັນດາຄຸນຄ່າວັດທະ ນະທຳມະນຸດ, ສິລະປະແກະຄວັດສະຫຼັກ, ສິລະປະທາງດ້ານສະຖາປັດຕະຍະກຳ, ເຕັກນິກການກໍ່ສ້າງ, ການວາງແຜນຜັງເມືອງ ແລະ ສິລະປະສ້າງທັດສະນີຍະພາບທີ່ເປັນເອກະລັກສະເພາະທີ່ສຸດ. ບັນດາປູຊະນີຍະສະຖານ ສະຖາປັດຕະຍະກຳ ພ້ອມກັບວັດຖຸພັນເປັນຈຳນວນຫຼວງຫຼາຍຢູ່ແຫ່ງນີ້ ໄດ້ສະແດງໃຫ້ເຫັນຂອບຂະໜາດຂອງພະລາດຊະວັງ ທັງລອງ ພ້ອມກັບຊີວິດການເປັນຢູ່ພາຍໃນພະລາດຊະວັງຂອງເຈົ້າຊີວິດ, ເສນາອາມາດ, ເຈົ້າຂຸນນາງ ຜ່ານບັນດາໄລຍະແຫ່ງປະຫວັດສາດ. ບັນດາປູຊະນີຍະສະຖານ ພ້ອມກັບບັນດາວັດຖຸພັນ ໄດ້ປະກົດຂຶ້ນປຽບເໝືອນຊຸດເອກະສານປະຫວັດສາດນັບພັນປີແຫ່ງອະລິຍະທຳຂອງ ທັງລອງ - ຮ່າໂນ້ຍ ຊຶ່ງໄດ້ສອ່ງແສງລະດັບຄວາມຮູ້ ແລະ ສີສັນຊາດຂອງສູນກາງວັດທະນະທຳໃຫຍ່ກ່ວາໝູ່ ແລະ ມີມາແຕ່ດົນນານທີ່ສຸດຂອງປະເທດຊາດ. ບັນດາຄຸນຄ່າທີ່ພົ້ນເດັ່ນໃນທົ່ວໂລກຂອງຂອງເຂດປູຊະນີຍະສະຖານໄດ້ຮັບການຢັ້ງຢືນດ້ວຍ 3 ຈຸດພິເສດທີ່ພົ້ນເດັ່ນຄື ໄລຍະທາງແຫ່ງປະຫວັດສາດວັດທະນະທຳ, ລັກສະນະຕໍ່ເນື່ອງຂອງມໍລະດົກດ້ວຍຖານະເປັນສູນກາງສິດອຳນາດ ແລະ ບັນດາປູຊະນີຍະສະຖານ, ວັດຖຸພັນທີ່ອຸດົມສົມບູນຫຼາຍຮູບຫຼາຍສີ. ເລື່ອງທ່ານນາຍົກລັດຖະມົນຕີຫວຽດນາມ ເຊັນອະນຸມັດ ແຜນຜັງໜ້າພຽງເຂດປູຊະນີຍະສະຖານພະລາດຊະວັງ ທັງລອງ - ຮ່າໂນ້ຍໃນຄັ້ງນີ້ແມ່ນມີຄວາມໝາຍເພື່ອແນໃສ່ເສີມຂະຫຍາຍຄຸນຄ່າມໍລະດົກວັດທະນະທຳນີ້. ທ່ານ Pham Cao Phong ເລຂາທິການໃຫຍ່ຄະນະກຳມະການແຫ່ງຊາດ UNESCO ຫວຽດນາມ ໃຫ້ຮູ້ວ່າ :
“ ນີ້ແມ່ນການຕັດສິນທີ່ສຳຄັນທີ່ສຸດເພື່ອແນະນຳໃຫ້ໂລກຮັບຊາບກ່ຽວກັບມໍລະດົກ, ຄວາມງາມ, ມູນເຊື້ອປະຫວັດສາດຂອງຫວຽດນາມທີ່ມີຕໍ່ເພື່ອນມິດສາກົນ ແລະ ພ້ອມກັນນັ້ນກໍມີຄຸນຄ່າອັນໃຫຍ່ຫຼວງທີ່ສຸດໃນການສຶກສາປະຫວັດສາດຂອງຫວຽດນາມໃຫ້ແກ່ບັນດາລຸ່ນຄົນໃນອະນາຄົດ ”
ແຂກມາຢ້ຽມຊົມຮ່ອງຮອຍບູຮານຄະດີ ຊຶ່ງຫາກໍຖືກຂຸດໃຕ້ດິນ
|
ໜຶ່ງໃນບັນດາເຂດນອນແຜນຜັງຊຶ່ງໄດ້ຮັບຄວາມເອົາໃຈໃສ່ເປັນພິເສດ, ນັ້ນແມ່ນເຂດດິນສະຫງວນໃຫ້ແກ່ວຽກງານຄົ້ນຄ້ວາບູຮານຄະດີ, ພ້ອມກັບການສ້າງເຂດວາງສະແດງໃຕ້ດິນນັ້ນ, ຍັງມີບາງຮອງຮອຍບູຮານຄະດີທີ່ສຳຄັນຈະໄດ້ຮັບການເລືອກເຟັ້ນເພື່ອອະນຸລັກຮັກສາດ້ວຍຮູບແບບຕູ້ແກ້ວ. ກິດຈະກຳໃໝ່ໃນເຂດ ປູຊະນີຍະສະຖານຈະມີລວງສູງບໍ່ຮອດ 5 ແມດ ແລະ ຈະຈຳກັດການກໍ່ສ້າງບັນດາກິດຈະກຳພົ້ນໜ້າດິນ. ໃນແຜນຜັງຍັງກໍ່ສ້າງທາງອຸໂມງໃຕ້ດິນຜ່ານຖະໜົນ ຮ່ວາງຢ້ຽວເພື່ອເຊື່ອມຕໍ່ລະຫວ່າງເຂດບູຮານຄະດີ ເລກທີ່ 18 ຖະໜົນຮ່ວາງຢ້ຽວ ກັບກຳແພງເກົ່າໃຫ້ກາຍເປັນກຸ່ມດຽວ ເພື່ອຢັ້ງຢືນບັນດາຄຸນຄ່າທີ່ໂລກໄດ້ຮັບຮອງ , ນັ້ນແມ່ນສູນກາງແຫ່ງສິດອຳນາດຜ່ານຕະຫຼອດ 13 ສະຕະວັດຄື ຈາກສະໄໝເຈົ້າຊີວິດ Ly Thai To ຈົນເຖິງຍຸກສະໄໝໂຮ່ຈິມິນ. ເລື່ອງສ້າງເຂດປູຊະນີ ຍະສະຖານພະລາດຊະວັງ ທັງລອງ ໃຫ້ກາຍເປັນສວນສາທາລະນະ ກໍແມ່ນແບບວິທີທີ່ມີປະສິດທິຜົນເພື່ອຊ່ວຍປະຊາຊົນມາຊົມ ແລະ ຊອກຮູ້ຢູ່ເຂດປູຊະນີ ຍະສະຖານໄດ້ຢ່າງສະດວກສະບາຍກ່ວາເກົ່າ. ທ່ານສາດສະດາຈານປະຫວັດ ສາດ Le Van Lan ໃຫ້ຂໍ້ສັງເກດວ່າ :
“ ຈຸດໜຶ່ງໃນແຜນຜັງດັ່ງກ່າວ, ນັ້ນແມ່ນບໍ່ມີກຳແພງອ້ອມຮອບ. ນີ້ກໍໝາຍເຖິງລັກສະນະເປີດກ້ວາງ, ສະແດງໃຫ້ເຫັນການເຊື້ອເຊີນທຸກໆຄົນມາທ່ຽວຫຼິ້ນຢູ່ສວນສາທາລະນະປູຊະນີຍະສະຖານ ”
ແຜນຜັງດັ່ງກ່າວບໍ່ພຽງແຕ່ຊ່ວຍໃຫ້ມ່ວນຊົນ, ແຂກທ່ອງທ່ຽວເຂົ້າມາທັດສະນະ ສຶກສາ ສາມາດເຂົ້າໃຈແຈ້ງກ່ວາກ່ຽວກັບມໍລະດົກ, ຮ່ອງຮອຍບູຮານຄະດີ, ສະຖາປັດຕະຍະກຳເທົ່ານັ້ນ, ຫາກຍັງຊ່ວຍໃຫ້ບັນດານັກວິທະຍາສາດກຳນົດວິທີການອະນຸລັກຮັກສາເປັນຢ່າງດີກ່ວາ. ທ່ານ ດຣ - ນັກສະຖາປານິກ Dao Ngoc Nghiem ອາດີດຫົວໜ້າພະແນກ ວາງແຜນຜັງສະຖາປັດຕະຍະກຳ ນະຄອນຮ່າໂນ້ຍໃຫ້ຮູ້ວ່າ :
“ ໃນຄັ້ງນີ້, ນາຍົກລັດຖະມົນຕີຫວຽດນາມ ບໍ່ພຽງແຕ່ເຊັນອະນຸມັດ ແຜນຜັງໜ້າພຽງເທົ່ານັ້ນ, ຫາກຍັງເຊັນອະນຸມັດທັງບັນດາການກຳນົດທິດ. ພິເສດໄດ້ຍົກອອກບັນດາຈຸດໝາຍທີ່ຕ້ອງການ, ຊ່ວຍໃຫ້ຮ່າໂນ້ຍຍູ້ແຮງການເສີມຂະຫຍາຍຄຸນຄ່າມໍລະດົກ ແລະ ປະກອບສ່ວນພັດທະນາເສດຖະກິດສັງຄົມ, ພິເສດແມ່ນການທ່ອງທ່ຽວ,ໂຄສະນາພາບພົດຂອງຮ່າໂນ້ຍໃຫ້ແກ່ພາກພື້ນ ແລະ ໂລກ ”
ພາຍຫຼັງທີ່ໄດ້ປະກາດແຜນຜັງໜ້າພຽງ ເຂດປູຊະນີຍະສະຖານສູນກາງ ພະລາດຊະວັງ ທັງລອງ, ນະຄອນຮ່າໂນ້ຍຍັງຈະສ້າງກົນໄກຄຸ້ມຄອງ ແຜນຜັງສະຖາປັດຕະຍະກຳ, ແຜນການອະນຸລັກຮັກສາ ຄຸ້ມຄອງການລົງທຶນກໍ່ສ້າງ ໃຫ້ສອດຄອ່ງກັບບັນດາເນື້ອໃນຂອງແຜນຮ່າງທີ່ໄດ້ຮັບການເຊັນອະນຸມັດ. ນອກຈາກນັ້ນ, ທາງນະຄອນຮ່າໂນ້ຍຍັງມີແຜນການຂຸດຄົ້ນບັນດາບໍລິເວັນໃຕ້ ດິນໃນໄລຍະທີ່ຈະມາເຖິງ,ສືບຕໍ່ຄົ້ນຫາບັນດາຄຸນຄ່າຂອງເຂດປູຊະນີຍະສະຖານ ພະລາດຊະວັງ ທັງລອງໃນຍຸກສະໄໝໃໝ່ຫຼາຍກ່ວາອີກ.