Ngo Mon ແມ່ນປະຕູໂຂງໃຫຍ່ຂອງພະລາດຊະວັງເຫ້ວ, ແມ່ນກິດຈະກຳສະຖາປັດຕະຍະກຳທີ່ມີຄຸນຄ່າສູງໃນສະໄໝລາດຊະວົງ ຫງວຽນ
(ພາບ:baohue.com)
|
ນະຄອນເຫ້ວ ຊຶ່ງແມ່ນເມືອງຫຼວງເກົ່າຂອງແຂວງເທື່ອທຽນເຫ້ວ ມີປະຫວັດ ສາດແຫ່ງການສ້າງຕັ້ງ ແລະ ຂະຫຍາຍຕົວຜ່ານຫຼາຍພັນປີ. ນີ້ກໍແມ່ນເຂດດິນທີ່ມີປູຊະນີຍະສະຖານປະຫວັດສາດວັດທະນະທຳຫຼາຍແຫ່ງພ້ອມກັບບັນດາງານບຸນອັນເປັນປະເພນີ, ພິເສດມີ 2 ມໍລະດົກທີ່ມີຄຸນຄ່າທົ່ວໂລກ ນັ້ນແມ່ນກຸ່ມປູຊະນີ ຍະສະຖານ ກຸງເກົ່າເຫ້ວ ແລະ ດົນຕີໃນພະລາດຊະວັງເຫ້ວ. ໃນຊຸມປີທີ່ຜ່ານມາ, ເຫ້ວໄດ້ມານະພະຍາຍາມຢ່າງບໍ່ຢຸດຢັ້ງໃນການອະນຸລັກຮັກສາ ແລະ ເສີມຂະ ຫຍາຍມໍລະດົກວັດທະນະທຳ.
ໂດຍຜ່ານບັນດາໄລຍະທາງແຫ່ງປະຫວັດສາດ, ມາຮອດປະຈຸບບັນ, ເຫ້ວຍັງຄົງສາມາດເກັບຮັກສາສາງປະຫວັດສາດທີ່ມະຫາສານຈາກບັນດາປູຊະນີຍະສະ ຖານບູຮານຄະດີວັດທະນະທຳ ຊາຫິ່ງ ທີ່ມີມາກ່ອນນີ້ປະມານ 2.500 ປີ, ປູຊະນີຍະສະຖານວັດທະນະທຳ ຈຳປາ ຕະຫຼອດຮອດບັນດາປູຊະນີຍະສະຖານສະຖາປັດຕະຍະກຳພຸດທະສາສະໜາຫວຽດນາມ. ທ່ານ Nguyen Van Cao ປະທານຄະນະກຳມະການປະຊາຊົນແຂວງເທື່ອທຽນເຫ້ວໃຫ້ຮູ້ວ່າ “ ສູນອະນຸລັກຮັກສາ ປູຊະນີຍະສະຖານກຸງເກົ່າເຫ້ວ ແມ່ນແຫ່ງປະຕິບັດບັນດາກິດຈະກຳ ແລະ ໂຄງການຫຼາຍກ່ວາໝູ່ໃນທົ່ວປະເທດກ່ຽວກັບການບຸລະນະປະຕິສັງຂອນ ປູຊະນີ ຍະສະຖານ ແລະ ອະນຸລັກຮັກສາມໍລະດົກວັດທະນະທຳ”. ປີ 2012, ສູນອະນຸລັກຮັກສາ ປູຊະນີຍະສະຖານກຸງເກົ່າເຫ້ວ ສຸມໃສ່ສ້າງຕັ້ງບັນດາໂຄງການເພື່ອຜັນຂະຫຍາຍປະຕິບັດ ຄືລະບົບ ປູຊະນີຍະສະຖານຫໍໂຮງ, ສຸສານຕ່າງໆໃນບໍລິເວນນະຄອນເຫ້ວ ແລະ ໃນພະລາດຊະວັງເຫ້ວ. ນອກຈາກນັ້ນ, ທາງສູນຍັງຍູ້ແຮງວຽກງານຄົ້ນຄ້ວາວິທະຍາສາດ, ຂໍ້ມຸນຂ່າວສານເອກະສານ, ຄົ້ນຄ້ວາບັນດາຄຸນຄ່າວັດທະນະທຳບໍ່ມີຮູບຮ່າງ, ຮ່ວມມືສາກົນ, ພິພິທະພັນ, ການວາງສະແດງ....ເພື່ອເສີມຂະຫຍາຍຄຸນຄ່າລະບົບປູຊະນີຍະສະຖານກຸງເກົ່າເຫ້ວ, ກໍຄືວຽກງານໂຄສະນາ ແນະນຳພາບພົດມໍລະດົກເຫ້ວເພື່ອດຶງດູດນັກທ່ອງທ່ຽວ. ໃນໄລຍະແຕ່ປີ 2006 ມາຮອດປະຈຸບັນ ໄດ້ດຳເນີນການບຸລະນະປະຕິສັງຂອນຫຼາຍກິດຈະກຳທີ່ເປັນຈຸດສຸມມີຄຸນຄ່າດ້ານວັດທະນະທຳ, ປະຫວັດສາດ, ສິລະປະ, ສະຖາປັດຕະຍະກຳທີ່ດີເດັ່ນ ແລະ ມີຂອບຂະໜາດໃຫຍ່ດ້ວຍຈຳນວນເງິນໃຊ້ຈາຍແມ່ນໄດ້ມາຈາກແຫຼ່ງທຶນຕ່າງໆຢູ່ພາຍໃນປະເທດ ແລະ ແຫຼ່ງເງິນອຸປະຖຳຂອງສາກົນລວມເຖິງ ກ່ວາ 200 ຕື້ດົງ.
ທ່ານ Phan Tien Dung ຫົວໜ້າພະແນກວັດທະນະທຳ-ກິລາ ແລະ ທ່ອງທ່ຽວ ແຂວງເທື່ອທຽນເຫ້ວ ໃຫ້ຮູ້ວ່າ:
“ ການອະນຸລັກຮັກສາບັນດາມໍລະດົກວັດທະນະທຳ ແມ່ນຍຸດທະສາດພັດທະນາຂອງແຂວງເທື່ອທຽນເຫ້ວ, ດັ່ງນັ້ນທຸກໆແຫຼ່ງກຳລັງລົງທຶນຂອງແຂວງ ລ້ວນແຕ່ສະຫງວນໃຫ້ແກ່ການ ບຸລະນະປະຕິສັງຂອນບັນດາປູຊະນີຍະສະຖານ, ບັນດາມໍລະດົກວັດທະນະທຳ. ໃນຂະນະທີ່ບັນດາປູຊະນີຍະສະຖານ, ບັນດາ ມໍລະດົກວັດທະນະທຳໄດ້ຮັບການບຸລະນະປະຕິສັງຂອນ, ອະນຸລັກຮັກສານັ້ນ, ການຂະຫຍາຍຈັດຕັ້ງງານ Festival ຈະຖືກຍູ້ແຮງ ແລະ ລັກສະນະຈຶ່ງໄດ້ຮັບການຖືເປັນສຳຄັນ. ໃນໄລຍະກ່ວາ 10 ປີທີ່ຜ່ານມາ, ພວກຂ້າພະເຈົ້າໄດ້ຜັນຂະຫຍາຍວຽກງານນີ້, ລະອຽດແມ່ນພວກຂ້າພະເຈົ້າໄດ້ຍົກຍ້າຍໂຮງງານໃຫຍ່ 15 ແຫ່ງອອກຈາກນະຄອນເຫ້ວ. ສິ່ງນີ້ໄດ້ສະແດງໃຫ້ເຫັນຄວາມຕັດສິນໃຈປົກປັກຮັກສາບັນດາຊັບສົມບັດດ້ານວັດທະນະທຳຢ່າງແຂງແຮງ. ນອກຈາກນັ້ນ, ມີຫຼາຍຄອບຄົວຊາວນະຄອນເຫ້ວ ກໍມີຄວາມສະໝັກໃຈຍົກຍ້າຍບ່ອນຢູ່ໄປແຫ່ງອື່ນເພື່ອປົກປັກຮັກສາບັນດາມໍລະດົກ. ນີ້ແມ່ນການກະທຳທີ່ເປັນໜ້າເຄົາລົບນັບຖື ”
ບັນດາທຳນອງດົນຕີໃນພະລາດຊະວັງເຫ້ວ ທີ່ພວກເພື່ອນຫາກໍຮັບຟັງຜ່ານໄປ ແມ່ນໜຶ່ງໃນບັນດາສັນຍາລັກວັດທະນະທຳທີ່ເປັນເອກະລັກທີ່ສຸດຂອງເຂດດິນກຸງເກົ່າເຫ້ວ. ທີ່ງານ Festival ເຫ້ວ 2012 ທີ່ຜ່ານມາ, ອີກເທື່ອໜຶ່ງ ດົນຕີໃນພະລາດຊະວັງເຫ້ວໄດ້ຮັບການເຊີດຊູໃນງານບຸນ “ ລອງເຮືອຄົ້ນຫາແມ່ນ້ຳເຮືອງ ” ແລະ “ ຄ່ຳຄືນພະລາດຊະວັງ ” ແນໃສ່ນຳເອົາປະເພດສິລະປະທີ່ເຄີຍຮັບໃຊ້ພຽງຢູ່ໃນພະລາດຊະວັງເກົ່າເທົ່ານັ້ນ ມາແນະນຳສູ່ມວນຊົນຢ່າງກ້ວາງຂວາງ. ນອກຈາກນັ້ນ, ເພື່ອແນໃສ່ອະນຸລັກຮັກສາ ແລະ ເສີມຂະຫຍາຍຄຸນຄ່າຂອງ ດົນຕີໃນພະລາດຊະວັງເຫ້ວ ນັ້ນ, ປະຈຸບັນ ແຂວງເທື່ອທຽນເຫ້ວພວມສຸມໃສ່ປະຕິບັດຫຼາຍໂຄງການທີ່ມີສວ່ນກ່ຽວຂ້ອງເຖິງ ດົນຕີໃນພະລາດຊະວັງເຫ້ວ ຄື: ຄົ້ນຄ້ວາກໍ່ສ້າງສູນກາງວັດທະນະທຳບໍ່ມີຮູບຮ່າງເຂດເຫ້ວ, ປັບປຸງ ແລະ ພັດທະນາກ່ຽວກັບພື້ນຖານດ້ານວັດຖຸ ແລະ ນັກສະແດງໃຫ້ແກ່ໂຮງລະຄອນສິລະປະພື້ນເມືອງ ພະລາດຊະວັງເຫ້ວ ເພື່ອກາຍເປັນສູນຈັດຕັ້ງລາຍການສະແດງສິລະປະພື້ນເມືອງ ພະລາດຊະວັງຢູ່ຫວຽດນາມ, ກ້າວໄປເຖິງຈັດຕັ້ງບັນດາລາຍການແລກປ່ຽນສະແດງສິລະປະສາກົນລະຫວ່າງ ສິລະປະດົນຕີໃນພະລາດຊະວັງເຫ້ວກັບ ສິລະປະ ການສະແດງໃນພະລາດຊະວັງຂອງບາງປະເທດໃນພາກພື້ນຄື ສ.ເກົາຫຼີ, ຍີປຸ່ນ.
ທ່ານ Ngo Hoa ຮອງປະທານຄະນະກຳມະການປະຊາຊົນ ແຂວງເທື່ອທຽນເຫ້ວ ໃຫ້ຮູ້ວ່າ :
“ ນັບແຕ່ປີ 2013 , ດົນຕີໃນພະລາດຊະວັງເຫ້ວໄດ້ຮັບການອຸປະຖຳຈາກລັດຖະບານຍີປຸ່ນໂດຍຜ່ານອົງການ UNESCO ປະຈຳຫວຽດນາມ ແລະ ພວກຂ້າພະເຈົ້າໄດ້ຜັນຂະຫຍາຍບາງໂຄງການບຳລຸງສ້າງກ່ຽວກັບ ດົນຕີໃນພະລາດຊະວັງ. ໂຄງການນີ້ໄດ້ຮັບການຕີລາຄາສູງຈາກ ອົງການ UNESCO ແລະ ນີ້ກໍແມ່ນໂຄງການທຳອິດທີ່ມີຄຸນນະພາບສູງເພື່ອສືບທອດ ແລະ ເສີມຂະຫຍາຍບັນດາຄຸນຄ່າຂອງ ມໍລະດົກວັດທະນະທຳທີ່ບໍ່ມີຮູບຮ່າງ. ພວກຂ້າພະເຈົ້າເຊື່ອໝັ້ນວ່າ ດົນຕີໃນພະລາດຊະວັງເຫ້ວຈະສືບຕໍ່ລົງເລິກເຂົ້າສູ່ຊີວິດວັດທະນະທຳຈິດໃຈບໍ່ພຽງແຕ່ຂອງຊາວເຫ້ວເທົ່ານັ້ນຫາກຍັງຂອງຊາວຫວຽດນາມກໍຄືຊາວໂລກ ອີກດ້ວຍ ”
ໃນໄລຍະທີ່ຜ່ານມາ, ສູນອະນຸລັກຮັກສາ ປູຊະນີຍະສະຖານກຸງເກົ່າເຫ້ວໄດ້ລົງສຳຫຼວດຕົວຈິງຢູ່ແຫ່ງຕ່າງໆໃນນະຄອນເຫ້ວ ແລະ ເຂດອ້ອມຂ້າງ, ໄດ້ມີໂອກາດພົບປະໂອ້ລົມກັບນັກສິລະປິນ, ນັກສິລະປະກຳ ຊຶ່ງກ່ອນນີ້ໄດ້ມີໄລຍະຮັບໃຊ້ ແລະ ເຮັດວຽກຢູ່ໃນພະລາດຊະວັງເຫ້ວສະໄໝລາດຊະວົງຫງວຽນ ອົງສຸດທ້າຍ. ມີເອກະສານທີ່ລ້ຳຄ່າຫຼາຍຢ່າງກ່ຽວກັບສິລະປະ ດົນຕີໃນພະລາດຊະວັງ, ຂັບຕວງ, ແລະ ຝ້ອນໃນພະລາດຊະວັງໄດ້ຖືກເກັບຮັກສາໄວ້. ບົນພື້ນຖານນັ້ນ, ຈຸຄົ້ນຄ້ວາໄດ້ລວບລວມ, ຈັດແບ່ງປະເພດ ແລະ ສ້າງເປັນຊຸດສຳເນົາວິທະຍາສາດ. ມາຮອດປະຈຸບັນ, ຊຸດສຳເນົາວິທະຍາສາດນີ້ລວມມີ 250 ໜ້າເຈ້ຍ, ຊຶ່ງແນະນຳກ່ຽວກັບພາລະກິດຂອງບັນດາ ນັກສິລະປິນ, ນັກສິລະປະກຳ ແລະ ບັນທຶກບັນດາບົດເພງທີ່ເຂົາເຈົ້າສະແດງ ແລະ ອື່ນໆ
ດ້ວຍບັນດາຄວາມມານະພະຍາຍາມໃນການປົກປັກຮັກສາ ແລະ ເສີມຂະຫຍາຍຄຸນຄ່າບັນດາ ມໍລະດົກທີ່ມີຮູບຮ່າງ ແລະ ບໍ່ມີຮູບຮ່າງໃນຍຸກປະຈຸບັນ, ງານ Festival ແຕ່ລະຄັ້ງຍິ່ງເປັນການຢັ້ງຢືນທີ່ຕັ້ງບົດບາດ ແລະ ເຄື່ອງໝາຍຂອງກຸງເກົ່າເຫ້ວທີ່ມີມານັບພັນປີໃນຈິດໃຈແຂກທ່ອງທ່ຽວທັງຢູ່ພາຍໃນ ແລະ ຕ່າງປະເທດ.