ແຂວງດ້ຽນບຽນ ມານະພະຍາຍາມ ອະນຸລັກຮັກສາ ເສີມຂະຫຍາຍຄຸນຄ່າວັດທະນະທຳບໍ່ເປັນວັດຖຸ
Thu Hoa -
(VOVWORLD) -ແຂວງດ້ຽນບຽນຫາກໍມີມໍລະດົກວັດທະນະທໍາບໍ່ເປັນວັດຖຸລະດັບຊາດ ສອງຢ່າງ ນັ້ນແມ່ນບຸນຫົດນໍ້າຂອງພໍ່ແມ່ພີ່ນ້ອງຊາວເຜົ່າລາວຢູ່ບ້ານນາຮາງ 1, ຕາແສງນົວງາມ ເມືອງດ້ຽນບຽນ ແລະ ສິລະປະສ້າງລວດລາຍໃນຊຸດອາພອນປະຈໍາເຜົ່າຂອງຊາວມົ້ງ ຢູ່ ຕາແສງຊາລົງ ເມືອງເມື່ອງຈ່າ. ນີ້ແມ່ນໝາກຜົນຂອງຄວາມມານະພະຍາຍາມອະນຸລັກຮັກສາ ແລະ ເສີມຂະຫຍາຍຄຸນຄ່າທາງວັດທະນະທໍາບໍ່ເປັນວັດຖຸ ຂອງອໍານາດການປົກຄອງ ແລະ ວົງຄະນະນາຍາດບັນດາເຜົ່າໃນແຂວງດ້ຽນບຽນ
 ພິທີປະກາດ ແລະມອບໃບຢັ້ງຢືນມໍລະດົກວັດທະນະທໍາບໍ່ເປັນວັດຖຸລະດັບຊາດ ສຳລັບບຸນຫົດນໍ້າຂອງຊາວເຜົ່າລາວຢູ່ບ້ານນາຮາງ 1, ຕາແສງນົວງາມ ເມືອງດ້ຽນບຽນ |
ໃນຊຸມວັນນີ້ ວົງຄະນະຍາດເຜົ່າລາວຢູ່ບ້ານນາຮາງ 1, ຕາແສງນົວງາມ ເມືອງດ້ຽນບຽນ ມີຄວາມເບີກບານມ່ວນຊື່ທີ່ສຸດ ເມື່ອກະຊວງວັດທະນະທໍາ, ກິລາ ແລະ ທ່ອງທ່ຽວຫວຽດນາມ ໄດ້ມອບໃບຢັ້ງຢືນຮັບຮອງບຸນຫົດນໍ້າແມ່ນມໍລະດົກວັດທະນະທໍາບໍ່ເປັນວັດຖຸລະດັບຊາດ. ເປັນອັນວ່າ ບັນດາຄວາມານະພະຍາຍາມຂອງພໍ່ແມ່ພີ່ນ້ອງ ໃນການອານຸລັກຮັກສາວັດທະນະທໍາພິເສດສະເພາະຂອງເຜົ່າຕົນຕໍ່ໜ້າການເຊື່ອມໂຍງຂອງວັດທະນະທໍາທັນສະໄໝໄດ້ຮັບການຕອບແທນ. ນາງເຫຼືອງຊາວໄມ ເຈົ້າພາບຂັ້ນຕອນຈັດພິທີກຳໃນບຸນຫົດນໍ້າ ບ້ານນາຮາງ 1 ໃຫ້ຮູ້ວ່າ:
“ມື້ນີ້ຊາວບ້ານນາຮາງມີຄວາມເອກອ້າງທະນົງໃຈທີ່ສຸດ ເພາະບຸນຫົດນໍ້າໄດ້ຮັບການຮັບຮອງແມ່ນມໍລະດົກວັດທະນະທໍາບໍ່ເປັນວັດຖຸລະດັບຊາດ. ທັງບ້ານມີຄວາມພາກພູມໃຈທີ່ສຸດ ພາກັນອອກເດີນລະຫຼິ້ນຢ່າງເບີກບານມ່ວນຊື່ນ. ໃນຊີວິດຂອງຂ້າພະເຈົ້າ ມື້ນີ້ແມ່ນມ່ວນຊື່ນທີ່ສຸດ. ບໍ່ພຽງແຕ່ໃນຊຸມວັນນີ້ເທົ່ານັ້ນ, ພວກຂ້າພະເຈົ້າຈະຕັດສິນໃຈພະຍາຍາມ ເສີມຂະຫຍາຍວັດທະນະທໍາທີ່ເປັນມູນເຊື້ອຂອງບັນດາເຜົ່າ ຖ່າຍທອດໃຫ້ລູກຫຼານລຸ່ນຄົນໃນອະນາຄົດ.”
ການອະນຸລັກຮັກສາ ເສີມຂະຫຍາຍວັດທະນະທໍາທີ່ເປັນມູນເຊື້ອຂອງບັນດາເຜົ່າໃນປັດຈຸບັນ ບໍ່ແມ່ນຄວາມມຸ່ງຫວັງຂອງ ສະເພາະບັນດາຜູ້ອາຍຸສູງໃນບ້ານເທົ່ານັ້ນ ຫາກຍັງໄດ້ກໍານົດແມ່ນຄວາມຮັບຜິດຊອບລວມຂອງວົງຄະນາຍາດ ອີກດ້ວຍ. ທ່ານນາງ ຟ້າມມິງເຈົາ ຫົວໜ້າຂະແໜງວັດທະນະທໍາ ເມືອງດ້ຽນບຽນໃຫ້ຮູ້ວ່າ:
“ພາຍຫຼັງທີ່ໄດ້ຮັບການຮັບຮອງແລ້ວ, ການອະນຸລັກຮັກສາ ກໍຕ້ອງຫຼີກເວັ້ນບັນດາສິ່ງທີ່ແຊກຊຶມ ທີ່ມີຮູບການວັດທະນະທໍາ ບໍ່ແມ່ນວັດທະນະທໍາຂອງຊົນເຜົ່າທ້ອງຖິ່ນ. ນີ້ແມ່ນບັນດາປັດໄຈທີ່ພວກຂ້າພະເຈົ້າສືບຕໍ່ຕ້ອງເອົາໃຈໃສ່ ແລະ ຕ້ອງກໍານົດທິດໃຫ້ແກ່ປະຊາຊົນໃນໄລຍະທີ່່ຈະມາເຖິງ. ເພື່ອສືບຕໍ່ຮັກສາ ແລະ ປະຕິບັດບັນດາທັດສະນະຊີ້ນໍາຢ່າງຖືກຕ້ອງຂອງພັກ ແລະ ລັດ”.
ມາຮອດປັດຈຸບັດ, ແຂວງດ້ຽນບຽນໄດ້ສໍາຫຼວດກວດຄືນບັນດາມໍລະດົກທີ່ພົ້ນເດັ່ນຂອງ 18 ຊົນເຜົ່າ ຄວນໄດ້ຮັບການອະນຸລັກຮັກສາໂດຍໄວ ແລະ ສະເໜີຮັບຮອງແມ່ນມໍລະດົກວັດທະນະທໍາບໍ່ເປັນວັດຖຸລະດັບຊາດເຊັ່ນ: ພິທີໄຫວ້ບູຊາບັນພະບຸລຸດ, ບຸນດອກໄມ້ຂອງຊົນເຜົ່າກົ໋ງ, ບຸນເຂົ້າໃໝ່ຂອງບັນດາເຜົ່າຮ່າຍີ່, ຊິງມູນ, ຊີລາ, ປາງຟອງ... ທາງແຂວງກໍໄດ້ສໍາເລັດການສົມທົບກັບສະຖາບັນດົນຕີ ຜັນຂະຫຍາຍ ການສ້າງສໍາເນົາເອກະສານ, ສິລະປະຟ້ອນແຊຂອງ ຊາວເຜົ່າພູໄທ ແຂວງດ້ຽນບຽນເພື່ອຍື່ນສະເໜີຕໍ່ UNESCO ຮັບຮອງມໍລະດົກວັດທະນະທໍາບໍ່ເປັນວັດຖຸ ເປັນຕົວແທນຂອງມວນມະນຸດ. ທ່ານ ດ່າວງອກເລື້ອງ ຫົວໜ້າພະແນກວັດທະນະທໍາ ແລະ ກິລາ ແລະ ທ່ອງທ່ຽວແຂວງດ້ຽນບຽນໃຫ້ຮູ້ວ່າ:
“ພໍ່ແມ່ພີ່ນ້ອງຫຼາຍຄົນໃນປັດຈຸບັນບໍ່ສາມາດຮັກສາສີສັນຂອງຊົນເຜົ່າໄດ້. ເມື່ອຄົ້ນຄວ້າໃນແຕ່ລະເທື່ອກ່ຽວກັບວັດທະນະທໍາແມ່ນຕ້ອງເສຍເວລາຫຼາຍ ແລະ ຕ້ອງຊອກຫາກ່ຽວກັບວັດຖຸເອກະສານຫຼາຍຢ່າງ ເພື່ອສາມາດສ້າງກົກເຄົ້າໃຫ້ເປັນຮູບປະທໍາ ນັ້ນແມ່ນການຂະຫຍາຍຕົວຜ່ານແຕ່ລະໄລຍະຂອງແຕ່ລະເຜົ່າ.”
ເລື່ອງສອງມໍລະດົກ ເມື່ອມໍ່ໆມານີ້ໄດ້ຮັບການຮັບຮອງກໍແມ່ນສັນຍານທີ່ດີໃນເບື້ອງຕົ້ນ ເຊິ່ງໄດ້ຮັບຮູ້ຄວາມພະຍາຍາມຂອງອໍານາດການປົກຄອງ ແລະ ປະຊາຊົນບັນດາເຜົ່າໃນແຂວງດ້ຽນບຽນໃນການອະນຸລັກຮັກສາ ເສີມຂະຫຍາຍສິ່ງຍອດຍິ່ງທາງດ້ານວັດທະນະທໍາຂອງຊົນເຜົ່າ ອັນໄດ້ສ້າງໂສມໜ້າຂອງແຂວງເຂດພູດອຍທາງທິດຕາເວັນຕົກສຽງເໜືອໃຫ້ມີຄວາມອຸດົມສົມບູນໃນຊີວິດວັດທະນະທໍາ.
Thu Hoa