ເຂດປູຊະນີຍະສະຖານກຳແພງລາດຊະວົງໂຮ່ ທີ່ເມືອງວິ້ງໂລກ, ແຂວງແທງຮ້ວາ
(ພາບ : baothanhhoa)
|
ກຳແພງລາດຊະວົງໂຮ່ ຊຶ່ງແມ່ນມໍລະດົກວັດທະນະທຳໂລກ ພວມກາຍເປັນ ສະຖານທີ່ທ່ອງທ່ຽວທີ່ດູດດື່ມ ສຳລັບແຂກທ່ອງທ່ຽວທັງຢູ່ພາຍໃນ ແລະ ຕ່າງປະ ເທດ. ແຕ່ພ້ອມກັບການພັດທະນາການທ່ອງທ່ຽວນັ້ນ, ການອະນຸລັກຮັກສາ ແລະ ເສີມຂະຫຍາຍບັນດາຄຸນຄ່າວັດທະນະທຳຂອງກິດຈະກຳສະຖາປັດຕະຍະກຳທີ່ ເປັນເອກະລັກສະເພາະ ແມ່ນວຽກງານທີ່ມີຄວາມໝາຍພິເສດສຳລັບປະຫວັດ ສາດຫວຽດນາມ ຊຶ່ງພວມແມ່ນບັນຫາທີ່ຈຳເປັນທີ່ສຸດ ທີ່ວາງອອກໃຫ້ແກ່ບັນດາຜູ້ເຮັດວຽກງານວັດທະນະທຳກໍຄືການທ່ອງທ່ຽວຂອງແຂວງແທງຮ້ວາ.
ໂດຍຖືກຕັ້ງຢູ່ຫ່່າງຈາກນະຄອນແທງຮ້ວາໄປທາງທິດຕາເວັນຕົກສ່ຽງເໜືອປະມານ 50 ກິໂລແມດ, ກຳແພງລາດຊະວົງໂຮ່ ແມ່ນກິດຈະກຳສະຖາປັດ ຕະຍະກຳທີ່ເປັນເອກະລັກສະເພາະຊຶ່ງໄດ້ຮັບການກໍ່ສ້າງໃນສະໄໝລາດຊະວົງໂຮ່ເມື່ອປີ 1397 ໃນເຂດທິວທັດທຳມະຊາດທີ່ສວຍສົດງົດງາມລະຫວ່າງ 2 ລຳແມ່ນ້ຳ ມ້າ ແລະ ແມ່ນ້ຳ ເບື່ອຍທີ່ຂຶ້ນກັບບໍລິເວັນເມືອງວິ້ງໂລກ. ລະບົບກຳແພງຖືກປຸກສ້າງດ້ວຍບັນດາໂງ່ນຫີນໃຫຍ່, ຊຶ່ງເປັນການສະແດງໃຫ້ເຫັນການພັດທະນາດ້ານເຕັກນິກສະຖາປັດຕະຍະກຳ ແລະ ການວາງແຜນຜັງເມືອງດ້ວຍລະດັບສູງຂອງຊາວຫວຽດນາມກ່ອນນີ້ 600 ປີ. ບັນດາໂງ່ນຫີນໃຫຍ່ ທີ່ມີນ້ຳໜັກ 20-30 ໂຕນຖືກຕັດເປັນສະເໝີດ້ວຍເຕັກນິກສູງ ແລະ ຖືກຕິດຕັ້ງກອງກັນດ້ວຍເຄື່ອງມືຢ່າງລະອຽດອ່ອນ, ມີລວງສູງກ່ວາ 10 ແມດ ອັນໄດ້ເຮັດໃຫ້ບັນດານັກວິທະຍາສາດທັງຢູ່ພາຍໃນ ແລະ ຕ່າງປະເທດມີຄວາມນິຍົມນັບຖືທີ່ສຸດ. ທີ່ກອງປະຊຸມສຳມະນາກ່ຽວກັບການອະນຸລັກຮັກສາ ແລະ ເສີມຂະຫຍາຍມໍລະດົກກຳແພງ ລາດຊະວົງໂຮ່ທີ່ຈັດຂຶ້ນເມື່ອບໍ່ດົນມານີ້, ມີຄຳຄິດຄຳເຫັນຫຼາຍຂໍ້ໄດ້ຖືວ່າ ຕ້ອງອະນຸລັກຮັກສາຄຸນຄ່າດັ້ງເດີມ, ບໍ່ຄວນເຮັດໃຫ້ຮູບຊົງຂອງປູຊະນີຍະສະຖານປ່ຽນແປງໄປ, ເພາະວ່າ ນີ້ແມ່ນຫຼັກການອະນຸລັກຮັກສາຄຸນຄ່າດັ້ງເດີມທີ່ມີຢູ່ແລ້ວຂອງ ປູຊະນີຍະສະຖານຕາມກົດໝາຍວ່າດ້ວຍມໍລະດົກ ແລະ ບັນດາຂໍ້ກຳນົດຂອງອົງການ UNESCO. ທ່ານ ໂຮ່ກວາງເຊີນ, ກຳມະການໃນຄະນະບໍລິຫານງານສູນກາງສະມາຄົມ ມໍລະດົກວັດທະນະທຳ ຫວຽດນາມ, ປະທານສະມາຄົມ ມໍລະດົກວັດທະນະທຳຫວຽດນາມສາຂາແຂວງ ແທງຮ້ວາ ໃຫ້ຮູ້ວ່າ :
“ ແທງຮ້ວາມີຄວາມເປັນກຽດຢ່າງຍິ່ງທີ່ມີມໍລະດົກວັດທະນະທຳໂລກ. ຍ້ອນເຫດນີ້ເອງ, ຄະນະກຳມະການປະຊາຊົນແຂວງ, ຂະແໜງການຂັ້ນຕ່າງໆ ແລະບັນດານັກລົງທຶນ ໄດ້ມີແຜນການອະນຸລັກຮັກສາ, ໂຄສະນາກ່ຽວກັບມໍລະດົກ ກຳແພງ ລາດຊະວົງໂຮ່ ໃຫ້ແກ່ແຂກທ່ອງທ່ຽວທັງຢູ່ພາຍໃນ ແລະ ຕ່າງປະເທດ ”
|
ລະບົບກຳແພງຖືກປຸກສ້າງດ້ວຍບັນດາໂງ່ນຫີນໃຫຍ່ ທີ່ມີນ້ຳໜັກ 20-30 ໂຕນຖືກຕັດເປັນສະເໝີ ແລະ ຖືກຕິດຕັ້ງກອງກັນດ້ວຍເຄື່ອງມືຢ່າງລະອຽດອ່ອນ
|
ຕາມທ່ານ ຢ້ວານວັນຟູ້ ຮອງຫົວໜ້າພະແນກວັດທະນະທຳ, ກິລາ ແລະ ທ່ອງທ່ຽວແຂວງແທງຮ້ວາແລ້ວ, ທາງພະແນກໄດ້ ແລະ ພວມເພີ່ມເຕີມ, ເປີດກ້ວາງ, ສ້າງແຜນກຳນົດສັງລວມບໍລິເວນກຳແພງ ລາດຊະວົງໂຮ່ ໃນຂອບເຂດເນື້ອທີ່ 5.000 ແຮັກຕາ; ພ້ອມກັນນັ້ນ ກໍເປັນເສນາທິການໃຫ້ແຂວງສຳຫຼວດຄົ້ນຄ້ວາດ້ານວັດທະນະທຳຂອງກຳແພງ ລາດຊະວົງໂຮ່, ລົງທຶນກໍ່ສ້າງພື້ນຖານໂຄງລ່າງ, ພັດທະນາການບໍລິການ, ເຊື່ອມຕໍ່ລະຫວ່າງກຳແພງ ລາດຊະວົງໂຮ່ ກັບເມືອງຫຼວງເກົ່າຕ່າງໆໂດຍຜ່ານບັນດາການເຄື່ອນໄຫວວັດທະນະທຳ, ລາຍການທ່ອງທ່ຽວ... ສ່ວນທ່ານ ຝ້າມວັນໄຈ້, ອະດີດປະທານຄະນະກຳມະການປະຊາຊົນເມືອງວິ້ງໂລກຖືວ່າໄປຄຽງຄູ່ກັບການອະນຸລັກຮັກສາບັນດາຄຸນຄ່າທີ່ດີເດັ່ນຂອງມໍລະດົກກຳແພງລາດຊະວົງໂຮ່ນັ້ນ, ຕ້ອງຍົກສູງການໂຄສະນາການທ່ອງທ່ຽວ ແລະ ມີການກະທຳທີ່ແທດຈິງເພື່ອປົວແປງຊີວິດການເປັນຢູ່ຂອງຊາວທ້ອງຖິ່ນໃຫ້ດີຂຶ້ນ . ທ່ານກ່າວວ່າ :
“ ນັບແຕ່ເວລາກຳແພງ ລາດຊະວົງໂຮ່ ໄດ້ຮັບການຮັບຮອງເປັນມໍລະດົກ ວັດທະນະທຳໂລກເປັນຕົ້ນມາ, ຊາວທ້ອງຖິ່ນມີຄວາມພາກພູມໃຈ ແລະ ເອກອ້າງທະນົງໃຈທີ່ສຸດຍ້ອນເປັນປະຊາຊົນຂອງເຂດມໍລະດົກ. ຍ້ອນເຫດນີ້ເອງ, ຊາວທ້ອງຖິ່ນແຕ່ລະຄົນຕ່າງກໍມີສະຕິຄວາມຮັບຜິດຊອບໃນການປົກປັກຮັກສາ ແລະ ບູລະນະປະຕິສັງຂອນປູຊະນີຍະສະຖານ. ມີຫຼາຍຄົນໄດ້ສະໝັກໃຈບໍລິຈາກທີ່ດິນເພື່ອຮັບໃຊ້ການບຸກເບີກພື້ນທີ່, ກໍ່ສ້າງທາງອ້ອມແອ້ມເຂດມໍລະດົກ ກໍ່ຄືກໍ່ສ້າງກຳແພງເພື່ອປົກປັກຮັກສາ ”
ທ່ານ ໂດ້ກວາງຈ້ອງ ຜູ້ອຳນວຍການສູນອະນຸລັກຮັກສາມໍລະດົກກຳແພງ ລາດຊະວົງໂຮ່ ໃຫ້ຮູ້ວ່າ ພາຍຫຼັງພິທີຮັບໃບຢັ້ງຢືນມໍລະດົກວັດທະນະທຳໂລກ, ຈຳນວນແຂກທ່ອງທ່ຽວເຂົ້າມາຢ້ຽມຊົມ, ທັດສະນະສຶກສາຢູ່ເຂດປູຊະນີ ຍະສະຖານກຳແພງ ລາດຊະວົງໂຮ່ ໄດ້ເພີ່ມຂຶ້ນທົບ 3 ເທົ່າເມື່ອທຽບໃສ່ໄລຍະດຽວກັນຂອງປີກາຍ. ພ້ອມກັນນັ້ນ, ວຽກງານແນະນຳ,ໂຄສະນາກ່ຽວກັບບັນດາຄຸນຄ່າວັດທະນະທຳທີ່ເປັນເອກະລັກສະເພາະຂອງກຳແພງ ລາດຊະວົງໂຮ່ ໃຫ້ແກ່ແຂກທ່ອງທ່ຽວທັງຢູ່ພາຍໃນ ແລະ ຕ່າງປະເທດ ກໍໄດ້ຮັບຄວາມເອົາໃຈໃສ່ເປັນພິເສດ, ດັ່ງນັ້ນມີແຂກທ່ອງທ່ຽວເຂົ້າມາຢ້ຽມຊົມ, ທັດສະນະສຶກສາຢູ່ເຂດມໍລະດົກກຳແພງ ລາດຊະວົງໂຮ່ ນັບມື້ນັບຫຼາຍຂຶ້ນ. ທ່ານ ໂດ້ກວາງຈ້ອງ ຜູ້ອຳນວຍການສູນອະນຸລັກຮັກສາມໍລະດົກກຳແພງລາດຊະວົງໂຮ່ເວົ້າວ່າ:
“ ໃນຍາວນານ, ພວກຂ້າພະເຈົ້າຈະຜູກຮັດບັນດາຄຸນຄ່າວັດທະນະທຳມໍລະດົກກັບການທ່ອງທ່ຽວ , ພ້ອມທັງໂຄສະນາໃຫ້ທຸກໆຄົນຮັບຊາບ. ທາງສູນ ແລະ ພະແນກວັດທະນະທຳ, ກິລາ ແລະ ທ່ອງທ່ຽວແຂວງແທງຮ້ວາ ພວມຜັນຂະຫຍາຍບັນດາແຜນການຕາມແຜນຮ່າງພັດທະນາການທ່ອງທ່ຽວຂອງແຂວງ. ນອກຈາກນັ້ນ, ຍ້ອນກຳແພງ ລາດຊະວົງໂຮ່ ຍັງມີວັດຖຸເຄື່ອງຂອງຫຼາຍຢ່າງພວມຝັງໃຕ້ດິນ, ດັ່ງນັ້ນກໍຕ້ອງການມີເວລາເພື່ອຊອກຄົ້ນຫາ, ເພາະສະນັ້ນ, ພວກຂ້າພະເຈົ້າຈະສຸມໃສ່ ອະນຸລັກຮັກສາເພື່ອເສີມຂະຫຍາຍບັນດາຄຸນຄ່າ ຂອງເຂດ ປູຊະນີຍະສະຖານ ”
ເລື່ອງໄດ້ຮັບການເຊີດຊູເປັນມໍລະດົກວັດທະນະທຳໂລກ ກໍເປັນການຍາກແລ້ວ, ແຕ່ການ ອະນຸລັກຮັກສາມໍລະດົກພາຍຫຼັງທີ່ໄດ້ຮັບການເຊີດຊູເພື່ອໃຫ້ຄຸນຄ່າຂອງມໍລະດົກນັ້ນແຜ່ລາມໃນວົງຄະນະຍາດນັ້ນ ກໍແມ່ນເລື່ອງຍາວນານ ແລະ ຍາກຫຼາຍກ່ວາ. ດ້ວຍຄວາມມານະພະຍາຍາມຂອງອຳນາດການປົກຄອງ ແລະ ປະຊາຊົນ ພ້ອມກັບການຊ່ວຍເຫຼືອຈາກອົງການ UNESCO ນັ້ນ, ກຳແພງ ລາດຊະວົງໂຮ່ ຈະບໍ່ພຽງແຕ່ໄດ້ຮັບການອະນຸລັກຮັກສາຄຸນຄ່າດັ້ງເດີມເທົ່ານັ້ນ, ຫາກຍັງກາຍເປັນສະຖານທີ່ທ່ອງທ່ຽວທີ່ດູດດື່ມຢູ່ແຂວງແທງຮ້ວາອີກດ້ວຍ.