10 ເຫດການທີ່ພົ້ນເດັ່ນຂອງໂລກໃນປີ 2012

ວັນເສົາ ທີ 29 ທັນວາ ຄ.ສ. 2012 | 17:36:04

ເຫດການທີ 1. ປີ 2012 ແມ່ນປີແຫ່ງການເລືອກຕັ້ງ ແລະ ມອບໂອນສິດອຳນາດຢູ່ບັນດາປະເທດໃຫຍ່ໃນໂລກ.

10 ເຫດການທີ່ພົ້ນເດັ່ນຂອງໂລກໃນປີ 2012 - ảnh 1

ປີ 2012 ແມ່ນປີແຫ່ງການເລືອກຕັ້ງ ແລະ ມອບໂອນສິດອຳນາດ

ລັດເຊຍ ໄດ້ດຳເນີນການມອບໂອນສິດອຳນາດປະທານາທິບໍດີ ລະຫວ່າງທ່ານ Putin ແລະ ທ່ານ Medvedev. ທ່ານນາຍົກລັດຖະມົນຕີ Vladimia Putin ກາຍເປັນປະທານາທິບໍດີ ພາຍຫລັງການເລືອກຕັ້ງປະທານາທິບໍດີ ເຊິ່ງຈັດຂຶ້ນເມື່ອວັນທີ 4/3/2012. ສ່ວນຢູ່ ຝລັ່ງ, ພາຍຫລັງ 17 ປີ, ສິດອຳນາດໄດ້ຖືກມອບໂອນຈາກຝ່າຍຂວາໃຫ້ແກ່ຝ່າຍຊ້າຍ ດ້ວຍໄຊຊະນະຂອງທ່ານ Francois Hollande ຜູ້ອອກສະໝັກຮັບເລືອກຕັ້ງທີ່ຂຶ້ນກັບພັກສັງຄົມ. ຢູ່ ອາເມລິກາ, ປະທານາທິບໍດີ ອາເມລິກາ Barack Obama ຍາດໄດ້ໄຊຊະນະຂາດຂັ້ນ ຕໍ່ຜູ້ອອກສະໝັກຮັບເລືອກຕັ້ງພັກສາທາລະນະລັດ Mitt Romney ເພື່ອສືບຕໍ່ດຳລົງຕຳແຫນ່ງເປັນປະທານາທິບໍດີອີກສະໄຫມຫນຶ່ງ. ຢູ່ ຈີນ, ກອງປະຊຸມໃຫຍ່ຄັ້ງທີ 18 ຂອງພັກກອມມູນິດ ຈີນ ເປັນຂີດໝາຍແຫ່ງການມອບໂອນສິດອຳນາດຈາກການນຳລຸ້ນທີ 4 ໃຫ້ແກ່ລຸ້ນທີ 5. ທ່ານຮອງປະທານ ສີຈິ້ນຜິງ ໄດ້ຮັບການເລືອກຕັ້ງເປັນເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຈີນ ແລະ ເປັນປະທານຄະນະພັກການທະຫານສູນກາງ. ສ່ວນຢູ່ ຍີ່ປຸ່ນ, ການເລືອກຕັ້ງສະພາຕຳ່ໄດ້ສິ້ນສຸດລົງດ້ວຍໄຊຊະນະຂອງພັກປະຊາທິປະໄຕເສລີ (LDP) ຝ່າຍຄ້ານຂອງອະດີດນາຍົກລັດຖະມົນຕີ Shinzo Abe ໄດ້ນຳພັກນີ້ຂຶ້ນກຳອຳນາດພາຍຫລັງ 3 ປີ ຖືກໂຈະໄວ້ ແລະ ນຳທ່ານ Shinzo Abe ດຳລົງຕຳແຫນ່ງເປັນນາຍົກລັດຖະມົນຕີຍີ່ປຸ່ນຄືນໃໝ່.

ເຫດການທີ 2. ການພິພາດອະທິປະໄຕທະເລ ແລະ ໝູ່ເກາະ ຢູ່ ອາຊີ ປາຊີຟີກ

10 ເຫດການທີ່ພົ້ນເດັ່ນຂອງໂລກໃນປີ 2012 - ảnh 2

ການພິພາດອະທິປະໄຕທະເລ ແລະ ໝູ່ເກາະ ຢູ່ ອາຊີ ປາຊີຟີກແມ່ນບັນຫາເຮັ່ງຮ້ອນໃນປີ 2012

ການພິພາດອະທິປະໄຕຢູ່ເກາະ Senkaku ລະຫວ່າງ ຍີ່ປຸ່ນ ແລະ ຈີນ, ຢູ່ເກາະ Dokdo/Takashema ລະຫວ່າງ ສເກົາຫລີ ແລະ ຍີ່ປຸ່ນ, ພິເສດການຖົກຖຽງກັນທີ່ກ່ຽວກັບເຖິງອະທິປະໄຕຢູ່ທະເລຕາເວັນອອກ ລະຫວ່າງ ຈີນ ແລະ ປະເທດຈຳນວນຫນຶ່ງໃນພາກພື້ນ ອາຊີຕາເວັນອອກສຽງໃຕ້ ໄດ້ກາຍເປັນບັນຫາເຄັ່ງຮ້ອນໃນບັນດາເວທີປາໄສສາກົນປີ 2012. ລັດຖະມົນຕີການຕ່າງປະເທດ ບັນດາປະເທດ ອາຊຽນ ບັນລຸໄດ້ຖະແຫລງການກ່ຽວກັບຫລັກການ 6 ຂໍ້ ກ່ຽວກັບທະເລຕາເວັນອອກ, ໃນນັ້ນໄດ້ຢືນຢັນວ່າ: ບັນດາປະເທດສະມາຊິກປະຕິບັດຖະແຫລງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ຢ່າງຄົບຖ້ວນ, ບັນລຸຂໍ້ກຳນົດການປະພຶດຢູ່ທະເລຕາເວັນອອກ (COC) ໂດຍໄວ, ແກ້ໄຂບັນດາການພິພາດໂດຍສັນຕິວິທີ ບົນພື້ນຖານບັນດາຫລັກການພື້ນຖານຂອງກົດໝາຍສາກົນ, ໃນນັ້ນມີສົນທິສັນຍາ ສປຊ ກ່ຽວກັບກົດໝາຍວ່າດ້ວຍທະເລປີ 1982.

ເຫດການທີ 3. ອາຊີ ປາຊີຟິກ - ຈຸດສຸມດ້ານຍຸດທະສາດຂອງຫລາຍປະເທດ

10 ເຫດການທີ່ພົ້ນເດັ່ນຂອງໂລກໃນປີ 2012 - ảnh 3

ທ່ານ Barack Obama ໄດ້ເລືອກເຟັ້ນສອງປະເທດຢູ່ ອາຊີຕາເວັນອອກສຽງໃຕ້ເພື່ອດຳເນີນການຢ້ຽມຢາມຕ່າງປະເທດ

ອຳນາດການປົກຄອງ ອາເມລິກາ ໄດ້ຫັນຈຸດສຸມດ້ານຍຸດທະສາດໄປຍັງ ອາຊີ ປາຊີຟິກ ດ້ວຍການສົ່ງກຳລັງກອງທັບເຮືອ, ກອງທັບອາກາດ ແລະ ທະຫານບົກໄປຍັງເຂດນີ້. ພາຍຫລັງໄດ້ຮັບເລືອກຕັ້ງເປັນປະທານາທິບໍດີ ອາເມລິກາ ອີກສະໄຫມຫນຶ່ງ, ທ່ານ Barack Obama ໄດ້ເລືອກເຟັ້ນສອງປະເທດຢູ່ ອາຊີຕາເວັນອອກສຽງໃຕ້ເພື່ອດຳເນີນການຢ້ຽມຢາມຕ່າງປະເທດຄັ້ງທຳອິດ ນັ້ນແມ່ນ ໄທ ແລະ ມ້ຽນມາ. ສ່ວນເອີລົບ ກໍພວມຫັນນະໂຍບາຍມຸ່ງໄປເຖິງພາກພື້ນ ອາຊີ. ບັນດາການນຳຄົນສຳຄັນຂອງເອີລົບ ກໍໄດ້ພາກັນໄປຍັງ ສປປ ລາວ ເພື່ອເຂົ້າຮ່ວມກອງປະຊຸມ ອາຊີ ເອີລົບ ຄັ້ງທີ 9 (ASEM 9). ສ່ວນ ສະຫະພາບເອີລົບ (ອີຢູ) ພວມເລີ່ມຕົ້ນເປີດກວ້າງເຄືອຂ່າຍສັນຍາການຄ້າເສລີ FTA ຂອງເຂົາເຈົ້າຢູ່ ອາຊີ.

ເຫດການທີ 4. ເສິກກາງເມືອງ ຢູ່ ຊີຣີ ໄດ້ນາບຂູ່ຄວາມສະຫງົບປອດໄພຢູ່ພາກພື້ນຢ່າງຮ້າຍແຮງ ແລະ ສືບຕໍ່ກໍ່ຄວາມບໍ່ລົງລອຍກັນລະຫວ່າງບັນດາປະເທດມະຫາອຳນາດ.

10 ເຫດການທີ່ພົ້ນເດັ່ນຂອງໂລກໃນປີ 2012 - ảnh 4

ເສິກກາງເມືອງ ຢູ່ ຊີຣີ ໄດ້ນາບຂູ່ຄວາມສະຫງົບປອດໄພຢູ່ພາກພື້ນ

ເສິກກາງເມືອງເກີດຂຶ້ນຢ່າງຮ້າຍແຮງລະຫວ່າງ ບັນດາກຳລັງຝ່າຍຄ້ານ ແລະ ກຳລັງຂອງປະທານາທິບໍດີ Bashar al Assad ຢູ່ ຊີຣີ. ໄລ່ມາຮອດທ້າຍປີ 2012 ມີກວ່າ 37.000 ຄົນຖືກເສຍຊີວິດ. ການປະທະກັນບໍ່ພຽງແຕ່ເກີດຂຶ້ນພາຍໃນ ຊີຣີ ເທົ່ານັ້ນ ຫາກຍັງເຮັດໃຫ້ການສູ້ຢັນ ລະຫວ່າງ ຊີຣີ ແລະ ຕວກກີ ແຜ່ລາມອອກສູ່ ລີບັງອີກດ້ວຍ. ອີກຄັ້ງຫນຶ່ງ ວິກິດການຢູ່ ຊີຣີ ໄດ້ສະແດງໃຫ້ເຫັນຄວາມບໍ່ລົງລອຍກັນລະຫວ່າງບັນດາປະເທດມະຫາອຳນາດໃນໂລກ. ລັດເຊຍ ແລະ ຈີນ ດ້ວຍຖານະເປັນກຳມະການບໍ່ປະຈຳຂອງສະພາຄວາມໝັ້ນຄົງ ສປຊ ໃນປີ 2012 ໄດ້ນຳໃຊ້ສິດຢັບຢັ້ງເປັນສອງຄັ້ງເພື່ອຄັດຄ້ານບັນດາຮ່າງມະຕິລົງໂທດ Damascus.

ເຫດການທີ 5. ສະຫະພາບເອີລົບ (ອີຢູ) ເກີດຄວາມບໍ່ລົງລອຍກັນພາຍໃນ, ອິດທິພົນຖືກຊຸດໂຊມ, ພາກພື້ນນຳໃຊ້ສະກຸນເງິນໂອໂຣ ຕົກເຂົ້າສຸູ່ສະພາບລົ້ມລະລາຍຄັ້ງທີ 2.

10 ເຫດການທີ່ພົ້ນເດັ່ນຂອງໂລກໃນປີ 2012 - ảnh 5

ພາກພື້ນນຳໃຊ້ສະກຸນເງິນໂອໂຣ ຕົກເຂົ້າສຸູ່ສະພາບລົ້ມລະລາຍຄັ້ງທີ 2

ອີຢູ ເກີດຄວາມບໍ່ລົງລອຍກັນກ່ຽວຂ້ອງເຖິງງົບປະມານລວມ ແລະ ບັນດາເງື່ອນໄຂກູ້ຊ່ວຍສຳລັບບັນດາປະເທດຕົກເຂົ້າສູ່ວິກິດການຫນີ້ສາທາລະນະຢ່າງຮ້າຍແຮງ. ຍິ່ງກວ່ານັ້ນ ພື້ນຖານເສດຖະກິດພາກພື້ນນຳໃຊ້ສະກຸນເງິນ ເອີໂຣ ບໍ່ພຽງແຕ່ບໍ່ສາມາດຊອກຫາມາດຕະການແກ້ໄຂໄດ້ເທົ່ານັ້ນ ຫາກຍັງຕົກເຂົ້າສູ່ກສະພາບລົ້ມລະລາຍເປັນຄັ້ງທີ 2 ອີກດ້ວຍ, ດ້ວຍ GDP ຂອງ 17 ປະເທດ ສະມາຊິກຖືກຊຸດໂຊມຢ່າງລຽນຕິດໃນຊຸມເດືອນທ້າຍປີ ແລະ ຄາດວ່າຍັງຈະຮ້າຍແຮງກວ່າໃນໄລຍະຈະມາເຖິງ.

ເຫດການທີ 6. ປາແລດສະຕີນ ກາຍເປັນລັດສັງເກດການຂອງສະຫະປະຊາຊາດ

10 ເຫດການທີ່ພົ້ນເດັ່ນຂອງໂລກໃນປີ 2012 - ảnh 6

ຊາວປາແລດສະຕີນ ມີຄວາມປິຕິຊົມຊື່ນຕໍ່ເຫດການປາແລດສະຕີນ ກາຍເປັນລັດສັງເກດການຂອງສະຫະປະຊາຊາດ

ດ້ວຍບັດເຫັນດີ 138 ບັດ, ບັດຂາວ 41 ແລະ ບັດຄ້ານ 9 ບັດ, ວັນທີ 30/11/2012, ສະມັດຊາໃຫຍ່ ສປຊ ໄດ້ຮັບຮອງເອົາມະຕິປັບປຸງຂໍ້ກຳນົດໃຫ້ແກ່ ປາແລດສະຕີນ ຈາກອົງການສັງເກດການຂຶ້ນເປັນລັດສັງເກດການ. ນີ້ໄດ້ຮັບຖືວ່າແມ່ນໄຊຊະນະທາງການທູດທີ່ສຳຄັນຂອງ ປາແລດສະຕີນ. ເຖິງວ່າ ຍັງປະເຊີນຫນ້າກັບສິ່ງທ້າທາຍຫລາຍຢ່າງຈາກຝ່າຍ ອິດສະຣາແອນ, ແຕ່ ປາແລດສະຕີນ ສາມາດເຂົ້າຮ່ວມບັນດາອົງການສາກົນທີ່ມີອິດທິພົນໃຫຍ່ຄື: ອົງການການຄ້າໂລກ, ອົງການອະນາໄມໂລກ, ທະນາຄານໂລກ ແລະ ສານອາຍາສາກົນ… ສ້າງພື້ນຖານໃຫ້ແກ່ ປາແລດສະຕີນ ປົກປັກຮັກສາ ແລະ ປະຕິບັດຜົນປະໂຫຍດອັນຊອບທຳຂອງຕົນ.

ເຫດການທີ 7. ແຫລມເກົາຫລີ ເຄັ່ງຮ້ອນຂຶ້ນຈາກບັນດາກໍລະນີຍິງດາວທຽມຂອງ ສປປ ເກົາຫລີ

10 ເຫດການທີ່ພົ້ນເດັ່ນຂອງໂລກໃນປີ 2012 - ảnh 7

ຜູ້ນຳ ສປປ ເກົາຫລີ ຕິດຕາມການຍິງລູກສອນໄຟ

ປີ 2012, ສປປ ເກົາຫລີ ໄດ້ຍິງລູກສອນໄຟສົ່ງດາວທຽມຂຶ້ນວົງໂຄຈອນ. ພາຍຫລັງການຍິງໃນຄັ້ງທຳອິດເມື່ອເດືອນ 4 ບໍ່ສຳເລັດຜົນ, ວັນທີ 12/12 ສປປ ເກົາຫລີ ຍິງດາວທຽມ Kwangmyongsong 3 ສຳເລັດຜົນ. ສະພາຄວາມໝັ້ນຄົງ ສປຊ ໄດ້ຈັດການປະຊຸມດ່ວນ ແລະ ອອກຖະແຫລງການກ່າວປະນາມເຫດການຍິງລູກສອນໄຟຂອງ ສປປ ເກົາຫລີ ແລະ ຖືວ່າ ເຫດການຍິງລູກສອນໄຟດັ່ງກ່າວຂອງ ສປປ ເກົາຫລີ ແມ່ນລະເມີດບັນດາມະຕິເລກທີ 1718 ແລະ 1874 ຂອງສະພາຄວາມໝັ້ນຄົງ ສປຊ.

ເຫດການທີ 8. ເຫດການຍິງປືນເຮັດໃຫ້ຫລາຍຄົນເສຍຊີວິດ ແລະ ບັນຫາກຳມະສິດປືນຖືກນຳມາປຶກສາ ຫາລືຢູ່ ອາເມລິກາ.

10 ເຫດການທີ່ພົ້ນເດັ່ນຂອງໂລກໃນປີ 2012 - ảnh 8

ເຫດການຍິງປືນຢູ່ໂຮງສາຍຟິມຮູບເງົາຢູ່ລັດ Colorado ເຮັດໃຫ້ 12 ຄົນເສຍຊີວິດ ແລະ ສີບຄົນຖືກບາດເຈັບ

ເຫດການຍິງປືນຢູ່ໂຮງຮຽນປະຖົມ Sandy Hook ນະຄອນ Newtown ລັດ Connecticut ຂອງອາເມລິກາ ເມື່ອວັນທີ 14/12 ໄດ້ເຮັດໃຫ້ 26 ຄົນເສຍຊີວິດ. ກ່ອນຫນ້ານັ້ນ ເມື່ອເດືອນ 7/2012, ໄດ້ເກີດເຫດການຍິງປືນຢູ່ໂຮງສາຍຟິມຮູບເງົາຢູ່ລັດ Colorado ເຮັດໃຫ້ 12 ຄົນເສຍຊີວິດ ແລະ ສີບຄົນຖືກບາດເຈັບ. ວັນທີ 5/8, ມີ 7 ຄົນຖືກເສຍຊີວິດໃນເຫດການຍິງປືນໃສ່ໂບດນິກາຍ Sikh ຢູ່ລັດ Wisconsin ຂອງອາເມລິກາ. ບັນດາເຫດການດັ່ງກ່າວບໍ່ພຽງແຕ່ເກີດຄວາມຖົກຖຽງກັນກ່ຽວກັບກຳມະສິດປືນຂອງປະຊາຊົນເທົ່ານັ້ນ, ຫາກຍັງສະແດງໃຫ້ເຫັນວິກິດການຈິດຕະສາດທີ່ພວມເພີ່ມຂຶ້ນໃນໝູ່ຊາວຫນຸ່ມພາກສ່ວນຫນຶ່ງ ໃນສະພາບການທີ່ອາເມລິກາພວມເກີດການຜັນແປດ້ານການເມືອງ, ເສດຖະກິດ ແລະ ສັງຄົມ.

ເຫດການທີ 9. ການປ່ຽນແປງຂອງດິນຟ້າອາກາດໄດ້ກໍ່ໃຫ້ເກີດປະກົດການທຳມະຊາດທີ່ຮ້າຍແຮງ

10 ເຫດການທີ່ພົ້ນເດັ່ນຂອງໂລກໃນປີ 2012 - ảnh 9

ພະຍຸ Bopha ພັດເຂົ້າພາກໃຕ້ ຟິລິບປີນເຮັດໃຫ້ 1000 ຄົນເສຍຊີວິດ ແລະ ກວ່າ 800 ຄົນຖືກຫາຍສາບສູນ

ພະຍຸ Bopha ພັດເຂົ້າພາກໃຕ້ ຟິລິບປີນ ເມື່ອຕອນເຊົ້າວັນທີ 4/12 ເກີດຝົນຕົກຫນັກ ແລະ ລົມແຮງ, ເຮັດໃຫ້ 1000 ຄົນເສຍຊີວິດ ແລະ ກວ່າ 800 ຄົນຖືກຫາຍສາບສູນ, ກວ່າ 6 ລ້ານຄົນຢູ່ 30 ແຂວງຖືກຕົກຢູ່ໃນສະພາບບໍ່ມີໄຟຟ້າ, ນ້ຳສະອາດໃຊ້. ກອ່ນຫນ້ານັ້ນ ພະຍຸ Sandy ໄດ້ພັດເຂົ້າບັນດາປະເທດຢູ່ເກາະ Caribbean ແລະ ອາເມລິກາ ໄດ້ກໍ່ຄວາມເສຍຫາຍທາງດາ້ນຊີວິດອິນຊີ ແລະ ຊັບສິນຢ່າງຫນັກຫນ່ວງ. ຄວາມເສຍຫາຍຈາກພະຍຸລູກນີ້ແມ່ນຂຶ້ນເຖິງ 80 ຕື້ໂດລາສະຫະລັດ, ເຊິ່ງແມ່ນລະດັບສູງກວ່າພະຍຸ Katrina ກໍ່ຂຶ້ນເມື່ອປີ 2005. ກ່ອນທີ່ພັດເຂົ້າ ອາເມລິກາ, ພະຍຸ Sandy ພັດເຂົ້າບັນດາປະເທດຢູ່ ເກາະ Caribbean ເຮັດໃຫ້ຢ່າງຫນ້ອຍສຸດມີ 69 ຄົນເສຍຊີວິດ.

ເຫດການທີ 10. ວິທະຍາສາດໂລກບັນລຸບັນດາຜົນງານສຳຄັນ

10 ເຫດການທີ່ພົ້ນເດັ່ນຂອງໂລກໃນປີ 2012 - ảnh 10

ຍານອາວະກາດ ອາເມລິກາ ໄດ້ເຊື່ອມເຂົ້າດາວພະອັງຄານ ສຳເລັດຜົນ. ວັນທີ 6/8 ພາຍຫລັງການເດີນທາງແກ່ຍາວໃນເວລາ 8 ເດືອນ, ຍານອາວະກາດສຳຫລວດດາວພະອັງຄານທັນສະໄຫມທີ່ສຸດ ແລະ ໃຫຍ່ກວ່າໝູ່ນັບແຕ່ກ່ອນມາຮອດປະຈຸບັນ ທີ່ມີຊື່ວ່າ Curiosity ໄດ້ລົງຈອດຢູ່ດາວພະອັງຄານສຳເລັດຜົນ ແລະ ສົ່ງບັນດາຮູບພາບຜ່ານ camera ທີ່ຕິດຕັ້ງເທິງຍານອາວະກາດມາຍັງຫນ່ວຍໂລກ. Curiosity ມີພາລະກຳຊອກຫາບັນດາພາກສ່ວນພື້ນຖານທີ່ສາມາດຫນູນຊ່ວຍໃຫ້ແກ່ສິ່ງທີ່ມີຊີວິດ, ຄົ້ນຄ້ວາສິ່ງແວດລ້ອມຂອງດາວພະອັງຄານ, ກະກຽມໃຫ້ແກ່ເລື່ອງສົ່ງມະນຸດຂຶ້ນດາວພະອັງຄານໃນຊຸມປີຈະມາເຖິງ.