ນັບແຕ່ເມື່ອ FDI ເຂົ້າມາລົງທຶນຢູ່ຫວຽດນາມ ປີ 1988, ການລົງທຶນຈາກຕ່າງປະເທດ ໄດ້ສ້າງວິທີດຶງດູດການລົງທຶນໃໝ່, ປະກອບສ່ວນຊຸກຍູ້ການເຕີບໂຕເສດຖະກິດ, “ປຸກລຸກ” ແລະຍົກສູງປະສິດທິຜົນໃນການນໍາໃຊ້ບັນດາແຫຼ່ງກໍາລັງລົງທຶນພາຍໃນປະເທດ, ຊ່ວຍໂຄສະນາເຄື່ອງໝາຍການຄ້າແຫ່ງຊາດ, ຍົກສູງທີ່ຕັ້ງ ແລະ ກໍາລັງແຮງຂອງຫວຽດນາມໃນສະພາບການຫັນເປັນໂລກາພິວັດ ເທື່ອລະກ້າວ.

ບັນດາຕົວເລກທີ່ໜ້າປະທັບໃຈ

        ຕາມຂໍ້ມູນຂອງກົມລົງທຶນຈາກຕ່າງປະເທດ, ກະຊວງແຜນການ ແລະ ການລົງທຶນ ຫວຽດນາມແລ້ວ, ພາຍຫຼັງ 30 ປີແຫ່ງການ ດຶງດູດການລົງທຶນຈາກຕ່າງປະເທດ, ໄລ່ຮອດເດືອນພຶດສະພາ 2018, ທົ່ວປະເທດມີເກືອບ 26.000 ໂຄງການ ຍັງມີຜົນສັກສິດ ດ້ວຍຍອດທຶນຈົດທະບຽນ ຫຼາຍກວ່າ 320 ຕື້ USD. ປັດຈຸບັນ, ເຂດເຂດທີ່ມີການລົງທຶນໂດຍກົງຈາກຕ່າງປະເທດກວມເອົາປະມານ 25% ຍອດເງິນລົງທຶນທົ່ວສັງຄົມ, ກວມເອົາກວ່າ 70% ຍອດມູນຄ່າສົ່ງອອກສິນຄ້າຂອງທົ່ວປະເທດ.

(ພາບປະກອບ:TTXVN)

        ໄລ່ຮອດທ້າຍເດືອນ ມິຖຸນາ 2018, ຍອດເງິນລົງທຶນໂດຍກົງຈາກຕ່າງປະເທດ FDI ແມ່ນກວ່າ 20 ຕື້ USD, ເພີ່ມຂຶ້ນ 5% ເມື່ອທຽບໃສ່ໄລຍະດຽວກັນຂອງປີ 2017. ປັດຈຸບັນ ມີ 87 ປະເທດ ແລະ ເຂດແຄວ້ນ ມີໂຄງການລົງທຶນຢູ່ຫວຽດນາມ. ໝາກຜົນດັ່ງກ່າວ ເຊິ່ງນັກຊ່ຽວຊ່ານເສດຖະກິດຫຼາຍຄົນໃຫ້ຮູ້ວ່າ ແມ່ນຈຸດເດັ່ນ ເມື່ອທຽບໃສ່ຫຼາຍປະເທດໃນພາກພື້ນ. ດ້ວຍພື້ນຖານມີສະຖຽນລະພາບດ້ານການເມືອງ, ມີທີ່ຕັ້ງສະດວກໃນພາກພື້ນ ອາຊຽນ ທີ່ພວມພັດທະນາຢ່າງຂະຫຍັນຂັນເຄື່ອນ, ຫວຽດນາມ ຍາມໃດກໍໄດ້ຮັບການຕີລາຄາວ່າ ແມ່ນ ຈຸດນັດພົບທີ່ດູດດື່ມຂອງກະແສເງິນລົງທຶນຈາກຕ່າງປະເທດໃນໄລຍະຈະມາເຖິງ. ທ່ານ ຫງວຽນກົງອ໊າຍ, ຮອງຜູ້ອໍານວຍການໃຫຍ່ບໍລິສັດກວດສອບ ແລະ ລົງທຶນສາກົນ KPMG ແບ່ງປັນວ່າ:

        “ໃນໄລຍະປະມານ 01 ປີ ມານີ້, ພິເສດແມ່ນບັນດາຊຸມເດືອນຕົ້ນປີ 2018 ນັ້ນ ຢູ່ KPMG ຍັງບໍ່ທັນມີຍາມໃດທີ່ພວກຂ້າພະເຈົ້າ ຫຍຸ້ງວຽກງານຄືແບບນີ້, ນັ້ນແມ່ນການຕ້ອນຮັບບັນດານັກລົງທຶນຢາກເຂົ້າມາລົງທຶນຢູ່ຫວຽດນາມ. ດັ່ງນັ້ນ, ລະດັບຄວາມສົນໃຈຂອງບັນດານັກລົງທຶນຕ່າງປະເທດຢາກເຂົ້າມາລົງທຶນຢູ່ຫວຽດນາມ ໃນປັດຈຸບັນ ແມ່ນຫຼາຍທີ່ສຸດ, ພິເສດແມ່ນບັນດານັກລົງທຶນ ອາຊີເໜືອ”.

ດຶງດູດ FDI ດ້ວຍວິທີກ້າວເດີນໃໝ່ໃນສະພາບການໃໝ່

        ປະຈຸບັນ, ຄວາມສາມາດບົ່ມຊ້ອນແມ່ນແນວນັ້ນ ແຕ່ສະພາບການເສດຖະກິດໂລກ ພວມມີການປ່ຽນແປງຫຼາຍຢ່າງ. ນັ້ນແມ່ນສະພາບການອາລັກຂາດ້ານການຄ້າເພີ່ມຂຶ້ນ, ເຮັດໃຫ້ກະແສເງິນລົງທຶນຈາກຕ່າງປະເທດ ມີການຜັນແປຫຼາຍຢ່າງໃນໄລຍະຈະມາເຖິງ. ສາດສະດາຈານ ຫງວຽນໝ້າຍ, ປະທານສະຫະສະມາຄົມວິສາຫະກິດລົງທຶນຕ່າງປະເທດໃຫ້ຮູ້ວ່າ:

        “ປະເທດຊາດມີການປ່ຽນແປງ, ໂລກມີການປ່ຽນແປງ, FDI ທົ່ວໂລກມີການປ່ຽນແປງນັ້ນ ຮຽກຮ້ອງໃຫ້ພວກເຮົາຕ້ອງ ປ່ຽນແປງການກຳນົດທິດ ແລະ ນະໂຍບາຍດຶງດູດເງິນລົງທຶນຈາກຕ່າງປະເທດ. ການກຳນົດທິດໃໝ່ແມ່ນການເຕີບໂຕຂຽວ, ແມ່ນການເຕີບໂຕແບບຍືນຍົງ ແລະ ດຶງດູດການລົງທຶນຈາກຕ່າງປະເທດເຂົ້າບັນດາຂົງເຂດເຕັກໂນໂລຊີອະນາຄົດ,ພູມປັນຍາ … ປັດຈຸບັນ,  ບັນດາການກຳນົດທິດເຫຼົ່ານີ້ ບໍ່ພຽງແຕ່ມາຈາກບັນດາປະເທດທີ່ ພວມເຄື່ອນໄຫວຢູ່ ຫວຽດນາມ ເຫຼົ່ານັ້ນ ຫາກຍັງແມ່ນບັນດາປະເທດອຸດສາຫະກຳເຕັກໂນໂລຊີກ້າວໜ້າທີ່ສຸດໃນໂລກອີກດ້ວຍ. ຢາກເຮັດໄດ້ຄືແນວນັ້ນ, ພວກເຮົາຕ້ອງປ່ຽນແປງວິທີເຮັດ, ຈາກການສົ່ງເສີມການລົງທຶນ, ປະເມີນໂຄງການ, ປະຕິຮູບຮອບດ້ານກ່ຽວກັບການຄຸ້ມຄອງຂອງລັດ.”

        ໄລຍະຈະມາເຖິງ, ຄາດວ່າການຂັດແຍ້ງກັນໃນການດຶງດູດການລົງທຶນຈາກຕ່າງປະເທດ ຈະດຳເນີນໄປຢ່າງຂ້ຽວຂາດ. ຍ້ອນເຫດນັ້ນ, ຮຽກຮ້ອງໃຫ້ ຫວຽດນາມ ຕ້ອງມີການປະຕິຮູບຢ່າງແຮງໃນການຄຸ້ມຄອງລັດໃນຂົງເຂດດຶງດູດການລົງທຶນຈາກຕ່າງປະເທດ. ໄປຄຽງຄູ່ກັນນັ້ນ, ແມ່ນປະຕິບັດນະໂຍບາຍສະເໝີຕົ້ນສະເໝີປາຍຂອງລັດຖະບານ ຫວຽດນາມ ກ່ຽວກັບການດຶງດູດການລົງທຶນຈາກຕ່າງປະເທດໃນ 3 ທົດສະວັດຜ່ານມາເປັນຢ່າງດີ, ນັ້ນແມ່ນສ້າງ ລະບົບກົດໝາຍ, ນະໂຍບາຍກ່ຽວຂ້ອງຕາມທິດສະເໝີຕົ້ນສະເໝີປາຍໃຫ້ສໍາເລັດ, ມີຄວາມເປີດເຜີຍ, ໂປ່ງໃສ, ສ້າງຄວາມສະດວກສູງສຸດໃຫ້ແກ່ນັກລົງທຶນ, ຫວຽດນາມ ກໍ່ພວມມານະພະຍາຍາມປັບປຸງຂອດການປະຕິບັດກົດໝາຍ, ເພີ່ມທະວີການໂອ້ລົມສົນທະນາຢ່າງແທດຈິງ, ສຸມໃສ່ແກ້ໄຂຄວາມຫຍຸ້ງຍາກໃຫ້ແກ່ນັກລົງທຶນ. ທ່ານ ປອ ຫງວຽນມິງຟອງ, ນັກຊ່ຽວຊານເສດຖະກິດ ຢັ້ງຢືນວ່າ:

        “ພວມເຮົາພວມໄປຖືກທິດໃນທ່າອ່ຽງເຊື່ອມໂຍງ ແລະ ເຂົ້າຮ່ວມລະບົບທົ່ວໂລກ. ດ້ວຍສະພາບການນີ້, ເລື່ອງດຶງດູດ FDI ຕ້ອງແມ່ນວິສາຫະກິດມີເຄື່ອງໝາຍການຄ້າ, ມີບັນດາເງື່ອນໄຂ ແລະ ມີບັນດາຜະລິດຕະພັນເຊິ່ງມີມູນຄ່າເພີ່ມສູງ ກໍ່ຄືກຽມພ້ອມມອບສົ່ງ ໃຫ້ ຫວຽດນາມ ແລະ ພວກເຮົາກໍຕ້ອງມີຄວາມສາມາດຮັບເອົາ. ວຽກງານສົ່ງເສີມການລົງທຶນຕ້ອງເປັນມືອາຊີບກ່ວາ, ຕ້ອງມຸ່ງໄປເຖິງບັນດາສະຖານທີ່ເຊິ່ງແມ່ນຕົ້ນກຳເນີດຂອງເຕັກໂນໂລຊີ, ເຄື່ອງໝາຍການຄ້າ, ຕົ້ນກຳເນີດກ່ຽວກັບຜະລິດຕະພັນ ເພື່ອຈາກນັ້ນເສີມຂະຫຍາຍໃຫ້ດີກ່ວາ.”

        ຕ້ອງຫັນທິດໄປລົງທຶນເຂົ້າບັນດາຂົງເຂດເຕັກໂນໂລຊີສູງ, ມີການກຳນົດທິດ ແລະ ໃຫ້ບຸລິມະສິດບັນດາມາດຕະຖານຄື ການຜະລິດຂຽວ, ຮັບປະກັນສິ່ງແວດລ້ອມສະອາດ ແມ່ນທັດສະນະຂອງທ່ານ ໂດ໊ເຍີດຮ່ວາງ, ຫົວໜ້າກົມລົງທຶນຈາກຕ່າງປະເທດ, ກະຊວງແຜນການ ແລະ ການລົງທຶນ ຫວຽດນາມ:

        “ໃນສະພາບການໃໝ່ນັ້ນ, ພວກເຮົາຕ້ອງມີການດຶງດູດການລົງທຶນໂດຍມີການເລືອກເຟັ້ນ. ເມື່ອພວກເຮົາມີກົດໝາຍ, ມີຄວາມສະເໝີພາບລະຫວ່າງບັນດາພາກສ່ວນເສດຖະກິດ ແລະ ພວກເຮົາໄດ້ເຂົ້າຮ່ວມສັນຍາເສດຖະກິດ 2 ຝ່າຍ ແລະ ຫຼາຍຝ່າຍຫຼາຍສະບັບນ້ັນ, ຕ້ອງເຮັດແນວໃດເພື່ອດຶງດູດການລົງທຶນໂດຍມີການເລືອກເຟັ້ນ, ຕ້ອງມີຮົ້ວກີດຂວາງດ້ານເຕັກນິກ.”

        ສະຖຽນລະພາບດ້ານເສດຖະກິດ, ການເມືອງ, ການປະຕິຮູບສະພາບແວດລ້ອມແຫ່ງການລົງທຶນ, ດໍາເນີນທຸລະກິດ ຢ່າງຕໍ່ເນື່ອງ ແມ່ນທ່າໄດ້ປຽບ ອັນໃຫຍ່ຫຼວງຂອງ ຫວຽດນາມ ໃນການດຶງດູດເງິນລົງທຶນຈາກຕ່າງປະເທດ. ແຕ່ເຖິງຢ່າງໃດກໍ່ຕາມ, ໃນສະພາບການເສດຖະກິດໂລກຍັງຂາດສະຖຽນລະພາບຫຼາຍຢ່າງ, ທ່າອ່ຽງອາລັກຂາຍັງແຜ່ລາມອອກສູ່ວົງກວ້າງໃນໂລກ, ເພື່ອໃຫ້ແຫຼ່ງທຶນ FDI ສືບຕໍ່ມີການປະກອບສ່ວນຢ່າງ ຕັ້ງໜ້າໃຫ້ແກ່ການເຕີບໂຕເສດຖະກິດ, ຫວຽດນາມ ກໍ່ບໍ່ຢຸດຕິການສ້າງໂຄງປະກອບເສດຖະກິດຄືນໃໝ່, ປ່ຽນແປງໃໝ່ຮູບແບບການເຕີບໂຕ, ຍົກສູງຄຸນນະພາບ ແລະ ປະສິດທິຜົນຂອງກະແສເງິນລົງທຶນ FDI.