ພາບປະກອບ

   ໂລກລະບາດ Covid-19 ເກີດຂຶ້ນໃນຈຸດເວລາຕົ້ນປີ 2020 ແລະ ກໍ່ແມ່ນໂອກາດພັກຍາມບຸນເຕັດຂອງຊາວຈີນ ແລະ ບາງປະເທດອາຊີ ໄດ້ກໍ່ຜົນກະທົບອັນຫຍໍ້ທໍ້ ຕໍ່ພື້ນຖານເສດຖະກິດຂອງປະເທດຕ່າງໆ, ໂດຍສະເພາະແມ່ນຈີນ, ໃນຂົງເຂດສາທາລະນະສຸກ, ການທ່ອງທ່ຽວ, ຄົມມະນາຄົມຂົນສົ່ງ, ຂາຍຍ່ອຍ, ການສົ່ງອອກນຳເຂົ້າ, ບັນດາຂະແໜງຜະລິດຕາມລະບົບຕ່ອງໂສ້, ການບໍລິການການເງິນ…

ບັນດາຜົນກະທົບໂດຍທັນທີ

   ພາຍຫຼັງພຽງຄືນໜຶ່ງເທົ່ານັ້ນ, ຈີນ ໄດ້ປະກາດການຄິດໄລ່ສະຖິຕິແບບໃໝ່, ບັນດາຜູ້ຕິດເຊື້ອພະຍາດ ແລະ ຜູ້ເສຍຊີວິດໄດ້ເພີ່ມຂຶ້ນຢ່າງກະໂດດຂັ້ນ. ດັດຊະນີໃນຕະຫຼາດຫຼັກຊັບອາຊີ ແລະ ຖະໜົນ Wall ກໍ່ຖືກຕົກລາຄາ.

   ບັນດາກາຊີໂນຢູ່ ມາເກົ້າ ຕ້ອງອັດປະຕູ, ບັນດາບໍລິສັດການບິນໃນໂລກໄດ້ຍົກເລີກ 25.000 ຖ້ຽວບິນຈາກຈີນ ແລະ ໄປຈີນ ແລະ ທັງຖ້ຽວບິນພາຍໃນປະເທດນີ້. ກຸ່ມບໍລິສັດການບິນພົນລະເຮືອນຮົງກົງ Cathay Pacific ຕ້ອງໃຫ້ພະລາກອນ 27.000 ຄົນພັກການໂດຍບໍ່ໄດ້ຮັບເງິນເດືອນ. ບໍລິສັດລົດໂອໂຕ Hyundai ຢູ່ສ.ເກົາຫຼີໄດ້ປິດປະຕູໂຮງງານທຸກແຫ່ງ ໃນອາທິດໜຶ່ງໂດຍຊົ່ວຄາວ ຍ້ອນຂາດເຄື່ອງອາໄຫຼ່ຜະລິດຢູ່ຈີນ. ໃນຊຸມອາທິດຜ່ານມາ, ນະຄອນ ອູຫັ້ນ, ແຂວງຮູເປີຍ ປະເທດຈີນ ຊື່ງແມ່ນນະຄອນແຫ່ງການຜະລິດລົດໂອໂຕ ໄດ້ຢຸດຕິການເຄື່ອນໄຫວ, ບັນດາໂຮງງານຕ້ອງອັດປະຕູ. ຈາກກຸ່ມບໍລິສັດຜະລິດຍົນ Airbus ຂອງເອີລົບ ຕະຫຼອດຮອດບໍລິສັດລົດໄຟຟ້າ Tesla ຫຼືກຸ່ມບໍລິສັດ Apple ຂອງອາເມລິກາ ການຜະລິດກໍ່ລ້ວນແຕ່ຕ້ອງຫລຸດລະດັບລົງ. ຍ້ອນວ່າ, ຫຼາຍແຂວງນະຄອນຂອງຈີນ ໄດ້ຕັດສິນຈະແກ່ຍາວໄລຍະພັກຜ່ອນ ເພື່ອແນໃສ່ຮັບມືກັບໂລກລະບາດ.

ພາບປະກອບ

    ໃນຂະນະນັ້ນ, ຂະແໜງອຸດສາຫະກຳສະບຽງອາຫານ ກໍ່ຖືກຜົນສະທ້ອນ ຍ້ອນບັນດາເສັ້ນທາງຄົມມະນາຄົມລ້ວນແຕ່ຖືກຢຸດສະງັກ. ຢູ່ປະເທດຝະລັ່ງ, ຂະແໜງບໍລິການໂຮງແຮມເລີ່ມໄດ້ຮັບຜົນກະທົບຍ້ອນໂລກລະບາດ ຂະນະທີ່ 80% ຈຳນວນຫ້ອງພັກທີ່ຈ່ອງໄວ້ກ່ອນ ຖືກຍົກເລີກໃນເດືອນມັງກອນປີ 2020 ແລະ 100% ໃນເດືອນກຸມພາປີ 2020.

    Google, IKEA …..ລ້ວນແຕ່ໄດ້ປະກາດອັດປະຕູບັນດາສາຂາຢູ່ຈີນ. ສ່ວນອົງການບັນດາປະເທດສົ່ງອອກນ້ຳມັນ (OPEC)  ໄດ້ຈັດການປະຊຸມດ່ວນ ຍ້ອນຕະຫຼາດໃຫ່ຍກ່ວາໝູ່ແມ່ນຈີນ ຖືກຢຸດສະງັກໂດຍຊົ່ວຄາວ. ລັດເຊຍ, ມົງໂກນ, ເກົາຫຼີ ໄດ້ປິດປະຕູຊາຍແດນກັບຈີນ ໃນຂະນະທີ່ບັນດາປະເທດຕາເວັນຕົກ ຂຸ້ນຂ້ຽວເອົາພົນລະເມືອງຂອງຕົນ ກັບຄືນເມືອປະເທດ. ຫຼາຍປະເທດໄດ້ກ່າວເຕືອນພົນລະເມືອງຫລີກລ້ຽງການໄປຈີນ. ເປັນທີ່ຈະແຈ້ງແລ້ວວ່າ, ລະບົບຕ່ອງໂສ້ໂລກເກີດຄວາມສັບສົນ ຍ້ອນຜົນກະທົບຈາກໂລກລະບາດ Covid-19 ຈາກຈີນ.

ປະເທດຕ່າງໆຍົກສູງຄວາມສາມາດປ້ອງກັນພື້ນຖານເສດຖະກິດດ້ວຍຕົນເອງ

  ແຕ່ເຖິງຢ່າງໃດກໍ່ຕາມ, ຕາມບັນດານັກຊ່ຽວຊານແລ້ວ, ບໍ່ທັນເຖິງເວລາທີ່ຈະມີການຕີລາຄາອັນຄົບຖ້ວນ ກ່ຽວກັບຜົນກະທົບຂອງໂລກລະບາດ Covid-19 ທີ່ມີຕໍ່ເສດຖະກິດໂລກ. ແຕ່ຕາມບາງການຄົ້ນຄ້ວາໃນເວລາມໍ່ໆມານີ້ ຂອງບັນດາອົງການຄື: Moody’s, BNP Paribas Cadif, International SOS, ຍ້ອນຈີນ ແມ່ນພື້ນຖານເສດຖະກິດໃຫ່ຍອັນດັບທີ 2 ໃນໂລກ, ຖັດຈາກອາເມລິກາ ກວມເອົາອັດຕາສ່ວນປະມານ 17% GDP  ທົ່ວໂລກ ແລະ ປະກອບສ່ວນປະມານ 33% ລະດັບເຕີບໂຕເສດຖະກິດທົ່ວໂລກນັ້ນ, ຄາດວ່າ, ໂລກລະບາດດັ່ງກ່າວ ອາດຈະເຮັດໃຫ້  GDP ທົ່ວໂລກຫລຸດລົງປະມານ 0.3-0.7% ໃນປີນີ້. Oxford Economics ຄາດຄະເນວ່າ: ອາເມລິກາ ຈະເສຍແຂກທ່ອງທ່ຽວຈີນ ໄປປະມານ 1 ລ້ານ 6 ແສນຄົນໃນປີນີ້.

   ແງ່ຫວັງການເຕີບໂຕຂອງເອີລົບ ອາດຈະຖືກຜົນກະທົບເຊັ່ນດຽວກັນ. ທະວີບເອີລົບ ນັບມື້ນັບກາຍເປັນຈຸດນັດພົບທີ່ດີສຳລັບແຂກທ່ອງທ່ຽວຈີນຫຼາຍຄົນ. ໃນຂະນະນັ້ນ, ວັນທີ 13 ກຸມພາ, ທ່ານ Kristalina Georgieva, ຜູ້ອຳນວຍການໃຫ່ຍກອງທຶນເງິນຕາສາກົນ (IMF) ໄດ້ຕີລາຄາວ່າ: ການເຕີບໂຕເສດຖະກິດທົ່ວໂລກ ຈະຖືກຜົນສະທ້ອນ “ເບົາບາງ” ຍ້ອນໂລກລະບາດອັກເສບປອດ COVID-19. ໃນຈຸດເວລານີ້, ຫຼາຍປະເທດ ໂດຍສະເພາະແມ່ນບັນດາປະເທດອາຊີ ພວມກະກຽມຮັບມື, ມີບັນດານະໂຍບາຍໜູນຊ່ວຍວິສາຫະກິດຢ່າງທັນການ, ຫລຸດຜ່ອນອັດຕາພາສີອາກອນ, ໜູນຊ່ວຍຂົງເຂດຮ້ານອາຫານ, ການທ່ອງທ່ຽວ, ຮັບປະກັນຄວາມເປັນລະບຽບຮຽບຮ້ອຍທາງສັງຄົມ, ເຮັດໃຫ້ຈິດໃຈປະຊາຊົນເປັນປົກກະຕິ, ພ້ອມແລ້ວທີ່ຈະຟື້ນຟູການຜະລິດດຳເນີນທຸລະກິດ ໃນຂະນະທີ່ໂລກລະບາດໄດ້ສິ້ນສຸດລົງ.