Petro Vietnam ສືບຕໍ່ຂຸດຄົ້ນຊັບພະຍາກອນທະເລ ອັນລ້ຳຄ່າເພື່ອສ້າງຄວາມຮັ່ງມີໃຫ້ແກ່ປະເທດຊາດ

Anh Huyen -

ວັນພຸດ ທີ 4 ມິຖຸນາ ຄ.ສ. 2014 | 13:56:44

ທ່ານເອກອັກຄະລັດຖະທູດຈີນປະຈຳອາເມລິກາ ໂທຍທຽນຂາຍ ເມື່ອ ບໍ່ດົນມານີ້ໄດ້ຕອບ ສຳພາດ ນັກຂ່າວຕ່າງປະເທດ, ຊຶ່ງໄດ້ແກ້ຄວາມແກ່ການ ກະທຳຕັ້ງຮ້ານເຈາະນ້ຳມັນໄຮຢາງ 981 ຢ່າງຜິດກົດໝາຍໃນເຂດເສດຖະກິດຈຳເພາະ ແລະ ໄຫຼ່ທະວີບຂອງຫວຽດນາມວ່າ ບໍລິເວນທະເລນີ້, ຈີນມີຮ້ານເຈາະນ້ຳມັນພຽງຮ້ານໜຶ່ງເທົ່ານັ້ນ, ໃນຂະນະທີ່ຫວຽດນາມມີຮ້ານເຈາະນ້ຳມັນກວ່າ 30 ຮ້ານ. ຈີນຍັງຖືວ່າ ບັນດາຮ້ານເຈາະນ້ຳມັນຂອງຫວຽດນາມເຄື່ອນໄຫວໃນບໍລິເວນທະເລທີ່ມີການຂັດແຍ້ງ. ຫວຽດນາມໄດ້ກ່າວປະຕິເສດຄຳເວົ້າທີ່ບໍ່ມີຂໍ້ອ້າງອີງນີ້ ເພາະໃນຕົວຈິງ, ຮ້ານເຈາະນ້ຳມັນໄຮຢາງ 981 ແມ່ນເຄື່ອນໄຫວໃນເຂດເສດຖະກິດຈຳເພາະ ແລະ ໄຫຼ່ທະວີບຂອງຫວຽດນາມຢ່າງແທ້ຈິງ. ຍິ່ງກວ່ານັ້ນ, ບັນດາການເຄື່ອນໄຫວສຳຫຼວດ, ຂຸດຄົ້ນນ້ຳມັນອາຍແກັສຂອງຫວຽດນາມໃນບໍລິເວນນີ້, ນັບແຕ່ກ່ອນເປັນຕົ້ນມາ ກໍລ້ວນແຕ່ປະຕິບັດຕາມກົດໝາຍສາກົນ.

ບັນດາການເຄື່ອນໄຫວສຳຫຼວດ, ຂຸດຄົ້ນນ້ຳມັນອາຍແກັສຂອງຫວຽດນາມ ບໍ່ພຽງແຕ່ໄດ້ຮັບການປະຕິບັດນັບແຕ່ 2-3 ທົດສະວັດມານີ້ຢູ່ໃນເຂດເສດຖະກິດຈຳເພາະ ແລະ ໄຫຼ່ທະວີບຂອງຫວຽດນາມເທົ່ານັ້ນ, ຫາກຍັງມີການເຂົ້າຮ່ວມຂອງຫຼາຍຄູ່ຮ່ວມມືຕ່າງປະເທດອີກດ້ວຍ.

ການເຄື່ອນໄຫວສຳຫຼວດ, ຂຸດຄົ້ນນ້ຳມັນອາຍແກັສໄດ້ຮັບການປະຕິບັດເປັນປົກກະຕິໃນຕະຫຼອດໄລຍະປະຫວັດສາດ.

ໃນຕົວຈິງ, ການເຄື່ອນໄຫວສຳຫຼວດ, ຂຸດຄົ້ນນ້ຳມັນອາຍແກັສຢູ່ໃນເຂດໄຫຼ່ທະວີບ ແລະ ເຂດນ່ານທະເລຂອງຫວຽດນາມ ແມ່ນໄດ້ຮັບການປະຕິບັດນັບແຕ່ກ່ອນຊຸມປີ 1975. ນັບແຕ່ປີ 1969-1970, ອຳນາດການປົກຄອງພາກໃຕ້ຫວຽດນາມໄດ້ດຳເນີນການສຳຫຼວດໃນເນື້ອທີ່ກວ່າ 12.000 ຕາລາງກິໂລແມດໃນເຂດໄຫຼ່ທະວີບ( ນັ້ນແມ່ນບໍລິເວນທະເລ ກິວລອງ, ນາມກົນເຊີນ, ມ້າລາຍ, ໂຖຈູ ແລະ ຕືຈິ້ງ-ວຸ້ງໄມໃນປະຈຸບັນ) ຕໍ່ຈາກນັ້ນ, ໃນ 2 ປີ 1973-1974, ອຳນາດການປົກຄອງພາກໃຕ້ຫວຽດນາມໄດ້ຮ່ວມມືກັບບໍລິສັດຂອງອາເມລິກາດຳເນີນການສຳຫຼວດບໍລິເວນທະເລພາກກາງ, ລວມທັງໝູ່ເກາະຮ່ວາງຊາຂອງຫວຽດນາມ( ທຽບເທົ່າກັບບັນດາແປງນ້ຳມັນອາຍແກັສ : 141, 142,143 ແລະ 144 ໃນປະຈຸບັນ)

ພາຍຫຼັງພາກໃຕ້ຫວຽດນາມໄດ້ຮັບການປົດປ່ອຍ, ປະເທດຊາດໄດ້ໂຮມເຂົ້າກັນເປັນເອກະພາບ, ການເຄື່ອນໄຫວສຳຫຼວດ, ຂຸດຄົ້ນນ້ຳມັນອາຍແກັສໄດ້ຮັບການຜັນຂະຫຍາຍຢ່າງແຂງແຮງໃນທົ່ວເຂດເສດຖະກິດຈຳເພາະ ແລະ ໄຫຼ່ທະວີບຂອງຫວຽດນາມ ຊຶ່ງລວມທັງບໍລິເວນໝູ່ເກາະຮ່ວາງຊາ ,ເຈືອງຊາ ຕືຈິ້ງ-ວຸ້ງໄມ.

ປະຕິບັດຕາມສົນທິສັນຍາ ສ.ປ.ຊ ກ່ຽວກັບກົດໝາຍທະເລ 1982.

ພາຍຫຼັງທີ່ສະພາແຫ່ງຊາດຫວຽດນາມໄດ້ໃຫ້ສັດຕະຍາບັນເຂົ້າຮ່ວມ ສົນທິ ສັນຍາ ສ.ປ.ຊ ກ່ຽວກັບກົດໝາຍທະເລ 1982(UNCLOS 1982) ເມື່ອປີ 1966, ໂດຍປະຕິບັດຕາມການຊີ້ນຳຂອງລັດຖະບານຫວຽດນາມ, ກຸ່ມບໍລິສັດ ນ້ຳມັນອາຍແກັສແຫ່ງຊາດຫວຽດນາມ(Petro Vietnam) ໄດ້ດັດປັບຂອບເຂດການເຄື່ອນໄຫວ, ປະຕິບັດຢ່າງຖືກຕ້ອງຕາມສົນທິສັນຍາ ສ.ປ.ຊ ກ່ຽວກັບກົດໝາຍທະເລ 1982. ທ່ານໂດ້ວັນເຫົ້າ ຜູ້ອຳນວຍການໃຫຍ່ ກຸ່ມບໍລິສັດ ນ້ຳມັນອາຍແກັສແຫ່ງຊາດຫວຽດນາມ ຢືນຢັນວ່າ :

“ ບັນດາການເຄື່ອນໄຫວຂອງກຸ່ມບໍລິສັດນ້ຳມັນອາຍແກັສແຫ່ງຊາດຫວຽດນາມ ແລະ ບັນດານັກປະມູນທີ່ກ່ຽວຂ້ອງພຽງແຕ່ດຳເນີນການເຄື່ອນໄຫວໃນບໍລິເວນເຂດເສດຖະກິດຈຳເພາະ ແລະ ໄຫຼ່ທະວີບຂອງຫວຽດນາມດ້ວຍກຳນົດ 200 ໄມທະເລ. ແລະ ປະຈຸບັນ, ກຸ່ມບໍລິສັດ ນ້ຳມັນອາຍແກັສແຫ່ງຊາດຫວຽດນາມໄດ້ ແລະ ພວມຮ່ວມມືກັບບໍລິສັດນ້ຳມັນອາຍແກັສຫຼາຍແຫ່ງຂອງສາກົນ, ໃນນັ້ນ, ໄດ້ເຊັນສັນຍາສຳຫຼວດນ້ຳມັນ 99 ສະບັບກັບບັນດາຄູ່ຮ່ວມມືຕ່າງປະເທດ ແລະ ປະຈຸບັນມີສັນຍາ 60 ສະບັບພວມມີຜົນບັງຄັບໃຊ້ ”

ສືບຕໍ່ຜັນຂະຫຍາຍການສຳຫຼວດ, ຂຸດຄົ້ນ ແລະ ຮ່ວມມືດ້ານນ້ຳມັນອາຍແກັສ.

ແລະ ກໍຕາມທ່ານໂດ້ວັນເຫົ້າ ຜູ້ອຳນວຍການໃຫຍ່ ກຸ່ມບໍລິສັດ ນ້ຳມັນອາຍແກັສແຫ່ງຊາດຫວຽດນາມແລ້ວ, ຢູ່ອ້ອມແອ້ມບໍລິເວນທີ່ຈີນຕັ້ງຮ້ານເຈາະນ້ຳມັນໄຮຢາງ 981 ຢ່າງຜິດກົດໝາຍໃນກວ່າ 1 ເດືອນທີ່ຜ່ານມານັ້ນ, ທຸກໆການເຄື່ອນໄຫວສຳຫຼວດ, ຂຸດຄົ້ນນ້ຳມັນອາຍແກັສຂອງກຸ່ມບໍລິສັດ ນ້ຳມັນອາຍແກັສແຫ່ງຊາດຫວຽດນາມ ກໍລ້ວນແຕ່ເຄື່ອນໄຫວເປັນປົກກະຕິ. ທ່ານໂດ້ວັນເຫົ້າ ກ່າວວ່າ :

“ ທັງໝົດການເຄືອ່ນໄຫວສຳຫຼວດ, ຂຸດຄົ້ນນ້ຳມັນອາຍແກັສຢູ່ບໍລິເວນທາງກ້ຳຕາເວັນອອກສ່ຽງເໜືອ, ທາງກ້ຳຕາເວັນຕົກສ່ຽງເໜືອຂອງໝູ່ເກາະຮ່ວາງຊາແມ່ນພວມ ເຄື່ອນໄຫວເປັນປົກກະຕິ. ຢູ່ບໍລິເວນທະເລພາກກາງຫວຽດນາມ, ບໍລິສັດໃຫຍ່ນ້ຳມັນອາຍແກັສໄຮຢາງ (CNOOC) ຂອງຈີນໄດ້ດຳເນີນຮຽກຮ້ອງການເຂົ້າຮ່ວມປະມູນຢ່າງຜິດກົດໝາຍຢູ່ 9 ແປງ. ແຕ່ທາງຝ່າຍຫວຽດນາມຍັງຄົງສືບຕໍ່ຂຸດຄົ້ນ ແລະ ມາຮອດປະຈຸບັນ, ບໍ່ມີບໍລິສັດ ນ້ຳມັນອາຍແກັສສາກົນແຫ່ງໃດ, ຊ້ຳບໍໜຳ ກໍບໍ່ມີບໍລິສັດ ນ້ຳມັນອາຍແກັສແຫ່ງໃດຂອງຈີນເຊັນສັນຍາກັບ CNOOC ເພື່ອເຄື່ອນໄຫວໃນບໍລິເວນນີ້. ສ່ວນກຸ່ມບໍລິສັດ ນ້ຳມັນອາຍແກັສແຫ່ງຊາດຫວຽດນາມ ຮ່ວມມືກັບຫຼາຍບໍລິສັດນ້ຳມັນອາຍແກັສສາກົນ, ໃນນັ້ນ, ມີບັນດາບໍລິສັດຂອງ ອາເມລິກາ, ລັດເຊຍ, ການາດາ.....

ເປັນອັນວ່າ, ບັນດາການເຄືອ່ນໄຫວສຳຫຼວດ, ຂຸດຄົ້ນນ້ຳມັນອາຍແກັສຂອງຫວຽດນາມ ແລະ ບັນດາຄູ່ຮ່ວມມືຕ່າງປະເທດ ແມ່ນພວມຜັນຂະຫຍາຍເປັນປົກກະຕິ, ບໍ່ມີສິ່ງກີດຂວາງໃດໆ. ຖ້ອຍທຳນອງຂອງຈີນທີ່ວ່າ : “ຈີນມີຮ້ານເຈາະນ້ຳມັນພຽງຮ້ານໜຶ່ງເທົ່ານັ້ນ, ໃນຂະນະທີ່ຫວຽດນາມມີຮ້ານເຈາະນ້ຳມັນກ ວ່າ 30 ຮ້ານ ” ແລະ ຖືວ່າ “ບັນດາແປງນ້ຳມັນອາຍແກັສທີ່ຫວຽດນາມພວມຂຸດຄົ້ນແມ່ນນອນໃນບໍລິເວນທະເລເກີດການຂັດແຍ້ງ” ແມ່ນຄວາມຜິດພາດຢ່າງສິ້ນເຊິ່ງ. ຈີນບໍ່ສາມາດຍົກອອກພື້ນຖານ ດ້ານກົດໝາຍໃດໆເພື່ອແກ້ຄວາມ ໃຫ້ແກ່ທັດສະນະນີ້. ໃນຕົວຈິງ, ຫວຽດນາມບໍ່ມີແປງນ້ຳມັນອາຍແກັສໃດໆນອນເກີນບໍລິເວນເຂດເສດຖະກິດຈຳເພາະ ແລະ ໄຫຼ່ທະວີບຂອງຫວຽດນາມດ້ວຍກຳນົດ 200 ໄມທະເລ. ສັນຍາສຳຫຼວດ, ຂຸດຄົ້ນນ້ຳມັນອາຍແກັສທັງໝົດລ້ວນແຕ່ໄດ້ຮັບການປະຕິບັດໂດຍ ກຸ່ມບໍລິສັດນ້ຳມັນອາຍແກັສແຫ່ງຊາດຫວຽດນາມ ແລະ ບັນດານັກປະມູນສາກົນ ແລະ ລ້ວນແຕ່ໄດ້ຮັບການຮັບຮອງຈາກສາກົນ.

ມີສິ່ງໜຶ່ງໄດ້ຮັບຖືວ່າ ແມ່ນການສະໜັບສະໜູນຢ່າງແຂງແຮງທີ່ມີຕໍ່ຫວຽດນາມນັ້ນ, ແມ່ນເມື່ອວັນທີ 3/6 ສຳນັກຂ່າວສານ Mint ຢູ່ອິນເດຍໃຫ້ຂ່າວວ່າ ບໍລິສັດ ນ້ຳມັນອາຍແກັສແຫ່ງຊາດອິນເດຍ Videsh (OVL) ຂຶ້ນກັບກຸ່ມບໍລິສັດ ນ້ຳມັນອາຍແກັສອິນເດຍ ຢືນຢັນວ່າ ຈະສືບຕໍ່ປະກົດຕົວໃນບໍລິເວນນີ້. ແລະ ເມື່ອບໍ່ດົນມານີ້, ໃນການມາຢ້ຽມຢາມຫວຽດນາມເມື່ອເດືອນ 4/2014, ທ່່ານລັດຖະມົນຕີການຕ່າງປະເທດລັດເຊຍ Lavrov ໄດ້ເນັ້ນໜັກວ່າ ຈຸດສຸມໃນການຮ່ວມມືລະຫວ່າງຫວຽດນາມ ແລະ ລັດເຊຍແມ່ນນ້ຳມັນອາຍແກັສ. ທ່ານກ່າວວ່າ :

“ ບັນດາກຸ່ມບໍລິສັດ ແລະ ບໍລິສັດຂອງ 2 ປະເທດພວມປຶກສາຫາລື, ພິຈາລະນາກໍລະນີເປີດກ້ວາງການຮ່ວມມືໃນຂົງເຂດນ້ຳມັນອາຍແກັສ, ແນໃສ່ປະຕິບັດຕາມການຊີ້ນຳຂອງການນຳຂັ້ນສູງຂອງ 2 ປະເທດ. ການຫັນການຮ່ວມມືໃນຂົງເຂດນ້ຳມັນອາຍແກັສຫວຽດນາມ-ລັດເຊຍເປັນຫຼາຍຮູບຫຼາຍແບບ ຈະປະກອບສ່ວນສຳຄັນເຂົ້າໃນການຊຸກຍູ້ການພົວພັນດ້ານການຄ້າ 2 ຝ່າຍ”

ມີຄວາມໝັ້ນໃຈບົນບໍລິເວນທະເລທີ່ຂຶ້ນກັບອະທິປະໄຕຂອງຕົນ.

ໂດຍປະຕິບັດບັນດາການເຄື່ອນໄຫວຢ່າງຖືກຕ້ອງຕາມກົດໝາຍໃນບໍລິເວນທະເລທີ່ຂຶ້ນກັບອະທິປະໄຕຂອງຕົນ, ປະຕິບັດຕາມບັນດາສົນທິສັນຍາສາກົນ, ກຸ່ມບໍລິສັດ ນ້ຳມັນອາຍແກັສແຫ່ງຊາດຫວຽດນາມ ພວມສືບຕໍ່ຂຸດຄົ້ນຊັບພະຍາກອນທະເລ, ປະກອບສ່ວນພັດທະນາເສດຖະກິດຂອງປະເທດຊາດ. ແຕ່ລະວັນ, ໃນການເດີນເຮືອປະຕິບັດວຽກງານສຳຫຼວດ, ຂຸດຄົ້ນນ້ຳມັນອາຍແກັສຢູ່ຕາມຮ້ານເຈາະນ້ຳມັນຕ່າງໆນັ້ນ, ກຸ່ມບໍລິສັດນ້ຳມັນອາຍແກັສແຫ່ງຊາດຫວຽດນາມຍັງຄົງຢືນຢູ່ຢ່າງໝັ້ນຄົງເພື່ອປະຕິບັດໜ້າທີ່ສຳຫຼວດ, ຊອກຫາ, ຂຸດຄົ້ນຊັບພະຍາກອນທະເລອັນລ້ຳຄ່າ ເພື່ອສ້າງຄວາມຮັ່ງມີໃຫ້ແກ່ປະເທດຊາດ .

Anh Huyen