ທ່ານປະທານາທິບໍດີ ລັດເຊຍ Vladimir Putin (ເບື້ອງຊ້າຍ) ແລະ ທ່ານປະທານາທິບໍດີ ຢູແກຼນ Zelensky  (ພາບ: AP)

ໃນຖະແຫຼງການອອກວັນທີ 8 ມັງກອນ, ກອງທັບ ລັດເຊຍ ໃຫ້ຮູ້ວ່າ ໄດ້ດຳເນີນການຍິງລູກສອນໄຟດັກໂຈມຕີນະຄອນ Kramatorsk ຢູ່ ຢູແກຼນ ຢ່າງທັນທີ ພາຍຫຼັງທີ່ຄຳສັ່ງຢຸດຍິງແບບລຳພັງຝ່າຍດຽວ ໂດຍ ລັດເຊຍ ປະຕິບັດ ຢູ່ ຢູແກຼນ ໝົດຜົນສັກສິດໃນຕອນເຊົ້າຂອງວັນດຽວກັນ. ມົດສະກູ ຢັ້ງຢືນວ່າ ການດັກໂຈມຕີດັ່ງກ່າວ ໄດ້ເຮັດໃຫ້ ນາຍທະຫານ ຢູແກຼນ 600 ຄົນເສຍຊີວິດ. ຕາມບັນດານັກໄຈ້ແຍກສາກົນແລ້ວ, ເຖິງວ່າ ຖືກຝ່າຍ ຢູແກຼນ ປະຕິເສດ ແຕ່ຂໍ້ມູນກ່ຽວກັບການຍິງລູກສອນໄຟຂອງ ລັດເຊຍ ຍັງໄດ້ຮັບຖືວ່າ ແມ່ນສັນຍານສະແດງໃຫ້ເຫັນການປະທະກັນຢູ່ສະໜາມຮົບ ຢູແກຼນ ບໍ່ສາມາດສິ້ນສຸດໄດ້ໃນໄວໆນີ້.

ສະພາບທີ່ສັບສົນຢູ່ສະໜາມຮົບ

        ຫວ່າງມໍ່ໆມານີ້, ມົດສະກູ ໄດ້ມີການດັດປັບຍຸດທະວິທີຢ່າງລຽນຕິດໃນສະໜາມຮົບຕາມທິດສຸມໃສ່ຮັດແຄບເຂດຄວບຄຸມ ແລະ ເພີ່ມທະວີການບຸກໂຈມຕີດ້ວຍລູກສອນໄຟ, ເຮືອບິນບໍ່ມີຄົນຂັບ UAV... ເລັງໃສ່ເຂດດິນແດນ ຢູແກຼນ. ການປະທະກັນລະຫວ່າງສອງຝ່າຍ ໄດ້ດຳເນີນໃນທຸກມື້ຢູ່ຫຼາຍສະໜາມຮົບ, ໃນນັ້ນ ກຳລັງ ຢູແກຼນ ໄດ້ຮັບການຊ່ວຍເຫຼືອອາວຸດໃໝ່ຢ່າງລຽນຕິດ, ດ້ວຍອາວຸດລຸ້ນໃໝ່ທັນສະໄໝເປັນຈຳນວນຫຼາຍ.

         ວົງການນັກສືບ ອາເມລິກາ ຄາດຄະເນວ່າ ກຳລັງ ລັດເຊຍ ແລະ ຢູແກຼນ ແຕ່ລະຝ່າຍມີຜູ້ເສຍຊີວິດ ແລະ ບາດເຈັບ ປະມານ 100.000 ຄົນ. ເຖິງວ່າ ທັງ ມົດສະກູ ແລະ Kiev ລ້ວນແຕ່ຍົກອອກຕົວເລກສະຖິຕິກ່ຽວກັບຈຳນວນຜູ້ເສຍຊີວິດ ແລະ ຮັບບາດເຈັບທີ່ຕ່ຳກວ່າຫຼາຍ, ແຕ່ວົງການນັກສັງເກດການຖືວ່າ ດ້ວຍການປະທະກັນໃນຕົວເມືອງ ແລະ ກຳລັງທະຫານປືນໃຫຍ່ ໄດ້ຜັນຂະຫຍາຍຢ່າງສຸດຂີດ, ຈຳນວນຜູ້ຖືກເສຍຊີວິດ ແລະ ບາດເຈັບຂອງທັງສອງຝ່າຍແມ່ນຫຼາຍທີ່ສຸດ.

        ສິ່ງທີ່ໜ້າວິຕົກກັງວົນແມ່ນ ບໍ່ຫົວຊາຕໍ່ການເສຍຫາຍຢ່າງໜັກໜ່ວງນັ້ນ, ການປະທະກັນຍັງບໍ່ທັນມີສັນຍານຈະຢຸດຕິໄດ້ໃນໄວໆນີ້. ຖະແຫຼງການໃນວັນທີ 8 ມັງກອນ, ທ່ານ Sergei Kiriyenko ຮອງຫົວໜ້າທີໜຶ່ງຫ້ອງວ່າການຂອງປະທານາທິບໍດີ ລັດເຊຍ Vladimir Putin ຊີ້ແຈ້ງວ່າ: “ບັນດາໜ້າທີ່ໂດຍປະທານາທິບໍດີ Vladimir Putin ວາງອອກໃຫ້ແກ່ບັ້ນຮົບການທະຫານພິເສດ ຈະສຳເລັດ. ແລະ ແນ່ນອນວ່າ ຈະຮັບໄຊຊະນະ.”

        ສ່ວນວົງການເຈົ້າໜ້າທີ່ ຢູແກຼນ ໄດ້ປະຕິເສດຄຳສັ່ງຢຸດຍິງ ໃນໂອກາດບຸນຄຼິດສະມາດ ໂດຍ ລັດເຊຍປະກາດ, ພ້ອມທັງຢັ້ງຢືນວ່າ ຈະສືບຕໍ່ເປີດກວ້າງການບຸກໂຈມຕີຕ່າງໆ ເພື່ອແນໃສ່ກຳລັງ ລັດເຊຍ ໃນທຸກແນວຮົບ. ວົງການນັກໄຈ້ແຍກສາກົນໄດ້ຕີລາຄາວ່າ ສະພາບການປະທະກັນຢູ່ ຢູແກຼນ ພວມສັບສົນທີ່ສຸດ, ແມ່ນສິ່ງທ້າທາຍໃຫຍ່ສໍາລັບບັນດາຄວາມມານະພະຍາຍາມຟື້ນຟູການເຈລະຈາສັນຕິພາບເຊິ່ງຫຼາຍປະເທດ ແລະ ປະຊາຄົມສາກົນພວມເດີນຕາມ.

        ໂດຍບໍ່ຫົວຊາຕໍ່ສະພາບການຕົວຈິງທີ່ໜ້າວິຕົກກັງວົນນັ້ນ, ຫາງສຽງສາກົນເຊື່ອໝັ້ນວ່າ ໂອກາດເຈລະຈາລະຫວ່າງ ລັດເຊຍ, ຢູແກຼນ ພ້ອມດ້ວຍບັນດາຝ່າຍທີ່ກ່ຽວຂ້ອງ ແມ່ນຍັງມີຢູ່.

        ມີຫຼາຍພື້ນຖານສຳຄັນຕໍ່ຄວາມເຊື່ອໝັ້ນນີ້. ທີໜຶ່ງ, ເຖິງວ່າ ສົງຄາມໄດ້ດຳເນີນຢ່າງດຸເດືອດ, ແຕ່ລັດເຊຍ ແລະ ຢູແກຼນ ຍັງຮັກສາກົນໄກເຈລະຈາທີ່ຈຳເປັນ ເພື່ອປະຕິບັດສຳເລັດການແລກປ່ຽນສະເລີຍເສິກໃນໄລຍະຜ່ານມາ. ຫຼ້າສຸດແມ່ນການແລກປ່ຽນສະເລີຍເສິກໄດ້ປະກາດໃນວັນທີ 8 ມັງກອນ ດ້ວຍເລື່ອງ ແຕ່ລະຝ່າຍຈະໃຫ້ອິດສະຫຼະພາບແກ່ສະເລີຍເສິກ 50 ຄົນຂອງຝ່າຍກົງກັນຂ້າມ. ກ່ອນໜ້ານັ້ນ, ໃນຮອບເວລາ 1 ອາທິດສຸດທ້າຍຂອງເດືອນ ຕຸລາ, ຕົ້ນເດືອນພະຈິກ 2022, ສອງຝ່າຍກໍ່ໄດ້ດຳເນີນການແລກປ່ຽນສະເລີຍເສິກໃນຂອບຂະໜາດໃຫຍ່ ດ້ວຍການປ່ອຍສະເລີຍເສິກນັບຮ້ອຍຄົນ. ຕາມບັນດານັກໄຈ້ແຍກແລ້ວ, ບັນດາການເຈລະຈາແລກປ່ຽນນັກໂທດຄັ້ງຕ່າງໆທີ່ໄດ້ປະຕິບັດສຳເລັດນັ້ນ ໄດ້ກາຍເປັນພື້ນຖານເພື່ອໃຫ້ສອງຝ່າຍ ເປີດກວ້າງການເຈລະຈາໃນບັນຫາອື່ນໆ, ລວມທັງບັນຫາຢຸດຍິງ.

        ທີສອງແມ່ນ, ດ້ວຍການຖືກຜົນເສຍຫາຍນັບມື້ນັບຫຼາຍກ່ຽວກັບທາງດ້ານຊີວິດອິນຊີ ແລະ ເສດຖະກິດ, ລັດຖະບານສອງຝ່າຍ ຢືນຢູ່ຕໍ່ໜ້າຄວາມກົດດັນຢູ່ພາຍໃນປະເທດ ກ່ຽວກັບການຢຸດຕິສົງຄາມ. ສຳລັບລັດຖະບານຫຼາຍປະເທດຝ່າຍຕາເວັນຕົກ, ໂດຍສະເພາະແມ່ນເອີຣົບ ຖືກຜົນກະທົບຢ່າງໜັກໜ່ວງທີ່ສຸດຈາກການປະທະກັນ, ເລື່ອງຢຸດຕິສົງຄາມຢູ່ ຢູແກຼນ ໂດຍໄວ ກໍແມ່ນກຳລັງກົດດັນທີ່ໃຫຍ່ຫຼວງ ເມື່ອຄຳຮຽກຮ້ອງຂອງມະຫາຊົນບັນດາປະເທດນີ້ກ່ຽວກັບບັນຫາດັ່ງກ່າວນັບມື້ນັບເພີ່ມຂຶ້ນ.

        ເຖິງວ່າມີຄວາມຈຳເປັນ ແລະ ຮີບດ່ວນຄືແນວນັ້ນກໍຕາມ ແຕ່ເພື່ອບັນລຸໄດ້ຂໍ້ຕົກລົງຢຸດຕິການປະທະກັນລະຫວ່າງ ລັດເຊຍ - ຢູແກຼນ ແມ່ນເສັ້ນທາງທີ່ເຕັມໄປດ້ວຍຄວາມຫຍຸ້ງຍາກ, ສິ່ງທ້າທາຍ, ຮຽກຮ້ອງຕ້ອງມີຄວາມມານະພະຍາຍາມ ແລະ ເຈດຈຳນົງອັນແຮງກ້າຂອງ ບໍ່ວ່າ ທຸກຝ່າຍທີ່ມີສ່ວນກ່ຽວຂ້ອງໂດຍກົງເທົ່ານັ້ນ, ຫາກຍັງນັບທັງປະຊາຄົມສາກົນອີກດ້ວຍ./.