|
ທ່ານນາງ Katherine Muller – Marin ຫົວໜ້າຜູ້ຕາງໜ້າ
ຫ້ອງການອົງການ UNESCO ປະຈຳຮ່າໂນ້ຍ
|
ປະຈຸບັນຫວຽດນາມພວມຢູ່ໃນທ່ວງທ່າປ່ຽນແປງໃໝ່ ແລະ ພັດທະນາ. ໂດຍແມ່ນປະເທດທີ່ມີຄວາມສາມາດບົ່ມຊ້ອນຫຼາຍຢ່າງ, ເປັນເຂດດິນທີ່ມີຄວາມສະຫງົບສຸກດ້ວຍປະຊາຊົນຜູ້ທີ່ມີຄວາມສະໜິດສະໜົມ ແລະ ມີຈິດໃຈຮັກແພງແຂກ. ນັ້ນແມ່ນບັນດາຄວາມປະທັບໃຈກ່ຽວກັບຫວຽດນາມໃນຄວາມນຶກຄິດຂອງບັນດາເພື່ອນມິດຊາວຕ່າງປະເທດຊຶ່ງພວມດຳລົງຊີວິດ ແລະ ເຮັດວຽກຢູ່ຫວຽດນາມ.
ໃນຊຸມປີມໍ່ໆມານີ້, ຫວຽດນາມໄດ້ຮັບຖືວ່າ ແມ່ນໜຶ່ງໃນບັນດາຈຸດສະຫວ່າງສະໄຫວໃນພາກພື້ນ ດ້ວຍບັນດາຜົນງານທີ່ໜ້າປະທັບໃຈໃນທຸກດ້ານ. ເປັນໜ້າສົນໃຈແມ່ນການພົວພັນທາງການທູດລະຫວ່າງຫວຽດນາມກັບບັນດາປະເທດໃນໂລກພວມນັບມື້ນັບພັດທະນາຕາມແນວໂນ້ມທີ່ດີງາມ. ພ້ອມກັນນັ້ນ, ທີ່ຕັ້ງບົດບາດຂອງຫວຽດນາມໃນເວທີ່ສາກົນນັບມື້ນັບໄດ້ຮັບການຢັ້ງຢືນ. ທ່ານ Valeriu Arteni ອຸປະທູດຊົ່ວຄາວ ຣູມານີ ປະຈຳຫວຽດນາມ ໃຫ້ຮູ້ວ່າ :
“ ໃນການລົງທຶນໃໝ່ຂອງ ຣູມານີ, ບັນດາວິສາຫະກິດ ຣູມານີ ໄດ້ເອົາໃຈໃສ່ພັດທະນາການຮ່ວມມື, ພິເສດໃນຂົງເຂດຕ່າງໆຄື ນ້ຳມັນອາຍແກັດ, ການກັ່ນນ້ຳມັນ. ຣູມານີ ກໍພວມການກໍ່ສ້າງໂຮງງານ ກັ່ນນ້ຳມັນແຫ່ງທຳອິດຂອງຫວຽດນາມຢູ່ຢຸງກວດ. ຫວຽດນາມກໍໄດ້ກາຍເປັນຄູ່ຮ່ວມມືອັນດັບໜຶ່ງຂອງ ຣູມານີ ໃນກຸ່ມບັນດາປະເທດອາຊຽນ. ອາດຈະເວົ້າໄດ້ວ່າ ຢູ່ອາຊີ ການພົວພັນລະຫວ່າງຫວຽດນາມ - ຣູມານີ ແມ່ນການພົວພັນຍຸດທະສາດ, ລະຫວ່າງ 2 ປະເທດ ໄດ້ມີການເຈລະຈາຂັ້ນສູງໃນບັນດາຂົງເຂດດ້ວຍກອບກົດໝາຍພິເສດເມື່ອທຽບໃສ່ກັບການພົວພັນກັບປະເທດຕ່າງໆ. ພວກເຮົາໄດ້ມີສາຍພົວພັນມິດຕະ ພາບ ແລະ ການຮ່ວມມືທີ່ມີມາແຕ່ດົນນານ ແລະ ການພົວພັນປະຈຸບັນພວມມຸ່ງໄປສູ່ອະນາຄົດ ”
ປີ 2012 ແມ່ນປີທີ່ຫຍຸ້ງຍາກສຳລັບພື້ນຖານເສດຖະກິດໂລກ ແລະ ຫວຽດນາມກໍບໍ່ສາມາດຫຼີກລ້ຽງຈາກຜົນສະທ້ອນ. ແຕ່ແຫຼ່ງເງິນລົງທຶນໂດຍກົງ ຂອງຕ່າງປະເທດເຂົ້າຫວຽດນາມນັ້ນ ຍັງຄົງແມ່ນຕົວເລກທີ່ເປັນໜ້າຊື່ນຊົມດ້ວຍຈຳນວນ 13 ຕື້ USD ຍ້ອນຫວຽດນາມມີຫຼາຍປັດໄຈດຶງດູດບັນດານັກລົງທຶນຕ່າງປະເທດຄື ກຳລັງແຮງງານຫຼວງຫຼາຍ ແລະ ຂະຫຍັນຂັ່ນເຄື່ອນ. ຫວຽດນາມແມ່ນຕະຫຼາດຈຳໜ່າຍສິນຄ້າຢ່າງຫຼວງຫຼາຍໃນພາກພື້ນ ແລະ ພິເສດຫວຽດນາມມີທີ່ຕັ້ງຍຸດທະສາດ ແລະ ພື້ນຖານເສດຖະກິດພວມຄ່ອຍໆຫັນເປັນເສລີໃນພາຍພື້ນອາຊີຕາເວັນອອກສ່ຽງໃຕ້. ທ່ານ Tobiaslim ນັກທຸລະກິດ ສິງກະໂປ ໃຫ້ຮູ້ວ່າ :
“ ຂ້າພະເຈົ້າດຳເນີນທຸລະກິດໃນຂົງເຂດຮັບໃຊ້ການກິນດື່ມ, ດັ່ງນັ້ນ, ຢູ່ຫວຽດນາມ, ວຽກງານນີ້ກໍມີຄວາມສະດວກສະບາຍຫຼາຍຢ່າງ. ແຕ່ສິ່ງສຳຄັນ ແມ່ນຜະລິດຕະພັນຕ້ອງແທດເໝາະກັບຄວາມຮຽກຮ້ອງຕ້ອງການຂອງຜູ້ບໍລິໂພກ. ເມື່ອຂ້າພະເຈົ້າເລີ່ມຕົ້ນວຽກງານ ດຳເນີນທຸລະກິດ, ຂ້າພະເຈົ້າພຽງສຸມໃສ່ແຂກຕ່າງປະເທດ, ຊຶ່ງສວນຫຼາຍແມ່ນຊາວ ສ.ເກົາຫຼີ ”
ຕາມການສະຖີຕິຂອງກະຊວງແຮງງານ-ທະຫານເສຍອົງຄະ ແລະ ສັງຄົມຫວຽດນາມແລ້ວ, ປະຈຸບັນ ມີຊາວຕ່າງປະເທດປະມານ 78.000 ຄົນພວມດຳລົງຊີວິດ, ຮ່ຳຮຽນ ແລະ ເຮັດວຽກຢູ່ຫວຽດນາມ. ໃນນັ້ນ ມີຫຼາຍຄົນມາຫວຽດນາມ ກໍບໍ່ເພື່ອຄວາມຕ້ອງການຂອງວຽກງານ, ຫາກເລີ່ມມາຈາກຄວາມຮັກແພງຕໍ່ປະເທດຊາດ ແລະ ຊາວຫວຽດນາມ. ໂດຍໄດ້ເຄີຍໄປທ່ອງທ່ຽວ ແລະ ເຮັດວຽກຢູ່ ຫຼາຍປະເທດໃນໂລກ, ແຕ່ສຸດທ້າຍ ນາງ Brenda Meiklejohn ຊາວອົດສະຕາລີ ໄດ້ເລືອກເອົາປະເທດຫວຽດນາມແມ່ນແຫ່ງເພື່ອດຳລົງຊີວິດຍາວນານ. ນາງໄດ້ ດຳລົງຊີວິດ ແລະ ເຮັດວຽກຢູ່ຫວຽດນາມເປັນເວລາ 9 ປີແລ້ວ ແລະ ໃນໄລຍະເວລານີ້ ນາງໄດ້ມີອະນຸສອນຫຼາຍຢ່າງທີ່ໜ້າຈັບອົກຈັບໃຈ, ນາງໄດ້ຢູ່ຮ່ວມກັບຄອບຄົວຊາວຫວຽດນາມ, ໄດ້ເຂົ້າໃຈກ່ຽວກັບຈິດໃຈຖານເພື່ອນບ້ານໃກ້ຄຽງຂອງຊາວຫວຽດນາມ. ແລະ ກໍຍັງມີຫຼາຍສິ່ງຫຼາຍຢ່າງທີ່ລຽບງ່າຍທີ່ສຸດ ໄດ້ເຮັດໃຫ້ນາງເພີ່ມຄວາມຮັກແພງປະເທດຫວຽດນາມ. ນາງ Brenda Meiklejohn ເວົ້າວ່າ
“ ຂ້າພະເຈົ້າມັກໄປຕະຫຼາດຍາມເຊົ້າ. ບັນຍາກາດຢູ່ຫັ້ນຟົດຟື້ນ, ມີຄົນມາຊື້ຂາຍຢ່າງຄັບຄາໜາແໜ້ນ. ບັນດາຜູ້ຂາຍເຄື່ອງແມ່ນຜູ້ໃຈດີ. ບາງຄັ້ງ, ໄປຮອດຕະຫຼາດ, ພວກຊາວຂາຍຍັງແນະນຳໃຫ້ຂ້າພະເຈົ້າຮູ້ວ່າ ຄວນຊື້ຂອງກິນຊະນິດໃດເມືອກິນຈະແຊບ. ຂ້າພະເຈົ້າມັກໄປຕະຫຼາດຢູ່ນີ້, ຂອງກິນຊະນິດໃດກໍແມ່ນຂອງກິນສົດ ແລະ ແຊບ. ຢູ່ນີ້ແມ່ນແຕກຕ່າງກັບຢູ່ອົດສະຕາລີຢູ່ບ່ອນວ່າ ມີຜູ້ຂາຍຂອງກິນຢູ່ຕາມຖະໜົນ, ສວ່ນຢູ່ອົດສະຕາລີ, ພວກຂ້າພະເຈົ້າຕ້ອງໄປຮ້ານຊັບພະສິນຄ້າເພື່ອຊື້ຂອງກິນ ”
ພ້ອມກັບທ່ວງທ່າເຊື່ອມໂຍງເຂົ້າກັບສາກົນ, ພາບພົດປະເທດຫວຽດນາມພວມນັບມື້ນັບກາຍເປັນທີ່ຮູ້ຈັກກັນດີຂອງເພື່ອນມິດສາກົນ. ໃນຊຸມປີມໍ່ມານີ້, ຈຳນວນແຂກທ່ອງທ່ຽວຕ່າງປະເທດເຂົ້າມາຫວຽດນາມໄດ້ເພີ່ມຂຶ້ນຢ່າງຕໍ່ເນື່ອງ. ພຽງໃນເດືອນ 01/2013, ຈຳນວນແຂກສາກົນມາຫວຽດນາມບັນລຸ 65.000 ກ່ວາເທື່ອຄົນ, ເພີ່ມຂຶ້ນ 2,2% ເມື່ອທຽບໃສ່ໄລຍະດຽວກັນຂອງປີກາຍ. ປະຈຸບັນ, ຫວຽດນາມໄດ້ຮັບຖືວ່າ ແມ່ນຈຸດນັດພົບທີ່ດູດດື່ມສຳລັບແຂກທ່ອງທ່ຽວຕ່າງປະເທດ. ຕາມການຄາດຄະເນຂອງສະຫະສະມາຄົມທ່ອງທ່ຽວ ອາເມລິກາ (USTOA) , ຫວຽດນາມອາດຈະຢືນອັນດັບທີ່ 2 ໃນຈຳນວນບັນດາສະຖານທີ່ທ່ອງທ່ຽວທີ່ຫາກໍພົ້ນເດັ່ນ ທີ່ຮັບການເລືອກເຟັ້ນຈາກແຂກທ່ອງທ່ຽວໃນປີ 2013. ບັນດາທິວທັດທຳມະຊາດ, ມໍລະດົກວັດທະນະທຳໂລກຢູ່ຫວຽດນາມ ກໍແມ່ນໜຶ່ງໃນບັນດາເຫດຜົນ ດຶງດູດແຂກທ່ອງທ່ຽວຕ່າງປະເທດເຂົ້າມາຫວຽດນາມເພື່ອຊອກຄົ້ນຫາຄວາມລຶກລັບມະຫັດສະຈັນ. ທ່ານນາງ Katherine Muller – Marin ຫົວໜ້າຜູ້ຕາງໜ້າຫ້ອງການອົງການ UNESCO ປະຈຳຮ່າໂນ້ຍ ເປີດເຜີຍວ່າ:
“ ຂ້າພະເຈົ້າຊົມຊອບຫວຽດນາມທີ່ສຸດ. ຂ້າພະເຈົ້າໄດ້ໄປທ່ອງທ່ຽວຫຼາຍແຫ່ງຈາກພາກເໜືອຕະຫຼອດລົງຮອດພາກໃຕ້ ແລະ ໄດ້ຮັບປະທານອາຫານຫຼາຍເຍືອງຂອງຫວຽດນາມ, ອັນໄດ້ຊ່ວຍໃຫ້ ຂ້າພະເຈົ້າສາມາດເຂົ້າໃຈວ່າ ເປັນຫຍັງຢູ່ແຫ່ງຕ່າງໆພັດມີຄວາມແຕກຕ່າງກັນ, ວິທີປຸ່ງແຕ່ງອາຫານກໍແຕກຕ່າງກັນ, ມີລົດຊາດແຕກຕ່າງກັນ, ການນຸ່ງຖື, ນິດໄສໃຈຄໍກໍແຕກຕ່າງກັນ. ເປັນໜ້າຈັບໃຈເມື່ອເຫັນວ່າບັນດາພື້ນຖານວັດທະນະທຳທີ່ມີຫຼາຍຮູບຫຼາຍສີ ແລະ ແຕກຕ່າງກັນ ໄດ້ໂຮມເຂົ້າກັນເປັນປະເທດຊາດ ”
ປະເທດຫວຽດນາມພວມພັດທະນາໄປຕາມທິດຫັນເປັນອຸດສາຫະກຳ ແລະ ທັນສະໄໝເທື່ອລະກ້າວ ແລະ ພວມໝັ້ນໝາຍສ້າງອະນາຄົດທີ່ດີດ້ວຍຄວາມສາມາດບົ່ມຊ້ອນຫຼາຍຢ່າງ. ພ້ອມກັບບັນດາຈຸດວັດທະນະທຳພື້ນເມືອງ, ວິຖີຊີວິດແບບລຽບງາຍ, ສະໜິດສະໜົມຂອງຊາວຫວຽດນາມ ໄດ້ສ້າງເປັນກຳລັງດຶງດູດຂອງຫວຽດນາມໃນສາຍຕາຂອງເພື່ອນມິດສາກົນ.